1 Samwẹl 14

1 Iwu jạnẹ, Jonatan kw’ode nwa kw’Saul obeni udikobh kw’ode utim-ekpongkpo pyẹ bẹ́, "Kwu anjekha k’ukhubha kw’akpongnạng p’aPhilistiya p’n’akkeri ẹbaakhamma aning." Okhenkha, wa Jonatan otte nótekha.

2 Wa Saul uning k’ofhon ọkhaan-ọkhaan kw’Gibea k’ichirin ch’pomegranate k’Migrọn. Wa utim anạng p’akpir ẹnọhna ukuma arạbh jobh. 3 K’ikhaana s’anạng p’aning abẹ wa ode Ahija kw’n’oge ẹphọd. Ahija nwọ wa ode nnwa kw’nnwọkka kw’Ikabọd, kw’okpen Ahitub. Ahitub ode nnwa kw’Phinẹhas kw’ode nnwa kw’Ẹli, kw’ode ọfọhnẹja kw’Ọvaar Ubinọkpaabyi k’Shilo. Ọnạng kw’uwa osong bẹ Jonatan kk’ubina ofona kòde.

4 K’ukhubha kwidede kw’Jonatan osengi bẹ́, ojekha okhebha akpongnạng p’aPhilistiya p’n’akkeri ẹbaakhamma, ọkhaam okpecho kw’ode ẹtakpa-ẹtakpa. Wạnọ ekpen Bozẹz, nwọkha ekpen Sẹnẹ. 5 Okpecho wạnọ kw’ode ẹtakpa-ẹtakpa, wạn ebe ekkeri k’ofhon ibir-ibira kw’Mikmash, njọkha ekkeri k’ofhon ẹrạkh-ẹrạkha kw’Geba.

6 Jonatan obeni utim-ekpongkpo pyẹ bẹ́, "Kwu amfona k’anạng mbọ p’n’akkeri ẹbaakhamma ch’aPhilistiya, p’nạn ọkpọkkrọkkọ násia. Nudusi, Ọvaar Ubinọkpaabyi m’urima irima nja ọnạng mạna. Ọttọhk vạnọ-vạnọ f’m’ọkpa Ọvaar Ubinọkpaabyi eden bẹ́ nạngẹ mạna ọkkaan kòde, ansaabh-ọsaabh nánsaabha."

7 Utim-ekpongkpo p’Jonatan oben bẹ́, "Ọbaan ma, si oche idede kw’ujibhi ọnạng-ọ, khiri amma mbe abọ k’nnạm k’eden chidede."

8 Ma wọ Jonatan obeni bẹ́, "Kwu anjekha ankhebha ajunung mbọ kha ukhubha, ọfha abẹ ase mạna. 9 De abẹ abeni mạna bẹ́, ‘Abạnga abe ma ankhebha bạnga ma,’ m’anninga ma ibyi s’anning, bẹ mámvura ankhebha. 10 Okhenkha, de abẹ abeni mạna bẹ́, ‘Avura akhebha mạna kha e,’ m’amvura ankhebha bẹ kha, ukwuru bẹ́, ma wọ m’ode ẹkhọhkha ọnạng mạna bẹ́, Ọvaar Ubinọkpaabyi kk’bẹ ọtạkha oge mạna k’mbọhk."

11 Ma o, abẹma anạng afa ata akhọhkha ifor sabẹ k’ẹbaakhamma ch’aPhilistiya. APhilistiya aben bẹ́, "Akker-e! AHiburu mba n’nkk’abẹk ayin k’ape p’wạra abẹ attubh-e." 12 Ma wọ, ajunung p’aning k’ẹbaakhamma atạbh-bhẹ Jonatan ọttạra utim-ekpongkpo pyẹ ẹmạng, aben bẹ́, "Avura akhebha mạna kha, ọfha ankọhkha bạnga nkwuru!"

Ma o, Jonatan n’obeni utim-ekpongkpo pyẹ bẹ́, "Vura tor-m nnạm, khiri Ọvaar Ubinọkpaabyi kk’bẹ ọtạkha oge Israẹl k’ọbọhk."

13 Jonatan utim mbọhk ọttạra mfhok sẹ uvura, utim-ekpongkpo pyẹ otor-ẹ nnạm. Wa Jonatan ọfhọ aPhilistiya, utim-ekpongkpo pyẹ ọbạra ọfhọ bẹ otor ẹ nnạm. 14 Ma echeden rima njọ, Jonatan ọttạra utim-ekpongkpo pyẹ afhọ anạng ẹrạbh k’ibyi s’ibạrẹ ikpira ntwạkhọ arạbh jobh.

15 Ma wọ opoma ọnwạ akpongnạng p’aPhilistiya phyibh p’aning k’ibyibhingasẹ, ọttạra p’aning k’akpongchen, ọttạra p’aning k’ẹbaakhama, ọttạra ikhaana s’n’irima irima, isek ibạra inyengi. Ubinọkpaabyi wọ wa ọtọhmọ opoma nwọ.

Anạng p’Israẹl akhem aPhilistiya

16 Akker-ibyi p’Saul p’aning k’Gibea k’ẹkhạma ch’Bẹnjamin ase s’akpongnạng p’aPhilistiya n’arạbh agbongu ayok ncho. 17 Ma wọ, Saul obeni ajunung p’atwạnọ abẹ bẹ́, "Abạnga atạkha ubhik kw’akpongnạng ọfha ansonga ọnạng kw’nạ́n ma ode." Masẹ abẹ abhikhi, abẹ ase bẹ́, Jonatan ọttạra utim-ekpongkpo pyẹ bọ nạ́n ma ade.

18 Saul n’obeni Ahija kw’ode ọfọhnẹja bẹ́, "Tima ikwukwur s’echekha ch’Ubinọkpaabyi kwu." Ma okpe ngwọ, wa ikwukwur nnọ ining anạng p’Israẹl abẹ. 19 Masẹ Saul utim ọkpaakhẹ udik ọnạng ọfọhnẹja, dạmadạma kw’aPhilistiya n’ọbạrẹ osengeden k’ibyibhingasẹ sabẹ. Ma wọ Saul n’obeni ọfọhnẹja bẹ́, "Tte ọbọhk ma udik ngwọ bạra."

20 Ma wọ Saul ọttạra akpongnạng pẹ phyibh akwu atobha, abẹ abina ata ekpong. Abẹ n’akhebh aPhilistiya k’dạmadạma, abẹ n’atima akkangkkang-kro pabẹ abhạkhẹ afhọ ayok. 21 AHiburu mbọ p’uwa acheden aninga attra aPhilistiya, p’atwạnọ bẹ abẹ afona k’ibyibhingasẹ, n’ajek ator anạng p’Israẹl p’abe atuma Saul ọttạra Jonatan.

22 Masẹ anạng p’Israẹl phyibh p’uwa atubh k’akpecho p’Ephraim abhaang bẹ́, aPhilistiya nạnka arạbh, abẹ anwa ekpong akhubh aPhilistiya ẹkhạm-ẹkhạma. 23 Ma wọ Ọvaar Ubinọkpaabyi ọkkaan anạng p’Israẹl ma iwu njọ, ekpong ichi eyongu Bẹt-Avẹn.

Jonatan uchi ọkhọhn

24 Ma iwu njọ, wa ajunung p’Israẹl aning k’ọmmaphyaangẹ, ukwuru s’Saul kk’echekha ọtạkha k’anạng mbọ k’echo ọben bẹ́, "M’upyibh ọnạng ujunung kwidede kw’uchi ọttọhk brasẹ n’ukpir k’ẹchọhkha, oyonga de kk’udik kw’awawunanạng paam asi ntwukha." Oseng mạma ọnạng kw’uchi ọttọhk kòde.

25 Ma o, akpongnạng mbọ phyibh akwu anwa k’ẹkpa, abẹ n’ase ọkhọhn ma isisek. 26 Masẹ abẹ anwa k’ẹkpa, abẹ ase s’ọkhọhn n’ofhobh, okhenka, ọnạng wạnọ-wạnọ kw’oge ọbọhk ma ọttaakhẹ kòde, ukwuru ojora f’echekha ch’Saul kk’bẹ ugia. 27 Okhenkha, wa Jonatan tạma nọ́bhaanga bẹ́, otte kk’anạng mbọ ugia k’echekha. Ma o, n’ọtạk echo ch’uchikwura kw’utim, ọrạna ma akhọhnkpa, udira ọbọhk oge k’ẹmma ọtaakhẹ, ifor inyaan-ẹ. 28 Ma wọ okpongnạng wạnọ ọkpaakh-ẹ bẹ́, "Atte oge akpongnạng mba k’echekha ch’ẹkpọhkh-ọkpọhkhọ oben bẹ́, ‘M’upyibh ọnạng ọnạ́ng kwidede kw’uchi ọttọhk chemma!’ Akwẹma gwọ usi bạra ifor n’imạm ajunung mbama e."

29 Jonatan ubhina bẹ́, "Uwoo! Otte kwaam kk’anạng pamạna ugia k’dạmadạma e. Kkeri oche kw’ifor inyaan-m kha masẹ nsi ọkhọhn sạsạkhẹ nttaakhẹ. 30 Wạra m’ujibh ọtạm de ode bẹ ajunung mbọ kk’ọttọhk achia k’ekpo byạnọ py’abẹ avạk awawunanạng pabẹ ana. Ma wọ wạra ekhema ch’anạng mbọ akhem aPhilistiya m’ẹbạra ọtạm e."

31 Ma iwu njọ, masẹ anạng p’Israẹl kk’aPhilistiya afha tạma k’Mikmash tạrr ukpira k’Aijalọn, wa kk’bẹ ọkhọhna. 32 Ma wọ abẹ atto akhubha ma ekpo py’abẹ atạk k’ekpong, abẹ atạkha arạkhạmaan ọttạra adamagbudu, ọttạra mmaamva, abẹ abhaak sẹ ma isisek achi asẹ apẹ. 33 Ma wọ ọnạng wạnọ obeni Saul bẹ́, "Kker e, ajunung mbọ n’asi ipyibha k’ititikha s’Ọvaar Ubinọkpaabyi sabẹ n’achi nten asẹ apẹ."

Saul ọbẹ́, "Abạnga kk’ipina asia e! Abingi ẹta chididen ẹbhạr-ẹbhạrẹ atima akwu ma." 34 Ma wọ Saul obeni bẹ́, "Abạnga asọhng k’ikhaana s’ajunung mbọ aben bẹ bẹ́, ‘Ọnạng-ọnạng utima ẹbhaam chẹ, ọttạra ọrạkhạmaan kwẹ utima ukwu ma. Afhọ sẹ ma, achi. Abạnga ẹkhọngkwuru k’ititikha s’Ọvaar Ubinọkpaabyi kási bẹ́, abạnga achi nten isẹ asẹ k’ẹtaanga.’ "

Ma wọ ọnạng-ọnạng utim ẹbhaam chẹ ukwu ma irungu njọ, ọfhọ chẹ mạma. 35 Ma wọ Saul usi ijabyi ọnạng Ọvaar Ubinọkpaabyi; ma wọ ode ochedenkpe kw’usi oche ngwọ.

36 Ma o, Saul ọbẹ́, "Tte ansạkha ma irungu anta annima aPhilistiya abẹ, ọfha ambạra achi bẹ́ tạạr iwu echobha, tte nạngẹ ọnạng wạnọ-wạnọ ọbọhk ante uruk akpen."

Ma wọ abẹ abhin bẹ́, "Si oche kwidede kw’ujibh-ọ."

Okhenkha, ọfhọhnẹja ọbẹ́, "Tte ambạbh Ubinọkpaabyi ma."

37 Ma wọ Saul ọbạbhọ Ubinọkpaabyi bẹ́, "Ma, n’nsạk nta nnima aPhilistiya abẹ o? S’m’ananạng Israẹl ekhema o?" Okhenkha, wa Ubinọkpaabyi khẹ ibhina nọ́nạnga ma iwu njọ.

38 Saul n’obeni bẹ́, "Abạngama adecho p’akpongnạng phyibh, akwu ma, ọfha andwạn eden ch’ipyibha ch’chemma eseng ikwu. 39 K’oche kw’Ọvaar Ubinọkpaabyi kw’n’ọkkaana Israẹl urukhu akpen, ọbạra ode bẹ́, nnwa kwaam Jonatan wọ usi udik ngwa, oyonga m’ope." Okhenkha, ujunung wạnọ-wạnọ kw’usi bẹ́ kọsọ kòde.

40 Ma wọ Saul obeni anạng p’Israẹl phyibh bẹ́, "Abạngama abe kha, amma ọttạra nnwa kwaam Jonatan ambe ma."

Ajunung mbọ abhina bẹ, "Si oche kwidede kw’ujibh-ọ."

41 Ma wọ Saul ose njọhm ọnạng Ọvaar Ubinọkpaabyi, kw’ode Ubinọkpaabyi kw’Israẹl oben bẹ́, "Totokhạn nạng-m ibhina ẹkkachẹ. De ọsẹ otto k’akhaam, ọbạra ode bẹ́, otto k’nnwa kwaam Jonatan, bhina ttạra Urim. Okhenkha, de otto k’ajunung p’Israẹl, bhina ttạra Thumim." Ma wọ abẹ abhạrẹ ọsẹ, ọsẹ otto k’Jonatan ọttạra Saul. Ma wọ ajunung mbọ annaang udik ngwọ. 42 Saul ọbẹ́, "Abhạrẹ ọsẹ k’akhaam k’echo ọttạra k’echo ch’Jonatan." Wa ọsẹ otto k’Jonatan.

43 Ma wọ Saul obeni Jonatan bẹ́, "Ọma kpaakh-m udik kw’kk’asia."

Jonatan n’ọkpaakh-ẹ bẹ́, "Amma nkhenka nttaakhẹ ọkhọhn f’ntim uchikwura-cho chaam ntwu. Ma, s’n’mpe o?"

44 Saul n’obeni bẹ́, "Tte Ubinọkpaabyi ọnạng-m irem, tte ọnạng-m ọttạra ọttạra, de ọma Jonatan nạnápua."

45 Okhenkha, ajunung mbọ n’abeni bẹ́, "Node bẹ́, Jonatan nwa kw’kk’Israẹl ẹkkaana chididen ọnạnga n’ope o? Mesese! Akwẹ oche ngwọ móde! K’oche kw’Ọvaar Ubinọkpaabyi urukhu akpen, isisira-naanga rạnẹ-rạnẹ s’Jonatan s’m’itto k’isisek k’ide, ukwuru bẹ́, oseng k’ẹkkaana ch’Ubinọkpaabyi bạra usi udik ngwa chemma." Ma wọ ajunung mbọ akkaan Jonatan, abẹ dạk kẹ náfha.

46 Ma wọ Saul ukum aPhilistiya khukhubh, abẹ akpa nnạm abhạna kabẹ k’ibyi.

47 Masẹ Saul kk’ẹvaar ọdạbha k’Israẹl, urim ekpong ọbaabha idifhon s’awawunanạng pabẹ. Wa idifhon nnọ ide: Moab, ọttạra Ammọn, ọttạra Edom, ọttạra avaarnạng p’Zoba, ọttạra aPhilistiya. Wa ọnạngẹ anạng mbọ irem k’ibyi sidede s’okkeri ititikha. 48 Wa urim ekpong masẹ ujunung okhema abAmalẹk, ọbạra ọrạbha Israẹl k’mbọhk s’anạng p’uwa kk’bẹ achia k’ekpong.

Ẹchọhmfhạr ch’Saul

49 Wa iva p’Saul ade Jonatan, ọttạra Ishvi ọttạra Malki-Shua. Ocheden-nwa kwẹ kw’ikwanạng okpen Mẹrab, kw’onyem-ẹ okpena Mikal. 50 Ikwanạng kw’Saul wa okpen Ahinoam, kw’ode nnwa kw’Ahimaz. Abnẹr wọ wa ode odennạng kw’akpongnạng p’Saul. Abnẹr wa ode ujunungnwa kw’Nẹr. Nẹr wa ode nnwotte kw’otte kw’Saul. 51 Abiyẹl wọ wa ofhonu Kish, kw’ode otte kw’Saul, ọbạra ofhon Nẹr, kw’ode otte kw’Abnẹr.

52 Wa okpe kw’Saul phyibh ode okpe kw’mkpong s’ikhạm-ọkhạm ọttạra aPhilistiya. Wa okpe kwidede kw’Saul ose ọfanạng kw’ọbạra ode okkemkpa, m’ọtạkh-ẹ ọttạra k’akpongnạng pẹ.