1 Samwẹl 10

Samwẹl obyeng Saul ana k’echo

1 Ma wọ Samwẹl ọtạk igbere ch’ana obyenga Saul ana k’echo, ọbaakh-ẹ, oben bẹ́, "Ọvaar Ubinọkpaabyi kk’ọ ana obyenga k’echo bẹ́, adabh anạng pẹ Israẹl p’ochokhu k’ettem. 2 Masẹ chemma m’atte-m ọbọhk ma abhạna, m’attạma ajunung afa abẹ ọbaanga epekwur ch’Rachẹl k’Zẹlza k’erem ch’Bẹnjamin. Abẹ m’akpaakh-ọ bẹ́, "Abẹ kk’nnyạnyaang s’ata ruror asia e. Ma wọ, atte dạkhẹ udik kw’nnyạnyaang nọ́kka e, n’oponga kwọ, ọbạbh bẹ́, ‘Ma m’nsi yạn k’nnwa kwaam o?’ "

3 Ma wọ m’asenga ma tạrr akpira k’ibyi s’ichi chididen ebe k’Tabọr. Ajunung attaan p’n’afona bẹ́, ata akpobha Ubinọkpaabyi k’Bẹtẹl m’akhebh-ọ ma. Oyok wạnọ m’utima avu-va attaan, nwọkha m’utima abrẹd attaan, nwọkha dạkhẹ m’utima itwuk-gbạre. 4 Abẹ m’asim-ọ, abạra anạng-ọ abrẹd afa, m’atạkha pyẹ kabẹ k’mbọhk.

5 "Ayongu ma, m’afona k’Gibea kw’Ubinọkpaabyi, k’ibyibhingasẹ s’aPhilistiya. Masẹ m’asenga abaanga k’ofhon, m’attạma ikhaana s’asi-ẹyaakha p’abin k’ijabyi, p’n’akhir agaangang ọttạra mbin, ọttạra aprompo, ọttạra agimangim p’abẹ n’akhir achi bẹ eden, bạra abẹ n’asi ẹyaakha. 6 Ma wọ Iguguma s’Ọvaar Ubinọkpaabyi m’ẹsạkha ọttạra ẹfa ininga abọ, ọma m’abạra asi ẹyaakha, m’ẹbạra ẹbhạkh-ọ akhạmọ. 7 Okpe kw’nkhọkha nnama k’iyina, si udik kwidede kw’akhạmọ bẹ́, asi, khiri Ubinọkpaabyi uning abọ.

8 "Chi-m eden afona k’Gilgal. K’udik ọkka, amma m’nsạkha-ọsạkha nkwu nkhebhọ, ọfha mfọhnọ ẹja ch’nnạnga ikkạmasẹ, ọttạra ch’nnạnga s’ofor-gbạkha. Okhenkha, oyonga m’aninga iwu isenọfa atik tạrr nkwu nkhebh-ọ, ọfha mkpaakh-ọ udik kw’m’asi."

Saul ọdạbhẹ Ẹvaar

9 Masẹ Saul ọbhạkhẹ nnạm bẹ́, ofona urik Samwẹl, Ubinọkpaabyi ọbhạkhẹ ẹkka ch’Saul, ọttạra bẹ, nkhọkha nna phyibh ikhaam ẹyaakha ma iwu njọma. 10 Masẹ abẹ akpir k’Gibea, ikhaana s’asi-ẹyaakha ikhebh-ẹ; ẹfa ch’Iguguma s’Ubinọkpaabyi ẹnwa Saul, ọttạra bẹ usi ẹyaakha. 11 Masẹ anạng mbọ phyibh p’kk-ẹ asonga ase s’n’usi ẹyaakha ọttạra asi-ẹyaakha, abẹ n’abhạkhẹ abạbh ayok bẹ́, "Mbẹ, bạng udik gwọ ma kw’okhebh nnwa kw’Kish o? Saul n’ọttạr adạkhẹ k’ikhaana s’asi-ẹyaakha o?"

12 Ujunung wạnọ kw’urukhu ma ọbạra ọttạra bẹ́, "Ma, bạng anạng bọ afhonu bẹ yeri?" Ma wọ, akwẹ node ẹtạma bẹ́, "Saul n’ọttạr adạkhẹ k’ikhaana s’asi-ẹyaakha o?" 13 Masẹ Saul ukkum ẹyaakha sisi, oseng ofona k’ijabyi.

14 Ma wọ, nnwotte kw’otte kw’Saul n’ọbạbhọ ẹma Saul ọttạra ọtọhmnạng kwẹ bẹ́, "Abạnga ata mạn o?"

Ubhin bẹ́, "Anta nnyạnyaang ruror e, okhenkha, masẹ nạn sẹ nánsia, n’ambin amfona k’Samwẹl."

15 Nnwọkka kw’otte oben-ẹ bẹ, "Kpaakh-m udik kw’Samwẹl ọkpaakh-ọ."

16 Saul ubhin-ẹ bẹ́, "Okpaakhẹ mạna ọyaakh-ọyaakhẹ bẹ́, abẹ kk’nnyạnyaang asia e." Okhenkha, nnwọkka kw’otte udik gwạnọ-gwạnọ kw’oten k’ẹvaar, kw’Samwẹl kk’ẹ ọkpaakha, nọ́kpaakha.

17 Ma wọ, Samwẹl oyeri anạng p’Israẹl akwu abe k’ititikha s’Ọvaar Ubinọkpaabyi k’Mizpa 18 ọkpaak bẹ bẹ́, "Ọvaar Ubinọkpaabyi kw’ode Ubinọkpaabyi kw’anạng p’Israẹl obeni bẹ́, ‘Amma wọ wa ntim anạng p’Israẹl mbina k’Ijip, mbạra nnạbha bạnga k’mbọhk s’anạng p’Ijip ọttạra idifhon idwạkh-ọdwạk phyibh, s’ichokhu bạnga k’ibira.’ 19 Mantọhmma abạnga kk’Ubinọkpaabyi kwabạnga afhuma, kw’ọkkaan bạnga k’ọkhạnkạmọ phyi-phyibh ọttạra irem s’itto ikhebha bạnga. Abạnga kk’abena dạkhẹ bẹ́, ‘Mesese, nạng mạna ọvaarnạng!’ Mantọhmma, abạnga m’abe k’ititikha s’Ọvaar Ubinọkpaabyi k’mfonamma ọttạra k’nnạmma sabạnga."

20 Masẹ Samwẹl utim mfonamma s’Israẹl phyibh uyin ka, abẹ abhạrẹ ọsẹ, ukwu otto k’efonamma ch’Bẹnjamin. 21 Ma wọ, oyeri efonamma ch’Bẹnjamin iyin ka, k’ẹnạmma-k’ẹnạmma, ọsẹ ukwu otto k’ẹnạmma ch’Matri. K’ekpongannạm-kpe, wa abẹ n’arengi Saul kw’ode ujunungnwa kw’Kish ator k’ẹyaakha ch’ọsẹ. Okhenkha, mas’abẹ aror-ẹ, abẹ kẹ násia. 22 Ma o abẹ n’abạbhọ adạkhẹ Ọvaar Ubinọkpaabyi bẹ́, "Ma, ujunung nwọ k’ukpira ma yeri?"

Ọvaar Ubinọkpaabyi ubhina bẹ, "Uwe e, uttubh ma k’ibyi s’abạnga achokhu ekpo pyabạnga e."

23 Ma wọ, abẹ arạbhọ afona k’ibyi s’uttubh, ata atạkh-ẹ atima ayin k’iyaan. Masẹ ọta obe k’ngekha kw’ayok, wa ogoru ebe ọyọhnga bẹ phyibh. 24 Samwẹl oben anạng mbọ phyibh bẹ́, "Abạnga kk’ujunung asia kw’Ọvaar Ubinọkpaabyi kk’otekha o? Ọnạng kw’ode masẹ akhẹ ma ikhaana nna phyibh kóde."

Ma wọ anạng n’acher bẹ wạạm aben bẹ́, "Tte ọvaarnạng uruk akpen p’adum-udum e!"

25 Ma wọ, Samwẹl n’ọtạk nnyina s’ẹvaar ọkpaak anạng mbọ. Ọkkẹrẹ sẹ k’nnwẹr ochok k’ibyi s’Ovaar Ubinọkpaabyi uning. Ma o, Samwẹl ubina ininga njọ, oben ọnạng-ọnạng ọbhạna k’akhẹ k’ọchọhm.

26 Wa Saul ọbạra ọbhạna k’akhẹ k’ofhon k’Gibea, ọttạra afanạng p’atwạnọ abẹ, p’Ubinọkpaabyi kk’nttem sabẹ udia. 27 Okhenkha, akhọr-nạng bạnọ n’abạbhọ bẹ́, "Ujunung nwa m’osenga yạn ọkkaana mạna k’mbọhk s’awawuna-nạng pamạna o?" Osenga ma, abẹ annukh-ẹ, abẹ kẹ nnạnga nábạra anạnga. Saul okhenka umyi bẹ́ tạkkạbh.