1 "Ma wọ ode ọttọhk f'masi ch'im'anana bẹ ọbọhk, mfha masi ọtọhm anang-m mach'afọhn-nja: tọka ọbhaamnwa kw'ode odim, ọmaana arọkimaandim afa p'nna ekebh ayen. 2 Tọka abuma ọkkọkka p'wit, tima si brẹd kw'nna yist ake: brẹd wanẹ m'abanga amaana ana p'oliv. Brẹd ọdọk-ọdọk m'ode mach'ayokpa p'mabọhr ana p'oliv. 3 Yika ekpo mbyo k'ikariba, pira natim pyẹ, azenga eden madanẹ ọmaana ẹbhaam ndo, ọttara arọkimaandim mbo afa, achen-m. 4 Tima Aarọn ọttara ajinọngva pẹ kwu ny'ẹsọhmma ch'ikkira s'etobha, atima asi agbobhọ bẹ ifor. 5 Tọka eforakpo mbyo py'ede ọkpaar-mbọhk kw'opyirẹ ny'ndudungọ, ọmaana ọnọhma-baba kw'ẹphọd, ọmaana ẹphọd oyenẹ, ọttara ẹbarakpa ch'ittemmọma, afọra Aarọn. Tima odikpa kw'omengkkanọng ikk'oyoka, akpẹ-ẹ ẹphọd ny'ifor. 6 Nan-ẹ ibara s'eso odidabh ny'eso, adabh-ẹ ibara njo s'eso amaana ny'ivaarkpo s'iwur-owur. 7 Tọka ana p'mad-abyenga ọnọng k'eso, abyeng-ẹ ny'eso. 8 Tima ajinọngva pẹ kwu, fọra bẹ akpaar-mbọhk p'apyirẹ ny'ndudungọ, 9 abir akpa bẹ mbarakpa s'eso. Pira nakpa Aarọn ọmaana ajinọngva pẹ adikpa. Ẹja ofufọhnọ m'ede ọsana kwabẹ, ttattampe.

"Ny'eden ndo ch'im'atima anana Aarọn ọmaana ajinọngva pẹ ọbọhk k'eso.

10 "Tima ẹbhaam kwu ny'ititika s'ikkira s'etobha; Aarọn ọmaana ajinọngva pẹ m'anana ẹbhaam ndo mbọhk ny'eso 11 Yẹkẹ ẹbhaam ndo ẹdọngọ ny'ititika s'Ọvaar Ibinọkpaabyi, ny'ẹsọhmma ch'ikkira s'etobha. 12 Tima ẹnọhna chọ gberẹ izẹ s'ẹbhaam ndo ake ny'abhik p'ija-byi njo, abyenga njoza s'irikẹ ny'orin kw'ija-byi. 13 Arọbha iyaak maphyir s'ẹtaanga s'ẹbhaam ndo, ọmaana s'ibubh attemnang, ọmaana adọhrọ mbo afa, akwọmọ jẹ ny'ija-byi. 14 Okenaka, kwọmọ anang, ọmaana ẹkpakpa, ọttara abhọrọ p'ẹbhaam ndo z'mbọr-mbọr kw'ibhinga-byi. Dẹ dọ ede ẹnanga ch'egbobhọ epyibha.

15 "Tọka ọrọkimaandim wanẹ ny'ambo afa, Aarọn ọttara ajinọngva pẹ m'anan-ẹ mbọhk ny'eso. 16 Yẹk-ẹ ẹdọngọ, atọka izẹ njo akponọ akọbha ija-byi. 17 Jọhkọ ọrọkimaandim nwo ma sẹkẹ-sẹkẹ, agbobhọ ẹtaangakpo, ọmaana mmo sẹ, ayika attara eso chẹ, ọttara akwuma mboza. 18 Kwọmọ ọrọkimaandim nwo k'ibungọ ny'ija-byi. Nya wọ ode ẹnanga ch'ẹkwọmọ ch'Ọvaar Ibinọkpaabyi, ch'elebhẹ eruk, ebir ede ẹnanga ch'ọchattọhk f'Ọvaar Ibinọkpaabyi.

19 "Kọ m'atọka ọrọkimaandim nwoza, pira Aarọn ọmaana ajinọngva pẹ manan-ẹ mbọhk ny'eso. 20 Yẹk-ẹ ẹdọngọ, asi izẹ sẹ afoka Aarọn ọmaana ajinọngva pẹ ny'itọhng s'odimbọhk-kwabẹ, ọmaana ny'nnọhnadim s'adimbọhk pabẹ, ọttara ny'nnọhnadim sabẹ s'odimbọhkbho. Íkk'asa minna, chakẹ izẹ kọbha ija-byi. 21 Abir asi izẹ, ọmaana ana p'ẹbọhk-nana ny'ija-byi, achakẹ Aarọn ọmaana ẹnya chẹ. Abir achakẹ ajinọngva pẹ, ọttara nnya sabẹ. M'ofona nya, kẹ ọmaana ajinọngva pẹ, ọttara nnya sabẹ mawur.

22 "M'atọka iyaak s'ẹsara ch'ọrọkimaandim nwa, ọmaana s'ẹtaanga, ọmaana s'attemnang, ọmaana adọhrọ pẹ afa, ttara iyaak sabẹ, ọttara odimbọhk-taak kwẹ. Ma wọ ode ọrọkimaandim kw'ẹbọhk-nana. 23 Ny'abrẹd mbo p'nna yist ake p'aning ny'Ọvaar Ibinọkpaabyi k'ititika, rọbha brẹd kw'ode, ọmaana wanẹ kw'odin-odinẹ kw'make ana, ọttara wanẹ kw'obhek-obhekẹ. 24 Tọka ekpo mbya maphyir, ke Aarọn ọttara ajinọngva pẹ ny'mbọhk, mawokọ ny'ititika s'Ọvaar Ibinọkpaabyi mach'ẹnanga ch'ewokọ. 25 Pira atọka byẹ ny'abẹ k'mbọhk akwọmọ ny'ija-byi, ttara z'nnanga s'ẹkwọmọ s'im'ilebh Ọvaar Ibinọkpaabyi eruk, ibir ide ẹnanga ch'ọttọhk f'manang Ọvaar Ibinọkpaabyi. 26 K'ogbe kw'ikk'ẹba ch'ọrọkimaandim kw'matim anana Aarọn ọbọhk atọka, wokọ chẹ ny'ititika s'Ọvaar Ibinọkpaabyi mach'ẹnanga ch'ewokọ. Dẹ dọ im'ede okebh fọ.

27 "Tọka ẹba, ọmaana ọtaak kw'oyen Aarọn ọmaana ajinọngva pẹ ny'ẹrọkimaandim ndo ch'atim anana bẹ ọbọhk k'eso, akọm asok. Mbyo nya byọ ede ẹnanga ch'ewokọ ch'Ọvaar Ibinọkpaabyi. 28 Ma wọ ode okebh f'anọng p'Israẹl mm'ad-anang Aarọn ọmaana ajinọngva pẹ k'ogbe kpenamkpen. Vẹ vọ ode ọtabha kw'anọng p'Israẹl mmad-asi anang Ọvaar Ibinọkpaabyi mach'nnanga sabẹ s'ẹgbaka.

29 "Nnya s'Aarọn s'awuriji m'ide nnya s'iva p'iva. Jẹ s'ikwuna mm'afọra k'ogbe kw'mm'abyeng bẹ ana k'eso, ọmaana ch'mm'anana bẹ ọbọhk k'eso. 30 Ojinọngnwa nwo kw'im'ọtọka eninga ch'Aarọn mach'ọfọhn-nja kw'Ibinọkpaabyi, m'ọfọra ẹnya ndo k'iwu ichenọmfa otima osi ọtọhm ny'ikkira s'etobha s'ide Ibyi s'Awuriji.

31 "Tọka ọrọkimaandim nwo kw'ẹbọhk-nana, wọhn eten chẹ k'Ibyi s'Awuriji. 32 Aarọn ọmaana ajinọngva pẹ m'aninga ny'ikkiramma s'etobha achi eten ch'ẹrọkimaandim ndo, ọmaana brẹd nwo kw'oyik k'ikariba. 33 Bẹ mm'achi nnanga nja s'efohkọ ch'ẹbọhk-nana, ọmaana efor-da chabẹ. Okenaka, tte ọnọng ọdọk-ọdọk oning ochi, okurọ bẹ́, ezeng ọmaana awuriji. 34 Ó̱de eten kpenamkpen ch'ọrọkimaandim nwo kw'ẹbọhk-nana orikẹ maa, opyirẹ k'ekpebha, obir ode brẹd o, màkwọmọ pyẹ. Tte ọnọng oning ochi, okurọ bẹ́, ezeng ọmaana awuriji.

35 "Si ọttọhk kpenamkpen f'ikk'ọ mbena anang Aarọn ọttara ajinọngva pẹ, atima iwu ichenọmfa asi ẹbọhk-nana chabẹ. 36 K'ewu kpenamkpen, tima ọbhaamdim fọhnọ ẹja ch'efokọ ch'epyibha. Si efokọ tima do ija-byi njo, abir abyenga ana nya, ọfha izeng ọmaana awuriji. 37 Tima iwu ichenọmfa si efokọ ch'ija-byi, ọfha izeng ọmaana awuriji. M'ofona nya, ija-byi njo m'iwur iyọhng-ọyọhnga. Ọttọhk kpenamkpen f'ọtwẹ-ẹ, m'obir owur-owur.

38 "Ma wọ ode ẹnanga ch'mad-anang m'ija-byi k'ogbe k'ogbe, k'ewu kpenamkpen: arọkimaanva afa p'atim ade icho mawanẹ. 39 Tima mawanẹ fọhnọ ẹja k'ekpebha, atima nwoza afọhnọ ẹja k'ẹsọhka. 40 K'ogbe kw'm'atọka ocheden kw'ọrọkimaannwa nwo anang Ibinọkpaabyi, m'abir ayoma abuma p'wit k'ogbobhmbọhk, p'malọbhọ amaana ana p'oliv p'afu nkkang, ọttara atuk k'ẹkkang-gbomma, mach'ẹnanga ch'atuk. 41 Tima ọrọkimaannwa nwoza fọhnọ ẹja k'ẹsọhka, ttara ẹnanga ch'abuma ọmaana ch'atuk mach'iwura asi k'ekpebha. Eruk ọkkọkka ch'ẹnanga nda, m'elebh Ọvaar Ibinọkpaabyi ettem.

42 "Mm'ad-asi ẹnanga nda ch'ẹkwọmọ k'ogbe k'ogbe, ny'ikkiramma s'etobha, ny'Ọvaar Ibinọkpaabyi k'ititika epemaanitor. Nya wọ kw'kaam m'nkebh bọnga, mgbaak odik nnang bọnga. 43 Nya wọ kw'im'mbira nttema mmaana anọng p'Israẹl, ntima abarada paam nsi ibyi njo iwur.

44 "Minna kw'im'nsi ikkira s'etobha, ọmaana ija-byi iyena awuriji, mbira nsi Aarọn ọmaana ajinọngva pẹ mayena awuriji, mfha masi ọtọhm mach'afọhn-nja paam. 45 Nya kw'kaam m'nruk mmaana anọng p'Israẹl, mbira nde Ibinọkpaabyi kwabẹ. 46 Bẹ mm'azonga bẹ́, kaam wọ nde Ọvaar Ibinọkpaabyi, kw'ode Ibinọkpaabyi kwabẹ, kw'uwa otim bẹ eden mabina z'Ijip, ọfha nruk mmaana bẹ. Kaam wọ nde Ọvaar Ibinọkpaabyi kwabẹ.