1 Samwẹl 23

Devid ọkkaan ofhon kw’Keyila

1 Iwu jạnẹ, abẹ akpaakhẹ Devid bẹ́, "Kker e, aPhilistiya n’arima ofhon kw’Keyila abẹ e, abẹ n’achi ibyi sa abẹ n’akhaan achimạma k’ekpong." 2 Ma wọ Devid ọbạbhọ Ọvaar Ubinọkpaabyi bẹ́, "Nta nnima aPhilistiya mbọ abẹ o?"

Ọvaar Ubinọkpaabyi ubhin-ẹ bẹ́, "Sọhng ata arimma aPhilistiya abẹ, ọfhạ akkaana aKeyila."

3 Okhenkha, ajunung p’Devid aben-ẹ bẹ́, "Oyeyema ma Juda, annuk k’ojora, de n’anfon k’Keyila bẹ́, anta annima akpongnạng p’Philistiya abẹ, akwẹ m’upyibh ọyọhnga ma e."

4 Devid ọbạra ọdwạn Ọvaar Ubinọkpaabyi, Ọvaar Ubinọkpaabyi ọbạra ubhin-ẹ bẹ́, "Sọhng k’Keyila, ukwuru bẹ́, m’ntạkha aPhilistiya nge-ọ k’ọbọhk." 5 Ma wọ Devid ọttạra ajunung pẹ afona k’Keyila ata arima aPhilistiya abẹ́, abẹ acha itirakpo pyabẹ. Wa Devid ọfhọ aPhilistiya k’ọsaabh, ọbạra ọkkaana aKeyila.

6 Ma okpe ngwọ, wa Abiyata kw’ode nnwa kw’Ahimẹlẹk, kk’ẹphọd utima k’ọbọhk ọrạbh ọta okhebha Devid k’Keyila.

Saul ukhubhu Devid

7 Wa anạng akpaakhẹ Saul bẹ́, Devid kk’ofona k’Keyila, Saul n’obeni bẹ́, "Ubinokpabyi kk’ẹ ọtạkha oge-m k’mbọhk. Devid kk’ẹma oyeni mgbakkọhbhọ ugia s’ọnwa, k’ofhon kw’ọkhaam abaakhamma ọttạra abaakha." 8 Ma wọ Saul obeni akpongnạng pẹ phyibh bẹ́, abẹ ado ifor afona k’Keyila, ata abaabha Devid ọttạra anạng pẹ age ngekha.

9 Masẹ Devid osong bẹ́, Saul n’ọttọhnọ bẹ́, usi-ẹ ipyibha, oben Abiyata kw’ode ọfohn-ẹja bẹ́, "Tima ẹphọd nwọ kwu." 10 Devid ose njọhm oben bẹ́, "O Ọvaar Ubinọkpaabyi kw’ode Ubinọkpaabyi kw’Israẹl, k’udik ọkka, amma ọtọhmnạng kwọ kk’mmaanga bẹ́, Saul n’ọttọhnọ bẹ́ ukwu k’Keyila, ukwu udimi ofhon ngwama ukwuru amma. 11 Ma, anạng p’Keyila m’atạkh-m anạng-ẹ yeri? Kọhngkhẹ, Saul m’ukwu ma Keyila oche kw’mmaang o? O Ọvaar Ubinọkpaabyi kw’ode Ubinọkpaabyi kw’Israẹl, totokhạn si ẹyaakha nạng amma ọtọhmnạng kwọ."

Ma wọ, Ọvaar Ubinọkpaabyi obeni bẹ́, "M’ukwu ukwu."

12 Devid ọbạbh adạkhẹ bẹ́, "Ma, anạng p’Keyila m’atạkh-m ọttạra anạng paam anạng Saul yeri?"

Ọvaar Ubinọkpaabyi oben bẹ́, "Abẹ m’asi ochengwọ."

13 Ma wọ, Devid ọttạra anạng pẹ p’akpir anạng ẹnọhna ukuma arạbh jobh, abin arik Keyila n’asenga k’ibyi k’ibyi. Masẹ abẹ akpaakhẹ Saul bẹ́, Devid kk’ọrạbha urik Keyila, wa Saul dạkhẹ k’Keyila nọ́ta.

14 Wa Devid uttubh k’ibyittubhasẹ k’uminkpa, k’akpecho p’ibyi s’owór s’Ziph. Iwu chidede, Saul n’oror Devid ẹmmeje-ẹmmeje, okhenka, Ubinọkpaabyi Devid ọbohk núttia ọnạng Saul.

15 Masẹ Devid uning k’Horẹsh k’uminkpa k’Ziph, n’ọbhaang bẹ́ Saul kk’ukwa bẹ́, ukwu ọfhẹ-ẹ. 16 Ma wọ, Jonathan kw’ode nnwa kw’Saul, ofon okhebha Devid k’Horẹsh, ugi-ẹ nttem bẹ́, ọbạr ettem, ọbạra ophye nnạm k’Ubinọkpaabyi. 17 Oben-ẹ bẹ́, "Tte nạng-ọ ojor. Otte kwaam Saul kọ ọbọhk mútwu e. Ẹma oyeni osong ma bẹ́, ọma wọ m’ade ọvaarnạng kw’Israẹl, amma nde ottong anạng afa kwọ." 18 Abẹma anạng afa atạkha echekha ma ititikha s’Ọvaar Ubinọkpaabyi. Jonatan oseng ọbhạna, Devid uninga ma Horẹsh.

19 Wa anạng p’Ziph afon akhebha Saul k’Gibea aben-ẹ bẹ́, "Kker e, Devid uttubh k’ibyittubhasẹ samạna k’Horẹsh e, k’okpecho kw’Hakila, k’ukhubha kw’ẹrạkh-ẹrạkha k’Jeshimọn. 20 O ọvaarnạng, sạkha kwu okpe idede kw’ọdaakh-ọ bẹ akwu, n’ode udik kwa amạnamba oyeni m’anvạkh-ẹ ange ọma ọvaarnạng k’ọbọhk.

21 Saul ọpọhna bẹ́, "Tte Ọvaar Ubinọkpaabyi odo bạnga k’ijibha ch’abạnga akhaam abamẹ 22 Asọhng ata ado kwẹ adwạn. Abaana ibyi s’n’ọta, ọttạra ọnạng kw’kk-ẹ usia ma. Abẹ akpaakh-m bẹ ode ọnạng kw’odongu-odongu mororo. 23 Adwạn asonga ibyi phyibh s’n’uttubha, ọfha abạnga akpa nnạm akwu akpaakh-m oche kw’akwẹ ode. Ma wọ, amma m’ntwạn bạnga abẹ amfona ma. De uttubh ma ibyi nnọ, amma m’vạkh-ẹ k’ibyi sidede s’uttubh ma ikhaana s’nnạmma s’aJuda.

24 Ma wọ, anạng mbọ achi Saul eden afona k’Ziph. Wa Devid ọttạra akpongnạng pẹ aning k’uminkpa k’Maọn k’Araba, k’ẹrạkh-ẹrạkha kw’Jeshimọn. 25 Saul ọttạra akpongnạng pẹ atạm-ẹ ruror. Masẹ Devid ọbhaang kwẹ, n’ofon ọta uninga k’ẹtakpa ch’ining k’uminkpa k’Maọn. Okpe kw’Saul ọbhaang bẹ́, Devid uttubh k’Maọn, ukhubh-ẹ ofona kha.

26 Saul n’osenga k’ukhubha gwạnọ kw’okpecho, Devid ọttạra akpongnạng pẹ asenga k’ukhubha ngwọkha, n’adwukha bẹ́, abẹ arạbh annaanga Saul. Masẹ Saul ọttạra akpongnạng pẹ kk’Devid ọttạra akpongnạng pẹ afora k’oche kw’abẹ m’avạkha bẹ, 27 wa ọkpaakh-ẹkkaabha okhebh Saul oben-ẹ bẹ́, "Kwu ẹbhạr-ẹbhạrẹ khiri aPhilistiya n’nka achi ofon k’ekpong e!" 28 Ma wọ, Saul ukkum Devid khu-khubh, n’ofon bẹ́ ọta urima aPhilistiya abẹ. Ẹgwọ usi abẹ ayeri ibyi nnọ Ẹtakpa ch’Ẹrạbh-ẹnnaanga.*23.28 k’eHiburu, abẹ ayeri ibyi nnọ Sela Hammahlekoth, kw’uyini Ẹtakpa ch’Ẹrạbh-ẹnnaanga. 29 Devid n’ubin ma uvura ọta uttubha k’Ẹn-Gẹdi.