1 Dáa dwoo Patekɔt nakakum ɛ, bɛdjekel nadi ɛ́ zɛɛga é sum di wat. 2 Kasɛka tɔ gwoo ɛ́, dhiiti mɛwuŋal dáa ghuu na lyel-lyel eezɛlwoodal ndjaa djas bɛ nadi tɔ tak ɛ. 3 Tin, bɛ eezɛbee esonok eezɛtyaa kɔ elo bɔɔ, tyee mengel mɛ du. Bhii tak, wɔ gwaa ngel tak zokazɛbɛka, bɔɔ epes-epes, kyee wat-wat eekɛtyaa kɔ mot nɛ mot. Ɛzyɛ ɛ Sisim na Dɛɛ é dwoo Patekɔt

4 Bɔɔ djas naalwood nɛ Sisim na Dɛɛ. Bhii tak bɛ moo tin elii membyak me sis, dáa Sisim nadi edjɛ bɛ ghwyil ɛlii ɛ.

5 Tin, é ghɛŋ tak, tɔ Yeluzalɛm, ye nadi ɛ́ nɛ bot ɛ mbyak eYuda nadi ekaab Zɛɛb ɔ, nadus pɛ kyee mɛdhik djas di kɔ ɛko ɛ bɔs ɔ. 6 Dáa bɛ nagwak ɛtap ɛlenek ɛ, bɔɔ djas zokasum ekaab zɛsɛɛga é di wat, bɛ moo tin edjoka ɛbuɛpe etɛɛ náá, mot nɛ mot nadi egwak bɛdjekel elii elii e membyak mɔɔ. 7 Bɛ naadyeebadjoka ɛbuɛpe, bɔɔ náá: «Bot ɛ di elii’aak, tok bot ɛ kyee dik Ghalile? 8 Ye sa dáa náá, mot nɛ mot pak’ena gwak sa bɛ di elii ɛ́ tɔ lii mbyak’ɛ? 9 Pak’ena wak, yɛ ɛ́ nɛ bot ɛ dus pɛ dik Paaletɛs, dik Medɛs, zɛnɔɔ dik Elam. Bɛdhiiti bot dus ɛ́ pɛ Meezopotami, pɛ kyee dik Yude, pɛ dɛl ɛ Kapadɔs, nɛ Pɔŋ pɛ kyee dik Azi, 10 pɛ Fiilizi, nɛ pɛ Panfili zɛnɔɔ pɛ Eziptɛ, nɛ é ngwoob dɛl ɛ Sylɛn pɛ Libi, ye nabɛ ɛ́ nɛ bot ɛ nadus pɛ ghaada Lɔm ɔ. 11 Bɛdhiiti nabɛ ɛ́, bot ɛ ghola Kelɛt, nɛ bot ɛ dik Aalabi. Pak’enaka ye nabɛ ɛ́ nɛ bot ɛ mbyak eYuda, bak bɛdhiiti nabɛ ɛ́ bot ɛ nazemyaal ɛdjaala Zɛɛb eYuda ɔ. Tin, bisɔ djas ɛpegwak pɛ tɔ elii e membyak mes dáa bɛ di elɛɛ embɛɛ nɛ eboo esesɛɛ Zɛɛb di esa ɛ!» 12 Bɔɔ djas naadyeebadjoka dhaa tyɛ, bɛ moo tin yooo ààbɛ nɛ dáa bɛ sa, bɛ moo tin edjinel pak’ɔɔ náá: «Yak tak kwyɛl ɛlɛɛ yé?» 13 Tin, bɛdhiiti bot nadi egɔ bɛ, bɔɔ náá: «Elangi e mɛnyok ɛ́ di esa bɛ ɔ!»

14 Tin Pyɛɛd eezɛtyaa tetel bɛ nɛ bak bɛdjekel kam nɛ ngɔt, nyɛ moo tin etuud nɛ mɛdhuu mɛ bot ɛlyelɛpe náá: «Bɔn-nyɛɛg bam bot ɛ mbyak eYuda, zɛnɔɔ biyɔ bot ɛ di é dwoo lak mos kɔ Yeluzalɛm ɔ, ye goka bi mɛt ɛsuk ɛ sa di esael ɛ. Gwakeka ɛnyɔɛpe sa mɛ di ekwyɛl ɛlɛɛ bin ɛ. 15 Bot bak tok tɔ elangi e mɛnyok dáa bi di egek tɔ elyem bin ɛ, etɛɛ náá, mena dinaaka ɛ́ é ɛwala etɛn nɛ ená yii mɛlem. 16 É di’enek guka náá, sa ngoolel-Mɛkpa ɛ Zɛɛb Zowɛl nalɛɛ ɛ́, ye moo zɛsael. Nyɛ nabɛ ɛ́ nyɛ eeke náá:

17 "Zɛɛb naake náá: Tɔ mɛlu mɛ mɛsik,

mɛ waadjɛ bot djas Sisim yam.

Bɔn bin, bɔn botom nɛ bɔn boa

bɛ aadi ɛ́ bɛngoolel ɛ Mɛkpa ɛ Zɛɛb,

mengbaaz ɛ́ waakan ɛbee etɛp tyee tɔ mɛdhyam

tin bɛtɔa-bot ɛ́ waadjem mɛdhyam.

18 Tsɛɛtsɛ nɛ tsɛɛtsɛ tɔ mɛlu menek,

mɛ waadjɛ Sisim yam nɛ bot ɛ mɛsa mam yii botom nɛ yii boa,

bɛ aadi ɛ́ bɛngoolel ɛ Mɛkpa ɛ Zɛɛb.

19 Mɛ waasa esa e mɛbwala pɛ ɛko tɔ gwoo,

nɛ endem e mɛbwala pɛ si kɔ bɔs.

Yɛ aadi ɛ́ ghiya, du, eguud nɛ eguluk.

20 Ɛsok nɛ dwoo ɛ Ghɛŋ zyɛ,

dwoo tak aadi ɛ́ boo dwoo nɛ duma,

gwyes ɛ́ waaghomela,

ngɔn ɛ́ waate zoooŋ dáa ghiya.

21 Tin, mot aadjaala nɛ din ɛ Ghɛŋ ɔ,

nyɛ waatsak*."

22 Bot ɛ mbyak Yisalaɛl, gwakeka sa mɛ di elii’aak: Zɛɛb naalyaal bin kɔkɔ mbi mot Yezu mot Nazalɛt nadi ɛ́. Etɛɛ náá, pak’en, Zɛɛb naasa eboo endem e mɛbwala membi nɛ membi é ze ɛ Yezu. Biyɔ bɛmet nɛ gu yɛ ɛnyɔɛpe. 23 Bi nabɛ ɛ́ bi eeka mot tak é mɛmbɔ mɛ bot ɛ di ààgu Zɛɛb ɔ. Bɛ naagó nyɛ, bem nyɛ é mɛlaaba, etɛp binek djas nasael ɛ́ dáa Zɛɛb naloozekɛk, nɛ ɛlɛɛ náá, nyɛ waasa ɛ. 24 Tin, Zɛɛb naagomal nyɛ bhis ɛsyee, nyɛ naapɛk nyɛ tɔ mezuk mɛ ɛsyee, etɛɛ náá, ye nabɛ ɛ́ ààdjala náá, ɛsyee di nɛ eghɛŋ kɔ lɛ. 25 Beeka dáa mɛkoozi Dhavid naake kɔ ɛsu ɛ lɛ ɛ:

"Mɛ nadi ebebee Ghɛŋ sok bhwoob’am,

nyɛ ɛ́ pɛ mbɔ eghɛŋ bam ekaab náá,

mɛ zɛkɛpwak nɛ bwoo.

26 Étɛp tak ɛ di náá, lyem’am ɛ́ tɔ boo mɛnyɔ,

mɛkpa mɛ nuub’am eelwood nɛ boo mɛmyaala,

nyel’am ɛ́ tɔ boo ɛbwaalel.

27 Etɛɛ náá, Ghɛŋ, wɔ tok nɛ ghwyil ɛlik mɛ kɔ dɛl ɛ edim e bot ɛ nazegwyɛ ɔ,

wɔ aanàkwaabet náá, mot’ɔ na Dɛɛ kɛsyep tɔ ɛvit.

28 Wɔ eelyaal mɛ ze di edul bot pɛ tsik ɛ,

wɔ ɛpedjɛ mɛ mɛmyaala é mis mɔ*."

29 Bɔn-nyɛɛg bam, betka mɛ lɛɛ bin popoopwon dum nɛ bhaab’enaka Dhavid, nyɛ naagwyɛ, bhii tak nyɛ naadelaa. Ɛvit ɛ lɛ ɛ́ tak dɔɔ nɛ dwoo pan mos’ak wak ɛkunaaɛpe. 30 Dáa nyɛ nadi náá, nyɛ ɛ́ ngoolel-Mɛkpa ɛ Zɛɛb ɛ, nɛ dáa Zɛɛb nakɛk nyɛ nɛ ɛtuwal myoŋ nɛ mɛsoŋ mɛ náá, ngɔt tɔ bɛdha bɛ ɛ́ waadjila kɔ bóó mɛkoozi mɛ ɛ. 31 Dhavid nabɛ ɛ́, nyɛ eegu sa nawaasael ɛ. Tin, ye nabɛ ɛ́, nyɛ eelɛɛ bot dum nɛ ɛgom ɛ Mɛsia bhis ɛsyee, étɛp tak ɛ nyɛ nake náá:

"Nyɛ nabɛ ɛ́ ààdhuugelaa tɔ dɛl ɛ edim e bot ɛ nazegwyɛ ɔ,

tin, muu’ɛ nabɛ ɛ́, ààsyep tɔ ɛvit."

32 Zɛɛb eegomal Yezu mɛ di elii kɔ ɛsu ɛ lɛ’aak bhis ɛsyee. Bisɔ djas ɛ́ bɛtyaasɛs étɛp tak. 33 Zɛɛb eesa náá, nyɛ byet pɛ ɛko kɛ di pɛ mbɔ eghɛŋ bɛ, nyɛ naabela Sisim na Dɛɛ Zɛɛb Sɛɛg nakɛk ɛ. Bhii tak, nyɛ eelwoodal bis nɛ yɛ. Yenek ɛ́, etɛp ee bi di ebee nɛ ɛgwak, mos yenek. 34 Bela náá, Dhavid nyɛ ɛmet nabɛ ààbyet tɔ gwoo, tin, ye nabɛ ɛ́ nyɛ eeke náá:

"Ghɛŋ Zɛɛb naake nɛ Ghɛŋ’am náá:

Dha disi pɛ mbɔ eghɛŋ bam.

35 Mɛ waalwom bot ɛ mɛbhuka mɔ,

bɛ di esa ee mɛbɔ mɔ aanyal ɛ*."

36 Ye goka ɛ́ náá, bot ɛ mbyak Yisalaɛl djas gu ɛnyɔɛpe náá: Yezu bi nabem nyɛ é mɛlaaba ɔ, yɛ ɛ́ nyɛy ɛ, Zɛɛb sa mos náá, nyɛ di Ghɛŋ nɛ Mɛsia!»

37 Bot ɛ nadi é di tak ɔ naadyeebadjoka nɛ mbi yenek kɔkɔ mɛkpa. Bɛ boozɛdji Pyɛɛd bɛ nɛ bɛdhiiti bot ɛ lwoma náá: «Mɔn-nyɛɛg, bis goka nɛ ɛsa dáa?»

38 Pyɛɛd eezɛbɔɔza nɛ nɔɔ náá: «Mot nɛ mot tɔ len, liigka elyem, da bi ɛ́ duwa Zɛɛb nɛ din ɛ Yezu Klisto, etɛɛ náá, mesyem men neepelaa. Bhii tak, bi ɛ́ waabela ekɛk ɛ Zɛɛb, Sisim na Dɛɛ. 39 Tin, Zɛɛb nakɛk etɛp bak ɛ́ kɔ ɛsu ɛ len, nɛ bɔn bin, zɛnɔɔ bot ɛ di kɔ mɛl mɛ di ɛtsetaɛpe ɛ, bot djas Ghɛŋ Zɛɛb’ena aadjóo ɔ.»

40 Pyɛɛd naabaalii nɛ nɔɔ bɛtɛ nɛ edhiiti etɛp, étɛp bɛ neemyaal, nɛ étɛp bɛ neebela mɛghaaz. Nyɛ nadi eke nɛ nɔɔ ɛ́ náá: «Myaalka tsik étɛp biyɔ bɛmet needi ààkwyɛ é laab bot ɛ di mos, bɛ eezewo ze’aak!» 41 Ye nabɛ ɛ́, bot ɛbuɛpe tɔ sama yɔɔ naamyaal mɛlyo ɛ Pyɛɛd, wɔ gwaa, bɛ zokazɛduwa Zɛɛb. Dwoo tak, bot ɛkɛɛ sa yɛ aasa bɛmil ɛlɛl (3 000) naabaazɛbilel kɔ sama bot ɛ nazedum koŋ nɛ Zɛɛb sok ɔ.

42 Bɔɔ djas naadyeebawa zii tɔ ɛgwak ɛ́ mɛlyo mɛ bot ɛ lwoma nadi elyo bɛ ɛ. Bɛ nadi ɛ́ tɔ boo ɛgwakel pak’ɔɔ, bɛ nadi edɛ edee ɛ́ é di wat, nɛ ɛdjaala Zɛɛb. 43 Mot nɛ mot nadi ɛ́ ekaab Zɛɛb ɛlyelɛpe. Tin é ze bot ɛ lwoma, Zɛɛb nadi esa bɛtɛ nɛ endem e mɛbwala. 44 Bot ɛ nadi edum koŋ nɛ Zɛɛb ɔ nadi ɛ́ lyem wat tɔ ɛgwakel. Pak’ɔɔ, bɛ nadi ekekaa esa djas bɛ nadi nɛ yɛ ɛ. 45 Bɛ nadi ebebɔmsa esa nɛ ekum bɔɔ. Bhii tak, epata ee bɛ aabela ɛ, bɛ kekaa yɛ ɛ́ pak’ɔɔ, é ɛbee ɛkwosak ɛ mot di nɛ yɛ ɛ́. 46 Mɛlu djas, bɛ nadi esɛɛga tɔ kok Ndjaa-ebuwa ɛ Zɛɛb. Bɛ nadi ededɛ edee bɔɔ ɛ́, é di wat tɔ mendjaa mɔɔ, tin bɛ nadi edɛ ɛ́ nɛ boo mɛmyaala tɔ elyem, ààbɛ nɛ lyem ɛbet. 47 Bɛ nadi eduwal Zɛɛb tɔ mɛdjeeb, tin, bot djas nadi ekwyɛl bɛ ɛbuɛpe. Tin mɛlu djas, Ghɛŋ nadi ebil tɔ ɛdhuu ɛ lɔɔ, bot ɛ nyɛ nadi etsik ɔ.