1 Wa Saul obeni nnwa kwẹ Jonatan, ọttạra atọhmnạng p'ẹma Saul phyibh bẹ́, abẹ afhọ Devid. Okenkha, wa Jonatan usi Devid eyodikkobh-ttem chẹ, 2 Jonatan n'ọtwạrọ Devid itọhng, ọbẹ́, "Otte kwaam Saul n'oror eden ch'm'ọfhọ-ọ e. Tik ifor sọ o, uphyini k'ekpebha rạbh taror ibyi attubha. 3 Amma ọttạra otte kwaam m'nyin k'iyaan anta ambe k'ibyi s'attubh, ọfha mkpaakh-ẹ udik ukwuru ọma, ọfha mmaanga ukhira kw'm'ubhina, ọfha nkwu mkpaakh-ọ."

4 Wa Jonatan ọkpaakhẹ ijibha ch'Devid kk'usia, ọnạng otte Saul, oben-ẹ bẹ́, "Ọma ọvaarnạng, ọtọhmnạng kwọ Devid ipyibha kási, ukwuru bẹ́ ẹma khọ ipyibha tạm núsia, ayongu ma, ọma kk'iru sididen atạkha k'idik s'kk'usia. 5 Ẹma wa ocher obo k'okpe kw'ọfhọ oPhilistiya-nạng nwọ. Ọvaar Ubinọkpaabyi ọnạngẹ Israẹl phyibh ẹkkaana ch'atim achen pọ ase, ettem ẹbạra erebh-ọ. Ma oseng yạn kw'm'asi ọnạng masẹ Devid kw'mbọhk iwur-uwur ipyibha, kw'nabạra afhẹ-ẹ k'ajaakha o?"

6 Wa Saul ocher udik kw'Jonatan ọkpaakhẹ, ọtạkha echekha oben bẹ́, "Nchekhi k'eche ch'Ọvaar Ubinọkpaabyi kw'urukhu akpen bẹ́, abẹ Devid máfhọ."

7 Ma wọ Jonatan oyeri Devid ọkpaakh-ẹ nttọhna s'ẹma ọttạra otte bẹ́ phyibh, bạra n'utim-ẹ ọkpa nnạm k'Saul, Devid ọbạra uruk ọttạra Saul oche kw'uwa urukhu.

8 Wa ekpong etto dạkhẹ, Devid ọta urima aPhilistiya abẹ, ọfhọ bẹ k'ọsaabh tạrr abẹ arạbh arikh-ẹ.

9 Okhenkha, masẹ Saul uning ẹyạr k'akhẹ k'ọchọhm, ọkhọhn apfẹ k'ọbọhk, wa iguguma-tạma s'ibin k'Ọvaar Ubinọkpaabyi inwẹ-ẹ. Okpe kw'Devid n'ukhir ọgaang-gang, 10 Saul okhong bẹ́, ukhum-ẹ ọkhọhn ọmaana k'udimokpon, okhenka, Devid ọrạbhọ ọnnaanga. Ma irungu njọ, Devid ọrạbhọ ọnnaanga, ọkkaana akpen pẹ.

11 Wa Saul ọtọhmọ ajunung bẹ́, abẹ ata abaabha ọchọhm kw'Devid k'irungu, ọfha abẹ afhẹ-ẹ k'ekpebha. Okhenkha, wa Mikal kw'ode ikwanạng kw'Devid, ọtwạr udim Devid itọhng, ọbẹ́, "De nạn nárora bẹ́, ape ma irungu ch'chemma, nemi eden rạbh akkaana akpen pọ, deja, uphyini abẹ m'afhọ-ọfhọ e." 12 Ma wọ Mikal utim ufhum-ma ọkkaana Devid ọrạbh ọsạkha, ọnnaanga. 13 Mikal o, n'ọtạk ọkpatanwa ururu k'ibhikha, ọtạkha ẹnọhmakpa ububha wẹ, ọbạra ọtạkha wẹ ọnạna echo k'avuphyạbha.

14 Masẹ Saul ọtọhmọ ajunung mbọ bẹ́, abẹ ata avạkha Devid, Mikal n'otekhi, bẹ bẹ́, "Ọmmẹ-ẹ ọmma e."

15 Ma wọ Saul ọtọhmọ ajunung mbọ bẹ́, abẹ akpa nnạm k'Devid, oben bẹ bẹ́, "Adir-ẹ ma ibhikha njọ chẹ akken-m mfhẹ-ẹ." 16 Okhenkha, masẹ atọhmnạng ajunung mbọ n'anwa k'ọchọhm kw'Devid, kkeri ọkpatanwa kha ibhikha, kw'abẹ anạn echo k'avuphyạbha.

17 Wa Saul n'ọbạbhọ Mikal bẹ́, "Asi yạn abọhr-m abạra asi ọwawunanạng kwaam ọrạbh o?"

Mikal ọpọhn-ẹ bẹ́, "Ẹma oben-m bẹ́, ‘Tte-m ọbọhk nnạbh, deja, m'mfh-ọfhọ e.’ ’’

18 Masẹ Devid kk'ọrạbha ọnnaanga, ọta okhebha Samwẹl k'Rama, ọtạkha udik kwidede kw'Saul kk'ẹ usia ọkpaakh-ẹ. Ma wọ ẹma ọttạra Samwẹl asengi afona k'Naiyọt ata aruk ka. 19 Wa ẹkkaabha ikpir Saul bẹ́, "Devid uning k'Naiyọt k'ukhubha kw'Rama e." 20 Ma wọ Saul ọtọhmọ ajunung bẹ́, abẹ ata avạkha Devid akken-ẹ. Okhenkha, masẹ abẹ ase ikhaana s'asi-ẹyaakha n'asi ẹyaakha o, ọttạra Samwẹl kw'obe masẹ utim-eden kwabẹ, Iguguma s'Ubinọkpaabyi ẹsạkha ẹnwa ajunung mbọ p'Saul, abẹ attạra akpaak ettem ch'Ubinọkpaabyi. 21 Wa Saul ọbhaang udik ngwọ, ọbạra ọtọhm ajunung adwạkh-ọdwạk p'asaabhẹ ayọhnga mbọ p'ocheden ọtọhm, ayok mbọ abạra asi-ẹyaakha. Ma o, Saul ọbạra ọtọhm ikhaana s'ittong ittaan, abẹma mbọ abạra asi-ẹyaakha oche kw'ayok asi. 22 K'ekpongannạm-kpe, ẹma oyeni n'ubin k'akhẹ ifor ofona k'Rama, k'isipe chididen ch'ining k'Seku. Ọbạbh bẹ́, "Samwẹl ọttạra Devid aning mạn yeri?"

Abẹ aben bẹ́, "Abẹ aning k'Naiyọt k'ẹkhạma ch'Rama e."

23 Ma o, Saul oseng ofona k'Naiyọt k'Rama. Okhenkha, Iguguma s'Ubinọkpaabyi ẹsạk ẹnwa dạkhẹ ẹma Saul, ọtạma ma n'osenga usi ẹyaakha tạrr ukpira k'Naiyọt. 24 Wa ọwạr ọnọhma-wuram kwẹ, ọbạra usi ẹyaakha ma ititikha s'Samwẹl. N'uning ẹkpakpa-eje ma irungu njọ tạrr ukpira k'ẹya. Ẹgwọ usi anạng n'abạbh bẹ́, "Saul ọgba ọttạra k'ikhaana s'asi-ẹyaakha o?"