1 Wa anọng p'Israẹl maphyir mabin ozenga z'Sin, z'ibyi s'anọng nna arukọ, mazenga k'ibyi k'ibyi, k'ose kw'Ọvaar Ibinọkpaabyi ikk'bẹ obena. Mapyirẹ ny'Rẹphidim, mabhing nya. Wa m'asi kaze p'mm'agwo. 2 Minna kw'masi ẹtta anang Mosẹs, maben-ẹ bẹ́, "Nang mina asi p'mm'ogwo."

Mosẹs ọpọhna bẹ bẹ́, "Osempira mad-asi ẹtta amaan-m o? Mad-asi yen ake Ọvaar Ibinọkpaabyi k'eyoma o?"

3 Ny'ogbe nwo, wa asi kk'anọng adaaka ny'ibyi njo maa, manwọhnọ anang Mosẹs, maben-ẹ bẹ́, "Osempira atima mina abina z'Ijip, ọmaana iva pamina, ọttara etirakpo pyamina bẹ́, mokwu ope k'osi-daakẹ o?"

4 Nya o, Mosẹs obhom ọkpẹkẹ Ọvaar Ibinọkpaabyi, oben-ẹ bẹ́, "Kaam m'nsi yen mmaana anọng mba? Bẹ nkk'ifor ada bẹ́, matọbh-m ata."

5 Ọvaar Ibinọkpaabyi oben Mosẹs bẹ́, "Zenga zọhng chi anọng mbo eden. Tima adidennọng banẹ p'Israẹl fona, abira atima ochikwura nwo kw'atim abin ọraanga kw'Nile. 6 Kaam m'mbọ-ọ ny'ititika ny'ẹtakpa ch'Horẹb. Á̱pyirẹ nya, tọka ochikwura nwo kwọ bin ny'ẹtakpa ndo. Asi m'ayin nya k'ose kw'anọng m'agwo." Mosẹs osi minna ny'ititika s'adidennọng p'Israẹl. 7 Mosẹs okpe ibyi njo bẹ́, Masa* ọmaana Mẹriba*, okurọ ch'anọng p'Israẹl masi ẹtta anang Mosẹs, mabira ayoma Ọvaar Ibinọkpaabyi, maben bẹ́, "Ma, Ọvaar Ibinọkpaabyi oning ma ọmaana mina k'odik ọkkọkka yirẹ?"

8 Ny'ogbe nwo, anọng p'Amalẹk makwu arima egbong amaana anọng p'Israẹl z'Rẹphidim. 9 Mosẹs oben Joshua bẹ́, "Rọbha ajinọng banẹ, mad-arima egbong amaana anọng p'Amalẹk. Ophyinẹ kaam m'ntima ochikwura kw'Ibinọkpaabyi ny'ọbọhk nd-mbe z'ogbe-so."

10 Minna kw'Joshua orim anọng p'Amalẹk ábè k'ose kw'Mosẹs kk'obena. Mosẹs ọmaana Aarọn, ọttara Hur mavura z'ogbe-so. 11 Ogbe kpenamkpen kw'Mosẹs ọyaangẹ mbọhk sẹ k'ẹrọng, minna kw'anọng p'Israẹl makem. Ogbe kw'ọsak mbọhk sẹ k'izek, anọng p'Amalẹk akema. 12 K'ogbe kw'mbọhk ikwok Mosẹs, Aarọn ọmaana Hur, matọka ẹta achen-ẹ oninga ẹwọr. Pira nnabẹ-ẹ k'okwubha k'okwubha, mabọka mbọhk njo asok ny'iwokọ bẹ sẹẹbh maa, ewu ẹsa. 13 Minna kw'Joshua otim ọkkangkkang orima anọng p'Amalẹk maa, okema agbongnọng pabẹ.

14 Nya o, Ọvaar Ibinọkpaabyi oben Mosẹs bẹ́, "Kkẹr idik nja k'nnwẹr, ọfha kwuna anọng matima ajima ekema nda. Yerẹ idik njo k'ose kw'Joshua m'ọbhaanga, okurọ bẹ́, kaam m'ndimẹ anọng p'Amalẹk eche m'iyagbin."

15 Mosẹs ottima ija-byi, oyerẹ sẹ bẹ́, "Ọvaar Ibinọkpaabyi wọ ode Okem kwaam." 16 Oben bẹ́, "Ọvaar Ibinọkpaabyi m'ọttaangẹ anọng p'Amalẹk k'epemaanitor, okurọ ch'matinẹ mbọhk atena ẹvaarkkọhbhọ ch'Ọvaar Ibinọkpaabyi."