Nnwẹr kw'Ozenga 8

1 Nya o, Ọvaar Ibinọkpaabyi oben Mosẹs bẹ́, "China z’Phero, gbaak-ẹ bẹ́, ‘Kaam Ọvaar Ibinọkpaabyi mbenẹ bẹ́, atte anọng paam ọbọhk mafona makwu akpobh-m. 2 Ó̱de ina acher, kaam m’ntọhm abhurubọhk k’ọsaabh ny’ẹkọma chọ kibungọ. 3 Abhurubọhk mbo m’afu ny’ọraanga kw’Nile bẹ́ taap. Mm’akwu adim z’odimpa kwọ, ọmaana z’idongọ sọ, ọttara z’eyima chọ. Mm’abir adim z’isọhm s’atọhmnọng pọ, ọmaana s’anọng pọ, ọmaana z’ibyi s’mad-asi brẹd ọttara z’ophe f’mad-atima asi brẹd. 4 Abhurubọhk mbo mm’avura kọ ọttara adukwa pọ ny’ifor.’ "

5 Nya o, Ọvaar Ibinọkpaabyi obir oben Mosẹs bẹ́, "Tek Aarọn bẹ́, onemẹ ọbọhk nwo kw’otim ochikwura otena z’ẹbhaakẹ ch’araanga, ọmaana nkeka, ọmaana ape, mfha abhurubọhk ayin afu izek s’Ijip bẹ́ gbing."

6 Ofona nya, Aarọn onemẹ ọbọhk kwẹ otena z’asi p’Ijip maphyir, abhurubọhk mayin z’asi makwu afu izek bẹ́ gbing. 7 Anọng p’Ijip p’ad-asi mbọn, masi mach’Aarọn osi, abhurubọhk abir ayin maa, mabubha izek maphyir.

8 Phero o, oyerẹ Mosẹs ọmaana Aarọn, oben bẹ bẹ́, "Màze njọm nang Ọvaar Ibinọkpaabyi bẹ́, ọrọhbha abhurubọhk mba m’kaam k’ifor, ọmaana z’anọng paam k’ifor, ọfha ntte anọng pẹ ọbọhk mafona, mad-afọhnọ nja anang kẹ Ọvaar Ibinọkpaabyi."

9 Mosẹs ọpọhna Phero bẹ́, "K’ẹvaar chọ, kọ m’ake ogbe anang-m kw’im’nze njọm nnang kọ ọmaana adukwa pọ, ọttara anọng pọ maphyir, ọfha abhurubọhk mbo atte bọnga ọbọhk, marik mbo p’ọraanga kw’Nile bẹ-bẹ."

10 Phero oben bẹ́, "Ze njọm njo ophyinẹ."

Mosẹs ọpọhn-ẹ bẹ́, "M’ode mach’abenẹ, ọfha atima azonga bẹ́, ọnọng za kode kw’ode mach’Ọvaar Ibinọkpaabyi kw’ode Ibinọkpaabyi kwamina. 11 Abhurubọhk mbo m’atte kọ ọbọhk, ọmaana isọhm sọ, ọmaana adukwa pọ, ọttara anọng pọ. Mbo p’aning z’ọraanga kw’Nile bẹ-bẹ bọ mm’aninga."

12 Minna kw’Mosẹs ọmaana Aarọn mabin Phero ny’ititika, Mosẹs oze njọm ọnang Ọvaar Ibinọkpaabyi bẹ́, ọrọhbha abhurubọhk mbo p’ikk’ọtọhma ọnang Phero. 13 Ọvaar Ibinọkpaabyi osi mach’Mosẹs ophyem-ẹ. Abhurubọhk p’maning z’isọhm, ọmaana z’nttemttem, ọttara z’iwonọ, mape maphyir. 14 Anọng p’Ijip matobha abhurubọhk mbo k’akkin-k’akkin. Ophyok kw’abhurubọhk mbo ẹtọka ibyi maphyir. 15 Phero okwu oze bẹ́, abhurubọhk mbo kk’apa-kpo, kẹ odo ettem ọgaangẹ. Mosẹs ọttara Aarọn itọhng koyong, k’ose kw’Ọvaar Ibinọkpaabyi ikk’obena.

Nkwurọ s’abinbinọ

16 Nya o, Ọvaar Ibinọkpaabyi oben Mosẹs bẹ́, "Tek Aarọn bẹ́, onemẹ ochikwura kwẹ obin ny’izek, ọfha ebonọ ch’ẹkọma ch’Ijip maphyir, ẹbhakẹ ezeng abinbinọ." 17 Mosẹs ọmaana Aarọn masi minna. Aarọn obin ochikwura kwẹ ny’izek, pira ebonọ ch’ẹkọma ch’Ijip maphyir, ẹbhakẹ ezeng abinbinọ. Abinbinọ mbo machi oyokinọng kpenamkpen, ọttara eten kpenamkpen ny’Ijip. 18 Anọng p’Ijip p’ad-asi mbọn akonga k’ose kw’matima mfa sabẹ abir asi abinbinọ ayin, nkakpo. Abinbinọ achina ororo abubha ayokinọng ọmaana nten.

19 Anọng p’Ijip p’ad-asi mbọn aben Phero bẹ́, "Odik nwa ọjaakadik azang o. Ọbọhk kw’Ibinọkpaabyi oyik ma e." Okenaka, Phero ochina ororo ọgaangẹ ettem, itọhng ny’idik njo koyong, k’ose kw’Ọvaar Ibinọkpaabyi ikk’obena.

Nkwurọ s’azizang

20 Nya o, Ọvaar Ibinọkpaabyi oben Mosẹs bẹ́, "Bina k’ekpikpebha, ad-agwunga Phero ọmma ch’im’oyin asi z’ọraanga, aben-ẹ bẹ́, Ọvaar Ibinọkpaabyi obenẹ bẹ́, ‘Tte anọng paam ọbọhk mafona, mfha mad-akpobh-m. 21 Ó̱de ina anọng paam ọbọhk atte mafona, kaam m’ntọhm azizang k’ọsaabh makwu abubha adukwa pọ, ọmaana anọng pọ, ọttara isọhm sọ. Azizang atọka isọhm s’anọng p’Ijip maphyir, ozeng k’izek s’maning. 22 Okenaka, ny’ewu ndo, kaam m’nsi nkọmẹ z’ẹkọma ch’Goshẹn ch’anọng paam arukọ. Azizang za mìntọhm, mfha matima azonga bẹ́, kaam Ọvaar Ibinọkpaabyi nning m’izek nja. 23 Kaam m’nsi anọng paam made nkọmẹ z’anọng pọ. Ophyinẹ kw’ẹkọhka nda im’eyin.’ "

24 Ọvaar Ibinọkpaabyi osi mach’obenẹ. Ọtọhm azizang k’ọsaabh z’odimpa kw’Phero, ọmaana z’isọhm s’adukwa pẹ. Wa azizang akibhẹ ẹkọma ch’Ijip kibung-kibungọ.

25 Ofona nya o, Phero oyerẹ Mosẹs, ọmaana Aarọn, oben bẹ bẹ́, "Màzọhng, mad-afọhnọ nja anang Ibinọkpaabyi kwabọnga m’izek nja."

26 Mosẹs oben bẹ́, "Minna mòjibh. Nja s’mina mm’ọfọhnọ ọnang Ọvaar Ibinọkpaabyi kwamina, anọng p’Ijip nttem mìlebh. Ó̱de m’ọfọhnọ nja s’ina bẹ idaakẹ, bẹ mm’atọka ata atọhbh mina. 27 Mm’ọtọma ozenga kw’iwu ittaan ochina z’ẹbhaakẹ ch’anọng nna arukọ, ọfha m’oninga za ọfọhnọ nja ọnang Ọvaar Ibinọkpaabyi kwamina, k’ose kw’ikk’mina ọtọhma."

28 Phero oben bẹ́, "Kaam m’ntte bọnga ọbọhk mad-afọhnọ nja anang Ọvaar Ibinọkpaabyi kwabọnga z’ibyi s’anọng nna arukọ. Okenaka, m’ibyi s’ibhir-obhir kàta. Màze-m njọm."

29 Mosẹs ọpọhn-ẹ bẹ́, "Ó̱de mfon ma, kaam m’nze njọm nang Ọvaar Ibinọkpaabyi. Ophyinẹ, azizang m’atte kọ Phero, ọmaana adukwa pọ, ọttara anọng pọ, ọbọhk. Okenaka, tte Phero oning obir otuna bẹ́, otte anọng mba ọbọhk mafona, mad-afọhnọ nja anang Ọvaar Ibinọkpaabyi."

30 Mosẹs obina orik Phero, od-oze njọm ọnang Ọvaar Ibinọkpaabyi. 31 Nya o, Ọvaar Ibinọkpaabyi osi mach’Mosẹs ophyem-ẹ. Azizang mbo matte Phero, ọmaana adukwa pẹ, ọttara anọng pẹ, ọbọhk. Ezizang madan-danẹ kerikẹ. 32 Okenaka, Phero obir ochina ororo ọgaangẹ ettem, anọng mbo ọbọhk kocher otte mafona.