1 Ma wọ Devid ọrạbhọ k'Naiyọt k'ẹkhạma ch'Rama, ọta okhebha Jonatan ọbạbh-ẹ bẹ́, "Amma oyeni nsi mbạng o? Njẹ bạng udik o? Mpini atte kwọ yạn kw'n'okhonga bẹ́ ọfhọ-m o?"

2 Jonatan ọpọhn-ẹ bẹ́, "Mesese! Ọma mápe! Kkeri e, vạnọ-vạnọ kóde f'otte kwaam m'usi, ọsạkh-ọsạkha ọbạr-ọbạr, kw'nạn khaam kạnọ́kpaak. M'usi yạn udubh-m ngwa o? Oche ngwọ núdia!"

3 Okhenkha, Devid ọtạk echekha oben bẹ́, "K'udik ọkka, atte osong ma bẹ́, amma ndaakh-ọ idik mororo. Ẹma kk'obena k'ettem bẹ́, ‘Jonatan udik ngwa mósonga, deja, ettem kẹ mérebh.’ Okhenkha, oche ngwọ kw'Ọvaar Ubinọkpaabyi urukhu akpen, ọttạra oche kw'ọma abạra aruk akpen, amma n'nning k'ngekha s'obo ọttạra akpen."

4 Jonatan obeni Devid bẹ́, "Fidede f'abeni bẹ́ nsi, m'nsusi nnạng-ọ."

5 Ma wọ Devid n'obeni Jonatan bẹ́, "Jima bẹ́ uphyini wọ ode erobhawu ch'ophye ọbhakwẹ, kw'wạra ọbaan bẹ́, nchi uchiattọhk ọttạra ọvaarnạng, okhenka, tte nta nttubha k'owonu tạrr ukpira uphyini k'ẹchọhkha. 6 De atte ọbạbhọ-ọ bẹ́, amma mo, tekh-ẹ bẹ́, ‘Wạra Devid ọtạk ẹfa bẹ́, ntte-ẹ ọbọhk ọta k'Bẹtẹlẹhẹm kw'ode ofhon kwẹ, ukwuru sabẹ n'afọhnọ ẹja ch'cho k'efona chẹ.’ 7 De obeni bẹ́, ‘Ọbaan ma,’ songa bẹ́ udik kóde. Okhenkha, de ettem ipyibh-ẹ, songa k'udik-ọkka bẹ́, ọkhạmọ ipyibha otena abamẹ. 8 Ọma si-m ijibha masẹ ọtọhmnạng kwọ, ator k'echekha ch'kk'atạkha amma abẹ k'ititikha s'Ọvaar Ubinọkpaabyi. Ode iponga khaam ipyibha, tima ọbọhk kwọ fhọ-m kadẹ! Oseng yạn kw'n'atte-m ọbọhk anạng atte bẹ́ ọfhọ o?"

9 Jonatan ọbẹ́, "Mạnna núdia! Ode wạra mmaang yebhi-yebhi bẹ́ otte kwaam n'ọkhạmọ bẹ́ ọfhọ-ọ, wạra khọ m'mkpaakh o?"

10 Devid n'ọbạbhọ Jonatan bẹ́, "Ma m'nsi yạn nsonga de atte ubhin-ọ k'idwạdwạkhọ?"

11 Jonatan obeni Devid bẹ́, "Kwu amfona k'owonu." Ma wọ abẹ atwạnọ afona k'owonu.

12 Ma o, Jonatan oben Devid bẹ́, "Amma nchekhi k'ititikha s'Ọvaar Ubinọkpaabyi kw'ode Ubinọkpaabyi kw'Israẹl bẹ́, k'iwu ifa k'ititikha, amma ọttạra otte kwaam m'amkpaak idik. De ẹma ọkhaam ẹkka ẹkkachẹ otena abọ, m'nsi-usi asonga. 13 Okhenkha, ode otte kwaam ọkhạmọ bẹ́ usi-ọ ọttọhk, tte Ọvaar Ubinọkpaabyi ọnạng aama Jonatan irem, tte ọnạng-m ọttạra-ọttạra, de nạn khọ nạ́nsia asonga, mbạra nkkaan-ọ afona k'idira. Tte Ọvaar Ubinọkpaabyi uninga abọ oche kw'kk'otte kwaam abẹ uninga. 14 Okhenkha, khọhkh-m ididaakha khira s'Ọvaar Ubinọkpaabyi s'nạn itwuna ikhaam, ator k'oche kw'm'nnuk akpen mkpira, ọfha abẹ nạng-m afhọ. 15 Ọma idạdaakha sọ kàkpaara k'ẹchọhmfhạr chaam, tạrr oseng k'okpe kw'kwạna Ọvaar Ubinọkpaabyi kk'awawunanạng p'ọma Devid udima phyibh ma ọyagbin."

16 Ma wọ Jonatan ọtạk echekha ọttạra ẹchọhmfhạr ch'Devid, ọbẹ́, "Tte Ọvaar Ubinọkpaabyi usi awawunanạng p'Devid atọhkha mpyibha sabẹ." 17 Wa Jonatan oseng ididaakha asẹ usi Devid ọtạkha dạkhẹ echekha chẹ, ukwuru bẹ́, Devid ọdaakh-ẹ masẹ ifor sẹ oyeni.

18 Wa Jonatan obeni Devid bẹ́, "Uphyini wọ ode erobhawu ch'ophye ọbhakwẹ. Anạng m'asong-osonga bẹ́ káde, s'ọnạng nạn ẹyạr k'ogbera kwọ mùninga. 19 de uphyini osengi, k'ẹchọhkha, sọhng ma ibyi nnọ s'uwa attubh okpe kw'ọmma-phyaangẹ nwa ọtạm, ttubha ma ẹta ch'Ẹzẹl, atik. 20 Amma m'ntta ayuk attaan k'ukhubha gwạnọ kw'ẹta njọ, aben bẹ́, n'mben bẹ́, ntta ọttọhk. 21 Ma wọ m'ntọhm udikkobh-nwa mben-ẹ bẹ́, ‘Sọhng ta aror ayuk mbọ.’ De abhaang s'mben-ẹ bẹ́, ‘Kkeri pyẹ k'ukhubha kwọ, tạkha pyẹ kwu,’ kw'uyini bẹ́, mbeni bẹ́ ọmoyeni akwu, ukwuru bẹ́, k'udik ọkka, k'oche kw'Ọvaar Ubinọkpaabyi urukhu akpen, kwu khiri kk'annaanga, ojora kòde. 22 Okhenkha, de mbeni udikkobh-nwa nwọ bẹ́, ‘Kker e, ayuk mbọ aning ayongu ma ibyi sabẹ e,’ kw'uyini bẹ́, oyonga m'abina afona, ukwuru bẹ́, Ọvaar Ubinọkpaabyi kk'ọ usia bẹ́ arạbh annaanga. 23 K'echekha ch'amma ọttạra ọma kk'antạkha, jima bẹ́, Ọvaar Ubinọkpaabyi wọ ode mạna nttẹnsẹ tạrr ipimmanitor."

24 Ma wọ Devid uttubh k'owonu. Masẹ erobha ch'ophye ọbhakwẹ ikpir, ọvaar Saul ọta uninga ẹyạr bẹ́, uchi ọttọhk. 25 Wa ọvaarnạng uning ẹyạr oche kw'ẹmmaana ede, okkeri Jonatan ititikha, Abnẹr ọbạra uninga ọbaanga ẹma Saul, okhenka, wa ọnạng kw'uning k'ogbera kw'Devid kóde. 26 Saul udik gwạnọ-gwạnọ nọ́kpaakha ma iwu njọ, s'ọkkẹ bẹ́, "Nạnudusi udik kk'uttia okhebha Devid kw'usi-ẹ ọkkẹ bẹ́, ẹma núwura k'oche kw'wạra m'ọgba ọttạra usi erobha nja, k'udik ọkka, Devid núwura k'ititikha s'Ọvaar Ubinọkpaabyi." 27 Masẹ iwu echobh ma ch'ettong iwu ifa s'ophye kw'erobha njọ, Devid nọ́bra ukwa bẹ́ uninga ẹyạr k'ogbera kwẹ. Ma wọ Saul n'ọbạbhọ nnwa kwẹ Jonatan bẹ́, "Ode yạn kwa nnwa kw'Jẹsẹ nạn ẹyạr ma núninga bẹ́, ọttạra mạna uchi uchiattọhk o? Chạnachẹ núkwa, chemma nọ́bra ukwa."

28 Jonatan ubhina Saul bẹ́, "K'udik ọkka, Devid ọtạk ẹfa ophyem-m bẹ́ ntte-ẹ ọbọhk ọta k'Bẹtẹlẹhẹm. 29 Oben-m bẹ́, ‘Totokhạn tte-m ọbọhk mfona, ukwuru bẹ́, efona chamạna m'ẹfọhnọ ẹja k'ofhon e. Nnwotte kwaam ọtọhmọ bẹ́, nta e. De kk'ọphyaam ntạkha k'ititikha sọ, tte nta nse ivotte paam.’ Ẹgwọ usi ẹma Devid nạn ma ode bẹ́, uchi uchiattọhk k'okpokkạro kw'ọma ọvaarnạng e."

30 Wa Saul ọdwạkh-ẹ mororo otena Jonatan, n'oben-ẹ bẹ́, "Ọma nnwa kw'ọsaasa ọbạra ọkpọkhe e cho kwanạng kw'aning ma! Ọma akkẹ bẹ́, kạ́nsong bẹ́ kk'ẹgbagba akhaama ọttạra nnwa kw'Jẹsẹ? Mkpạr ide sọ ibạra ide s'akka kw'ọmaan-ọ. 31 Oche ngwọ kw'nnwa kw'Jẹsẹ m'uruk akpen ma ọyagbin, ọma oyeni ọttạra ẹvaar chọ arạnga máttima a. De asong udik, ror eden tim-ẹ kken-m, khiri ọbaan k'obo!"

32 Jonatan ọbhạkhẹ ọbạbh Saul bẹ́, "Ukwuru yạn kw'n'ọbaan k'obo o? Sẹ ọjẹ bạng udik o?" 33 Wa Saul ọbhạrẹ ọkhọhn pfẹ bẹ́, ọfhọ Jonatan. Ma wọ Jonatan n'osong bẹ́, otte kwẹ ọkhạmọ bẹ́ ọfhọ Devid.

34 Jonatan onnemeden ubina bẹ́ bik, ottemkạm awẹ. Ottong iwu ifa s'ophye, Jonatan ọttọhk núchia, ukwuru s'ettem ipyibh-ẹ k'ọkpạrsia-dik kw'otte usi ọnạng Devid.

35 K'ekpebhachẹ, wa Jonatan utim udikkobh wạnọ utima ofona k'ibyi s'Devid uttubh. 36 Oben udikkobh nwọ bẹ́, "Ttima ẹbhạr ata aror ayuk mbọ p'ntta." Masẹ udikkobh nwọ n'ọrạbh ofona o, Jonatan ọtta uyuk oche kwa awẹ m'otto oyongu nnwa nwọ. 37 Masẹ udikkobh nwọ ukpir ma ibyi s'uyuk kw'Jonatan otto, Jonatan oyer-ẹ k'ẹrạng-k'ẹrạng oben bẹ́, "Awẹ otto kha ororo k'akh-ọ k'ititikha e!" 38 Ma wọ Jonatan ọbạra ọkwọhrọ ẹmạng, oben-ẹ bẹ́, "Dwukh-udwukha! Sọhng ẹbhạr-ẹbhạrẹ! K'eden kábe o!" Ma wọ udikkobh nwọ udwung uyuk nwọ ọkpa nnạm okkena otte kwẹ kw'ode Jonatan. 39 Udikkobh nwọ udik gwạnọ-gwạnọ kósong otena ma idik nnọ, oyonga Jonatan ọttạra Devid kw'uwa asong nttọhna sabẹ asi. 40 Wa Jonatan ọtạk ekpong-kpo pyẹ ọnạng udikkobh nwọ, oben-ẹ bẹ́, "Tima ekpo mbyọ kpa nnạm k'ofhon."

41 Masẹ udikkobh nwọ kk'ofona, Devid uyin k'ibyi s'uttubh, osenga k'ẹrạkh-ẹrạkha kw'ẹta njọ ch'uttubh ọta okhebha Jonatan, ọrạkha uttima ititikha k'isisek nden nttaan usima Jonatan. Abẹ abaakha ayok, abẹ agạma, okhenka, Devid ọgạm ọyọhnga Jonatan.

42 Jonatan oben Devid bẹ́, "Sọhng e, tte Ọvaar Ubinọkpaabyi uninga abọ k'idira. Masẹ kk'eyok-chekhi nja ansia, ‘Tte Ọvaar Ubinọkpaabyi ode mạna nttẹnsẹ, ọttạra k'iva p'iva pọ, ọttạra k'iva p'iva paam tạrr ipimmanitor.’ " Ma wọ Devid ubin ofona, Jonatan ọbạra ọkpa nnạm k'ofhon.