1 Ma wọ, Hana ose njọhm oben bẹ́,

"Amma nkhaam ottennebh kwididen k'ettem chaam k'Ọvaar Ubinọkpaabyi;

Ọvaar Ubinọkpaabyi kk'aam ẹfa ch'ekhema* ọnạnga.

Amma n'nsi awawunanạng paam ẹmma,

ukwuru s'nkhaam ottennebh k'ẹnnaanga chọ.

2 "Ọnạng kw'uwuru masẹ Ọvaar Ubinọkpaabyi kòde;

ọnạng ọdwạkh-ọdwạk kòde, oyonga ọma Ọvaar Ubinọkpaabyi;

Ẹtakpa kède ch'ẹkpọhkhọ masẹ Ubinọkpaabyi kwamạna.

3 "Abạnga nnyang kási k'ọkpaakha-dik,

Abạnga ẹmma kási,

ukwuru bẹ, Ọvaar Ubinọkpaabyi ode Ubinọkpaabyi kw'esonga,

ẹma wọ n'usi aponga p'usisi kw'anạng.

4 "Ayuk p'akke-kkamankkam kk'aphyạkha,

okhenka, anạng p'asir atto, kk'ẹfa abạra akhaama.

5 Anạng mbọ p'uwa n'achi adọhbh, n'ayin ayok abẹ, brasẹ abẹ n'ase uchiattọhk,

okhenka, anạng mbọ p'uwa n'ayima okwo, n'achi uchiattọhk adọhbh.

Ikwanạng kw'uwa ode ujidim, kk'iva asenọfa ọmaana,

okhenka, oyok kw'uwa ọmaanẹ iva k'ọsaabh, mantọhmma n'oworu wong.

6 "Ọvaar Ubinọkpaabyi wọ utim obo, ọbạra utima akpen;

ẹma wọ n'utima apfura ofona k'ipfura-fhon, ọbạra utima bạnọ ọkpa nnạm.

7 Ọvaar Ubinọkpaabyi n'ọtọhm upyibhada, ọbạra ọtọhm ujibhada;

Ẹma wọ n'ọsạkha anạng bạnọ ininga, ọbạra udira ayok bạnọ k'ẹrạng.

8 Ẹma wọ n'udira akpukpora k'idọhngọ, ọbạra udira anạng p'oworu bẹ owor k'ẹsạmma;

ọnạng bẹ ininga k'ibyi s'avạvaara, ọbạra usi bẹ aninga ẹyạr k'mvaarchi s'ikpukpobha.

Ọvaar Ubinọkpaabyi wọ utim agbaarẹ p'avạk ọyagbin;

ma agbaarẹ mbọ bọ ọnạn ọyagbin.

9 Ẹma wọ n'okkeri osenga kw'anạng p'n'aphye nnạm k'akhẹ-ẹ,

okhenka, m'udimi abyibyanạng k'urungubạnga.

"Ẹfa ch'ọnạng irima mékke ekhema,

10 Ọvaar Ubinọkpaabyi m'udimi anạng p'arim abẹ udimi.

Ẹma oyeni m'uninga k'ẹrạng ọtta bẹ itum,

Ọvaar Ubinọkpaabyi m'ọkpaara aponga p'iyagbin phyibh.

"Ẹma oyeni m'ọnạng ọvaarnạng kwẹ akpọkhọhdọ,

ọbạra ọnạng ọnạng kw'kk'ana obyenga k'echo ẹfa ch'ekhema."

11 Ma wọ Ẹlkana ubin ọbhạna kha Rama, okhenka, udikobh-nwa nwọ uning k'isekhisek kw'Ẹli kw'ode ọfọhnẹja, n'usi ọtọhm k'ititikha s'Ọvaar Ubinọkpaabyi.

12 Wa ajunungva p'Ẹli ade abyibyiava; abẹ Ọvaar Ubinọkpaabyi masẹ ọttọhk nátạkha. 13 Wa ode ẹmmaana ch'afọhnẹja k'ngekha s'anạng p'Israẹl bẹ́, okpe kwidede kw'ọnạng ọfọhnọ ẹja, masẹ eten ch'abẹ atim afọhnọ ẹja itim ẹnnọhn k'ekpon, ọtọhmnạng kw'ọfọhnẹja m'utima ijum ch'ẹkhaam asa attaan, 14 ukwu ukhum k'isọhkha-khira sidede sabẹ atim awọhn eten njọ. Eten chidede ch'ijum njọ ewong, ẹjọ ch'ọfọhnẹja m'ọtạkha. Ukhira ngwọ gwọ kw'uwa abẹ n'asi anạng anạng p'Israẹl phyi-phyibh p'ata k'Shilo. 15 Brasẹ abẹ n'akkạmọ iyaak s'ẹjaten njọ, atọhmnạng p'ọfọhnẹja m'ata akhebha ọnạng kw'n'ọfọhnọ ẹja aben-ẹ bẹ́, "Khiri kha, nạng ọfọhnẹja nten rạnẹ ọbhaabh, deja móchera ọtạkha eten ẹwọhnachẹ e, oyonga ikhikhebhi."

16 Ode ọnạng kw'n'oben bẹ ọfọhnọ ẹja nạn ochera, oben-ẹ bẹ́, "Mma e, tte abẹ abhaabh chẹ ọbhaabh bạra, fha atạkha okhebh f'ọdaakh-ọ," ọtọhmnạng kw'ọfọhnẹja bạra ubhin-ẹ bẹ́, "Mesese, nemeden nạng-m chẹ mantọhmma, deja, m'ntạkha chẹ k'ẹfa."

17 Wa usisi kw'adikkobh mbọ p'Ẹli ode ẹkhọngkwuru chididen k'ititikha s'Ọvaar Ubinọkpaabyi, ukwuru s'uwa abẹ n'atạkha nnạnga s'anạng m'anạng Ọvaar Ubinọkpaabyi asi oche kw'ọdaakhẹ bẹ.

18 Wa Samwẹl kw'n'usi ọtọhm k'ititikha s'Ọvaar Ubinọkpaabyi, n'oge ọnọhma-khira kw'okpen ẹphọd. 19 Cho kwidede, Hana n'ọbọhra ọnọhma wuraam okkena Samwẹl okpe kw'ẹma ọttạra udim n'ata afọhnọ ẹja. 20 Ẹli bạra odo Ẹlkana ọttạra ikwanạng kwẹ, oben Ẹlkana bẹ, "Tte Ọvaar Ubinọkpaabyi udi-ọ ọttạra iva adwạkh-ọdwạk p'm'afhon ma ikwanạng nwa, pa m'atera echo ch'oyok kw'ophyemi, bạra ọtạkh-ẹ ọnạng Ọvaar Ubinọkpaabyi." Abẹ abina abhạna. 21 Wa Ọvaar Ubinọkpaabyi usi Hana ọphyaam. Hana ọbạra ọmaan ajunung attaan, ọttạra ipanạng afa. Ma okpe ngwọ, Samwẹl ọbạrẹ k'ọgbọ, k'ititikha s'Ọvaar Ubinọkpaabyi.

22 Ma okpe ngwọ, Ẹli kw'kk'ọtạma kidaam-kidaam ọbhaang idik sidede s'iva pẹ n'asi anạng p'Israẹl phyibh, ọttạra oche kw'abẹ n'ayima ipanạng p'n'asi ọtọhm k'ẹbakhamma ch'ukkira kw'etobha abẹ. 23 Ma wọ, obeni bẹ bẹ́, "Amma kk'ibyibyia-mmaana chabạnga mmaanga k'anạng p'Israẹl phyibh e. Abạnga asi yạn asi idik demasẹ nnọ o? 24 Mma e, iva paam. Idik s'n'mmaanga otena bạnga, s'n'inyaamẹ k'ikhaana s'anạng p'Ọvaar Ubinọkpaabyi níjibha a. 25 Ode ọnạng ọkhaam ipina k'ititikha s'oyokhanạng, Ubinọkpaabyi m'okkokke uchini k'echo ch'ọnạng nwọ. Okhenkha, de ọnạng n'otto k'ititikha s'Ọvaar Ubinọkpaabyi, anẹ wọ n'abạra uchini k'echo ch'ọnạng nwọma o?" Tạrr oseng mạma, iva mbọ ẹtọhng-twạra ch'otte nátạkha masẹ ọttọhk, ukwuru s'ode nttọhna s'Ọvaar Ubinọkpaabyi bẹ, ọtạkha akpen p'iva mbọ.

26 Wa Samwẹl ofon ororo ọbạr k'ebe, ọttạra k'ọphyaam f'Ọvaar Ubinọkpaabyi, ọttạra f'ayokhanạng.

27 Iwu jạnẹ, usi-ẹyaakha kw'Ubinọkpaabyi ukwu okhebha Ẹli, oben-ẹ bẹ́, "Ma wọ ode udik kw'Ọvaar Ubinọkpaabyi obeni, ‘Amma wọ wa nyaakhẹ ifor saam nnạng ẹchọhmfhạr ch'atte, Aarọn, k'okpe kw'uwa abẹ aning k'isekhisek kw'Phero k'Ijip. 28 Amma wa ntek atte k'nnạmma s'Israẹl bẹ, ode ọfọhnẹja kwaam, ọfha n'ofona k'ijabyi saam, n'ọkkạmọ ekpo py'erebhi iruk, ọbạra oge ẹphọd k'ititikha saam. Amma wa ntạk nnạnga ibhaabh-bhaabhsẹ s'anạng p'Israẹl anạngẹ, sabẹ nnạng ẹchọhmfhạr ch'atte. 29 Abạnga n'asi yạn atạkha njafọhna saam, ọttạra nnạnga saam, ch'ntek k'ọchọhm kwaam abyạrẹ mfhokh o? Ọma Ẹli, iva pọ n'asi yạn abạr ọma udik ọtạm ayọhnga amma, bạra n'atte bẹ ọbọhk, abạnga atekha nten ikkasẹ k'ẹja ch'anạng paam Israẹl achi o?’

30 "Ma wọ, Ọvaar Ubinọkpaabyi kw'ode Ubinọkpaabyi kw'Israẹl usi ẹyaakha bẹ́, ‘Amma kk'nchekha bẹ́, anạng p'ẹchọhmfhạr chọ, ọttạra ch'atte kwọ m'asi ọtọhm k'ititikha saam tạrr ipimmanitor.’ Okhenkha, Ọvaar Ubinọkpaabyi n'obeni bẹ, ‘Akwẹ dạkhẹ oche ngwọ mode mesese! Anạng mbọ p'akpobh-m, ẹbọ m'mkpobha, mbọ p'annukh-m, ẹbọ mkpạr m'isi. 31 Okpe ukwuma, kwa m'mkpaara akpen p'anạng p'ẹnạmma chọ. Ọnạng kwa m'ọbạra uruk ọtạm-ọtạm k'ẹnạmma chọ kòde. 32 M'atima ottemma ase ujibhada kw'm'ọnạng Israẹl. Ọtạmanạng k'ẹnạmma chọ dạk múninga. 33 Ọnạng kwidede kw'nchokhu akpen k'ijabyi saam, m'uruk akpen pẹ k'ikwosi ọttạra imạmạna k'ettem chẹ. Iva pọ, ọttạra iva p'iva pọ phyibh m'ape k'idikobh ch'akpen pabẹ.

34 " ‘Udik kwa m'otto okhebha ajunungva pọ afa, p'ade Hophini ọttạra Phinẹhas, m'ode ẹkhọhkha ọnạng-ọ. Abẹma anạng afa m'ape k'iwu jạnẹ. 35 Amma m'ntekha ọfọhnẹja nnạng ammoyeni, kw'm'ọsạkha echo ọnạng-m, kw'm'ọbạra usi udik kwidede otor k'ẹkka chaam. Amma m'nttima ẹchọhmfhạr chẹ ebe bẹ gwuk, ẹma m'ọbạra usi ọtọhm k'okpe kwidede k'ititikha s'ọnạng kwaam kw'm'ntekha. 36 Ma wọ ọnạng kwidede k'ẹnạmma chọ m'ọsạkha echo onạng-ẹ, k'silva ọbạra ọnạng-ẹ uchiattọhk, ọbạra uchin-ẹ bẹ, "Totokhạn, rạbh-m mgba nde ọnạng kw'n'usi ọtọhm kw'ofohnẹja, ọfha nse uchiattọhk f'm'nchi." ’ "