1 Wa ọkpaakhadik kw'Samwẹl ọnyaamẹ ọbaabha Israẹl.

Ma okpe ngwọ, wa anạng p'Israẹl afon bẹ́ ata arima aPhilistiya abẹ. Anạng p'Israẹl abhingi k'Ẹbẹneza, aPhilistiya abhing k'Aphẹk. 2 APhilistiya atọhmọ ikhaana s'akpongnạng pabẹ bẹ́ abẹ ata attạma anạng p'Israẹl abẹ. Masẹ ekpong ẹnyaamẹ, wa aPhilistiya akhem anạng p'Israẹl, abẹ afhọ anạng nnọhna jobh k'akpongchen. 3 K'okpe akpongnạng p'anaang k'ekpong n'akwun k'ibyibhingasẹ, adecho p'Israẹl n'abạbhọ ayok bẹ́, "Oseng yạn kw'Ọvaar Ubinọkpaabyi n'otte aPhilistiya ọbọhk abẹ akhema mạna chemma o? Tte anta andira ikwukwur s'echekha ch'Ọvaar Ubinọkpaabyi k'Shilo, ọfha itwạn mạna abẹ, ibạra ikkaana mạna k'mbọhk s'awawunanạng pamạna."

4 Ma wọ, abẹ atọhmọ akpongnạng kha Shilo, abẹ ata adira ikwukwur s'echekha ch'Ọvaar Ubinọkpaabyi kw'Ẹfa phyibh, kw'uning k'ngekha s'achẹrubim, atima akwu. Wa ajunungva afa p'Ẹli, p'ade Hophini ọttạra Phinẹhas aning ma ọttạra ikwukwur nnọ s'echekha ch'Ọvaar Ubinọkpaabyi.

5 Masẹ ikwukwur s'echekha ch'Ọvaar Ubinọkpaabyi ikpir k'ibyibhingasẹ, anạng p'Israẹl phyibh awur ẹmạng ch'enyengi isisek. 6 Masẹ aPhilistiya abhaang ẹkhọr njọ, abẹ abạbh bẹ́, "Bạng ẹmạng khira jọ abẹ n'awur k'ibyibhingasẹ s'aHiburu o?"

Masẹ abẹ abhaang bẹ́, ikwukwur s'echekha ch'Ọvaar Ubinọkpaabyi kk'ikpira k'ibyibhingasẹ s'aHiburu, 7 aPhilistiya ojoru bẹ, abẹ aben bẹ́, "Ọkha mạnna vunọ kk'ukpira k'ibyibhingasẹ e. Kk'andima e. Udik demakwẹ ngwa tạma núyina bạra o. 8 Akwẹ k'upyibh ọnạng mạna! Mbẹ, anẹ wọ m'ọrạbha mạna k'mbọhk s'ikha nna s'ikhaam ẹfa mạnna o? Ikha nnọ rọ wa isi bạra ọkhạnkhạmọ k'ukhira-k'ukhira otto okhebha anạng p'Ijip k'uminkpa e! 9 Abạr ettem, aPhilistiya! Asi ijunung-ijunung, deja, abạnga m'abhạkhẹ ade abira p'aHiburu, oche kw'uwa abẹ kk'adia anạng bạnga. Akpọkhọ ifor mas'ajunung arima irima!"

10 Ma wọ aPhilistiya arim irima, abẹ akhema anạng p'Israẹl, ọnạng-ọnạng ọrạbh ọta uttubha k'ukkira kwẹ. Wa ẹnạngfha ẹbạrẹ tạrr, akpongnạng p'aseng k'mfhok p'Israẹl adimi akpira nnọhna arạbh attaan ukuma chi. 11 Wa aPhilistiya avạk anạng p'Israẹl ikwukwur s'echekha ch'Ubinọkpaabyi ana. Ajunungva afa p'Ẹli p'ade Hophini ọttạra Phinẹhas abạra ape.

12 Ma iwu njọ jạnẹ, ọnạng mạnna wạnọ kw'ubin k'efona ch'Bẹnjamin ọrạbhọ k'akpongchen ofona k'Shilo, ọvạra f'ifor k'ọyaakha, adọngọ abẹ kha echo. 13 Masẹ ukwu ukpira, okhebha Ẹli kw'uning ẹyạr k'ogbera kwẹ n'okkeri k'eden, ojora awẹ kha ettem, ukwuru ikwukwur s'echekha ch'Ubinọkpaabyi. Masẹ ujunung nwọ ọnwa k'ofhon, ọbạra ọkpaak anạng idik s'kk'ittia, ẹmạng etto k'ofhon ubungukwẹ.

14 Ẹli ọbhaang ẹgạma njọ, n'ọbạbhọ bẹ́, "Ẹgạma nja iyini yạn o?"

Ọnạng nwọ udwukha ofona okhebha Ẹli, 15 kw'ode icho arạbh annebung ukuma chikhanttaan, ọbạra ọkpa achen. 16 Ọnạng nwọ ọkpaakhẹ Ẹli bẹ́ "Napra mbina k'akpongchen ma. Nnạbhọ kha chemma nwama e."

Ẹli n'ọbạbhọ bẹ́, "Nnwa kwaam, bạng udik gwọ otto o?"

17 Ujunung nwọ kw'utim ẹkkaabha njọ ukwu n'ubhin-ẹ bẹ́, "Anạng p'Israẹl arạbhọ k'ititikha s'aPhilistiya, akpongnạng kk'mạna apua k'ọsaabh. Ajunungva pọ afa p'ade Hophini ọttạra Phinẹhas kk'abạra apua, ikwukwur s'echekha ch'Ubinọkpaabyi kk'ifona a."

18 Masẹ ujunung nwọ ọkpaakhẹ udik opye ẹmma k'ikwukwur s'echekha ch'Ubinọkpaabyi o, Ẹli ọbạng-ọbạnga k'ogbera kw'uning ẹyạr k'ẹbaakhamma, otto nnạm-nnạm bẹ gwuroong, ọphyạkhẹ ikhukhora, okhebha ma, ope, ukwuru s'kk'ọtạma, ọttạra k'adọbh p'ọkhaam. Wa Ẹli kk'Israẹl ọdạbha k'icho arạbh-afa.

19 Wa ọnyẹ kwẹ, kw'ode ikwanạng kw'Phinẹhas, utim k'ifhạr s'okpe kk'ofora kw'm'ọmaan. Masẹ ọbhaang ẹkkaabha njọ bẹ́, abẹ kk'ikwukwur s'echekha ch'Ubinọkpaabyi avạkha atima afona, ọttạra bẹ́, otte-ofon-udim ọttạra udim kwẹ kk'apua, ọmaan onnemeden ọtạm-ẹ sisi, okhebha ma, ọmaan. Okhenkha, wa ọmaan ọnẹ-ẹ ẹfa. 20 Masẹ n'abạra ope, ipanạng p'n'atikh-ẹ ọmaan aben-ẹ bẹ́, "Tte nạng-ọ ojor khiri kk'ujunungnwa amaana." Okhenkha, bẹ ẹmma nọ́tọhbha, bẹ itọhng nọ́bra ọkhọma.

21 Wa okpe nnwa nwọ Ikabọd, ọbẹ́, "Abrada p'Israẹl kk'adima," ukwuru ikwukwur s'echekha ch'Ubinọkpaabyi s'aPhilistiya avạk atima afona, ọttạra obo kw'otte-ofon-udim, ọttạra udim kwẹ. 22 Ukwu oben bẹ́, "Abrada p'Israẹl kk'adima, ukwuru bẹ́ abẹ kk'ikwukwur s'echekha ch'Ubinọkpaabyi avạkha atima afona."