1 Wa Devid ọrạbhọ ofona k'ofh kw'Nọb ọta okhebha Ahimẹlẹk kw'ode ọfọhnẹja. Masẹ Ahimẹlẹk ọttạm Devid abẹ, ọtạma fhạfhạnọ, ọbạbh bẹ́, "Ode yạn kw'aseng mạnkeni? Bạng udik gwọ usi ọnạng nạn abọ nọ́twạna?"

2 Devid ubhina Ahimẹlẹk kw'ode ọfhọhnẹja bẹ́, "Ọvaar Saul ọtwạr-m itọhng oben-m bẹ́, ‘Tte ọnạng wạnọ-wạnọ nạngẹ ọtọhm f'ntọhmọ ọttạra ntọhna s'nnạng-ọ osong o.’ Kk'akpongnạng paam mbena bẹ́, abẹ akhebh-m k'ibyi mạnna rạnẹ khạkha. 3 Mantọhmma, Bạng ọttọhk vọ akhaam k'ọbọhk? Nạng-m abrẹd asen, oyongu ma, fidede f'akhaam, nạng-m."

4 Okhenkha, ọfọhnẹja nwọ ubhina Devid bẹ́, "Brẹd kw'ottem uninga k'akhaam k'ọbọhk kóde. Okhenkha, wạra ode bẹ́, ajunung mbọ ipanạng abẹ náyima, amma ntim brẹd kw'awurada mạma e."

5 Devid ọpọhna ọfọhnẹja bẹ́, "K'udik ọkka, amạna ipanạng abẹ nányima, oche ngwọ gwọ n'ode okpe kwidede kw'anyini k'iyaan. Yeyema nạn ọtọhm f'awurada nánta sisi, ajunung avạkha ijunung-for sabẹ, bạra wạra chemma kw'ọkhaankẹ ode iwu ch'awurada o!" 6 Ma wọ ọfọhnẹja n'ọnạng-ẹ brẹd nwọ kw'awurada, ukwuru s'ọdwạkh-ọdwạk nạ́n ode, oyonga nwọ kw'okpokkạro kw'awurada kw'Ọvaar Ubinọkpaabyi, abẹ atạkha kw'utim ọkhạm-ọkhạm atera ma iwu njọ jạnẹ.

7 Wa ọkhaam ọtọhmnạng wạnọ kw'Saul kw'uning ma iwu njọ, kw'abẹ avạk achok, ukwuru ọtọhm f'ọbaan bẹ́, usi k'ititikha s'Ọvaar Ubinọkpaabyi. Ẹma nwọ wa okpen Doẹg, kw'ubin Edom, ọbạra ode ochonạng kw'anạng p'n'akkeri nten s'Saul.

8 Devid ọbạbhọ Ahimẹlẹk bẹ́, "Ọma ọkhọhn ọbạra ode ọkkangkkang-kkro kákhaam mama o? Amma ọkkangkkang-kkro kwaam, ọbạra ode ojoma-ttọhk vạnọ-vạnọ nạ́ntima nkwu ma e, uwuru s'ọvaarnạng ọtọhm-m ọtọhm f'idwudwukha."

9 Ọfọhnẹja nwọ ọpọhna bẹ́, "Ọkkangkkang-kkro kw'uning ma ode nwọma kw'Golayat kw'ubin Philistiya, kw'uwa afhọ k'ipekhuma s'Ẹla. Abẹ afhạrọ wẹ k'ivạra achok k'ẹphọd k'nnạm-nnạm. De abeni bẹ́ atạkha wẹ, atạkha, ọkkangkkang-kkro ọdwạkh-ọdwạk ma kóde oyonga nwọ."

Devid ọbẹ́, "Ọdwạkh-ọdwạk kw'ode masẹ nwọ kóde, nạng-m wẹ."

10 Ma iwu njọ, Devid ọrạbhọ k'Saul okhebha Akish kw'ode ọvaarnạng kw'Gat. 11 Okhenkha, atọhmnạng p'Akish abạbh-ẹ bẹ́, "Devid kw'ode ọvaarnạng kw'isek s'Israẹl sạng ma? Ẹma sạng ode nwọ kw'abẹ n'akkọhn akpaanga k'mbin aben bẹ́,

‘Saul kk'nnọhna sẹ ọfha,

Devid kk'nnọhna ibhik-asong sẹ ọfha o’?"

12 Wa Devid ọtạk udik ngwọ oge k'ettem, Akish kw'ode ọvaarnạng kw'Gat n'ojora Devid oseng eden. 13 Ma wọ n'usi nkkari ma abẹ ititikha bẹ́, n'utubh eten. Ma abẹ ititikha, n'usi idik masẹ utubhuten-nạng, n'ọkkẹr ekpo k'ammakhubh, ọbạra otte attabọng ọbọhk efhobh-ẹ ẹsạkha k'agba-phyạbha.

14 Akish n'obeni atọhmnạng pẹ bẹ́, "Akkeri ujunung nwọ! Usi itubhuten e! Abạnga atim-ẹ akwu mbạng o? 15 Masẹ amma nworu atubhuten, ẹgwọ kw'abạnga n'atim oyok nwa akken-m bẹ́, ukwu usi idindingi chẹ k'akhaam k'ititikha o? Ọbaan ma bẹ́ ọnạng khira nwaa ukwu k'akhaam k'ọchọhm o?"