1 Samwẹl obeni Saul bẹ́, "Amma wọ kw'uwa Ọvaar Ubinọkpaabyi ọtọhmọ bẹ́, mbyeng-ọ ana k'echo, ọfha ade ọvaarnạng kw'anạng pẹ, Israẹl; s'ode mạnna, m'akhọhmọ itọhng abhaanga ẹkkaabha ch'ibin k'Ọvaar Ubinọkpaabyi. 2 Ọvaar Ubinọkpaabyi kw'Ẹfa phyibh obeni bẹ́, ‘Amma m'nnạng anạng p'Amalẹk irem k'oche kw'uwa abẹ asi Israẹl, sabẹ akpa bẹ eden okpe kw'abẹ abin k'Ijip. 3 Ma o, sọhng ata arima abAmalẹk abẹ, abạra adimi fidede f'ode fabẹ. Vạnọ-vạnọ ọbọhk kátte uruk akpen; fhọ ajunung ọttạra ipanạng, ọttạra ọgbọsẹkhẹ, ọttạra iva p'abẹ atim k'mbọhk, ọttạra adamagbudu, ọttạra arạkhạmaan, ọttạra akamẹl, ọttạra nnyạnyaang.’ "

4 Ma wọ Saul oyeri ajunung otobha, ọtạkha ubhik kwabẹ k'Telaim. Wa akpongnạng p'aseng k'mfhọhk ade nnọhna ẹnọhna ukuma arạbh asen, ọbạra ubhik anạng nnọhna ẹrạbh ukuma asen p'abin Juda. 5 Saul ubin ofona k'ofhon kw'Amalẹk, ọta uttubha k'epe utik bẹ. 6 Ma wọ Saul obeni abạKen bẹ́, "Asọhng afona, atte anạng p'Amalẹk ọbọhk ọfha nạngẹ bạnga mfhọ ọttạra bẹ; khiri wa abạnga asi ọphyaam anạng anạng p'Israẹl phyibh sabẹ abin k'Ijip." Ma wọ anạng p'Ken abin arik Amalẹk.

7 Ma wọ Saul urim abAmalẹk abẹ, tạma k'Havila tạrr ukpira k'Shur, atena k'ukhubha kw'okpebha-dudon n'uyin k'Ijip. 8 Wa Saul ọvạk Agag kw'ode ọvaarnạng kw'Amalẹk ikhikhebhi, khẹ nọ́fha, okhenka utima ọkkangkkang-kkro ọfhọ anạng p'Agag phyibh. 9 Okhenkha, Saul ọttạra akpongnạng pẹ atte Agag ọbọhk, ọttạra arạkhạmaan pẹ p'ajibhi ifor, ọttạra adamagbudu, ọttạra abhaamva, ọttạra arạkhạmaan-va, ọttạra ọttọhk fidede f'ujibh-ujibh, aruk akpen. Wa ekpo mbyọ ẹmma bẹ ettem bẹ́ abẹ afhọ. Okhenkha, mbyọkha pyẹ nạn bẹ nẹ́daakha, ọttạra f'ọmạmọ ifor, abẹ annemeden akhibhi phyi-phyibh.

10 Ma wọ Ọvaar Ubinọkpaabyi ọkpaakhẹ ọtọhnga ọnạng Samwẹl oben bẹ́, 11 "Akwẹ ọmmaam k'ettem bẹ́, kk'Saul ọvaarnạng nsia, ukwuru bẹ kk'nnạm ọkpa ọvạr-m, ntọhna saam nọ́bra ọtạkha." Wa udik ngwọ ọphyaangẹ Samwẹl ẹmma tạrr ọgạma, ose njọhm ma irungu njọ phyibh ọnạng Ọvaar Ubinọkpaabyi.

12 Samwẹl ubina k'ekpebha-rungu ọta ose Saul, okhenka, abẹ n'akpaakh-ẹ bẹ́, "Saul kk'ubina ofona k'Kaamẹl e. Mạma wọ usi ọkpata kw'abẹ m'atima ajim-ẹ, kk'adạkhẹ nnạm ọkpa ọsạkha ofona k'Gilgal."

13 Masẹ Samwẹl n'okhebh-ẹ, Saul ọbẹ́, "Tte Ọvaar Ubinọkpaabyi udi-ọ, ukwuru bẹ́ kk'nsia oche kw'Ọvaar Ubinọkpaabyi ọtọhn-m."

14 Okhenkha, Samwẹl n'ọbạbhọ bẹ́, "Mbạng vọ f'arạkhạmaan n'ammẹbhẹ ma o? Mbạng vọ f'adamagbudu n'ammẹbhẹ ma o?"

15 Saul ubhina bẹ́, "Akpongnạng bọ atim pyẹ k'Amalẹk akwu e; abẹ achokhu arạkhạmaan ọttạra adamagbudu p'ajibhi ifor, ọfha abẹ atima afọhnọ ẹja anạng Ọvaar Ubinọkpaabyi kw'ode Ubinọkpaabyi kwọ, okhenka, kk'ekpo mbyọkha andima phyi-phyibh."

16 Samwẹl obeni Saul bẹ́, "Pyia dạk kákpaak! Kanse mkpaakh-ọ udik kw'Ọvaar Ubinọkpaabyi ọkpaakh-m chạnachẹ k'irungu."

Saul ubhina bẹ́, "Kpaakh-m."

17 Samwẹl ọbẹ́, "Chibhi s'uwa asạk ifor sọ, ọma sạng kw'ade odecho kw'nkạma s'Israẹl o? Ọvaar Ubinọkpaabyi obyeng-ọ ana k'echo ọfha adạbh Israẹl. 18 Ọvaar Ubinọkpaabyi ọtọhm-ọ ọtọhm, oben bẹ́, ‘Sọhng ata adimi agbaan-nạng mbọ p'Amalẹk, rima bẹ abẹ tạrr ase bẹ́ kk'bẹ adima phyi-phyibh.’ 19 Akwẹ n'oseng yạn kw'nạn Ọvaar Ubinọkpaabyi nábhaanga o? Oseng yạn kw'atto akhubha k'ekpo p'anạng p'Amalẹk bạra asi ipyibha k'ititikha s'Ọvaar Ubinọkpaabyi o?"

20 Saul okhenka ọpọhna Samwẹl bẹ́, "Amma kk'Ọvaar Ubinọkpaabyi ikpukpobha nnạnga e, kk'ọtọhm f'Ọvaar Ubinọkpaabyi ọtọhm-m nta. Kk'anạng p'Amalẹk ndima bẹ́ phyibh, mbạra mvạkha Agag kw'ode ọvaarnạng kwabẹ ntima nkwuna. 21 Akpongnạng mbọ atạk arạkhạmaan, ọttạra adamagbudu p'ẹkhaankẹ ijibh ifor, py'abẹ atim k'ekpong akwu, ọfha abẹ atima afọhnọ ẹja anạng Ọvaar Ubinọkpaabyi, kw'ode Ubinọkpaabyi kwọ k'Gilgal."

22 Ma wọ Samwẹl ọpọhn bẹ́,

"Ọma akkẹ bẹ́ Ọvaar Ubinọkpaabyi n'ọtạkha ottennebh k'nnạnga ikkạmasẹ ọttạra nja ifọhnasẹ,

ọyọhnga bẹ́, ọnạng ọsạkha echo ọnạng k'ntọhna s'Ọvaar Ubinọkpaabyi o?

Echo sạsạkha ijibhi ẹyọhnga ẹja-fạfọhnọ,

ntọhna bhạbhaanga ibạra ijibh iyọhnga iyaak s'arạkhạmaan-dim.

23 Ukwuru bẹ́, ochokpọhkhọ ode masẹ ipyibha ch'ẹbọhk-sisi,

nkkang-gạge ibạra ide masẹ ipyibha ch'akha-kpukpobha.

Masẹ ọma kk'ọtọhnga kw'Ọvaar Ubinọkpaabyi afhuma,

ẹma kk'ọma ufhuma masẹ ọvaarnạng."

24 Ma wọ Saul obeni Samwẹl bẹ́, "Amma kk'ipyibha nsia. Amma kk'inyina ch'Ọvaar Ubinọkpaabyi ọttạra ntọhna sọ mfhuma. Akpongnạng mbọ bọ ajor-m e, ẹgwọ usi nkhọhmọ bẹ itọhng. 25 Totokhạn bina ma nạng-m k'ipyibha chaam, abạra akpa nnạm atạkh-m, ọfha mbạra mkpobha Ọvaar Ubinọkpaabyi."

26 Okhenkha, Samwẹl oben-ẹ bẹ́, "Kọ abẹ mạ́ntwạn mkpa nnạm. Ọma kk'ọtọhnga kw'Ọvaar Ubinọkpaabyi afhuma, Ọvaar Ubinọkpaabyi k'adạkhẹ ọma ufhuma masẹ ọvaarnạng kw'Israẹl!"

27 Masẹ Samwẹl ọbhạkhẹ nnạm bẹ́, ofona, Saul ọkpạn-ẹ k'ammakpa p'ọnọhma-wuram, awẹ ọyaakhẹ. 28 Samwẹl n'oben-ẹ bẹ́, "Chemma, Ọvaar Ubinọkpaabyi kk'ẹvaar ch'Israẹl ọtạkha k'akhọ k'mbọhk, ọtạkha ọnạng oyok-ọbaanga kwọ wạnọ kw'ujibhi ọyọhng-ọ. 29 Ẹma nwọ kw'ode Abạrada p'Israẹl afhạra k'núsi, ẹkka chẹ k'nófona; ẹma masẹ oyokhanạng núdia kw'n'ofona ẹkka chẹ."

30 Saul ọpọhna bẹ́, "Amma kk'ipyibha nsia. Totokhạn, khenka nạng-m ikpukpobha k'ititikha s'adennạng p'anạng paam, ọttạra k'ititikha s'anạng p'Israẹl. Kwu antwạn amkpa nnạm, ọfha mkpobha Ọvaar Ubinọkpaabyi kw'ode Ubinọkpaabyi kwọ." 31 Ma wọ Samwẹl utim Saul ọkpa nnạm, Saul okpobha Ọvaar Ubinọkpaabyi.

32 Ma wọ Samwẹl obeni bẹ́, "Akken-m Agag kw'ode ọvaarnạng kw'Amalẹk."

Agag ubina ẹnyaan-ẹnyaana okhebha Samwẹl, ọkkẹ bẹ́, "K'udik ọkka, ojora f'obo kk'osenga."

33 Okhenkha, Samwẹl ọbẹ́,

"Oche kw'ọkkangkkang-kkro kwọ kk'ipanạng usia awor iva,

oche ngwọ gwọ kw'akka m'owor nnwa k'ikhaana s'ayok ipanạng."

Ma o, Samwẹl ọchẹk Agag k'ititikha s'Ọvaar Ubinọkpaabyi k'Gilgal.

34 Ma wọ Samwẹl ubin ọbhạna k'Rama, okhenka, Saul uvura ofona k'akhẹ k'ofhon k'Gibea. 35 Tạma ma, tạrr Samwẹl okhebha ma ope, Saul abẹ ayok dạk násia, oseng ma, wa Samwẹl kk'nkwuna s'Saul utima. Wa akwẹ ọbạra ọmma Ọvaar Ubinọkpaabyi k'ettem s'usi Saul ọdạbh ẹvaar k'Israẹl.