1 "Ma wọ ode apaanga p'm'anang anọng p'Israẹl.

2 "Ó̱de adebh obira kw'ofon Israẹl, kẹ m'osi ọtọhm ọmaan-ọ k'icho ichadanẹ. Ópyirẹ icho ichenọmfa, kọ m'attẹ-ẹ ọbọhk ọbhana, ọttọhk kpenamkpen mọnang. 3 Ó̱de obira nwo okwu kẹ-kẹ, ttẹ-ẹ ọbọhk ofona kẹ-kẹ. Okenaka, óde otim kwanọng kwẹ okwu, tte kwanọng nwo otor-ẹ mafona. 4 Ó̱de otte kw'osi ọtọhm ọmaana ọnang-ẹ kwanọng bẹ́, ọba, óde ọmaan-ẹ ajinọngva, wanẹma, panọngva, kwanọng nwo ọttara iva pẹ, mm'ade p'atte nwo kw'odebh obira nwo, ojinọng kẹ-kẹ wọ im'ọsa k'ebira.

5 "Okenaka, óde obira nwo oben bẹ́, ‘Atte kwaam, ọmaana kwanọng kwaam, ọttara iva paam madaak-m ọkpan, kinnorọ bẹ́, nsa k'ebira.’ 6 Ny'ogbese nwo, otte kwẹ m'otim-ẹ okebha akpaar-aponga za, obe ny'ọmma, wanẹma ny'ẹmmakwukchi, otima edum ọdwẹ-ẹ itọhng. Íkk'ọsa minna, kẹ m'ode obira kwẹ ttattampe.

7 "Ó̱de ọnọng okpe ominanwa kwẹ ọnang k'ebira, kẹ ominanwa nwo k'ebira mọ̀sa, k'ose kw'ode ọmaana ajinọngva. 8 Ó̱de éttem ina otte nwo elebhẹ ọmaana obirakwanọng nwo kw'odebhẹ, m'ọttẹ-ẹ ọbọhk mabhek-ẹ. Otte nwo ẹfa koyen ch'im'ọkpẹ-ẹ ọnang okikennọng okurọ ch'ikk'echekẹ ch'mayen ọvọhka. 9 Okenaka, óde odebh obirakwanọng nwo osok ojinọngnwa kwẹ bẹ́, ọba, kẹ otte nwo m'ọtọk-ẹ mach'nnwa kwẹ kw'obhon-obhon. 10 Ó̱de ọtọk kwanọng ọdọk-ọdọk, kẹ m'ochina ororo okkerẹ ocheden-kwanọng, ọnang-ẹ ọchattọhk ọmaana ẹfọrakpo, obir od-otor-ẹ eyima. 11 Ó̱de ina kẹ ekpo mbyoma ẹttaan ọnangẹ, kwanọng nwo m'ọsa k'ebira, okpuka motima obhek ifor sẹ.

12 "Ọnọng kpenamkpen kw'ottem oyok ọttọhk f'ochin k'obo, kẹ mm'abira afhẹ-ẹ. 13 Okenaka, óde ina odik nwo z'ettem ọkamẹ, pira oyin k'ose kw'Ibinọkpaabyi ophyikẹ, kẹ m'ọrọbh ochina z'ibyi s'im'nteka nnang-ẹ. 14 Okenaka, óde ọnọng ọbọk oyok ọfhọ k'ẹyaaka, mm'atima ọnọng nwo abina ny'ija-byi saam, màfhẹ-ẹ.

15 "Ọnọng kpenamkpen kw'obin otte ọttọhk, obir ode ọkka, mm'afhọ ọnọng nwo.

16 "Ọnọng kpenamkpen kw'offu oyokinọng, ode bẹ́, kk'ẹ ọkpa, obira ode bẹ́, otim oning-ẹ ny'mbọhk, mm'afhẹ-ẹ.

17 "Ọnọng kpenamkpen kw'ọnang otte ẹmma, obir ode ọkka, mm'afhẹ-ẹ.

18 "Ó̱de anọng asi ẹtta, pira oyok wanẹ ọtọhbh oyok ẹta, wanẹma, ottem-ẹ ẹbọhkduk, óde oyok ina ope, okenaka oyima ọkọhmaana, 19 óde obin, otima ochikwura kwẹ ozenga oyin k'iyaan, oyok kw'ottem oyok ọttọhk, k'irem kọbaan. M'okenaka otuk ọnang oyok k'ogbe kwẹ kw'okibhẹ, obir okkerẹ oyok maa, obina k'ọkọhmaana mvo.

20 "Ó̱de ọnọng otim echi ottema obira kwẹ kw'ejinọng, wanẹma, oyok kw'kwanọng maa, ọpẹ-ẹ ny'mbọhk, mm'anang ọnọng nwo irem. 21 Okenaka, óde ojek ewu madanẹ, wanẹma, iwu ifa, ọttọhk obira nwo kosi, m'kẹ irem mànang, ch'ode bẹ́, akpuka pẹ p'otim odebh obira nwo.

22 "Ó̱de anọng asi erima, mattema kwanọng kw'otim ibhọr ọttọhk, ibhọr njo iyin, okenaka, m'kẹ ọttọhk kamum, ọnọng nwo kw'ọjẹ odik nwo, m'otuk ọttọhk kpenamkpen f'odim kwẹ ọkpaar bẹ otuk, esobh ebira echera ẹmaan-ẹ. 23 Okenaka, óde mamum-ẹ ọttọhk fiden, mm'atima akpen atera akpen. 24 Ó̱de ọnọng odwu oyok ichen, mm'abira adwu kẹ ichen; ọ́rọbh-ẹ ẹsa, mm'abira arọbha kẹ ẹsa; ọ́kpaar-ẹ ọbọhk, mm'abira akpaara kẹ ọbọhk; ọ́phyak-ẹ obho, mm'abira aphyakẹ kẹ obho; 25 ọ́kwọm-ẹ ekpon, mm'abira akwọmọ kẹ ekpon; ómum-ẹ ọttọhk, mm'abira amuma kẹ ọttọhk; ọ́sẹ-ẹ oborọ, mm'abira asi kẹ oborọ.

26 "Ó̱de ọnọng ottem obira kwẹ ọttọhk k'ichen, okibh-ẹ ichen, zaabẹ́ obira nwo ode ojinọng, wanẹma, kwanọng, oyen-obira nwo m'otte obira nwo ọbọhk ọbhana k'ajaaka okurọ ichen njo. 27 Ó̱de oyen-obira ọrọbh obira kwẹ ẹsa, zaabẹ́ obira nwo ode ojinọng, wanẹma, kwanọng, oyen-obira nwo m'otte obira nwo ọbọhk ọbhana k'ajaaka okurọ ẹsa ndo.

28 "Ó̱de ọbhaamdim okwumọ ọnọng abhik maa ope, zaabẹ́ ọnọng nwo ode kwanọng, wanẹma, ojinọng, mm'atọhbh ọbhaamdim nwo ata maa ope. Ọnọng eten ch'ọbhaamdim nwo mòchi. Oyen-ọbhaamdim nwo k'otuka mòbir oninga. 29 Okenaka, óde ọbhaamdim nwo ọd-ọtọma za okwum anọng abhik, pira matek oyenẹ, oyenẹ nwo, kẹ kọbọk ọgbana. Ó̱de okwumọ ọnọng abhik, ọnọng nwo okwu ope, mm'atọhbh ọbhaamdim nwo ata maa, ope, m'abir afhọ oyen-ọbhaamdim nwo. 30 Okenaka, óde manang-ẹ otuka, kẹ m'ọnang ọttọhk kpenamkpen f'makpaar anang-ẹ, otima obhek eso chẹ. 31 Ọpaanga nwa obir ọbaabha ọbhaamdim kw'okwumọ ojinọngnwa, wanẹma, kwanọngnwa abhik. 32 Ó̱de ọbhaamdim okwumọ obira abhik, ode ojinọng, wanẹma, kwanọng, oyen-ọbhaamdim nwo m'otuk ashẹkẹl ẹrọbh okwuma ijobh p'silva ọnang otte kw'obira nwo. Mm'abira atọhbh ọbhaamdim nwo ata maa, ope.

33 "Ó̱de ọnọng owong epe otte eje, wanẹma, otum epe, kobubh, ọbhaamdim, wanẹma, ẹnyanya ekwu etto nya, 34 oyen-epe ndo m'otuk ọnang oyen-ẹbhaam ndo. Ọbhaambukọ nwo m'ode kw'oyen-epe.

35 "Ó̱de ọbhaamdim kw'ọnọng omum ẹbhaam ch'ọnọng ọdọk-ọdọk ọttọhk maa, epe. Nnam njo mfa m'ikpe ẹbhaam ndo ch'ening akpen, makebh akpuka mbo, pira makebh ọbhaambukọ nwo mbengana. 36 Okenaka, óde ọ́nọng okkikken ozonga bẹ́, minna kw'ẹbhaam ndo ed-ekwum ayok abhik, oyenẹ okkerẹ nya ẹbhaam ndo kọgban, oyenẹ nwo m'otima ẹbhaam otuk ẹbhaam ọnang oyok. Ẹbhaam ndo ch'epe-ope m'ede chẹ.