1 Samwẹl 8

Anạng p’Israẹl aroru ọvaarnạng

1 Masẹ Samwẹl kk’ọtạma, n’orengi ajunungva pẹ abẹ ade akpaar-aponga p’Israẹl. 2 Ocheden-nwa kwẹ wa okpen Joẹl, onyema okpena Abija, wa abẹ ade akpaar-aponga k’Beershẹba. 3 Okhenkha, wa ajunungva pẹ ntwạkhọ sẹ nátora. Abẹ n’atima ẹfhạra-den abhạkhẹ aponga, ukwuru ngwu sabẹ n’achi.

4 Ma wọ adennạng p’Israẹl phyibh ayeri ayok atobha, abẹ afona akhebha Samwẹl k’Rama. 5 Abẹ aben-ẹ bẹ́, "Ọma kk’atạma, ajunungva pọ ntwạkhọ sọ k’nátor, ma wọ, m’anạng mạna ọvaarnạng kw’m’ọdạbh mạna, oche kw’idifhon idwạkh-ọdwạk phyibh ikhaam."

6 Okhenkha, masẹ abẹ abeni bẹ́, "Nạng mạna ọvaarnạng kw’m’ọdạbh mạna," wa udik ngwọ Samwẹl ettem nórebha. Ma wọ ose njọhm ọnạng Ọvaar Ubinọkpaabyi. 7 Ọvaar Ubinọkpaabyi obeni Samwẹl bẹ́, "Khọmọ bẹ itọhng k’udik kwidede kw’abẹ n’akpaakh-ọ. Ọma sạng kw’abẹ afhumu e, amma wọ kw’abẹ afhumu masẹ ọvaarnạng kwabẹ e. 8 Tạma s’ntim bẹ mbina k’Ijip tạrr ukpira ma, oche ngwọ kw’abẹ n’akpa nnạm avạr-m abạra akpobha ikha, mạnna wọ kw’abẹ n’asi-ọ mạma e. 9 Ọma Khọmọ bẹ itọhng, okhenka, twạr bẹ itọhng mororo, si abẹ asonga ukhira kw’ọvaarnạng kw’m’ọdạbh bẹ m’usi bẹ."

10 Wa Samwẹl ọtạk idik nnọ phyibh s’Ọvaar Ubinọkpaabyi ọkpaakhẹ, ọkpaak anạng mbọ p’n’aror ọvaarnạng abạbh-ẹ. 11 Obeni bẹ bẹ́, "Ma wọ ode udik kw’ọvaarnạng kw’m’ọdạbh bạnga m’usi: m’ọtạkha ajunungva pabạnga k’ẹfa ade atọhmnạng p’ijaar s’nnyạnyaang n’itwạr, ọttạra ayaar-nnyạnyaang. Abẹ mạna achi ijaar sẹ eden. 12 M’usi ayok bạnọ adecho p’akpongnạng k’nnọhna k’nnọhna, bạnọ adecho p’akpongnạng arạbh afa ukuma jobh, arạbh afa ukuma jobh. M’otekha ayok bạnọ ade anạng p’m’atubh ekpo pyẹ, abẹ abạra asi iphya sẹ. Oyongu ma, m’otekha ayok bạnọ ade atepa p’m’adwuk ekpongkpo pyẹ, ọttạra ẹtọhmkpo p’ijaar sẹ. 13 M’ọtạkha apanạngva pabạnga abẹ n’asi ana p’arebhi iruk anạng-ẹ, abạra awọhn-ichiakpo, abạra asi abrẹd anạng-ẹ. 14 Ẹma m’ọvạkha bạnga iwonu sabạnga ọna, ọttạra iwonu s’grep, ọttạra s’oliv ọna, ọtạkha ọnạng atọhmnạng pẹ. 15 Ẹma m’ọtạkha ukwung gwạnọ k’akwung jobh p’arasẹ pabạnga, ọttạra agbạroko pabạnga, ọnạng ayok-adennạng pẹ, ọttạra atọhmnạng pẹ. 16 M’ọtạkha atọhmnạng pabạnga p’ajunung ọttạra p’ipanạng ọttạra mmaam sabạnga s’ijibhi ifor, ọttạra nnyạnyaang sabạnga phyibh utima usi itọhm sẹ. 17 M’ọtạkha ibyi rạnẹ k’ibyi jobh k’arạkhạmaan pabạnga, ọbạra utima bạnga usi abira pẹ. 18 Okpe kw’kk’obenga, abạnga m’agạma aror ọnạng kw’m’ọkkaana bạnga k’mbọhk s’ọvaarnạng kw’abạnga kk’arenga e, okhenka, ma iwu njọ, Ọvaar Ubinọkpaabyi bạnga ẹmma m’ọtọhbh."

19 Okhenkha, anạng mbọ Samwẹl itọhng náchera akhọmọ. Abẹ aben bẹ́, "Mesesé! Amạna mba annoru ọvaarnạng kw’m’ọdạbh mạna e. 20 Ma wọ m’ande masẹ idifhon idwạkh-ọdwạk phyibh de ankhaam ọvaarnạng kw’m’uchi mạna eden, kw’m’ọbạra urima mkpong samạna."

21 Masẹ Samwẹl ọbhaang idik nnọ phyibh s’anạng mbọ akpaakhẹ, ọbạra ọtạkha sẹ ọkpaak Ọvaar Ubinọkpaabyi. 22 Ma wọ Ọvaar Ubinọkpaabyi ubhin bẹ́, "Chera oche kw’abẹ abeni, nạng bẹ ọvaarnạng."

Ma wọ Samwẹl n’obeni ajunung p’Israẹl bẹ́, "Tte ọnạng ọnạng ọbhạna k’akhẹ k’ofhon."