1 Wa Saul ode icho ẹrạbh ukuma jobh k'okpe kw'ọdạbhẹ ẹvaar. Wa ọdạbhẹ Israẹl k'icho arạbh afa ukuma ifa.*

2 Saul otek ajunung p'Israẹl nnọhna arạbh asenọfa ukuma arạbh jobh; anạng nnọhna arạbh asen aning abẹ k'Mikmash, ọttạra k'okpecho k'ofhon kw'Bẹtẹl, ọtọhm anạng nnọhna mfa ukuma arạbh jobh ọnạng Jonatan k'Gibea, k'ẹkhạma ch'Bẹnjamin. N'obeni ajunung p'arikh'urik bẹ́, abẹ akpa nnạm k'ichọhm sabẹ.

3 Jonatan urim utim-eden kw'akpongnạng p'aPhilistiya p'abe k'ẹbaakhamma k'Geba abẹ, aPhilistiya akwu abhaanga udik ngwọ. Ma wọ, Saul n'obeni abẹ age ẹsa abaabha ofhon ngwọ phyibh oben bẹ́, "Tte aHiburu abhaanga o!" 4 Ma wọ, anạng p'Israẹl phyibh abhaang ẹkkaabha njọ bẹ́, "Saul kk'utim-eden kw'akpongnạng p'aPhilistiya abẹ urima, mantọhmma, anạng p'Israẹl n'abạkhọ aPhilistiya idik." Saul n'oyeri akpongnạng pẹ bẹ́, abẹ akhebh-ẹ k'Gilgal.

5 APhilistiya atobh bẹ́, abẹ arima anạng p'Israẹl abẹ, abẹ atim ijaar s'nnyạnyaang n'itwạr nnọhna ẹrạbh ukuma nttaan ukuma chi, ọttạra akpongnạng p'n'ayaar ijaar s'nnyạnyaang n'itwạr nnọhna chi, ọttạra akpongnạng adwạkh-ọdwạk nnọhna ibhikh-asong. Abẹ ata abhing k'Mikmash, k'ukhubha kw'okpebha-dudon n'uyin k'Bẹt-Avẹn. 6 Masẹ anạng p'Israẹl n'ase bẹ́, abẹ n'aning k'ọmmaphyaangẹ ọttạra bẹ́, ayok n'ayọhng bẹ ẹfa, abẹ arạbh ata attubha k'amma p'ntakpa ọttạra k'akpasạn, ọttạra k'apekhuma, ọttạra k'ape p'adong-odong. 7 Wa aHiburu bạnọ arạbhọ ajekha Jọrdan afona k'Gad, ọttạra k'Gilead.

Saul ọttạra ikhaana s'akpongnạng p'atwạnọ abẹ n'aning k'opoma k'Gilgal. 8 Saul uning iwu isenọfa utik okpe kw'Samwẹl oge bẹ́ m'ukwu, okhenka, wa Samwẹl k'Gilgal tạm núkwa. Ma wọ ajunung p'Saul atạm ny'nyaamẹ. 9 Ma o, Saul n'obeni bẹ́, "Kken-m ẹnạnga ẹkkạmachẹ ọttạra nnạnga s'oforgbạkha." Ma wọ Saul ọtạk ẹja ẹkkạmachẹ ọfọhnọ. 10 Masẹ okker ẹja njọ fạfọhnọ bẹ ẹ kkeri Samwẹl ma, Saul uyin k'iyaan ọta usim-ẹ.

11 Samwẹl ọbạbh-ẹ bẹ́, "Bạng udik gwọ asi ma?"

Saul ọpọhn-ẹ bẹ́, "Masẹ nse bẹ́, ajunung mbọ kk'atạma wạwena, ọttạra bẹ́, okpe kw'age nábạra akwua, ọttạra bẹ́, aPhilistiya n'kk'atobha k'Mikmash, 12 nkwu nkkẹ bẹ́, ‘Mantọhmma, aPhilistiya bạra akwu arim-m abẹ k'Gilgal, abhaang, Ọvaar Ubinọkpaabyi tạma nạ́mbẹna bẹ́, ọkkaana mạna.’ Ẹgwọ usi nkwa ammoyeni k'ẹfa bẹ́, mfọhnọ ẹja ẹkkạmachẹ nja e."

13 Samwẹl oben bẹ́, "Asi kwẹ k'idindingi-den e, inyina ch'Ọvaar Ubinọkpaabyi kw'ode Ubinọkpaabyi kwọ, ọnạng-ọ, náchokha a, de wạra kk'achokha, wạra m'usi ẹvaar chọ ittima arạnga k'Israẹl tạrr ipimmanitor. 14 Okhenkha ode bẹ́, mantọhmma, ẹvaar chọ dạkhẹ ororo méfona; Ọvaar Ubinọkpaabyi kk'ọnạng otekha kw'ubin-ẹ k'ettem, kw'm'ode ọdạbhẹ kw'anạng pẹ, ukwuru bẹ́, inyina chẹ náchokha."

15 Ma wọ, Samwẹl ubin k'Gilgal uvura ofona k'Gibea, k'ẹkhạma ch'Bẹnjamin. Saul ọtạkha ubhik kw'ajunung p'aning abẹ. Abẹ akpir ẹnọhna ukuma arạbh jobh.

16 Saul ọttạra nnwa kwẹ Jonatan, ọttạra akpongnạng p'atwạn bẹ abẹ, aning k'Gibea k'ẹkhạma ch'Bẹnjamin, aPhilistiya n'abhingi k'Mikmash. 17 Akpongnạng p'irima abin k'ikhaana ittaan k'ibyibhingasẹ s'aPhilistiya. Ikhaana rạnẹ iten k'Ọphra k'ukhubha kw'Shual, 18 nnọkha itena k'Bẹt-Họrọn, s'ittong ittaan itena k'erem ch'ichọrạna k'ipekhuma s'Zeboyim, s'ikkeri ititikha k'uminkpa.

19 Wa otepa wạnọ-wạnọ k'efhonfhạr ch'Israẹl bẹ́ wạạmm kòde, ukwuru s'aPhilistiya kk'abena bẹ́ akpa bẹ eden k'ekpongkpo sisi, ọbẹ́, "Deja, aHiburu m'adwuk akkangkkang-kro ọttạra akhọhn!" 20 Ma wọ, anạng p'Israẹl phyibh n'asạk akhebha aPhilistiya bẹ́, abẹ ata abọhnga nkubh, ọttạra nkubh-sẹkhẹ, ọttạra mbạr-chi, ọmana f'ọkọbh-ẹma. 21 Ẹphya ch'nkubh ọttạra nkubh-sẹkhẹ bạbọhnga ede ibhaakha s'ishẹkẹl, ọmạna ọttọhk f'ukpir ishẹkẹl-bhaakha s'sọvẹl kw'ọkhaam asa, ọttạra mbạr, ọttạra ẹbọhnga kw'ẹmma chẹ, ashẹkẹl ibyi ittaan.

22 Ma o, ma iwu ch'ekpong, okpongnạng wạnọ-wạnọ kw'uning Saul ọttạra Jonatan abẹ, kw'ọkhaam ọkkangkkang-kkro, ọbạra ode ọkhọhn kakhẹ ọbọhk, kòde, oyonga Saul ọttạra nnwa kwẹ Jonatan.

23 Ma wọ ikhaana rạnẹ s'akpongnạng p'aPhilistiya afon ata akpa eden k'Mikmash.