1 "Nya o, wa itọhm maphyir s'iruk-byi s'Ibinọkpaabyi osisi, nining k'mbọhk s'Bẹzalẹl, ọmaana Oholiyab, ọttara omengkkanọng kpenamkpen kw'Ọvaar Ibinọkpaabyi ikk'emengkka ọttara ẹfa ọnanga bẹ́, mazonga ose k'mm'asi ọtọhm mvo ator k'ose kw'Ibinọkpaabyi ikk'bẹ obena."

2 Mosẹs o, oyerẹ Bẹzalẹl ọmaana Oholiyab, ọttara omengkkanọng kpenamkpen kw'Ọvaar Ibinọkpaabyi ikk'ẹ ẹfa ọnanga, kw'obir ofon-ẹ z'ettem bẹ́, okwu osi ọtọhm mvo. 3 Matọka ẹtọhmkpo mbyo maphyir py'anọng p'Israẹl nkk'ananga z'Mosẹs k'mbọhk bẹ́, matima asi ọtọhm f'iruk-byi s'Ibinọkpaabyi. K'ekpebha kpenamkpen, anọng p'Israẹl achina ororo anang ẹtọhmkpo py'efon bẹ z'nttem. 4 Ofona nya, amengkkanọng mbo maphyir p'mad-asi ọtọhm mvo f'iruk-byi s'Ibinọkpaabyi, mabina arik itọhm sabẹ, 5 makwu aben Mosẹs bẹ́, "Ẹtọhmkpo py'anọng nkk'ananga ma, kk'ẹsaabha ẹyọhnga ọtọhm f'Ọvaar Ibinọkpaabyi obenẹ bẹ́, mosi."

6 Minna kw'Mosẹs ọnang ẹfa, makpaanga awon ẹmọng z'ibhinga-byi maphyir bẹ́, "Tte ojinọng kpenamkpen, ozeng k'kwanọng, ọkpọka ẹnanga kpenamkpen oninang ch'echin k'iruk-byi s'Ibinọkpaabyi osisi." Nya o, wa makpọka anọng mbo bẹ́, maning ọdọk nnanga atim akwu, 7 okurọ bẹ́, ẹtọhmkpo py'nkk'ayena, kk'ẹsaabha ẹyọhnga itọhm maphyir s'mm'asi.

8 Amengkkanọng maphyir p'uwa aning ny'ikpakaana s'atọhmnọng, masi ọbara f'ọmma ijobh. Wa matim mmọradik ọkkọkka, ọmaana ndik s'ide blu, ọmaana s'ikorọ isiso, ọttara s'ikorọ izizẹ, mayok ọbara mvo f'ọmma. Omengkkanọng oyok acherubim nya. 9 Ọbara mvo f'ọmma maphyir ode mbengana. Adum pabẹ ade ntọkọ arọbh afa obhirẹ afa, ẹkpa chabẹ ede ntọkọ nchadanẹ 10 Wa makọma ọbara mvo ochen f'ọmma k'ẹkpa madanẹ, mabir asi mvoza ochen minna. 11 Masi adik-pe p'ade blu ny'ẹbaramma ch'ibara s'ọmma s'ikpa nso k'ẹkpa danẹ, mabir asi minna z'ibara s'ọmma s'ikpa nso z'ẹkpa ndoza. 12 Mabir asi adik-pe arọbh afa okwuma ijobh k'ibara majanẹ, ọmaana adik-pe arọbh afa okwuma ijobh z'ikpongannam-bara s'ẹkpa ndoza. Adik-pe mbo aninga akkerẹ ayok ititika. 13 Mabir atima gol asi mgbaka arọbh afa obhirẹ ijobh, matima abọka mkpa njo mfa s'ọbara f'ọmma k'ibyi majanẹ, ọfha iruk-byi s'Ibinọkpaabyi ide ibyi majanẹ.

14 Matima avu-phyabha asi ọbara f'ọmma ijobh kawanẹ, mabubha z'ẹrọng-ẹrọng kw'iruk-byi s'Ibinọkpaabyi. 15 Wa ọbara mvo ijobh kawanẹ f'ọmma maphyir, ode mbengana. Adum pabẹ ade ntọkọ arọbh afa obhirẹ achen, ẹkpa chabẹ ede ntọkọ nchadanẹ. 16 Makọma ọbara mvo ochen f'ọmma k'ẹkpa madanẹ, mabir akọma mvoza ochadanẹ k'ẹkpa ọdọk-ọdọk. 17 Masi adik-pe arọbh afa obhirẹ ijobh ny'ammabọhra p'ibara s'ọmma s'ikpa nso k'ẹkpa danẹ, mabir asi minna z'ammabọhra p'ibara s'ọmma s'ikpa nso z'ẹkpa ndoza. 18 Matima bronz asi adik-pe arọbh afa obhirẹ ijobh, matima abọka ikkira njo k'ibyi majanẹ. 19 Matima ntenkpa s'arọkimaandim s'nkk'asi-kora afoka, mabubha ikkira njo, pira nnatim ntenkpa ọdọk-ọdọk s'ichọhr-ọchọhrọ mado abubha z'ẹrọng.

20 Matima echi ch'akasiya masi mmakwukchi s'iruk-byi s'Ibinọkpaabyi. 21 Adum p'ẹmmakwukchi kpenamkpen nya, ede ntọkọ ichi, ẹkpa ede ntọkọ mfa obhirẹ akaana attaan, 22 ọmaana aso afa pabẹ p'masokọ mbengana, mage akkerẹ ayok. Minna wọ kw'uwa masi mmakwukchi njo maphyir s'iruk-byi s'Ibinọkpaabyi. 23 Wa masi mmakwukchi ẹrọbh z'ẹwọn-ẹwọna kw'iruk-byi s'Ibinọkpaabyi, 24 mabir atima silva asi arin arọbh afa ny'izek-izek kwabẹ, arin afa k'ẹmmakwukchi, ọmaana orin mawanẹ k'izek-izek kw'ẹmmakwukchi kpenamkpen ch'ege-oge. 25 Z'ẹbhaakẹ ndoza ch'ebir-ebir kw'iruk-byi s'Ibinọkpaabyi, masi mmakwukchi ẹrọbh, 26 ọmaana arin arọbh afa p'matim silva asi, arin afa k'izek-izek kw'ẹmmakwukchi kpenamkpen. 27 Mabir asi mmakwukchi ichadanẹ z'nnam-nnam kw'iruk-byi s'Ibinọkpaabyi, kw'ode ẹbhaakẹ ch'ewuchen ed-edimẹ, 28 ọmaana mmakwukchi mfa s'abongọ p'nnam-nnam kw'iruk-byi s'Ibinọkpaabyi. 29 M'abongọ mba afa, mmakwukchi njo mfa s'ikkerẹ ayok, itọm z'ẹwọr maa, id-iyika aso k'oringẹ mawanẹ z'ẹrọng. 30 Nya o, wa mmakwukchi ide ochenọntaan, ọmaana arin ichi kkawanẹ p'matim silva asi, arin afa k'ẹmmakwukchi kpenamkpen.

31 Matima agbaaka p'akasiya masi nzemachi, matima agbaaka achen masi mmakwukchi s'ẹbhaakẹ danẹ ch'iruk-byi s'Ibinọkpaabyi, 32 nzemachi nchen ininga k'ẹbhaakẹ danẹ ch'mmakwukchi njoza, njoza nchen ininga z'ẹbhaakẹ ndoza ch'nzemachi s'nnam-nnam kw'iruk-byi s'Ibinọkpaabyi, z'ẹbhaakẹ ch'ewuchen ed-edimẹ. 33 Masi ezemachi ch'ettem, ọfha ẹtọhnga ọmaana nzemachi ny'njeka, k'okwubha k'okwubha. 34 Matima gol abhọrọ nzemachi njo, mabir atima gol asi aringẹ p'mm'atima abọka jẹ. Pira nnatim gol abhọrọ jẹ maphyir.

35 Matima ndik s'ide blu, ọmaana s'ikorọ isiso, ọmaana s'ikorọ izizẹ, ọttara mmọradik ọkkọkka, makwum ibara s'ọmma s'omengkkanọng ikk'acherubim oyoka nya. 36 Matima echi ch'akasiya masi mkpọmmachi nna s'ibara s'ọmma, matima gol abhọrọ jẹ. Mabir atima gol asi mgbaka sabẹ, pira nnatim silva arabha arin pabẹ anna. 37 Ny'ikkiramma njo, matima ndik s'ikorọ isiso, ọmaana s'ikorọ izizẹ, ọttara mmọradik ọkkọkka, makwum ibara s'ọmma s'omengkkanọng ikk'odoka. 38 Mabir asi mkpọmmachi nchen ttara mgbaka sabẹ. Matima gol abhọrọ aso p'mkpọmmachi njo ttara mbarakpa sabẹ, pira nnatim bronz asi arin nna pabẹ.