1 Wa Devid ubin urik Gat, ọrạbh ọta uttubha k’ẹtakpamma ch’Adulam. Masẹ ivotte pẹ ọttạra ẹchọmfhạr ch’otte phyibh abhaang kwẹ, abẹ afona akhebh-ẹ kha. 2 Anạng mbọ phyibh p’uwa aning k’ọmmaphyaangẹ, ọttạra p’atim ayok ifhoru, ọttạra p’aning k’ottempyibh akwu abaabh-ẹ age ngekha, ẹma n’ode bẹ odennạng. Wa anạng p’akpir ẹnọhna anạng amma abẹ.

3 Devid ubina ma ofona k’Mizpa k’ẹkhạma ch’Moab, ọta oben ọvaarnạng kw’Moab bẹ́, "Totokhạn, tte otte kwaam ọttạra ọkka kwaam ọbọhk abẹ akwu aninga abọ, ttạr nsonga ọttọhk f’Ubinọkpaabyi m’usi onạng-m." 4 Ma o, Devid ochokhu ọkka ọttạra otte ma ọvaarnạng kw’Moab. Wa abẹ aning ma ọttạra ọvaarnạng ma okpe ngwọ phyibh kw’Devid uttubh k’ibyittubhasẹ.

5 Okhenkha, Gad kw’ode usi-ẹyaakha kw’Ubinọkpaabyi obeni Devid bẹ́, "Dạkhẹ ma ibyittubhasẹ nnọ káttubha. Sọhng k’isek s’Juda." Ma wọ Devid ubin ofona k’ọkpattem kw’Hẹrẹt.

6 Ma o, Saul ukwu ọbhaanga bẹ́, abẹ kk’Devid ọttạra ajunung p’aning abẹ asia. Wa Saul uning ẹyạr k’isekhisek kw’ichi ch’tamarisk, k’okpecho kw’Gibea, ọkhọn apfẹ kha ọbọhk, ọttạra atọhmnạng pẹ p’abaabh-ẹ age ngekha. 7 Saul oben bẹ bẹ́, "Ajunung p’Bẹnjamin o, akhọm-m itọhng-ẹ! Ma, nnwa kw’Jẹsẹ s’m’ọnạng abạngama phyibh iwonu s’agrep ọttạra s’achidwuk k’ukhira-k’ukhira o? Ma, s’m’usi abạngama phyibh adecho p’arim-ekpong p’nnọhna ibhikh-asong, ọttạra adecho p’arạbh k’asen k’asen o? 8 Ẹgwọ usi abạngama phyibh asi nttọhna-pyibha aten-m o? Owor ọnạng kw’ọkpaakh-m bẹ́, nnwa kwaam kk’echekha ọtạkha nnwa kw’Jẹsẹ abẹ. Ọnạng wạnọ-wạnọ kw’ọjọkh-m kòde, ọnạng kw’ọtekh-m bẹ́, nnwa kwaam kk’ọtọhmnạng kwaam ọchọma bẹ́, obe k’eden utikh-m, k’oche kw’usi chemma, kòde."

9 Osenga ma, Doẹg kw’ubin Edom, kw’uwa obe ma ọttạra atọhmnạng p’Saul, oben bẹ́, "Amma nse nnwa kw’Jẹsẹ s’ukwu okkebha Ahimẹlẹk kw’ode nnwa kw’Ahitub k’Nọb. 10 Ahimẹlẹk ọdwạn Ọvaar Ubinọkpaabyi udik otena Devid, ọnạng Devid uchiattọhk ọttạra ọkkangkkang-kkro kw’Golayat kw’ubin Philistiya."

11 Ma wọ, ọvaar Saul ọtọhmọ abẹ ayeri Ahimẹlẹk, kw’ode ọfọhnẹja, kw’ọbạra ode nnwa kw’Ahitub, ọttạra afọhnẹja p’ẹchọhmfhạr ch’otte phyi-phyibh k’Nọb. Wa abẹma phyibh acher eyera ch’ọvaarnạng. 12 Saul oben bẹ́, "Ọma nnwa kw’Ahitub, khọhmọ itọhng."

Ubhina bẹ́, "Iyaa, aro kwaam."

13 Saul oben-ẹ bẹ́, "Ukwuru yạn kw’ọma ọttạra nnwa kw’Jẹsẹ n’akhạm ipyibha atena abamẹ o? N’anạng-ẹ uchiattọhk ọttạra ọkkangkkang-kkro, abạra adwạn Ubinọkpaabyi k’akhẹ-ẹ echo, osenga ma n’uwunu-m, ọbạra utubha k’eden utikh-m oche kw’usi chemma."

14 Ahimẹlẹk ubhina ọvaar Saul bẹ́, "K’atọhmnạng pọ phyibh, anẹ wọ ọsạk echo masẹ Devid, kw’ode ọnyẹ kw’ọma ọvaarnạng, kw’ọbạra ode ocho-nạng kw’anạng p’n’atikh-ọ, kw’abẹ n’anạng ikpukpobha sididen k’ẹchọhmfhạr ch’ọma ọvaarnạng o? 15 Echedenwu sạng ma ch’ndwạn k’Ubinọkpaabyi k’echo ch’Devid e! Oche ngwọ núdia! Tte ọvaarnạng nạngẹ amma ọtọhmnạng kwẹ udik ọbọhm, ọbạra ọnạng kwidede k’ẹchọhmfhạr chẹ jọ, ukwuru bẹ́, ọtọhmnạng kwọ udik gwạnọ-gwạnọ kw’oten ma idik nna phyi-phyibh kósong."

16 Okhenkha, ọvaarnạng oben bẹ́, "Ahimẹlẹk o, m’ape, ọma ọttạra ẹnạmma ch’atte kwọ kubungu, itwuna kède."

17 Ma wọ ọvaarnạng ọnạngẹ akpongnạng pẹ p’nakker-ẹ ẹfa bẹ́, "Abhạkhẹ nnạm afhọ afọhnẹja p’Ọvaar Ubinọkpaabyi, ukwuru bẹ́, abẹma kk’adạkhẹ Devid abe abẹ atuma. Abẹ asong ma bẹ n’ọrạbh-ọrạbh, okhenka, abẹ khaam nátekha."

Okhenkha, attọhmnạng p’ọvaarnạng wa abẹ ifor nádia bẹ́, ayaan ọbọhk afhọ afọhnẹja p’Ọvaar Ubinọkpaabyi.

18 Ma wọ ọvaar Saul n’ọnạngẹ Doẹg ẹfa bẹ́, "Ọma bhạkhẹ fhọ afọhnẹja mbọ." Ma o, Doẹg kw’ubin Edom ọbhạkhẹ ọfhọ bẹ. Ma iwu njọ, ọfhọ afọhnẹja arạbh annebung ukuma asen p’age ẹphọd. 19 Wa ofon adạkhẹ k’Nọb, kw’ode ofhon kw’afọhn-nja, ọfhọ ajunung ọttạra ipanạng, ọttạra ibhagbọ, ọttạra ọgbọsẹkhẹ, ọbạra ọfhọ adamagbudu, ọttạra mmaam, ọttạra arạkhạmaan k’ọkkangkkang-kkro.

20 Okhenkha, wa Abiyata, ujunungnwa wạnọ kw’Ahimẹlẹk kw’ode nnwa kw’Ahitub, ọrạbhọ ọnnaanga, ọta okhebha Devid. 21 Abiyata ọkpaak Devid oche kw’Saul kk’afọhnẹja p’Ọvaar Ubinọkpaabyi ọfha. 22 Ma wọ Devid obeni Abiyata bẹ́, "Masẹ wa Doẹg kw’ubin Edom uning mạma, nsongma bẹ́ k’udik ọkka m’ọkpaak Saul ọkpaak. Obo kw’ẹnạmma ch’ab’atte kubungu ubin k’akhaam e. 23 Ninga abamẹ, tte nạng-ọ ojor. Ẹma nwọ kw’n’oror-ọ bẹ́ ọfhọ, n’ọgba oror-m bẹ́ ọfhọ e. Ọma m’akhaama ẹnnaanga ọkhaama de aning abamẹ.