1 Samwẹl 26

Devid ọbạra oyobh akpen p’Saul

1 Anạng p’Ziph ata akhebha Saul k’Gibea aben bẹ́, "Devid uttubh k’okpecho kw’Hakila kw’okkeri Jẹshimọn ititikha e."

2 Ma wọ, Saul ọttạra akpongnạng pẹ nnọhna arạbh asenọfa ukuma arạbh jobh p’otek k’Israẹl, abin asạkha k’ibyi s’anạng nạnárukha k’Ziph bẹ́, abẹ ata aror Devid. 3 Saul usi ibyibhingasẹ k’eden ọkhaan-ọkhaan kw’okpecho kw’Hakila, kw’okkeri Jẹshimọn ititikha, okhenka, wa Devid uning k’ibyi s’anạng nạnárukha. Masẹ n’ose bẹ́, Saul kk’ẹ nnạm otora ukpira ma, 4 Devid n’ọtọhmọ abaan-ibyi bẹ́, abẹ ata aror asonga k’udik ọkka de Saul kk’ukpira ma ibyi nnọ.

5 Wa Devid ubin ofona k’ibyibhingasẹ s’Saul, ose s’Saul ọttạra Abnẹr kw’ode nnwa kw’Nẹr, kw’ọbạra ode odecho kw’akpongnạng n’attaabha. Wa Saul uyim k’ottemkwẹ kw’akkemkpa pẹ, p’kk’abạra attaabha.

6 Devid n’ọbạbhọ Ahimẹlẹk kw’ubin Het, ọttạra Abishayi kw’ode nnwa kw’Zẹruya, kw’ọbạra ode nnwọkka kw’Joab bẹ́, "Anẹ m’antwạn anta k’ibyibhingasẹ s’Saul?"

Abishayi oben bẹ́, "Amma m’ntwạn abọ."

7 Ma wọ Devid ọttạra Abishayi abin ma irungu afona k’ibyi s’akpongnạng p’Saul aning, akwu ase s’Saul n’ọttaabha k’ibyibhingasẹ, ọttạra ọkhọhn f’abẹ afho abaangẹ ka echo. Abnẹr ọttạra akpongnạng ayim abaabh-ẹ age ngekha.

8 Abishayi obeni Devid bẹ́, "Chemma, Ubinọkpaabyi kk’ọwawuna-nạng kwọ ọtạkha oge k’mbọhk sọ. Wạra m’atte-m ọbọhk ntima ọkhọhn pfaam nkhum-ẹ eden jạnẹ mmaana ma isisek, khẹ nden mfa mạ́nkhum."

9 Okhenkha, Devid obeni Abishayi bẹ́, "Kẹ khádimi o! Anẹ m’okke ọnạng kw’Ọvaar Ubinọkpaabyi kk’ana obyenga k’echo ọbọhk utwu, iponga ikkum-ẹ pyi-pyibh o?" 10 Devid oben bẹ́, K’udik-ọkka, k’oche kw’Ọvaar Ubinọkpaabyi urukhu akpen, Ọvaar Ubinọkpaabyi oyeni wọ m’uvun-ẹ ọfhọ, oyongu ma m’ope k’okpe kwẹ, oyongu adạkhẹ ma, m’ope k’ekpong. 11 Tte Ọvaar Ubinọkpaabyi nạngẹ ocher bẹ́, ntwu ọnạng kw’Ọvaar Ubinọkpaabyi kk’ana obyenga k’echo ọbọhk. Ọma sạbhọ ọkhọhn, abạra adira ekkora ch’eber ẹbaang-ẹ ma echo, akwu amfona."

12 Ma wọ Devid ọsạbhọ ọkhọhn, ọbạra udira ekkora ch’eber ẹbaanga Saul ma echo abẹ afona. Ọnạng wạnọ-wạnọ kw’ose bẹ, kw’ọbạra osonga udik ngwọ, brasẹ n’ọphyạbh ọda, kòde. Wa abẹma phyibh n’attaabha ọda, ukwuru s’Ọvaar Ubinọkpaabyi ọjẹ bẹ ọda, abẹ attaabha amạm.

13 Ma wọ Devid ojek k’ukhubha ọta obe k’okpecho k’ẹrạng k’oden-mir, abẹ abe ayok abẹ eden-ibhir. 14 Devid oyeri akpongnạng p’Saul ọttạra Abnẹr kw’ode nnwa kw’Nẹr, ọbẹ́, "Abnẹr o, abạnga khaam ẹmạng máchera o?"

Abnẹr ubhina bẹ́, "Ọma anẹ wọ n’ayeri ọvaarnạng o?"

15 Devid ọpọhna bẹ́, "Ọma ade ujunung, oche ngwọ sạng? Anẹ wọ ode masẹ akhọ k’Israẹl? Ode yạn kw’nạn aro kwọ, kw’ode ọvaarnạng nákke akker o? Ọnạng kk’ukwa bẹ́, udimi aro kwọ kw’ode ọvaarnạng e. 16 Udik kw’asi ma nújibha. k’Oche kw’Ọvaar Ubinọkpaabyi urukhu akpen, ọma ọttạra ajunung pọ abaan k’obo, ukwuru bẹ́, abạnga aro kwabạnga kw’Ọvaar Ubinọkpaabyi kk’ana obyenga k’echo nákkera. Abạnga akkeri abaabh-ọbaabha. Ọkhọhn ọttạra ekkora ch’ọvaarnạng p’wára ining ẹbaanga echo ch’ọvaarnạng kẹmbyạn o?" 17 Wa Saul utini ẹmạng ch’Devid, ukwu oben bẹ́, "Nnwa kwaam, ẹmạng chọ jọ mạma o?"

Devid ọpọhna bẹ́, "Uwe e, aro kwaam kw’ode ọvaarnạng, ẹmạng chaam jọ e. 18 Ukwuru yạn kw’aro kwaam n’ukhubh amma ọtọhmnạng kwẹ o? Nsi mbạng o? Bạng udik gwọ njẹ o? 19 Ma o, tte aro kwaam kw’ode ọvaarnạng okhọhmọ itọhng k’ọkpaakha-dik kw’ọtọhmnạng kwẹ. De akwẹ ubin k’Ọvaar Ubinọkpaabyi bẹ́, awun-m, tte ẹma ochera ọtạkha ẹnạnga chaam. De ode bẹ́, akwẹ ubin k’ayokhanạng, tte Ọvaar Ubinọkpaabyi ọraakhẹ bẹ ẹmma! Abẹ kk’aam akhubha bẹ́, nạngẹ okhebh pfaam k’Ọvaar Ubinọkpaabyi ntạk. Abẹ atera aben-m bẹ́, ‘Sọhng ata akpobha akha.’ 20 Ma o, abạnga káchera isẹ saam ichebhi k’isek s’anạng p’nạn Ọvaar Ubinọkpaabyi asong. Ọvaarnạng kw’Israẹl kk’ukwua bẹ́, ukwu oror ẹtạtaana masẹ ọnạng uyini ẹgbaji ch’inọhn k’okpecho."

21 Ma wọ Saul ọpọhn bẹ́, "Amma kk’ipyibha nsia. Nwa kwaam Devid o, kpa nnạm. Ukwuru s’akpen paam abạr-ọ udik chemma, amma dạk kọ igbaan mạ́nsi i. K’udik ọkka, amma kk’idindingi ọttạra ipina chididen nsia e."

22 Devid ubhina bẹ́, "Kkeri ọkhọhn f’ọvaarnạng ma e. Tte okpongnạng kwọ wạnọ ojekha ukwu ọtakha. 23 Ọvaar Ubinọkpaabyi m’ọtaam ọnạng kwidede kw’akpen pẹ ator-otor, ọttạra kw’ophye nnạm k’akhẹ. Chemma, Ọvaar Ubinọkpaabyi kk’ọ ọtakha oge-m k’mbọhk, okhenka, amma ọnạng kw’Ọvaar Ubinọkpaabyi kk’ana obyenga k’echo ọbọhk mạ́ntwu. 24 K’udik ọkka, masẹ akpen pọ abạr-m udik chemma, tte akpen paam ẹgba ebạr Ọvaar Ubinọkpaabyi udik, tte ọbạra ọrạbh-m k’ọmmaphyaangẹ kwidede."

25 Ma wọ Saul obeni Devid bẹ́, "Nnwa kwaam, Devid, tte Ọvaar Ubinọkpaabyi udi-ọ; ọma m’asi idik s’m’ibạr udik, ọttạra bẹ́, k’udik ọkka, m’abạra akhaama ekhema."

Ma o, Devid oseng ofona, Saul ọbạra ọkpa nnạm ọbhạna k’akhẹ k’ofhon.