1 Masẹ Saul ọkpa nnạm k'aPhilistiya khukhubh, abẹ akpaakh-ẹ bẹ́, "Devid uttubh k'uminkpa k'Ẹn-Gẹdi." 2 Wa Saul otek ajunung nnohna nsenọfa ukuma arạbh jobh, k'Israẹl phyibh, utima bẹ ọta oror Devid ọttạra anạng pẹ, ọbaanga Ntakpa s'Mvu s'Ẹkpa.

3 Masẹ Saul ukpir k'avu-pa k'ọkkaden, ukwu ose ẹtakpamma, wa ọyaak ma bẹ́, ọjẹ ẹsamma. Devid ọttạra ajunung pẹ attubh ma ẹtakpamma njọ ẹtaanga. 4 Ajunung p'Devid aben-ẹ bẹ́, "Chemma wọ ode iwu njọ ch'uwa Ọvaar Ubinọkpaabyi ọkpaakh-ọ bẹ́, ‘Amma m'ntạkha ọwawunanạng kwọ nge-ọ k'ọbọhk, ọfha ạsi-ẹ oche kw'ọdaakh-ọ.’ " Ma wọ, Devid ubin, ọbẹk, ọnạng kẹ núsia, ọta ọkpaara ivạrama-kpa ch'ọnọhma-wuram kw'Saul.

5 Ayongu ma, wa ettem ẹphyaangẹ Devid ẹmma, ukwuru ivạrama-kpa ch'ọnọhma-wuram kw'Saul ch'kk'ọkpaara. 6 N'obeni ajunung pẹ bẹ́, "Ọvaar Ubinọkpaabyi móchera bẹ́, nsi udik dema ngwa nnạng aro kwaam, kw'Ọvaar Ubinọkpaabyi kk'ana obyenga k'echo, brasẹ n'ukpir s'm'ntwu-ẹ ọbọhk, ukwuru bẹ́, ẹma ode nwọ kw'Ọvaar Ubinọkpaabyi kk'ana obyenga k'echo." 7 Wa Devid utim itọhnga nnọ ọkpa ajunung pẹ eden, nọ́bra ochera bẹ́, abẹ arima Saul abẹ. Saul o, n'ubin ma ẹtakpamma ofona kwẹ akwẹ.

8 Ma wọ, Devid uyini k'ẹtakpamma oyeri Saul bẹ́, "Aro ọvaar kwaam o!" Masẹ Saul ọbhạkhẹ nnạm, Devid ọrạkha utwunga echo k'isek k'ikpukpobha. 9 Obeni Saul bẹ́, "Ode yạn kw'n'ạkhọhmọ itọhng okpe kw'anạng n'aben bẹ́, ‘Devid n'ọkhạmọ bẹ́, usi-ọ ipyibha e?’ 10 Chemma, ọma oyeni kk'achen pọ atima ase oche kw'Ọvaar Ubinọkpaabyi utti-ọ ọbọhk ọnạng-m k'ẹtakpamma. Anạng bạnọ achọhm-m bẹ́, mfhọ-ọ, okhenka, kk'ọbọhk nttia, nkwu mben bẹ́, ‘Amma aro kwaam ọbọhk mạ́ntwu, ukwuru bẹ́, ẹma ode nwọ kw'Ọvaar Ubinọkpaabyi kk'ana obyenga k'echo.’ 11 Kker e, aro kwaam, kkeri ivạrama-kpa ch'ọnọhma-wuram kwọ k'akhaam k'ọbọhk. Mkpaar chẹ k'ammakpa p'ọnọhma-wuram kwọ, okhenka, kọ nạ́mfha. Tte akwẹ ọttaan-ọ, abạra atin bẹ́, amma ipina, ọbạra ode ochokpọhkhọ kạ́nkhaam abọ. Ama khọ nạ́mpina, okhenka, ọma n'aror-m bẹ́, atạkha akpen paam. 12 Tte Ọvaar Ubinọkpaabyi usi aponga paam ọma abẹ. Tte Ọvaar Ubinọkpaabyi utwuk mpyibha s'khaam asia. Okhenkha, amma kọ ọbọhk kwaam mạ́ntwu. 13 K'oche kw'ẹtạma ebeni, anạng p'n'asi ibyibyia-dik bọ n'asi ibyibyia, ma o, amma kọ ọbọhk mạ́ntwu.

14 "Ọvaarnạng kw'Israẹl oseng anẹ abẹ uyin k'iyaan o? N'akhubh anẹ o? Ẹpfa-bukhu jọ sa? Ma, ẹtạtaana jọ yeri? 15 Tte Ọvaar Ubinọkpaabyi ode ọkpaar-aponga kwamạna, tte ọbạra ọnạng ẹyaakha ch'amma ọma abẹ. Tte ẹma usi iponga saam, tte ẹma ọbạra ọkkaana ọrạbh-m k'mbọhk sọ."

16 Masẹ Devid okker idik nnọ, Saul ọbạbh bẹ́, "Nnwa kwaam, Devid, ọma wọ n'akpaak mạma o?" Osenga ma, Saul ọgạma ẹmạng k'ẹrạng-k'ẹrạng. 17 Ọbạra oben Devid bẹ́, "Ọma wọ atoru ọtạm ayọhnga amma e. Kk'aam ijibha asia, okhenka, amma kk'ọ igbaan nsia. 18 Ijibha ch'kk'asia anạng-m, ẹjọ ch'atekh-m ma. Ọvaar Ubinọkpaabyi ọtạkh-m ugi-ọ k'mbọhk, okhenka, kaam náfha. 19 Bạng ọnạng wọ m'ose ọwawunanạng kwẹ, utti-ẹ ọbọhk ofona k'idira o? Tte Ọvaar Ubinọkpaabyi ọtaam-ọ mororo k'ijibha ch'asi anạng-m chemma. 20 Amma nsong ma k'udik ọkka bẹ́, kwạna m'ade ọvaarnọng ode, ọttạra bẹ́ kwạna ẹkhạma ch'Israẹl m'ittima arạnga uttima k'okpe kw'ẹvaar chọ. 21 Chekhi k'eche ch'Ọvaar Ubinọkpaabyi nạng-m bẹ́, ọma iva p'iva paam mádimi, eche ch'ẹchọhmfhạr ch'otte kwaam mábạra apfura."

22 Ma wọ, Devid ochekhi ọnạng Saul. Ma o, Saul ọbhạna, okhenka, Devid ọttạra ajunung pẹ akpa nnạm k'ibyittubhasẹ sabẹ.