1 Samwẹl 27

Devid urukhu ọttạra aPhilistiya

1 Ma wọ Devid ọkkẹ kha ettem chẹ, oben bẹ́, "Iwu jạnẹ Saul m’ọfhọ-m ọfhọ. Udik ubungukwẹ kw’m’nsi ode bẹ́, m’nnạbh mfona k’ẹkhạma ch’aPhilistiya. Ma wọ Saul m’ukum-m ruror k’ibyi sidede k’Israẹl, ma wọ m’mbạra nnaang-ẹ."

2 Ma-o, Devid ubina ọttạra anạng pẹ ẹnọhna ukuma arạbh jobh, ofona k’ọvaar Akish kw’Gat, kw’ode nnwa kw’Maok. 3 Devid ọttạra ajunung pẹ, arukhu Akish abẹ k’Gat. Ujunung kwidede urukhu ma ọttạra ẹchọhmfhạr chẹ. Ẹma Devid wa urukhu ma ọttạra ipanạng pẹ afa p’ade Ahinoam kw’ubin Jẹzrẹl, ọttạra Abigẹl kw’ubin Kaamẹl, kw’ode opokwa kw’Nabal. 4 Masẹ Saul ọbhaang bẹ́, Devid kk’ọrạbha ofona Gat, ukum-ẹ ruror.

5 Ma wọ Devid obeni Akish bẹ́, "De kk’ọphyaam nkhaama k’akhọ k’ititikha, tte abẹ anạng-m ibyi ma ofhon ngwa ọfha nnuk. Ukwuru yạn kw’amma ọtọhmnạng kwọ n’abạra nnuk k’ivaarbyi ọma abẹ o?"

6 Ma o, ma iwu njọ, Akish n’ọnạngẹ Devid Ziklag, asẹ n’ide isek s’avaar p’Juda, tạma ma kpira ma. 7 Wa Devid urukhu cho gwạnọ ọmaana aphye annebung k’ẹkhạma ch’aPhilistiya.

8 Wa Devid ọttạra anạng pẹ ata arima aGeshur, ọttạra aGirz, ọttạra abAmalẹk abẹ. Anạng mbọ kk’atạma k’ẹtạma aruk ma isisek nnọ s’itạm k’Shur inyaamẹ ikpira k’Ijip. 9 Okpe kwidede kw’Devid ọta ekpong k’ibyi, ọnạng wạnọ-wạnọ ọbọhk k’n’otte uruk akpen, ode ujunung ọbạra ode ikwanạng. M’okhenka ọtạkha arạkhạmaan, ọttạra adamagbudu, ọttạra nnyạnyaang, ọttạra akamẹl, ọttạra ọvạra, utima ukwuna okhebha Akish.

10 Okpe kw’Akish ọbạbhọ bẹ́, "Bạng anạng bọ p’abạnga arim bẹ abẹ chemma?" Devid m’oben bẹ́, "Annim Nẹgẹv kw’Juda, ọttạra Nẹgẹv kw’Jẹramẹl, ọttạra Nẹgẹv kw’aKen abẹ." 11 Devid ọnạng wạnọ-wạnọ ọbọhk núttia ọkpa nnạm k’Gat k’akpen, ode ujunung ọbạra ode ikwanạng, ukwuru s’ọkkẹ bẹ́, "Abẹ m’akke-okke ayaakhẹ idik samạna aben bẹ́, ‘Kkeri oche kw’Devid usi e.’ " Usisi kw’Devid wọ ma, masẹ urukhu k’ẹkhạma ch’aPhilistiya. 12 Wa Akish ọkhaam echera k’Devid, ukwu ọkkẹ bẹ́, "Devid kk’anạng pẹ Israẹl idik ọgbẹra. Ma wọ, n’abạra ode ọtọhmnạng kwaam tạrr ipimmanitor."