1 Ọvaar Ubinọkpaabyi obeni Samwẹl bẹ́, "M'atima nkwuna s'Saul akpira k'abạng-okpe, s'kk-ẹ mfhuma masẹ ọvaarnạng kw'Israẹl o? Tạkha ana p'ẹbọhk-nạna ge k'ẹrạkhạmaansa chọ, abina osenga, m'ntọhm-ọ k'Jẹsẹ kw'ubin Bẹtẹlẹhẹm. Amma kk'ujunung-nwa kwẹ wạnọ nnenga bẹ́ ode ọvaarnạng."

2 Okhenkha, Samwẹl ọben bẹ́, "M'nsenga yạn nta o? De Saul ọbhaang kwẹ, khaam ọfha e."

Ọvaar Ubinọkpaabyi ọbẹ́, "Tima ọbhaam-nwa kwa sọhng, de akpir ben bẹ́, ‘Kk'nkwa bẹ́ nkwu mfọhnọ ẹja nnạng Ọvaar Ubinọkpaabyi e.’ 3 Bher Jẹsẹ ma ẹjafọhnọ njọma, amma m'mbạra ntibh-ọ ọttọhk f'm'asi. M'abyenga nwọ kw'm'nkọhkh-ọ ana k'echo anạng-m."

4 Samwẹl usi oche kw'Ọvaar Ubinọkpaabyi obeni. Masẹ ukpir k'Bẹtẹlẹhẹm, adecho p'ofhon ojora bẹ sabẹ ase-ẹ. Abẹ n'abạbh-ẹ bẹ́, "Akwu k'ẹmẹm o?"

5 Samwẹl ọpọhna bẹ́, "Uwee, nkwu k'ẹmẹm bẹ́ nkwu mfọhnọ ẹja nnạng Ọvaar Ubinọkpaabyi. Ado ifor sabạnga iwur, akwu anta amfọhnọ ẹja." Ma wọ Samwẹl usi Jẹsẹ ọttạra iva pẹ awur, obher bẹ ẹjafọhna.

6 Masẹ abẹ akpir kha, Samwẹl ose Eliyab, ukwu ọkkẹ bẹ́, "K'udik ọkka, kw'Ọvaar Ubinọkpaabyi m'obyenga ana k'echo wọ obe ma ititikha s'Ọvaar Ubinọkpaabyi."

7 Okhenkha, Ọvaar Ubinọkpaabyi obeni Samwẹl bẹ́, "Ifor sẹ, ọttạra ebe chẹ kásana, khiri ẹma sạng kw'nnoru. Oche kw'Ọvaar Ubinọkpaabyi n'ose idik ikhạmọ k'oche kw'oyokhanạng n'ose. Oyokhanạng n'ose s'iyaan-iyaan, okhenkha, Ọvaar Ubinọkpaabyi n'okkeri k'ettem."

8 Ma wọ Jẹsẹ oyeri Abinadab, utim-ẹ oseng Samwẹl k'ititikha. Okhenkha, Samwẹl ọbẹ, "Nnwama sạng kw'Ọvaar Ubinọkpaabyi otek." 9 Jẹsẹ ọbạra utima Shama oseng, okhenka, Samwẹl ọbẹ́, "Ọvaar Ubinọkpaabyi nnwama n'ọbạra otekha." 10 Wa Jẹsẹ utim ajunungva pẹ ncho nsenọfa ọkhọkha Samwẹl, okhenka, Samwẹl oben-ẹ bẹ́, "Ọvaar Ubinọkpaabyi ọnạng ma nótekha e." 11 Ma wọ Samwẹl n'ọbạbhọ Jẹsẹ bẹ́, "Ajunungva pọ p'akhaam phyibh bọ ma o?"

Jẹsẹ ọpọhna bẹ́, "Urikhi oyok kw'ọsạk ọtạm, kw'n'okkeri arạkhạmaan."

Samwẹl ọbẹ, "Tọhm ọnạng oyer-ẹ ukwu; ẹyạr mạ́nninga tạrr ukpira."

12 Ma o, Jẹsẹ ọtọhm abẹ ata ayeri Devid ukwu. Wa Devid ujibhi kh'ifor ọttạra idikkobh ọttạra k'ikkikkeri.

Ma wọ Ọvaar Ubinọkpaabyi obeni bẹ́, "Bina byeng-ẹ ana k'echo, khiri ẹma wọ ma."

13 Ma wọ Samwẹl ọtạk ana p'utim k'ẹrạkhạmaansa obyeng-ẹ k'echo ma ititikha s'ivotte pẹ. Tạma ma iwu njọ, Iguguma s'Ọvaar Ubinọkpaabyi isạkha ọttạra ẹfa, inwa Devid. Ma wọ Samwẹl ubin ọbhạna k'Rama.

14 Wa Iguguma s'Ọvaar Ubinọkpaabyi kk'ibina irik Saul, Ọvaar Ubinọkpaabyi ọbạra ọtọhm ọkpaakpa-tạma n'iphyaangẹ Saul ẹmma.

15 Atọhmnạng p'Saul oyeni aben-ẹ bẹ́, "Kker e, ọkpaakpa-tạma s'Ubinọkpaabyi ọtọhmọ ọnạng-ọ, rọ n'iphyaang-ọ ẹmma e. 16 Tte aro kwamạna ọtọhm amạnamba atọhmnạng pẹ anta annor ọnạng kw'n'ukhir ọgaang-gang. Okpe kw'ọkpaakpa-tạma nnọ m'inwọ-ọ, ukhir ọnạng-ọ, ifor ikpọhkh-ọ."

17 Ma wọ, Saul obeni atọhmnạng pẹ bẹ́, "Abạnga aror ọnạng kw'okke ọgaang-gang khikhir akken-m."

18 Ọtọhmnạng kwẹ wạnọ ọpọhna bẹ́, "Amma k'ujungnwa wạnọ kw'Jẹsẹ kw'ubin Bẹtẹlẹhẹm kw'okke ọgaang-gang khikhir nsia e. Ode okkedim, ọbạra ode okkemkpa, okke ọkpaakhadik, ọbạra ujibh idikkobh. Ọvaar Ubinọkpaabyi ọbạra uninga abẹ."

19 Ma wọ Saul ọtọhmọ atek-nkkaabha afona akhebha Jẹsẹ ọbẹ, "Tọhm nnwa kwọ Devid, kw'n'okkeri arạkhạmaan ken-m." 20 Ma wọ Jẹsẹ ọtạk ẹnyạnyaang ch'onạn brẹd, ọttạra itwuk-gbạre, ọttạra uvunwa, ọtọhm ọttạra nnwa kwẹ Devid, okkena Saul.

21 Devid ukwu uninga Saul abẹ, ọtạma ọtọhm sisi ọnạng-ẹ. Devid ọkhankẹ ọdaakhẹ Saul idik mororo, n'ukwu ode utim-ekpongkpo kwẹ. 22 Ma wọ Saul ọtọmọ ẹkkaabha ọnạng Jẹsẹ, oben-ẹ bẹ́, "Tte Devid ọbọhk uninga ma usi-m ọtọhm, ukwuru bẹ ọdaakh-m idik oseng eden."

23 Okpe kwidede kw'ọkpaakpa-tạma nnwọ kw'Ubinọkpaabyi inwa Saul, Devid n'ọtạkha ọgaang-gang ukhir. Ma wọ ifor m'ikpọhkhọ Saul; ọkpaakpa-tạma nnọ bạra irikh-ẹ ẹbhaang.