1 Reis 8

Abẹ atim ikwukwur s’Echekha akwu k’Ọchọhm kw’Ubinọkpaabyi

1 Wa ọvaar Sọlọmọn oyeri adennạng p’Israẹl ọttạra adabhẹ-nkhạma, ọttạra avaar-mfona s’inạmma s’Israẹl otobha bẹ́, abẹ atima Ikwukwur s’Ẹchekha ch’Ọvaar Ubinọkpaabyi kha Ziyọn, kw’ode efhondiden ch’Devid, akwuna k’Jẹrusalẹm. 2 Wa anạng p’Israẹl phyibh akwu atobha k’ọvaar Sọlọmọn, k’okpe kw’erobha k’ophye kw’Ẹtanim, kw’ode aphye asenọfa.

3 Masẹ adennạng p’Israẹl phyibh kk’akpira, afọhnẹja adira Ikwukwur s’Ẹchekha. 4 Abẹ atim Ikwukwur s’Ẹchekha ch’Ọvaar Ubinọkpaabyi, ọttạra ibyirukhasẹ s’Ọvaar Ubinọkpaabyi, ọttạra ekpo edokhapyẹ py’ining k’ẹtaanga. Afọhnẹja ọttạra aLẹvi atọhkha pyẹ. 5 Ọvaar Sọlọmọn ọttạra anạng p’Israẹl phyi-phyibh p’kk’atobha abaabh-ẹ, aninga k’ititikha s’Ikwukwur s’Echekha njọ, n’atima arạkhạmaan k’ọsaabh ọttạra mmaam s’ibhikh-asong, afọhnọ ẹja.

6 Afọhnẹja mbọ atim Ikwukwur s’Echekha ch’Ọvaar Ubinọkpaabyi akwu achok k’ibyi sẹ, k’ẹtaanga kw’ibyi s’Awurada p’ayọhng Awurada, k’ọchọm kw’Ubinọkpaabyi. Wa abẹ achokhu sẹ k’isekhisek kw’abạbaang p’chẹrubim. 7 Chẹrubim mbọ ammaam abạbaang pabẹ abubha ibyi s’Ikwukwur s’Echekha ining. Wa chẹrubim mbọ abubh Ikwukwur s’Ẹchekha ọttạra nsemachi sabẹ n’atima adira sẹ. 8 Nsemachi nnọ idumu tạrr ikpira k’ochẹ kw’m’akke-okke abe k’iyaan-iyaan kw’ibyi s’awurada, s’ide ibyi s’Awurada p’ayọng Awurada, ase ibyi s’asẹ ikpong. Asẹ itim ining kha tạrr ukpira chemma. 9 Wa ọttọhk f’uning k’Ikwukwur nnọ ẹtaanga kòde, oyong ata-gbẹrẹ afa p’Mosẹs kk’ugia k’ẹtaanga k’Họrẹb. Ma wọ wa Ọvaar Ubinọkpaabyi ochekhi ọnạng anạng p’Israẹl, sabẹ abin k’Ijip.

10 Masẹ afọhnẹja abin k’Ibyi s’Awurada, ebona ẹsạkha ibubha Ọchọhm kw’Ọvaar Ubinọkpaabyi. 11 Afọhnẹja ọtọhm fabẹ kákke asi ukwuru ebona, s’abạrada p’Ọvaar Ubinọkpaabyi kk’ọchọhm kwẹ afhạra.

12 Ma o, Sọlọmọn oben bẹ́, "Ọvaar Ubinọkpaabyi kk’obena bẹ́, ẹma m’uninga k’ebona ch’ipyi irungu bẹ kkạng ; 13 k’udik ọkka, amma kk’ọchọhm kw’abạrada nsia nnạng-ọ, kw’ode ibyi s’m’aruk tạrr ipimmanitor."

14 Masẹ anạng p’Israẹl phyibh atim abe ma, ọvaarnạng ọbhạkhẹ nnạm odo bẹ. 15 Ma wọ obeni bẹ́,

"Ẹtọhnga iyim ẹnạng Ọvaar Ubinọkpaabyi, kw’ode Ubinọkpaabyi kw’Israẹl, kw’kk’ọbọhk kwẹ utima usi udik kw’utim ẹmma chẹ ochekhi ọnạng otte kwaam Devid. Obeni bẹ́, 16 ‘Tạma k’iwu ch’ntim anạng paam Israẹl mbina k’Ijip, amma efhondiden k’ẹkhạma jạnẹ-jạnẹ ch’Israẹl tạm nạ́ntekha ch’m’isi ọchọhm, ọfha anạng akpobha eche chaam mạma. Okhenka, amma kk’Devid ntekha bẹ́, ọdạbh anạng paam Israẹl.’

17 "Otte kwaam Devid kk’ọkhạma kha ettem bẹ́, m’usi ọchọhm kw’anạng m’akpobha eche ch’Ọvaar Ubinọkpaabyi, kw’ode Ubinọkpaabyi kw’Israẹl. 18 Okhenka, Ọvaar Ubinọkpaabyi obeni otte kwaam bẹ́, ‘Ode udik kw’ujibh-ujibh bẹ́, akhaama ẹkka ch’ẹkpọhkhọ-ọkpọhkhọ bẹ́, asi ọchọhm kw’anạng m’akpobha Eche chaam. 19 Okhenka, ọma sạng m’asi ọchọhm ngwọ e, nnwa kwọ kw’ubin k’adima pọ, ọbạra ode isẹ sọ, wọ ode ọnạng kw’m’usi ọchọhm kw’anạng m’akpobha eche chaam.’

20 "Ọvaar Ubinọkpaabyi kk’echekha ch’ọtạk ochokha: amma kk’echo ch’otte kwaam Devid ntera. Ma o, amma n’nning ẹyạr k’ẹvaarchi ch’Israẹl, ntor k’echekha ch’Ọvaar Ubinọkpaabyi ọtạk. Amma kk’ọchọhm nsia kw’anạng m’akpobha eche ch’Ọvaar Ubinọkpaabyi, kw’ode Ubinọkpaabyi kw’Israẹl. 21 Amma kk’ibyi nsia s’Ikwukwur s’Echekha m’ininga, s’ide echekha ch’Ọvaar Ubinọkpaabyi ọttạra abaro pamạna, k’okpe kw’utim bẹ ubina k’Ijip."

Njọhm s’Sọlọmọn ose, s’otte ọchọhm ọbọhk ọnạng Ubinọkpaabyi

22 Wa Sọlọmọn obe k’ititikha s’ijabyi s’Ọvaar Ubinọkpaabyi, k’ititikha s’anạng p’Israẹl phyibh, ọmmaama mbọhk sẹ otena k’ẹrạng 23 oben bẹ́:

"O Ọvaar Ubinọkpaabyi kw’ode Ubinọkpaabyi kw’Israẹl, ọttọhk k’ẹrạng ọttạra ma isek f’obeng ọma Ubinọkpaabyi abẹ kòde. Ọma wọ n’achok echekha chọ ch’idạdaakha s’akhaam anạng pọ abẹ, p’afon ororo atima ettem-ibunguchẹ asenga abọ. 24 Ọma kk’echekha chọ ch’akhaam ọttạra ọtọhmnạng kwọ Devid, kw’otte kwaam, achokha. Ọma atim ẹmma chọ atạkha echekha njọ, oche kw’akwẹ ode chemma bẹ́, ọma kk’ẹyaakha ch’udik ngwa anạnga.

25 "Ma o, Ọvaar Ubinọkpaabyi, kw’ode Ubinọkpaabyi kw’Israẹl, chok ọtọhmnạng kwọ Devid kw’ode otte kwaam, nchekha nnọ s’atạk anạng-ẹ k’okpe kw’uwa abeni bẹ́, ‘Ọma kátwuna bẹ́, anạng-m ọnạng kw’m’otera echo chaam masẹ ọvaarnạng kw’Israẹl, de iva p’iva pọ atạk okpe k’udik kwidede, asenga k’nnạm-phyạphye k’ititikha saam, oche kw’ọma kk’asia.’ 26 Ma wọ, o Ubinọkpaabyi kw’Israẹl, tte idik sọ s’achekhi anạng ọtọhmnạng kwọ Devid kw’ode otte kwaam, ide udik ọkka.

27 Ma, Ubinọkpaabyi s’m’uruk ma ọyagbin k’udik ọkka o? Ọrạngkpaang, ọbạra kw’ogoru ọtạm wọ, khọ mókke obenga; bạra wạra ọchọhm ngwa kw’kk’nsia o! 28 Okhenka, o Ọvaar Ubinọkpaabyi kw’ode Ubinọkpaabyi kwaam, bhaanga njọhm s’amma ọtọhmnạng kwọ, ọttạra ephyema chaam ch’ikwosi. Bhaanga ẹmạng ọttạra njọhm s’amma ọtọhmnạng kwọ n’nse k’ititikha sọ chemma. 29 Tte achen pọ awonga akkeri ọchọhm ngwa k’irungu ọttạra k’ẹya. Ibyi nna s’abeni bẹ́, ‘Eche chaam m’ininga ma,’ ọfha abhaanga njọhm s’amma ọtọhmnạng kwọ nkkeri ma ibyi nna nse. 30 Bhaanga ephyema ch’ọtọhmnạng kwọ, ọttạra ch’anạng pọ Israẹl k’okpe kw’abẹ m’ase njọhm akkeri ma ibyi nnọ. Bhaanga sẹ kha ẹrạng kw’ode ibyirukhasẹ sọ. Okpe kw’abhaang sẹ, bina ma nạng bẹ.

31 "De ọnạng upini oyokh-ọbaanga kwẹ, de ode udik kw’ọbaan k’mkpon-chichi, bạra abẹ akwu bẹ́, akwu achi mkpon k’ititikha s’ijabyi sọ ma ọchọhm ngwa, 32 ninga kha ẹrạng bhaanga bẹ, abạra asi oche kw’ọbaan bẹ́, asi. Si aponga p’atọhmnạng pọ; anạng oyok kw’iponga ipyibhi ipyima kk’udik kw’kk’usia. Atte oyok kw’iponga nạnípyibha ọbọhk, ator k’etora chẹ.

33 De ọwawunanạng okhem anạng pọ Israẹl, ukwuru ipyibha ch’abẹ kk’asia k’ititikha sọ, abẹ abạra akpa nnạm ator-ọ, akwu atọhnga eche chọ, abẹ ase njọhm achin-ọ ma ọchọhm ngwa, 34 ninga kha ẹrạng bhaanga, abạra abina anạng ipyibha ch’anạng pọ Israẹl, abạra atima bẹ akpa nnạm k’isek s’uwa anạngẹ ab’otte pabẹ.

35 "De ọrạngkpaang nạnótebha ukwuru s’amma p’ọrạngkpaang akpa, s’ubin k’ipyibha ch’anạng pọ kk’ọ asia, abẹ ase njọhm ma ibyi nna, abẹ abạra anạng ẹyaakha ch’eche chọ, akpa nnạm avạra ipyibha chabẹ, ukwuru ipyima ch’kk’bẹ anạnga, 36 ninga kha ẹrạng bhaanga, abạra abina anạng ipyibha ch’atọhmnạng pọ Israẹl. Kpebhi bẹ bẹ́, abẹ aruk k’eden ch’etor-otor, abạra atebh asi k’isek s’achekhi anạng anạng pọ, masẹ okhebh fabẹ.

37 De okwo fididen, ọbạra ode ọkhạmana, otto ma isek nna, ode ọkhạmana f’akwongutọhng o, ọbạra ode agwuruwewe o, ode mpfapfa o, ọbạra ode okpe kw’awawunanạng abaabhẹ bẹ k’efhondiden chabẹ o, ode ipyibha-khira chidede, ode bẹ́ ọkhạmaana vọ ukwu, 38 de ọnạng kwidede k’ikhaana s’anạng p’Israẹl ose njọhm, ode bẹ́, ophyemi ọttọhk fidede o, de utim ọkhạnkhạmọ kw’ettem chẹ ọmmaama mbọhk sẹ otena ma k’ọchọhm ngwa, 39 ninga kha ẹrạng ch’ede ibyirukhasẹ sọ bina anạng bẹ. Si nạng ọnạng kwidede ator k’usisi kwabẹ, s’ọma asong nttem sabẹ (khiri ọma mạnkkeni wọ asong nttem s’ayokhanạng phyibh), 40 ọfha abẹ aruk k’ojora pfọ, k’okpe kwidede kw’abẹ m’aruk k’isek s’uwa anạngẹ ab’otte pamạna.

41 "De ukhikhennạng kw’nạn ọmmaana kw’anạng pọ Israẹl núdia, ubin kha edenibhir ukwu k’eche chọ, 42 sabẹ m’abhaanga eche-bạrada chọ ọttạra ibọhktọhm-bạrada sọ, ọttạra ẹfa chọ, abẹ akwu ase njọhm akkeri k’ọchọhm ngwa, 43 ninga kha ẹrạng kw’ode ibyirukhasẹ sọ bhaanga. Asi udik kwidede kw’ukhikhennạng nwọ ophyem-ọ, ọfha idifhon s’ọyagbin phyibh isonga eche chọ, ibạra ikhaama ojora pfọ oche kw’anạng pọ Israẹl akhaam. Abẹ atima ma asonga bẹ́, amma kk’ọchọhm nsia kw’abẹ m’akpobha eche chọ.

44 "De anạng pọ ata bẹ́, abẹ ata arima awawunanạng pabẹ abẹ k’ibyi sidede s’m’atọhm bẹ, de abẹ ase njọhm anạng ọma Ọvaar Ubinọkpaabyi, akkeri k’efhondiden ch’kk’atekha, ọttạra k’ọchọhm kw’kk’nsia bẹ́, abẹ akpobha eche chọ, 45 ninga kha ẹrạng bhaanga njọhm sabẹ, ọttạra ephyema chabẹ, akkaana bẹ.

46 "De abẹ asi iphyibha k’akhọ k’ititikha, s’ọnạng nạ́n ode kw’nạ́n ipyibha kạnúsi, ettem ipyibh-ọ etena bẹ abẹ, akwu atte bẹ ọbọhk anạng awawunanạng pabẹ, abẹ avạkha bẹ k’ẹmmạri atima afona kabẹ k’nkhạma s’ibhiri eden, ọbạra ode s’ifor-ofora; 47 de abẹ n’abạra afhona nttem k’isek sabẹ avạk bẹ k’ẹmmạri aben bẹ́, ‘Amạna mba kk’ipyibha ansia, amạna kk’anttia, ambạra ansi ọgban’; 48 de abẹ atim nttem sabẹ, ọttạra akpakpa pabẹ phyibh akpa nnạm ator-ọ ma isek s’awawunanạng pabẹ, p’avạk bẹ k’ẹmmạri, abẹ akkeri k’isek s’uwa anạngẹ ab’otte pabẹ, ase njọhm akkeri efhondiden ch’kk’atekha, ọttạra k’ọchọhm kw’kk’nsia bẹ́, abẹ akpobha eche chọ; 49 ninga kha ẹrạng, kw’ode ibyirukhasẹ sọ, bhaanga njọhm ọttạra ephyema chabẹ, akkaana bẹ. 50 Abina anạng anạng pọ p’kk’ipyibha asia k’akhọ k’ititikha, abạra asi bẹ́, anạng p’avạk bẹ k’ẹmmạri ase bẹ ikwosi; 51 ukwuru sabẹ ade anạng pọ, abẹ abạra ade okhebh pfọ f’atim abina k’Ijip, p’arengi k’irem s’ikhạmọ masẹ ekpon ch’eson mbaanga.

52 Tte achen pọ awonga akkeri ephyema ch’amma ọtọhmnạng kwọ, ọttạra ephyema ch’anạng pọ Israẹl, abạra akhọhmọ itọhng anạng bẹ k’okpe kwidede kw’abẹ ase njọhm agạma ayer-ọ. 53 S’ode bẹ́, ọma oyeni wọ atek bẹ k’ikhaana s’idifhon phyibh bẹ́, abẹ ade okhebh pfọ, masẹ aseng k’ọtọhmnạng kwọ Mosẹs asi ẹyaakha k’okpe kw’ọma Ọvaar Ubinọkpaabyi kw’Ọyọhng, atim ab’otte pamạna abina k’Ijip."

54 Masẹ Sọlọmọn kk’njọhm nnọ usia bẹ́ phyiibh, ọttạra k’idik phyibh s’ophyemi Ọvaar Ubinọkpaabyi, ubin k’ititikha s’ijabyi s’Ọvaar Ubinọkpaabyi k’ibyi s’wạra kk’ndwudwungu ukpikha, ọmmaama mbọhk otena k’ẹrạng. 55 Obe mạma ọyọhbh efhonfhạr ch’Israẹl phyibh itta, oben k’ẹrạng-k’ẹrạng bẹ́:

56 "Ẹtọhnga iyim ẹnạng Ọvaar Ubinọkpaabyi, kw’kk’anạng pẹ Israẹl ẹyọhng-kwokha ọnạnga oche kw’ochekhi. Ọtọhnga kwẹ gwạnọ-gwạnọ kw’oseng k’ọtọhmnạng kwẹ Mosẹs ọtạkha echekha ọkkachẹ, p’ọkhaam itwuna, kòde. 57 Tte Ọvaar Ubinọkpaabyi kw’ode Ubinọkpaabyi kwamạna, uninga mạna abẹ, oche kw’uwa uning ab’otte pamạna abẹ; tte nạngẹ mạna ọbọhk otte, nạngẹ mạna ọbạra obonu. 58 Tte ọbhạkhẹ nttem samạna antor-ẹ, ambạra ansạkha echo annạng-ẹ, ambạra anchok nnyina, ọttạra ekpebha, ọttạra ntọhna s’uwa ọnạngẹ ab’otte pamạna. 59 Tte itọhnga nna saam s’mkpaakhẹ k’Ọvaar Ubinọkpaabyi k’ititikha, isenga ifora Ọvaar Ubinọkpaabyi, kw’ode Ubinọkpaabyi kwamạna k’irungu ọttạra k’ẹya. Tte ẹma ọkkaana ọtọhmnạng kwẹ, ọttạra anạng pẹ Israẹl, otor k’idik sabẹ aroru k’iwu chidede, 60 ọfha idifhon s’iyagbin phyibh isonga bẹ́, Ọvaar Ubinọkpaabyi wọ ode Ubinọkpaabyi, ọdwạkh-ọdwạk kha kòde. 61 Tte nttem sabạnga phyibh ininga k’Ọvaar Ubinọkpaabyi, kw’ode Ubinọkpaabyi kwamạna, ọfha annuk antor k’ekpebha chẹ, ambạra nsạkha echo annạng k’nnyina s’okpe ngwa."

Ẹbọhkttia ch’ọchọhm anạng Ubinọkpaabyi

62 Wa ọvaar Sọlọmọn ọttạra anạng p’Israẹl phyibh afọhnọ nja k’ititikha s’Ọvaar Ubinọkpaabyi. 63 Wa Sọlọmọn utim mmaam nnọhna arạbh afa ukuma chi, ọttạra arạkhạmaan, ọttạra mvu nnọhna arạbh chi, ọfọhnọ ẹja ch’ẹmẹm ọnạng Ọvaar Ubinọkpaabyi. Ma wọ ọvaarnạng ọttạra anạng p’Israẹl phyibh atte ọchọhm ngwọ ọbọhk anạng Ọvaar Ubinọkpaabyi.

64 Ma iwu njọ jạnẹ, ọvaarnạng otek ibyi rạnẹ ma ottemkwẹ kw’ẹttọhmma-ttem k’ititikha s’ọchọhm kw’Ọvaar Ubinọkpaabyi, uninga ma usi nnạnga ikkạmasẹ, ọttạra nnạnga s’agwu, ọttạra iyaak s’nnạnga s’ẹmẹm. Wa usi oche ngwọ ukwuru bẹ́, wa ijabyi s’brons s’ining k’ititikha s’Ọvaar Ubinọkpaabyi isạk iyọhnga bẹ́, ivạkha nnạnga ikkạmasẹ, ọttạra nnạnga s’agwu, ọttạra iyaak s’nnạnga s’ẹmẹm.

65 Wa Sọlọmọn usi erobha ma okpe ngwọ, ọttạra efhonfhạr ch’Israẹl phyibh, tạma k’anạng p’Lebo-Hamat, tạrr ukpira k’ẹkpẹme ch’Ijip. Wa abẹ atim iwu isenọfa asi erobha njọ k’ititikha s’Ọvaar Ubinọkpaabyi, abẹ attạra adạkhẹ iwu isenọfa idwạkh-ọdwạk. Phyi-phyibh wa abẹ asi erobha njọ iwu sọnachi. 66 Iwu ikwu echobha, ọtọhm anạng mbọ abẹ abhạna. Abẹ ado ọvaarnạng, akpa nnạm abhạna k’ichọhm sabẹ, k’orebhada, ọttạra ottennebh awẹ, ukwuru idik-jibhada phyi-pyibh s’Ọvaar Ubinọkpaabyi kk’usia ọnạng ọtọhmnạng kwẹ Devid, ọttạra anạng pẹ Israẹl.