1 Wa matim ndik s'ide blu, ọmaana s'ikorọ isiso, ọttara s'ikorọ izizẹ, mayok nnya s'ẹja ofufọhnọ z'ọsọhm kw'awuriji. Wa mabir ayok ẹnya ch'awuriji anang Aarọn k'ose kw'Ọvaar Ibinọkpaabyi ikk'Mosẹs obena.

2 Matima ndik s'ide gol, ọmaana s'ide blu, ọmaana s'ikorọ isiso, ọmaana s'ikorọ izizẹ, ọttara mmọradik ọkkọkka, asi ẹphọd. 3 Maduk gol kw'ower-owerẹ, makpaara k'anaanga-k'anaanga, matima asi ndoka ny'ndik njo s'ide blu, ọmaana s'ide isiso, ọmaana s'ikorọ izizẹ, ọttara mmọradik ọkkọkka s'nkk'emengkka atima ayok. 4 Masi mbarakpa magbana ny'mbubaang mfa s'ẹphọd, ọfha ẹkpẹ-ẹ ẹbọka. 5 Omengkkanọng otima ndik s'ide gol, ọmaana s'ide blu, ọmaana s'ikorọ isiso, ọmaana s'ikorọ izizẹ, ọttara mmọradik ọkkọkka, osi odikpa kw'erin ọgbaka ny'ẹphọd, k'ose kw'Ọvaar Ibinọkpaabyi ikk'Mosẹs obena.

6 Mabẹ ata p'oniks nya ch'nkk'gol atima adoka, makkẹr ache p'ajinọngva p'Israẹl nya, mach'ẹkọhka. 7 Matọka ata mbo agbana ny'mbarakpa s'mbubaang s'ẹphọd, ọfha Ọvaar Ibinọkpaabyi od-otima ojima ajinọngva p'Israẹl, k'ose kw'ikk'Mosẹs obena.

8 Wa omengkkanọng oyok ẹbarakpa ch'ittemmọma. Wa mayokọ chẹ mach'ẹphọd kw'matim ndik s'ide gol ayok, ọmaana s'ide blu, ọmaana s'ikorọ isiso, ọmaana s'ikorọ izizẹ, ọttara mmọradik ọkkọkka. 9 Adum pẹ ọmaana ẹkpa chẹ made mbengana mach'ẹbọhkpattem, mabir anyọng-ẹ igbedim ifa.

10 Mabẹ ata p'ajibh-ojibh nya, k'akaana anna. Ny'ocheden-kaana, mabẹ ata p'ruby, ọmaana p'topaz, ọttara p'bẹril. 11 K'ọkaana ttong afa, mabẹ ata p'tọkwọis, ọmaana p'saphira, ọttara p'ẹmẹral. 12 K'ọkaana ttong attaan, mabẹ ata p'jasint, ọmaana p'agate, ọttara p'amẹtist. 13 K'ọkaana ttonga anna, mabẹ ata p'krisolita, ọmaana p'oniks, ọttara p'jaspa. Wa mabẹ ata mbo nya ch'nkk'gol atima adoka. 14 Wa ata mbo ade ijobh kkamfa. Ekpenamkpen eter eso ch'ojinọngnwa mawanẹ kw'Israẹl, ebir etima eche ch'ọnọng-ọnọng mach'ẹkọhka ny'nnọmma njo ijobh kkamfa s'isi Israẹl. 15 Matima gol ọkkọkka asi agbakkọhbhọva mach'edik ch'ẹbarakpa ch'ittemmọma. 16 Matima gol asi ndoka mfa, mabir atima gol asi aringẹ afa. Pira nnagbak aringẹ mbo afa ny'aso afa p'ẹbarakpa ch'ittemmọma. 17 Mabir akpa agbakkọhbhọva mbo afa p'gol ny'aringẹ p'aso mbo p'ẹbarakpa ch'ittemmọma, 18 makpa aso mboza p'agbakkọhbhọva mbo z'ndoka njo mfa, magbaka bẹ ny'mbarakpa s'ebubaang s'ining ny'ititika s'ẹphọd. 19 Matima gol asi aringẹ afa magbana z'aso mboza afa p'ẹtaanga kw'ẹbarakpa ch'ittemmọma, ch'ẹnyọm ẹphọd. 20 Mabir atima gol asi aringẹ afa ọdọk-ọdọk, magbaka ny'izek-izek kw'mbarakpa s'mbubaang, z'ititika-ititika kw'ẹphọd, ẹnyọma ẹbọhra ch'ẹrọng-ẹrọng kw'odikpa kw'ẹphọd. 21 Matima edik ch'ede blu akpa aringẹ p'ẹbarakpa ch'ittemmọma amaana z'aringẹ p'ẹphọd, ẹbọka z'odikpa kw'erin, ọfha ẹbarakpa ndo ch'ittemmọma ed-eninga ma sẹẹbh ny'ẹphọd, k'ose kw'Ọvaar Ibinọkpaabyi ikk'Mosẹs obena.

22 Omengkkanọng otima ibara s'ide blu jẹ-jẹ oyok ọnọhma-baba kw'ẹphọd, 23 oyena ọmma ny'ottem mach'ẹnọhmadọngọ kw'eso im'edim. Mabir atima ẹbarakpa ake ẹmma ny'ọmma nwo, ọfha oning ọyaakẹ. 24 Matima ndik s'ide blu, ọmaana s'ikorọ isiso, ọmaana s'ikorọ izizẹ, ọttara mmọradik ọkkọkka, mayok apomegrenet akọbha ẹmmabọhra ch'ọnọhma-baba nwo. 25 Matima gol ọkkọkka asi akkaningkka magbana ny'njeka kw'pomegrenet akọbha ẹmmabọhra ch'ọnọhma-baba nwo. 26 Akkaningkka mbo ọmaana apomegrenet ajek ayok akọbha ny'ẹmmabọhra ch'ọnọhma-baba kw'Aarọn min'ọfọra k'ogbe kw'ọfọhn ẹja, k'ose kw'Ọvaar Ibinọkpaabyi ikk'Mosẹs obena.

27 Omengkkanọng otima mbaradik ọkkọkka oyok akpaar-mbọhk p'apyirẹ ny'ndudungọ ọnang Aarọn ọmaana iva pẹ, 28 mabir atima mbaradik ọkkọkka ayok ibara s'eso odidabh, ọmaana okpo, ọttara ẹfọrakpo py'ẹtaanga py'matim mmọradik ọkkọkka ayok. 29 Omengkkanọng otima mmọradik ọkkọkka, ọmaana ndik s'ide blu, ọmaana s'ikorọ isiso, ọttara s'ikorọ izizẹ, osi odikpa, k'ose kw'Ọvaar Ibinọkpaabyi ikk'Mosẹs obena.

30 Matima gol ọkkọkka asi ẹgbangbangkpa ch'awuriji, makkẹr nya mach'ẹkọhka bẹ́, AWURIJI AYEN ỌVAAR IBINỌKPAABYI. 31 Madabh edik ch'ede blu nya, ọfha ẹbọka z'ibara s'eso, k'ose kw'Ọvaar Ibinọkpaabyi ikk'Mosẹs obena.

32 Nya o, ọtọhm mvo maphyir f'iruk-byi s'Ibinọkpaabyi kw'ode ikkira s'etobha osisi, okwu ọsa. Wa anọng p'Israẹl masi vẹ maphyir ator k'ose kw'Ọvaar Ibinọkpaabyi ikk'Mosẹs obena. 33 Ofona nya, wa matinẹ iruk-byi njo achena Mosẹs: ikkira njo ọttara ekpo py'eyik z'ẹtaanga maphyir, py'ede mgbaka sẹ, ọmaana mmakwukchi, ọmaana nzemachi, ọmaana achiva p'adum-odum, ọttara arin pabẹ, 34 ọmaana etenkpa ch'ọrọkimaandim ch'mafok asi-kora, ọmaana etenkpa ọdọk-ọdọk ch'ẹchọr-ọchọrọ, ọttara ibara s'ọmma, 35 ọmaana Ẹkkọhbhọ ch'Echekẹ ttara mkpọmmachi sẹ, ọttara efokọkpa, 36 ọmaana okpokkoro ttara ekpo pyẹ maphyir, ọmaana brẹd kw'awuriji, 37 ọmaana etorongkkang-nana ch'matim gol ọkkọkka asi, ttara ekpo pyẹ maphyir, ọttara ana p'oliv p'ekpon oyiyenẹ, 38 ọmaana ija-byi s'matim gol asi, ọmaana ana p'mad-abyenga ọnọng k'eso, ọmaana insẹns, ọttara ibara s'ọmma s'ẹmmakwukden s'ikkira njo, 39 ọmaana ija-byi s'matim bronz asi, ttara ọkkẹng kwẹ kw'mabir atima bronz ayok, ọmaana nchi sẹ s'idum-odum, ọmaana ekpo pyẹ maphyir, ọmaana ọgbangbang ttara ẹnana chẹ, 40 ọmaana ọbara f'ọmma f'eterttem, ttara nchi sẹ s'idum-odum, ọmaana arin pẹ, ọmaana ibara s'ọmma s'ẹmmakwukden ch'eterttem ndo, ọmaana ndik sẹ, ọttara abhik p'ikkira s'eterttem ndo, ọmaana ekpo py'eyik z'ẹtaanga kw'iruk-byi s'Ibinọkpaabyi, kw'ode ikkira s'etobha, 41 ọmaana nnya s'mayok-oyok s'Aarọn ọmaana ajinọngva pẹ mmad-afọra z'ibyi s'awuriji, k'ogbe kw'masi ọtọhm f'ẹja ofufọhnọ.

42 Wa anọng p'Israẹl asi ọtọhm mvo maphyir ator k'ose kw'Ọvaar Ibinọkpaabyi ikk'Mosẹs obena. 43 Mosẹs o, ọbaana ọtọhm mvo maphyir, oze bẹ́, nkk'asa k'ose kw'Ọvaar Ibinọkpaabyi ikk'obena. Ofona nya o, osi bẹ ittabọhng.