1 Ma okpe ngwọ, aPhilistiya atobh akpongnạng pabẹ bẹ́, abẹ arima anạng p'Israẹl abẹ. Akish obeni Devid bẹ́, "Songa bẹ́, ọma ọttạra anạng pọ m'ator-m ekpong o."

2 Devid oben bẹ́, "Tte akwẹ ode oche ngwọ, napra wọ m'ase ọttọhk f'amma ọtọhmnạng kwọ m'nkke nsi."

Akish ubhina bẹ́, "Ọbaan ma, amma bạra nsi-ọ ade okker-akpen-paam tạrr ipimmanitor."

3 Ma o, Samwẹl ukwu ope, abẹ annọhng-ẹ k'Rama kw'ode ofhon kwẹ, anạng p'Israẹl phyibh atima nkwuna sẹ. Wa Saul kk'abọhnganạng ọttạra anạng p'n'aye okkewạra ukhubha k'Israẹl.

4 APhilistiya atobh, abẹ asi ibyibhingasẹ k'Shunẹm. Okhenkha, Saul ọbạra otobha anạng p'Israẹl phyibh, abẹ asi ibyibhingasẹ k'Gilboa. 5 Okpe kw'Saul ose akpongnạng p'aPhilistiya, ojor-ẹ, opoma ọnwẹ-ẹ k'ettem. 6 Saul n'ọdwạnọ Ọvaar Ubinọkpaabyi, okhenka, Ọvaar Ubinọkpaabyi khẹ ẹpọhna nọ́nạnga, tạma k'idachen kpira k'ọsẹ bhạbhạrẹ, tạrr oseng k'asi-ẹyaakha. 7 Ma wọ Saul n'obẹni anạng p'n'asi ọtọhm k'isekhisek kwẹ bẹ́, "Abạnga aror-m ikwanạng kw'n'oye okkewạra, ọfha nta ndwạn-ẹ."

Abẹ aben bẹ́, "Ikwanạng-khira nwọ uning k'Ẹndọr."

8 Ma wọ, Saul ofhon ẹnya chẹ, ọtạkha ẹdwạkh-ọdwạk oge ọfha abẹ nạngẹ atini. Ma irungu njọ, ẹma ọttạra ajunung afa atwạn afona k'okkewạra-kwanạng nwọ. Oben-ẹ bẹ́, "Dwạn upfhura-nạng nạng-m, abạra asi nwọ kw'nyeri eche uyin."

9 Okhenkha, ikwanạng nwọ ubhin-ẹ bẹ, "Ọma kk'asonga k'udik ọkka bẹ́, Saul kk'anạng p'n'aye okkewạra, ọttạra abọhnganạng p'ofhon ngwa ukhubha phyibh. Ukwuru yạn kw'abạnga n'aro ọmma achokh-m bẹ́, mpe o?"

10 Ma wọ Saul ochekhi ọnạng-ẹ k'eche ch'Ọvaar Ubinọkpaabyi bẹ́, "K'udik ọkka, s'Ọvaar Ubinọkpaabyi urukhu akpen, ọnạng kw'm'usi-ọ ọttọhk ukwuru udik ngwa kòde."

11 Ma wọ ikwanạng nwọ n'ọbạbh-ẹ bẹ́, "Anẹ wọ kw'aroru bẹ́, nsi uyin o?" Ubhin-ẹ bẹ, "Si Samwẹl uyin."

12 Masẹ ikwanạng nwọ ose Samwẹl o, ọwạmọ k'ẹrạng oben Saul bẹ́, "Ukwuru yạn kw'abọhr-m o? Ọma ade Saul!"

13 Ọvaarnạng oben-ẹ bẹ́, "Tte nạng-ọ ojor. Ase mbạng?"

Ikwanạng nwọ ubhin Saul bẹ́, "Nse upfhura-nạng kw'uyini k'epekwur."

14 Ọbạbh-ẹ bẹ, "Okher bạng ọttọhk?"

Ikwanạng nwọ ubhin-ẹ bẹ́, "Okher ujunung kw'kk'ọtạma, kw'oge ọnọhma-wuram."

Ma wọ Saul n'osong bẹ́, Samwẹl wọ, osenga ma, ọrạkha uttima ititikha k'isisek.

15 Samwẹl oben Saul bẹ́, "Ukwuru yạn kw'n'aphyaang-m ẹmma, abạra asi-m mphyạbha k'epekwur o?"

Saul ọpọhn-ẹ bẹ́, "Masẹ ase-m ma, nning k'ọyạyạkhẹ nwa kw'kk'ọbạra. APhilistiya n'arima abamẹ, ọttạra bẹ́, Ubinọkpaabyi kk'nnạm ọkpa ọvạr-m e. Dạk kaam ẹpọhna k'nọ́nạng k'adachen ọttạra k'asi-ẹyaakha. Ẹgwọ usi bạra nyer-ọ bẹ, atẹkh-m oche kw'm'nsi."

16 Samwẹl oben bẹ́, "Ukwuru yạn kw'akwu adwạn-m o, Masẹ Ọvaar Ubinọkpaabyi kk'nnạm ọkpa ọvạr-ọ, ọbạra ode ọwawunanạng kwọ, ẹgwọ kw'n'akwu amma bạbạbh o? 17 Ọvaar Ubinọkpaabyi kk'usia k'oche kw'uwa utim-m usi eyaakha bẹ́, m'usi. Ọvaar Ubinọkpaabyi kk'ẹvaar ọtạkha k'akhọ-ọ k'mbọhk, ọnạng oyok ọbaanga kwọ, kw'ode Devid. 18 Ukwuru s'nạn asia oche kw'Ọvaar Ubinọkpaabyi ọtọhnọ bẹ́, asi, bẹ́, adimi anạng p'Amalẹk ọttạra itirakpo pyabẹ phyibh, akwẹma gwọ usi Ọvaar Ubinọkpaabyi usi-ọ oche ngwa chemma. 19 Ọvaar Ubinọkpaabyi m'ọtạkha ọma ọttạra anạng p'Israẹl oge k'mbọhk s'aPhilistiya. Ma wọ, k'iwu ch'uphyini, ọma ọttạra iva pọ m'aninga abamẹ k'ipfhura-fhon. Ọvaar Ubinọkpaabyi m'ọbạra ọtạkha akpongnạng p'Israẹl oge k'mbọhk s'aPhilistiya."

20 Ma ibua-ibua, Saul otto osema ma isisek, ojora awẹ, ukwuru itọhnga s'Samwẹl ọkpaakhẹ. Ẹfa ẹsa-ẹ ukwuru bẹ́, ọttọhk nùchia tạma k'ekpebha kpira k'irungu.

21 Okpe kw'ikwanạng nwọ n'ose bẹ́, Saul khẹ ojora, n'obeni bẹ́, "Kker e, ikwanạng kw'usi ọtọhm k'isekhisek kwọ kk'ọ okpobha e. Ncher obo nsi oche kw'aben-m bẹ́, nsi. 22 Totokhạn m'akhọmọ ọtọhmnạng kwọ itọhng, tte nnạng-ọ uchiattọhk achi, ọfha akhaama ẹfa aror eden chọ."

23 Saul ufhum, ọbẹ, "Ọttọhk mạ́nchi."

Okhenkha, atọhmnạng pẹ age ẹmma achin-ẹ, ukwu ochera. Ubina k'isisek uninga ẹyạr k'ibhikha.

24 Ikwanạng nwọ ọtạkha ọbhaam-nwa-dim kw'ujibhi ifor kw'ọkpạn k'ochọhm, onnemeden ọfhọ. Ọtạkha abubuma p'wit usi brẹd kw'abẹ nạn ọttọhk f'm'usi awẹ ubir-ubir nágia. 25 Ma wọ, udir obera Saul ọttạra atọhmnạng pẹ, abẹ achi. Ma irunguwu njọ, abẹ abina abhạna.