1 Wa Bẹzalẹl otim echi ch'akasiya osi Ẹkkọhbhọ ch'Echekẹ. Adum pẹ ade ntọkọ nttaan ọmaana akaana attaan, ẹkpa ọmaana agoriji pẹ made ntọkọ mfa ọmaana akaana attaan. 2 Otima gol ọkkọkka ọbhọrọ z'ẹtaanga, ọttara k'iyaan. Obir otima gol odoka ọkọbha. 3 Otima gol ọrabha aringẹ anna, ọgbaka ny'mmo sẹ nna, aringẹ afa k'ẹbhaakẹ danẹ, mboza afa z'ẹbhaakẹ ndoza. 4 Otima echi ch'akasiya osi nchi s'idum-odum, otima gol ọbhọrọ jẹ. 5 Oke nchi njo s'idum-odum ny'aringẹ p'abem p'Ẹkkọhbhọ ch'Echekẹ, mfha mad-abọka nya atinẹ. 6 Obir otima gol ọkkọkka osi efokọkpa ch'adum pẹ made ntọkọ nttaan ọmaana akaana osowanẹ, ẹkpa ede ntọkọ mfa ọmaana akaana attaan. 7 Oduk gol otima osi acherubim afa z'ẹkpọka ch'ọkpa nwo. 8 Osi cherub mawanẹ k'eso danẹ, osi nwoza z'eso ndoza; osi pyẹ ọgbaka ny'ọkpa nwo. 9 Wa acherubim mbo amaam mbubaang sabẹ k'ẹrọng, matima abubha ọkpa nwo kw'efokọ. Acherubim mbo makkerẹ ayok ititika, marọn ny'ọkpa nwo.

10 Wa matim echi ch'akasiya asi okpokkoro kw'adum pẹ ade ntọkọ nttaan, ẹkpa chẹ ede ẹtọkọ madanẹ ọmaana akaana achadanẹ, agoriji pẹ made ntọkọ mfa ọmaana akaana attaan. 11 Otima gol ọkkọkka ọbhọrọ, obir otima gol odoka abem pẹ ọkọbha. 12 Mabir asi oringẹ kw'obeng ẹkpa mach'ẹbọhkkpattem, matima gol adok-ẹ. 13 Matima gol arabha aringẹ anna p'okpokkoro nwo, magbaka ny'abongọ pẹ anna, nya ch'mmo sẹ nna ining. 14 Aringẹ mbo aning anyọma ope nwo, ọfha ẹbọka nchi njo s'idum-odum s'nd-atima atinẹ okpokkoro nwo. 15 Wa matima echi ch'akasiya asi nchi s'idum-odum s'nd-atima atinẹ okpokkoro nwo, matima gol abhọrọ jẹ. 16 Wa mabir atima gol ọkkọkka asi ekpokira py'im'eninga ny'okpokkoro nwo, mach'agbangbang p'ọchattọhk, ọmaana agbẹrkpa, ọmaana agbobhmbọhk, ọttara akkọbh p'mm'ad-atima asi nnanga s'atuk obyibyenga.

17 Matima gol ọkkọkka asi etorongkkang-nana. Maduk orin ọmaana ochi kwẹ oduk, mabir asi akọbh pẹ p'akerẹ agbok, ọmaana agbok p'nkk'amaama magbaka k'ibyi majanẹ. 18 Abọhnga achadanẹ matọhnga ny'abem p'etorongkkang-nana ndo, attaan aninga k'obem wanẹ, attaan aninga z'okwubha nwoza. 19 Akkọbh attaan p'akerẹ agbok p'almọn p'nkk'amaama, maninga k'ẹbọhnga madanẹ, attaan aninga z'ẹbọhnga ndoza ch'ẹnyọm-ẹ. Minna kw'obir ode z'abọhnga mbo achadanẹ maphyir p'afon ny'etorongkkang-nana ndo. 20 Etorongkkang-nana ndo wa eyen akkọbh anna p'akerẹ agbok p'almọn, ọmaana agbok p'nkk'amaama. 21 Ogbok mawanẹ oninga ny'izek-izek kw'abọhnga afa p'achi eden ny'etorongkkang-nana ndo. Ogbok ttonga afa oninga ny'izek-izek kw'abọhnga afa p'attong afa. Ogbok ttong attaan oninga ny'izek-izek kw'abọhnga afa p'attong attaan. K'ibungọ-k'ibungọ, nokwu ode abọhnga achadanẹ. 22 Agbok ọmaana abọhnga mbo maphyir nekwu ede ọttọhk mavanẹ ọmaana etorongkkang-nana ndo ch'madukọ gol ọkkọkka atima asi.

23 Matima gol ọkkọkka asi atorongkkang achenọmfa pẹ, ọmaana itorongkkang-nọm, ọttara akkoriya pẹ. 24 Mabir atima talẹnt mawanẹ kw'gol ọkkọkka, masi etorongkkang-nana ndo, ttara ekpo pyẹ maphyir.

25 Wa matim nchi s'akasiya asi ija-byi s'insẹns. Ẹkpa ọttara adum pẹ made mbengana. Adum pẹ made ẹtọkọ madanẹ ọmaana ibhaaka, ẹkpa chẹ ede ẹtọkọ madanẹ ọmaana ibhaaka, agoriji pẹ made ntọkọ nttaan. Abhik pẹ mabir agbaka nya amaan-ẹ. 26 Matima gol ọkkọkka abhọrọ jẹ z'ẹrọng, ọmaana z'akongọ pẹ, ọttara z'abhik pẹ, pira nnatim gol adoka jẹ akọbha. 27 Wa matima gol asi aringẹ afa, ny'izek-izek kw'edoka ndo, afa-afa k'okwubha k'okwubha, mfha ẹbọka achiva mbo p'adum-odum s'nd-atima atinẹ. 28 Matima echi ch'akasiya masi achiva p'adum-odum, pira matima gol abhọrọ jẹ maphyir. 29 Mabir asi ana p'awuriji p'nd-abyenga ọnọng k'eso, ọttara insẹns ọkkọkka kw'omengkkanọng kw'od-osi ana p'alebh eruk, osi.