1 Ma wọ ajunung p'Kiriyat-Jẹrim ata atạkha ikwukwur s'echekha ch'Ọvaar Ubinọkpaabyi, avura afona k'okpecho k'ibyi s'ọchọhm kw'Abinadab uning. Wa abẹ atạk Eleaza kw'ode ujunung-nwa kw'Abinadab anạna ọbọhk k'echo bẹ́, okkeri ikwukwur s'echekha ch'Ọvaar Ubinọkpaabyi.

2 Wa ikwukwur nnọ s'echekha ining k'Kiriyat-Jẹrim k'okpe kw'ubhir-ubhir. Phyi-phyibh wa asẹ ining icho ẹrạbh. Ma wọ anạng p'Israẹl n'aning k'ikwosi, abẹ aror eden ch'abẹ m'asenga ator Ọvaar Ubinọkpaabyi dạkhẹ. 3 Wa Samwẹl obeni anạng p'Israẹl phyibh bẹ́, "Ode abạnga aben bẹ́, akpa nnạm ator Ọvaar Ubinọkpaabyi ọttạra nttem sabạnga phyibh, abạnga arengi ifor sabạnga k'ikha s'idifhon idwạkh-ọdwạk, ọttạra akpatava p'Ashtọrẹt, abạnga m'abạra atte ifor sabạnga ọbọhk anạng Ọvaar Ubinọkpaabyi, abạra akpobha ẹma mạnkkeni. M'ọnạng bạnga ẹkkaana k'irem s'abanga n'adọhbh k'aPhilistiya k'mbọhk." 4 Ma wọ anạng p'Israẹl atte ikha s'Baal ọttạra akpatava p'Ashtọrẹt ọbọhk, n'akpobha Ọvaar Ubinọkpaabyi mạnkkeni.

5 Ma wọ Samwẹl obeni bẹ́, "Atobha anạng p'Israẹl phyibh k'Mizpa, amma m'nse njọhm nnạng Ọvaar Ubinọkpaabyi k'abạnga k'ncho." 6 Masẹ abẹ kk'atobha k'Mizpa, abẹ atwạr asi abyenga ma ititikha s'Ọvaar Ubinọkpaabyi. Ma iwu njọ, abẹ ayim okwo, abạra ayaakhẹ mpyibha sabẹ, aben bẹ, "Amạna mba kk'anttia k'ititikha s'Ọvaar Ubinọkpaabyi." Wa Samwẹl ode ọdạbhẹ kw'Israẹl k'Mizpa.

7 Masẹ aPhilistiya abhaang bẹ́, anạng p'Israẹl kk'atobha k'Mizpa, avaar p'aPhilistiya ado ifor ọfha abẹ ata arima bẹ abẹ. Masẹ anạng p'Israẹl abhaang nttọhna nnọ, ojora ọvạkha bẹ, ukwuru aPhilistiya. 8 Wa anạng p'Israẹl n'abeni Samwẹl bẹ́, "Nạng-ọ obhemi k'atim jạjọhm khamạna k'ncho, anạng Ọvaar Ubinọkpaabyi, kw'ode Ubinọkpaabyi kwamạna, ọfha ọkkaana orengi mạna k'ibira ch'aPhilistiya." 9 Osenga ma, Samwẹl ọtạkha ọrạkhạmaan-nwa kw'utim ọjaabh ẹba, ọnạng Ọvaar Ubinọkpaabyi k'ubungu masẹ ẹnạnga ẹkkạmachẹ. Wa ose njọhm ọnạng Ọvaar Ubinọkpaabyi k'ncho s'anạng p'Israẹl, Ọvaar Ubinọkpaabyi ọbhaang-ẹ.

10 Masẹ Samwẹl n'ọfọhnọ ẹja ch'ẹnạnga ẹkkạmachẹ njọ, aPhilistiya asenga afora anạng p'Israẹl, ọfha abẹ arima bẹ abẹ. Okhenkha, ma iwu njọ, Ọvaar Ubinọkpaabyi ọtọhmọ ẹbhaamkpon ẹtta itum k'ẹrạng-k'ẹrạng bẹ gbạraangng, utima oge aPhilistiya ojora k'ifor. 11 Osenga ma, anạng p'Israẹl arạbh ayin k'iyaan k'Mizpa akhubh aPhilistiya tạrr abẹ avạkha bẹ afhọ k'eden-udumudum, tạrr abẹ akpira k'isekh-isek kw'Bẹt-Kar. 12 Wa Samwẹl udir ẹta ofo k'ottemkwẹ kw'Mizpa ọttạra Shen. Oyeri chẹ Ẹbẹneza, ọbẹ, "Ọvaar Ubinọkpaabyi kk'mạna ọkkaana tạrr ukpira mantọmma." 13 Ma wọ anạng p'Israẹl akhem aPhilistiya, abẹ ofhon kw'Israẹl dạk nákke achi.

K'akpen p'Samwẹl phyibh, wa Ọvaar Ubinọkpaabyi uwunu aPhilistiya.

14 Ifhon s'uwa aPhilistiya kk'achia tạma k'Ẹkrọn tạrr ukpira k'Gat, anạng p'Israẹl abạra akpa nnạm atạkha sẹ bẹ́, phyibh. Abẹ abạra akkaana ayok-ọbaanga pabẹ k'mbọhk s'ibira s'aPhilistiya, osenga ma, wa anạng p'Israẹl ọttạra anạng p'Amọr n'arukhu k'ẹmẹm.

15 Samwẹl ọdạbhẹ Israẹl k'akpen pẹ phyibh. 16 Cho kwidede, n'osenga k'ifhon k'ifhon, tạma k'Bẹtẹl akwu akpira k'Gilgal, tạrr ukpira k'Mizpa, usi aponga p'anạng p'Israẹl ma ọkpaarẹ ngwọ phyibh. 17 Okhenkha, wa okpe kwidede kw'Samwẹl ọkpa nnạn k'Rama, k'ibyi s'usi uruk kwẹ, n'usi adạkhẹ aponga p'anạng p'Israẹl ma. Ma wọ kw'uwa usi ijabyi ọnạng Ọvaar Ubinọkpaabyi.