Arca da aliança

Ikwukwur s’Echekha

10 "Tte abẹ atima mkpaakha s’akasiya asi ikwukwur s’adum pẹ ade ntwạkhọ nttaan ọmaana akpamma sọnajobh, ẹkpa chẹ ede ntwạkhọ mfa ọmaana akpamma attaan, ebe chẹ ede ntwạkhọ mfa ọmaana akpamma attaan. 11 Tima gol ọkkọkka fhạrọ sẹ k’ẹtaanga ọttạra k’iyaan, abạra atima gol afhạrọ ammakpabem pẹ abaabha. 12 Tima gol rạbha ariringi annebung ge k’ntwạkhọ nnebung s’ikwukwur nnọ, ẹfa k’ukhubha gwạnọ, ẹfa k’ukhubha ngwọkha. 13 Tima mkpaakha s’akasiya si nsemachi, atima gol afhạrọ sẹ. 14 Ge nsemachi nnọ k’ariringi p’abem p’ikwukwur nnọ, p’abẹ m’avạkha adira sẹ. 15 Nsemachi nnọ m’ininga ma ariringi p’ikwukwur nnọ; abạnga sẹ kárạbha. 16 Tạkha atakpa p’nnyina nnọ s’m’nnạng-ọ, yikha ma Ikwukwur nnọ s’Echekha.

17 "Bạra tima gol ọkkọkka rạbha ikwukwurkpa ch’ephyokhu. Adum pẹ m’ade ntwạkhọ nttaan ọmaana akpamma sọnajobh, ẹkpa chẹ m’ede ntwạkhọ mfa ọmaana akpamma attaan. 18 M’atima gol adwuk achẹrubim afa abera k’ikpicho kw’ikwukwurkpa njọ. 19 Chẹrub wạnọ m’uninga k’echo jạnẹ, nwọkha uninga k’echo njọkha. Si achẹrubim mbọ ọttạra ikwukwurkpa njọ agbạkha ayok, k’ncho mfa s’ikwukwur nnọ. 20 Tte achẹrubim mbọ akhaama abạbaang p’m’ẹmmaama k’ẹrang ibubha ikwukwurkpa s’ikwukwur nnọ. Tte achẹrubim mbọ akkeri ayok ititikha, tte apyẹ ekkeri k’ikwukwurkpa njọ. 21 Tạkha ikwukwurkpa njọ khubha k’ẹrạng-ẹrạng kw’Ikwukwur s’Echekha, atạkha nnyina s’m’nnạng-ọ age ma ẹtaanga.

22 Ma ẹrạng-ẹrạng kw’ikwukwurkpa njọ, ọttạra k’ottemkwẹ kw’achẹrubim mbọ p’aning k’ẹrạng-ẹrạng kw’Ikwukwur s’Echekha nnọ, wọ m’nkebh-ọ, mbạra nnạng-ọ nnyina phyi-phyibh s’m’anạng anạng p’Israẹl.

Ikwukwur s’echekha

1 Wa Bẹzalẹl utim ichi ch’akasiya usi Ikwukwur s’Echekha. Adum pẹ ade ntwạkhọ nttaan ọmaana akpamma sọwạnọ, ẹkpa chẹ ede ntwạkhọ mfa ọmaana akpamma attaan, ebe chẹ ede ntwạkhọ mfa ọmaana akpamma attaan.

Ittima ch’ibyirukhasẹ s’Ubinọkpaabyi

1 Ma wọ, Ọvaar Ubinọkpaabyi obeni Mosẹs bẹ́, 2 "K’echedenwu ch’ocheden-phye, ttima ibyirukhasẹ s’Ubinọkpaabyi kw’ode ukkira kw’etobha. 3 Chok Ikwukwur nnọ s’Echekha ma ẹtaanga, abạra akpạna ivạra s’ẹchọhmma abubha sẹ.

20 Ọtạkha ata p’nnyina oge k’Ikwukwur s’Echekha, ọtạkha nsemachi ọnọhma ma Ikwukwur s’Echekha, ọbạra ọtạkha ikwukwurkpa ch’epfokhu ububha sẹ. 21 Ma wọ Mosẹs, utim Ikwukwur nnọ s’Echekha ọnwa k’ibyirukhasẹ ẹtaanga, ọkpạna ivạra s’ẹchọhmma ọkpa sẹ ọmaana ma ẹtaanga, ọbạra ọkpa Ikwukwur s’Echekha ọmaana ma, otor k’oche kw’Ubinọkpaabyi ọtọhn-ẹ.

2 APhilistiya atọhmọ ikhaana s’akpongnạng pabẹ bẹ́ abẹ ata attạma anạng p’Israẹl abẹ. Masẹ ekpong ẹnyaamẹ, wa aPhilistiya akhem anạng p’Israẹl, abẹ afhọ anạng nnọhna jobh k’akpongchen. 3 K’okpe akpongnạng p’anaang k’ekpong n’akwun k’ibyibhingasẹ, adecho p’Israẹl n’abạbhọ ayok bẹ́, "Oseng yạn kw’Ọvaar Ubinọkpaabyi n’otte aPhilistiya ọbọhk abẹ akhema mạna chemma o? Tte anta andira ikwukwur s’echekha ch’Ọvaar Ubinọkpaabyi k’Shilo, ọfha itwạn mạna abẹ, ibạra ikkaana mạna k’mbọhk s’awawunanạng pamạna."

4 Ma wọ, abẹ atọhmọ akpongnạng kha Shilo, abẹ ata adira ikwukwur s’echekha ch’Ọvaar Ubinọkpaabyi kw’Ẹfa phyibh, kw’uning k’ngekha s’achẹrubim, atima akwu. Wa ajunungva afa p’Ẹli, p’ade Hophini ọttạra Phinẹhas aning ma ọttạra ikwukwur nnọ s’echekha ch’Ọvaar Ubinọkpaabyi.

5 Masẹ ikwukwur s’echekha ch’Ọvaar Ubinọkpaabyi ikpir k’ibyibhingasẹ, anạng p’Israẹl phyibh awur ẹmạng ch’enyengi isisek. 6 Masẹ aPhilistiya abhaang ẹkhọr njọ, abẹ abạbh bẹ́, "Bạng ẹmạng khira jọ abẹ n’awur k’ibyibhingasẹ s’aHiburu o?"

Masẹ abẹ abhaang bẹ́, ikwukwur s’echekha ch’Ọvaar Ubinọkpaabyi kk’ikpira k’ibyibhingasẹ s’aHiburu, 7 aPhilistiya ojoru bẹ, abẹ aben bẹ́, "Ọkha mạnna vunọ kk’ukpira k’ibyibhingasẹ e. Kk’andima e. Udik demakwẹ ngwa tạma núyina bạra o. 8 Akwẹ k’upyibh ọnạng mạna! Mbẹ, anẹ wọ m’ọrạbha mạna k’mbọhk s’ikha nna s’ikhaam ẹfa mạnna o? Ikha nnọ rọ wa isi bạra ọkhạnkhạmọ k’ukhira-k’ukhira otto okhebha anạng p’Ijip k’uminkpa e! 9 Abạr ettem, aPhilistiya! Asi ijunung-ijunung, deja, abạnga m’abhạkhẹ ade abira p’aHiburu, oche kw’uwa abẹ kk’adia anạng bạnga. Akpọkhọ ifor mas’ajunung arima irima!"

10 Ma wọ aPhilistiya arim irima, abẹ akhema anạng p’Israẹl, ọnạng-ọnạng ọrạbh ọta uttubha k’ukkira kwẹ. Wa ẹnạngfha ẹbạrẹ tạrr, akpongnạng p’aseng k’mfhok p’Israẹl adimi akpira nnọhna arạbh attaan ukuma chi. 11 Wa aPhilistiya avạk anạng p’Israẹl ikwukwur s’echekha ch’Ubinọkpaabyi ana. Ajunungva afa p’Ẹli p’ade Hophini ọttạra Phinẹhas abạra ape.

6 Wa Ọvaar Ubinọkpaabyi ọnạng anạng p’Ashdọd ọkhạnkhạmọ kwididen; ọbạra usi ikhạmana s’ibirakpo imma bẹ. 7 Masẹ anạng p’Ashdọd ase idik s’itto ikhebha bẹ, abẹ aben bẹ́, "Ikwukwur s’echekha ch’ọkha f’Israẹl níbaana bẹ́, ininga dạkhẹ ittra mạna e, ukwuru bẹ́, asẹ kk’mạna, ọttạra Dagọn kw’ode ọkha famạna ọkhạnkhạmọ ọnạnga." 8 Ma wọ, abẹ ayeri adecho p’ẹkhạma ch’aPhilistiya phyibh atobha, abạbh bẹ bẹ́, "M’ansi yạn ọttạra ikwukwur nna s’echekha ch’ọkha f’Israẹl o?"

Wa abẹ abhin bẹ́, "Adira ikwukwur nnọ s’echekha ch’ọkha f’Israẹl atima afona k’ukhubha kw’Gat." Ma wọ abẹ adir ikwukwur s’echekha ch’Ubinọkpaabyi kw’Israẹl abina. 9 Okhenkha, masẹ abẹ kk’sẹ adira, Ọvaar Ubinọkpaabyi ọbạra ọnạng anạng p’Gat ikhạmana s’ibirakpo, ọbạra oge ofhon ngwọ k’ojora fididen. Usi ikhạmana s’ibirakpo imma anạng p’ofhon ngwọ, tạma k’ọgbọsẹkhẹ kpira k’adennạng. 10 Ma wọ abẹ atọhmọ ikwukwur s’echekha ch’Ubinọkpaabyi afona kha Ẹkrọn.

Masẹ abẹ kk’ikwukwur s’echekha ch’Ubinọkpaabyi kw’Israẹl atima anwa k’Ẹkrọn, anạng p’Ẹkrọn atạma ẹmạng k’ẹrạng-k’ẹrạng gạgạma aben bẹ́, "Abẹ kk’ikwukwur s’echekha ch’ọkha f’Israẹl atima akwu bẹ́, abẹ akwu afhọ mạna ọttạra anạng pamạna e!" 11 Wa abẹ ayeri adecho p’aPhilistiya phyibh aben bẹ́, "Tte ikwukwur s’echekha ch’ọkha f’Israẹl ibina kamạna k’ofhon, ikpa nnạm k’ofhon kw’anạng p’akhaam sẹ, ọfha nạngẹ mạna ọttạra anạng pamạna ifhọ e." Ukwuru bẹ, wa ojora kw’obo kk’ọnyaamma k’efhonfhạr phyi-phyibh. Wa Ubinọkpaabyi ọnạngẹ anạng mbọ ọkhạnkhạmọ kwididen.

Ikwukwur s’echekha ch’Ọvaar Ubinọkpaabyi ikpa nnạm k’Israẹl

1 Masẹ ikwukwur s’echekha ch’Ọvaar Ubinọkpaabyi kk’aphye asenọfa ikkia k’APhilistiya k’mbọhk, 2 abẹ ayeri afọhnẹja, ọttạra abọhnganạng p’Aphilistiya, abạbh bẹ́, "M’ansi yạn ọttạra ikwukwur nna s’echekha ch’Ọvaar Ubinọkpaabyi o? Akpaak mạna eden ch’m’ansenga antọhm sẹ ikpa nnạm k’ibyi s’asẹ ibin ikwu."

3 Abẹ abhina bẹ́, "Abạnga ikwukwur nna s’ọkha f’Israẹl mbọhk-mbọhk kátọhm ikpa nnạm o, ọkwọnọ upyibh, abạnga atọhm sẹ ọttạra ẹnạnga ch’ipongapyibha. Ma wọ abạnga m’abina k’ikhạmana, abạnga m’abạra asonga oche kw’usi bạra utim ọnạng bạnga irem ọnạng."

10 Ma wọ, abẹ asi oche ngwọ. Wa abẹ atạk mmaam mfa akpạna k’ọkpaar kw’nten n’itwạr, abẹ abạra atạkha abhaamva mbọ akpạkha k’ọbhaampa. 11 Abẹ atạkha ikwukwur s’echekha ch’Ọvaar Ubinọkpaabyi age k’ọkpaar ngwọ, ọttạra ikwukwur s’okpomma pf’abẹ atim gol asi, ọttạra ibirakpo p’gold. 12 Wa mmaam nnọ innemi bẹ gbẹẹng itor k’eden ch’eten k’Bẹt-Shẹmẹsh, asẹ n’isenga immẹbhẹ k’eden; asẹ k’udimbọhk ọttạra k’ọkwabọhk níttena. Wa avaar p’aPhilistiya atwạnọ sẹ asẹ tạrr akpira k’erem ch’Bẹt-Shẹmẹsh.

13 Ma okpe ngwa, anạng p’Bẹt-Shẹmẹsh n’asi iphya s’awit k’ipekhuma. Masẹ abẹ adir achen ase ikwukwur s’echekha ch’Ọvaar Ubinọkpaabyi, ettem erebhi bẹ k’ọttọhk f’abẹ ase. 14 Masẹ ọkpaar ngwọ ukpir k’owonu kw’Joshua kw’ubin Bẹt-Shẹmẹsh, ukwu uphyikha k’ẹtakpa chididen. Anạng mba aphyaakhẹ ọkpaar ngwa, atima amuma ekpon, abẹ abạra atima mmaam nnọ afọhnọ ẹja ẹkkạmachẹ anạng Ọvaar Ubinọkpaabyi. 15 Anạng p’Lẹvi adir ikwukwur nnọ s’Echekha ch’Ọvaar Ubinọkpaabyi, ọttạra nnọkha s’ekpo p’gold iyik, atạkha anạna k’ẹtakpa njọ chididen. Ma iwu njọ, anạng p’Bẹt-Shẹmẹsh anạngẹ nnạnga ikkạmasẹ, abạra afọhnọ nja anạng Ọvaar Ubinọkpaabyi.

1 Ma wọ ajunung p’Kiriyat-Jẹrim ata atạkha ikwukwur s’echekha ch’Ọvaar Ubinọkpaabyi, avura afona k’okpecho k’ibyi s’ọchọhm kw’Abinadab uning. Wa abẹ atạk Eleaza kw’ode ujunung-nwa kw’Abinadab anạna ọbọhk k’echo bẹ́, okkeri ikwukwur s’echekha ch’Ọvaar Ubinọkpaabyi.

Samwẹl okhem aPhilistiya k’Mizpa

2 Wa ikwukwur nnọ s’echekha ining k’Kiriyat-Jẹrim k’okpe kw’ubhir-ubhir. Phyi-phyibh wa asẹ ining icho ẹrạbh. Ma wọ anạng p’Israẹl n’aning k’ikwosi, abẹ aror eden ch’abẹ m’asenga ator Ọvaar Ubinọkpaabyi dạkhẹ.

12 Ma wọ abẹ akpaakhẹ ọvaar Devid bẹ́, "Ọvaar Ubinọkpaabyi kk’ẹchọhmfhạr ch’Ọbẹd-Edom udia, ọttạra ọttọhk fidede f’ode pfẹ, ukwuru Ikwukwur s’Echekha ch’Ọvaar Ubinọkpaabyi e." Wa Devid utim erobha ofona ọta ọtạkha Ikwukwur s’Echekha ch’Ọvaar Ubinọkpaabyi k’ọchọhm kw’Ọbẹd-Edom, utima ukwu k’ofhon-diden kw’Devid. 13 K’okpe kw’anạng p’attọhk Ikwukwur s’Echekha ch’Ọvaar Ubinọkpaabyi kk’ntwạkhọ nsajạnẹ asenga, Devid ọtạkha ẹbhaamdim ọttạra ọbhaamnwa, utima ọfọhnọ ẹja. 14 Wa Devid oge ẹphọd oyokhakwẹ, utima ẹfa chẹ phyibh utubh ibin k’ititikha s’Ọvaar Ubinọkpaabyi. 15 Ẹma Devid, ọttạra anạng p’Israẹl phyi-phyibh atim ọkkọhna ọttạra abukpọhng, atima Ikwukwur s’Echekha ch’Ọvaar Ubinọkpaabyi awuna.

Abẹ atim ikwukwur s’Echekha akwu k’Ọchọhm kw’Ubinọkpaabyi

1 Wa ọvaar Sọlọmọn oyeri adennạng p’Israẹl ọttạra adabhẹ-nkhạma, ọttạra avaar-mfona s’inạmma s’Israẹl otobha bẹ́, abẹ atima Ikwukwur s’Ẹchekha ch’Ọvaar Ubinọkpaabyi kha Ziyọn, kw’ode efhondiden ch’Devid, akwuna k’Jẹrusalẹm. 2 Wa anạng p’Israẹl phyibh akwu atobha k’ọvaar Sọlọmọn, k’okpe kw’erobha k’ophye kw’Ẹtanim, kw’ode aphye asenọfa.

3 Masẹ adennạng p’Israẹl phyibh kk’akpira, afọhnẹja adira Ikwukwur s’Ẹchekha. 4 Abẹ atim Ikwukwur s’Ẹchekha ch’Ọvaar Ubinọkpaabyi, ọttạra ibyirukhasẹ s’Ọvaar Ubinọkpaabyi, ọttạra ekpo edokhapyẹ py’ining k’ẹtaanga. Afọhnẹja ọttạra aLẹvi atọhkha pyẹ. 5 Ọvaar Sọlọmọn ọttạra anạng p’Israẹl phyi-phyibh p’kk’atobha abaabh-ẹ, aninga k’ititikha s’Ikwukwur s’Echekha njọ, n’atima arạkhạmaan k’ọsaabh ọttạra mmaam s’ibhikh-asong, afọhnọ ẹja.

6 Afọhnẹja mbọ atim Ikwukwur s’Echekha ch’Ọvaar Ubinọkpaabyi akwu achok k’ibyi sẹ, k’ẹtaanga kw’ibyi s’Awurada p’ayọhng Awurada, k’ọchọm kw’Ubinọkpaabyi. Wa abẹ achokhu sẹ k’isekhisek kw’abạbaang p’chẹrubim. 7 Chẹrubim mbọ ammaam abạbaang pabẹ abubha ibyi s’Ikwukwur s’Echekha ining. Wa chẹrubim mbọ abubh Ikwukwur s’Ẹchekha ọttạra nsemachi sabẹ n’atima adira sẹ. 8 Nsemachi nnọ idumu tạrr ikpira k’ochẹ kw’m’akke-okke abe k’iyaan-iyaan kw’ibyi s’awurada, s’ide ibyi s’Awurada p’ayọng Awurada, ase ibyi s’asẹ ikpong. Asẹ itim ining kha tạrr ukpira chemma. 9 Wa ọttọhk f’uning k’Ikwukwur nnọ ẹtaanga kòde, oyong ata-gbẹrẹ afa p’Mosẹs kk’ugia k’ẹtaanga k’Họrẹb. Ma wọ wa Ọvaar Ubinọkpaabyi ochekhi ọnạng anạng p’Israẹl, sabẹ abin k’Ijip.

10 Masẹ afọhnẹja abin k’Ibyi s’Awurada, ebona ẹsạkha ibubha Ọchọhm kw’Ọvaar Ubinọkpaabyi. 11 Afọhnẹja ọtọhm fabẹ kákke asi ukwuru ebona, s’abạrada p’Ọvaar Ubinọkpaabyi kk’ọchọhm kwẹ afhạra.