1 "Tima agbaaka p'akasiya si ija-byi; ebe chẹ m'ede ntọkọ nna ọmaan akaana achadanẹ; agoriji pẹ m'ede ntọkọ nchenọmfa ọmaana akaana achadanẹ, ẹkpa chẹ m'ebir ede ntọkọ nchenọmfa ọmaana akaana achadanẹ. 2 M'asi obhik k'ibongọ kpenamkpen, ọfha abhik mbo ọmaana ija-byi njo efona k'ibyi majanẹ. M'atima opo abhọrọ ija-byi njo. 3 Màtima bronz asi ekpo pyẹ py'ẹttọhk-wọhna maphyir: ọzọhka f'ititọhng okpukpokọ, ọmaana sọvẹl, ọmaana agbobhmbọhk p'asi ochichakẹ, ọmaana agbindara p'atim asa, ọttara nzenga s'ekpo okkikkang. 4 Màtima bronz si ayok ọkkẹng, atima bronz asi aringẹ anna; obongọ kpenamkpen m'oyena oringẹ kwẹ. 5 M'ayika ọkkẹng nwo ny'izek-izek kw'ija-byi, ọfha oninga ny'ibhaang kw'ija-byi. 6 M'atima echi ch'akasiya asi nchi s'idum-odum s'ija-byi, abir atima bronz abhọrọ jẹ. 7 M'anọhma nchi njo s'idum-odum ny'aringẹ mbo, ọfha eninga ny'abem mbo afa p'ija-byi k'ogbe kw'mm'ad-atinẹ. 8 Tima agbaakakpa si ija-ibyi njo ide oje. Si jẹ mbengana k'ose kw'nkọhk-ọ z'egbe.

9 "Si eterttem ch'iruk-byi s'Ibinọkpaabyi. Ẹwọn-ẹwọna kwẹ m'ode ntọkọ arọbh achenọmfa obhirẹ ijobh, k'adum. Bira tima mmọradik ọkkọkka si ọbara f'ọmma, 10 ọmaana mfafachi ẹrọbh, ttara arin p'bronz ẹrọbh, ọttara mgbaka s'matim silva asi, ọttara mbarakpa s'im'igbana ny'mfafachi njo. 11 Ẹbhaakẹ ch'ebir-ebir m'ebira ede ntọkọ arọbh achenọmfa obhirẹ ijobh k'adum, eyena ọbara f'ọmma, ọmaana mfafachi ẹrọbh, ọttara arin p'bronz ẹrọbh, ọmaana mgbaka s'matim silva asi, ọttara mbarakpa s'im'igbana ny'mfafachi njo.

12 "Ẹbhaakẹ ch'eterttem ndo ch'ening z'ẹbhaakẹ ch'ewuchen ed-edimẹ, m'ede ntọkọ arọbh afa obhirẹ ichi k'ẹkpa, ebira eyena ọbara f'ọmma, ọmaana mfafachi ijobh, ọttara arin ijobh. 13 Z'ẹbhaakẹ ch'ewuchen ed-eyin, eterttem ndo m'ebira ede ntọkọ arọbh afa obhirẹ ichi k'ẹkpa. 14 Ọbara f'ọmma f'adum pabẹ m'ade ntọkọ ẹrọbh obhirẹ mfa ọmaana igboka, ọmaana mfafachi nttaan, ọttara arin attaan, m'oninga k'ẹbhaakẹ danẹ ch'ẹmmakwukden. 15 Ọbara f'ọmma f'adum pabẹ m'ade ntọkọ ẹrọbh obhirẹ mfa ọmaana igboka, ọmaana mfafachi nttaan, ọttara arin attaan ebir eninga z'ẹbhaakẹ ndoza.

16 "Nya ch'mm'azenga adim ny'eterttem ndo, gbana ibara s'ọmma s'adum pẹ made ntọkọ ẹrọbh obhirẹ ijobh. Omengkkanọng m'otima ndik s'ide blu, ọmaana s'ikorọ isiso, ọmaana s'ikorọ izizẹ, ọmaana mmoradik ọkkọkka, oyok sẹ. Mfafachi nna, ọttara arin anna pabẹ mabir aninga nya. 17 Mfafachi njo maphyir s'ikọbh eterttem ndo, m'itima mbarakpa, ọmaana mgbaka s'ide silva, ọttara arin p'ade bronz. 18 Adum p'eterttem ndo m'ade ntọkọ arọbh achenọmfa obhirẹ ijobh, ẹkpa chẹ ede ntọkọ arọbh attaan obhirẹ ichi. Agoriji p'ọbara f'amma pẹ p'matim mmoradik ọkkọkka ayok, m'ade ntọkọ nchenọmfa ọmaana igboka, ọttara arin p'ade bronz. 19 Ẹtọhmkpo maphyir py'matim asi iruk-byi s'Ibinọkpaabyi, ọttara abhuk pẹ maphyir, ọmaana abhuk p'eterttem ndo maphyir, mm'ade bronz.

20 "Ben anọng p'Israẹl machen-ọ ana ọkkọkka p'mamyan z'achiduk p'oliv p'mm'atima ayenẹ ekpon, ọfha atorongkkang ad-ayenẹ nya k'ogbe kpenamkpen. 21 Ny'ikkira s'etobha, ny'ititika-ititika kw'ibara s'ibubh Ẹkkọhbhọ ch'Echekẹ, nya wọ kw'Aarọn ọmaana ajinọngva pẹ mm'ad-ayenẹ atorongkkang ny'ititika s'Ọvaar Ibinọkpaabyi, tọma k'ẹsọhka maa, pyirẹ k'ekpebha. Ọsana nwa m'oninga ọmaana anọng p'Israẹl ọttara iva p'iva pabẹ p'ikwuna mm'ammaana.