1 Samwẹl 29

APhilistiya afhumu Devid

1 Wa aPhilistiya atobh akpongnạng pabẹ k’Aphẹk, anạng p’Israẹl abạra abhing k’efhobh ch’Jẹzrẹl. 2 Masẹ adecho p’aPhilistiya n’asenga k’ikhaana sabẹ arạbh k’asen k’asen, ọttạra k’nnọhna k’nnọhna, Devid ọttạra ajunung pẹ n’asenga k’nnạm-nnạm kw’Akish. 3 Adecho p’aPhilistiya abạbhọ bẹ́, "AHiburu mba n’asi mbạng ma o?"

Akish ubhina bẹ́, "Devid kw’ode odecho wạnọ kw’Saul kw’ode ọvaarnạng kw’Israẹl wọ ma e. Kk’abamẹ uninga oyongu cho gwạnọ, s’obobe uninga abamẹ tạrr ukpira mantọhmma, ipina tạm nọ́khaama."

4 Okhenkha, adecho p’akpongnạng p’aPhilistiya ọdwạkhọ bẹ otena Akish abẹ, abẹ aben-ẹ bẹ́, "Ben ujunung nwọ ọkpa nnạm k’ofhon kw’kk’ẹ anạnga. Nọ́baana bẹ́, ọtwạn mạna abẹ ọta ekpong, deja m’ọbhạkhẹ urima mạna abẹ k’akpong-chen. M’osenga yạn usi ettem erebh aro kwẹ, de nạn achokpa p’ajunung pamạna nútima o? 5 Devid nwọ sạng ma kw’abẹ akkọhnọ k’ẹmạng aben bẹ́,

" ‘Saul kk’nnọhna sẹ ọfha,

Devid kk’anạng nnọhna ibhikha-song sẹ ọfha.’ "

6 Ma wọ Akish oyeri Devid oben-ẹ bẹ́, "S’Ọvaar Ubinọkpaabyi urukhu akpen, kk’nsia bẹ́, ade oyok-ikhaana ọkkakwẹ, amma wạra ọdaakh-m bẹ́, antwạn ansi ọtọhm f’akpongnạng e. Tạma k’iwu ch’arạbhọ ator-m tạrr ukpira ma, ipina k’akhọ tạm nạ́nsia, okhenka ode bẹ́, adạbh-ofhon náchera bẹ́, ata ekpong e. 7 Kpa nnạm abhạna k’idira, udik k’asi kw’m’ọdwạkhọ adạbh-ofhon p’aPhilistiya o."

8 Ma wọ Devid n’ọbạbhọ bẹ́, "Nsi mbạng o? Bạng ipina jọ kk’asia k’amma ọtọhmnạng kwọ tạma k’iwu ch’uwa nnạbhọ ntor-ọ, tạrr ukpira ma o? Ukwuru yạn kw’nạn awawunanạng p’aro kwaam kw’ode ọvaarnạng abẹ m’nnima?"

9 Akish ubhina Devid bẹ́, "Amma nsong ma bẹ́, ipina k’ititikha saam kákhaam masẹ itọhmọ s’Ubinọkpaabyi s’nạn ipina ikhaam; udik ode bẹ́, adecho p’akpongnạng p’aPhilistiya abeni bẹ́, ‘Ẹma nọ́baana bẹ́, ọtwạn mạna abẹ ọta ekpong e.’ 10 Ma wọ, uphyini k’ekpekpebha, tima atọhmnạng p’aro kwọ p’atwạnọ abọ, abhạna okpe kw’iwu k’ẹttaana."

11 Ma wọ Devid utim anạng pẹ ubina k’ekpekpebha ọkpa nnạm ọbhạna k’ẹkhạma ch’aPhilistiya, aPhilistiya abạra afona k’Jẹzrẹl.