Comunidade

Bot ɛ zedum koŋ nɛ Zɛɛb ɔ ɛpekaa esa bɔɔ pak’ɔɔ

32 Ɛdhuu ɛ bot djas nadi edum koŋ nɛ Zɛɛb ɔ, nadi ɛ́ tɔ ɛgwakel ɛnyɔɛpe tɔ elyem nɛ esisim, ye tok nɛ mot ngɔt pak’ɔɔ nadi eke náá, esa bɛ ɛ́ yii nyɛy nyɛ ɛmet. Esa ee bɛ nadi nɛ yɛ ɛ, nabɛ ɛ́ yii bɔɔ djas.

Tsik bot ɛ zɛɛga mendjaala

42 Bɔɔ djas naadyeebawa zii tɔ ɛgwak ɛ́ mɛlyo mɛ bot ɛ lwoma nadi elyo bɛ ɛ. Bɛ nadi ɛ́ tɔ boo ɛgwakel pak’ɔɔ, bɛ nadi edɛ edee ɛ́ é di wat, nɛ ɛdjaala Zɛɛb.

46 Mɛlu djas, bɛ nadi esɛɛga tɔ kok Ndjaa-ebuwa ɛ Zɛɛb. Bɛ nadi ededɛ edee bɔɔ ɛ́, é di wat tɔ mendjaa mɔɔ, tin bɛ nadi edɛ ɛ́ nɛ boo mɛmyaala tɔ elyem, ààbɛ nɛ lyem ɛbet. 47 Bɛ nadi eduwal Zɛɛb tɔ mɛdjeeb, tin, bot djas nadi ekwyɛl bɛ ɛbuɛpe. Tin mɛlu djas, Ghɛŋ nadi ebil tɔ ɛdhuu ɛ lɔɔ, bot ɛ nyɛ nadi etsik ɔ.

14 Bɔɔ djas, bɛ nabɛ ɛ́ nɛ mɛfulu mɛ ɛsesɛɛga é zɛɛga mendjaala bɛ nɛ boa, nɛ Maali nyɛɛg ɛ Yezu, zɛnɔɔ bɔn-nyɛɛg ɛ Yezu esok nɛ esok.

5 Tin, Pyɛɛd nadi ɛ́ kɔɔla tɔ ndjaa membok, deenek bot ɛ zɛɛga mendjaala nadi ewa zii tɔ ɛdjaala ɛ Zɛɛb kɔ ɛsu ɛ lɛ ɛlyelɛpe.

20 Etɛɛ náá, bot ɛbá nɛghu bot ɛlɛl ɛ sɛɛga kɔ ɛsu ɛ din ɛ lam ɔɔ, mɛ aadi ɛ́ tin pak’ɔɔ.»

Zyaala tɔ ndjaa mendjaala

10 Bɔn-nyɛɛg bam, mɛ ɛpedjaala nɛ nen nɛ din ɛ Ghɛŋ’enaka Yezu Klisto náá: Gwakelka, sa bi ààdi nɛ zyaala pak’en, dika tɔ ɛgwakel nɛ lyem wat, da bi ɛ́ di nɛ esiiza wat, zɛnɔɔ egeka wat.

13 Tin, menabɛlka djas, bot ɛ mbyak eYuda nɛghu bot ɛ mbyak eGhɛlɛk, kwom mot nɛghu seŋɛlɛ mot, mena naaduwaka Zɛɛb tɔ Sisim wat. Ye nabɛ ɛ́ étɛp mena needika nyel ngɔt. Tin, yɛ ɛ́ Sisim tak wat ɛ di tyee mɛdii mɛ mena di edɛka menabɛlka djas ɛ.

4 Dáa ye di náá, nyel wat mena dika nɛ yɛ nɛ bu ekyes ɛ, kyes nɛ kyes ɛ́ nɛ mɛsa mɛ ye di esa ɛ. 5 Ye nakoozodi náá, bot ɛ́ ɛbuɛpe, bot moo ɛ́ nyel ngɔt tɔ ɛgwakel nɛ Klisto. Deenek, bot ɛ́ tɔ ɛgwakel pak’enaka dáa esum e nyel mot ngɔt.

16 Dika tɔ ɛgwakel pak’en. Tin, sa bi ààdi bot ɛ ɛghɛɛa nyel, dika bot ɛ mɛsila. Tin, sa bi ààbee náá, biyɔ bɛmet ɛ́ zodi bɛtsoŋ ɛ bot✝.

Sa wɔ ààpɛ́ɛ mɔn-nyoog

1 Myaalka ɛdi ɛnyɔɛpe nɛ mot di ààlyel tɔ ɛdum ɛ koŋ nɛ Zɛɛb ɔ, sa bi ààlii ɛbiyoɛpe dum nɛ mɛkpa mɛ.

5 Beta náá, Zɛɛb mot di edjɛ bot zii nɛ mɛghaaz ɔ sa náá, bi di tɔ ɛgwakel pak’en dáa Yezu Klisto di esa nɛ nen ɛ.

Ɛdulaa mɛlɔ yii mɛsik

17 Mɛ ɛpedjaala nɛ nen bɔn-nyɛɛg, bi ɛ́ kobaka nɛ bot djas di ewa mbɛk nɛ ɛzɛm tɔ sama bot ɛ zedum koŋ nɛ Zɛɛb ɔ, bot ɛ di esaa náá, bi liig Zɛɛb koŋ nɛ ɛbyen ɛ́ mɛdjek mɛ bi nadjek ɛ. Dika ɛtsetaɛpe nɛ nɔɔ,

24 Djhookwyɛɛgelka pak’enaka étɛp ɛdjɛel mɛghaaz tɔ kwyɛl nɛ ɛsa enɛm esa. 25 Sa mena ààkatka ɛtɔ́ pɛ ndjaa mendjaala, dáa bɛdhiiti bot moo nɛ mɛfulu mɛ ɛsa yɛ mos ɛ. Tin, mena goka ɛ́ nɛ ɛdjɛel mɛghaaz pak’enaka, etɛɛ náá, bi ɛpebee biyɔ bɛmet náá, ɛlu ɛ Ghɛŋ eezekunaa.

14 Daŋ-daŋ ɛ́ náá, kwyɛlelka pak’en, etɛɛ náá, kwyɛl ɛ di esa náá, bi di tɔ ɛgwakel ɛnyɔɛpe.

3 Saka mɛghaaz étɛp ɛbaal ɛgwakel ɛ Sisim na Dɛɛ djɛ mena ɛ. Dika tɔ egwyem pak’en étɛp bi needi tɔ egwakel.

Sa di ɛnyɔɛpe tɔ ndjaa mendjaala ɛ

8 Tin, ye goka ɛ́ náá, bi di nɛ esiiza nɛ ɛkwosak ɛ wat, dika nɛ kwyɛl pak’en dáa bɔn-nyɛɛg. Dika nɛ lyem ghoŋ, nɛ ɛdjɛel duu pak’en.

11 Bɛwɛn bam, dáa di náá, Zɛɛb nɛ kwyɛl mena deenek ɛ, mena gokaka ɛ́ nɛ kwyɛlel pak’enaka.

7 Zɛɛb ɛ́ mɛkas. Tin, menabɛlka djas ɛ di ekɛ tɔ gwyɛ ngel dáa Zɛɛb nyɛy nyɛ ɛmet di ekɛ ɔɔ, menaka ɛ́ tɔ ɛgwakel pak’enaka. É di’enek, ghiya ɛ Yezu, Mɔn’ɛ waadis mena edhuud e mesyem djas.

28 Tin, ye tokapɛ nɛ mbɛk pak mot mbyak eYuda nɛ mot mbyak eGhɛlɛk, pak kwom mot nɛ mot di ààdi kwom ɔ, pak moma nɛ motom, etɛɛ náá, biyɔ djas, bi moo ɛ́ mot ngɔt tɔ ɛgwakel nɛ Yezu Klisto. 29 Yɛ bɛ náá, bi ɛ́ bot ɛ Klisto ɔɔ, deenek bi ɛ́ pe ɛ́ bɛdha ɛ Abalaam, tin, bi ɛ́ waabela esa e lyak ee Zɛɛb nakɛk ɛ.

3 É di’enek, da wɔ ɛ́ gheekwyee-kwyee bɛkus ɛ boa, yii wɔ di egu náá, bɛ tok nɛ bot ɛ kwyee bɛ ɔ.

20 Mɛ lɛɛ bin ɛ́ etɛp e tsɛɛtsɛ náá, mot aamyaal mot mam dhis ɔ, nyɛ myaal ɛ́ dɔɔ nɛ mam. Deenek, mot aamyaal mɛ ɔ, nyɛ myaal ɛ́ mot nadhis mɛ ɔ.»