1 Pɛ tɔ zɛɛga mendjaala Antiɔs, ye nabɛ ɛ́ nɛ bɛngoolel ɛ Mɛkpa ɛ Zɛɛb, nɛ bɛlyoel, ye nabɛ ɛ́: Bhaanabhas, Simɛyɔŋ mot di ebaadjóoaa na «Dhɔɔ» ɔ, Lusius mot dɛl ɛ Silɛn, Manaɛn sɔ ɛ Eelood kana edhɔma, zɛnɔɔ Sɔl. É ghɛŋ tak, Eelood ɛ́ nadi ekɔk kɔ Ghalile. 2 Dhiiti dwoo, é ghɛŋ bɛ nadi tɔ mendjaala nɛ ɛtsi ɛ edee étɛp ɛduwal Ghɛŋ ɛ, Sisim na Dɛɛ eezɛke nɛ nɔɔ náá: «Sɛ́ɛka mɛ Bhaanabhas bɛ nɛ Sɔl, étɛp bɛ neekɛsa mɛsa mɛ mɛ nadjóo bɛ étɛp tak ɛ.» 3 É di'enek, bhii bɛ nazedjaala nɛ ɛtsi ɛ edee ɛ, bɛ eezɛkɛl bɛ mɛmbɔ, bhii tak, bɛ eezɛbet bɛ, bɛ tɔ́.

4 Dáa Sisim na Dɛɛ nalwom bɛ ɛ, bɛ eezɛtɔ́ pɛ ɛboŋ ɛ Selesi, pɛ bɛ nazɛni tɔ boo elɛɛd étɛp bɛ neetɔ́ pɛ ghola Siipɛlɛ ɛ. 5 Dáa bɛ nakum pɛ dɛl Salamin ɛ, bɛ eezɛni é ɛgoola Mɛkpa ɛ Zɛɛb tɔ mendjaa mɛ mendjaala mɛ eYuda. Bɛ nadi ɛ́ bɛ nɛ Zaŋ-Malak, étɛp nyɛ neegheekwyee-kwyee bɛ. 6 Bɛ naazɛkɛ kɔ ghola tak djas kɛkum pɛ dɛl Pafɔs. Penek, bɛ eezɛboma nɛ dhiiti mot mɛsimba mɛ ɛlyeeb, din ɛ lɛ ɛ́ Bhaal-Yezu, dhiiti mot mbyak eYuda nadi eke náá, nyɛ ɛ́ ngoolel-Mɛkpa ɛ Zɛɛb ɔ. 7 Nyɛ nadidi ɛ́ pɛ daa kukuma dɛl, din ɛ lɛ ɛ́ Seedyus Polus, nyɛ nadi ɛ́ mot mɛtselal. Wɔ gwaa, mot tak zɛdjóo Bhaanabhas bɛ nɛ Sɔl, etɛɛ náá, nyɛ nadi ekwyɛl ɛgwak Mɛkpa ɛ Zɛɛb. 8 Tin, mot mɛsimba mɛ ɛlyeeb, nadi edjóoaa Elimas tɔ lii eGhɛlɛk ɔ, eezɛni nɛ ɛsuu ɛ́ mɛso nɛ nɔɔ, nyɛ moo tin esaa náá, kukuma nàdum koŋ nɛ Zɛɛb. 9 Tin, Sɔl mot nabaadi edjóoaa Pɔl ɔ, moo tin tɔɔɔ nɛ Sisim na Dɛɛ, nyɛ eezɛgwyák nyɛ kpɛɛɛ. 10 Bhii tak, nyɛ eezɛke náá: «Mot mɛkɔŋ nɛ embee esa, mɔn ɛ dim mot mɛkɔŋ, mot bhyen embɛɛ esesɛɛ djas! Wɔ aanàkwaabookat ɛlet ɛ́ mɛze ɛ Ghɛŋ é? 11 Nenak, gwaka: Ghɛŋ ɛ́ waadjɛ wɔ baka, wɔ waabɛ́ edhim, wɔ aanàkabaabee mɛkas mɛ gwyes é ba bim mɛlu.»

É di tak wat, mis ɛ Elimas eezɛdipel, nyɛ moo tin tɔ ghooghom: Nyɛ ɛ́ moo tin bako-bako eliigel é ɛgwyák é mengwoob djas, nyɛ nadi esaa mot, étɛp nyɛ neemɛt nyɛ é mbɔ, étɛp ɛlyaal ɛ nyɛ ze. 12 Dáa kukuma nabee sa nadhaŋ ɛ, nyɛ eezɛdum koŋ nɛ Zɛɛb, etɛɛ náá, ye nabɛ ɛ́ mɛlyo naadyeebakwyɛsa nyɛ tɔ lyem ɛbuɛpe.

13 Pɔl bɛ nɛ bot ɛ sama yɛ eezɛni tɔ boo elɛɛd pɛ Pafɔs, bhii tak, bɛ eezɛtɔ́ pɛ ghaada Panfili kɔ Pɛɛledje. É di'enek, Zaŋ-Malak ɛ́ boozɛlik bɛ, sik pɛ Yeluzalɛm. 14 Bɛ eezɛdus Pɛɛledje, goola tɔ́ pɛ ghaada Antiɔs kɔ Pisidi. Dwoo saba, bɛ naazɛni tɔ ndjaa mendjaala mɛ eYuda, bɛ eezɛnɔɔ mɛnyel, disi. 15 Bhii bɛ zelaa tɔ mɛkana mɛ etsi nɛ yii bɛngoolel ɛ Mɛkpa ɛ Zɛɛb ɛ, ekukuma e ndjaa mendjaala mɛ eYuda ɛ́ boolwom bot, bɛ lɛɛ nɛ nɔɔ náá: «Bɔn-nyɛɛg, bi ɛ di nɛ etɛp ɛlii nɛ bot ɛ zɛɛga étɛp bɛ neebela mɛghaaz nɛ zii ɔɔ, bi ɛ́ nɛ ghwyil ɛlii nenak.» 16 Tin, wɔ gwaa Pɔl zɛwyɛl, nyɛ eezɛsa dhiiti tseŋa nɛ mbɔ, bɛ di gwyem, nyɛ eezɛke náá: «Biyɔ bot ɛ Yisalaɛl, nɛ biyɔ bot ɛ zyɛ é mendjaala mena zɛdjaalaka Zɛɛb ɔ, gwakeka mɛ! 17 Zɛɛb bot ɛ mbyak Yisalaɛl naatɔ bɛbhaab bena. Nyɛ naasa náá, mɛtaŋ mɛ bot byet, é sok bɛ nadi é mɛdjoŋ pɛ Eziptɛ ɛ. Bhii tak, nyɛ naazɛwyisal bɛ kɔ kyee dik tak nɛ ghwyil mɛbwala. 18 Nyɛ naadyeebamaad ebus bɔɔ, membu mɛkam-mɛná (40) bɔɔ tɔ kyee dik bɛsyɛ di ààbɛ nɛ mɛdii ɛ. 19 Bhii tak, nyɛ eezɛsilal bot ɛ membyak mɛtɛn nɛ ebá pɛ kyee dik Kanan bhɛɛɛ. Nyɛ eezɛnɔɔ mɛdhik mɛ tak djɛ nɛ bot ɛ mbyak'ɛ, bɛ di bɛkum ɛ tak. 20 Deenek, ye naasa tyee membu bɛdhet-ɛná nɛ membu mɛkam-mɛtɛn (450).

Bhii tak, nyɛ eezɛdjɛ bɛbhaab bina bɛtetɛp, kɛkum é ɛlu ɛ ngoolel-Mɛkpa ɛ Zɛɛb Samyɛl. 21 Bhii tak, bɛ eezɛwaab náá, Zɛɛb djɛ bɛmɛkoozi. Tin, Ghɛŋ ɛ́ boozɛdjɛ bɛ Sɔl mɔn Kis, mot mbyak Bhɛzamɛ. Sɔl tak naadi ɛ́ kukuma yɔɔ membu mɛkam-mɛná (40). 22 Bhii nyɛ nakazɛbyen Sɔl ɛ, Zɛɛb ɛ́ boozɛdjɛ bɛ Dhavid, nyɛ di mɛkoozi mɔɔ. Nyɛ nabɛ ɛ́, nyɛ eeke kɔ ɛsu ɛ lɛ náá: "Mɛ eebela Dhavid mɔn Yese, mot tak ɛ́, mot lyem'am kwyɛl ɔ. Nyɛ waasa esa ee lyem'am di ekwyɛl ɛ djas*." 23 Ngɔt tɔ bɛdha ɛ Dhavid nabɛ ɛ́ Yezu, mot Zɛɛb nadjɛ nyɛ di ɛdi ɛ Mɛtsik-bot étɛp mbyak Yisalaɛl ɔ, yɛ ɛ́ dáa nyɛ nakɛk ɛ. 24 Ɛsok nɛ Yezu nɛ zyɛ, ye nabɛ ɛ́, Zaŋ naagoola Mɛkpa ɛ Zɛɛb nɛ membyak djas yii Yisalaɛl, etɛɛ náá, bɛ neeliig elyem bɔɔ, da bɛ ɛ́ duwa Zɛɛb. 25 É ghɛŋ Zaŋ nadi nyɛ moo pɛ ɛsik ɛ mɛsa mɛ ɛ, ye nabɛ ɛ́, nyɛ naake náá: "Bi gek náá, mam ɛ́ zɛ? Mam tok mot bi di ebwood ɔ. Tin, gwakeka: Nyɛ ɛpezyɛ bhii koŋ'am, bela tin náá, mam aanàkwaakobela-belak duu ɛmalal étɛp ɛkotii-tiiak ekel e ekoko bɛ.*"

26 Bɔn-nyɛɛg, biyɔ bɛdha ɛ Abalaam, nɛ biyɔ bot ɛ zyɛ wak étɛp ɛzɛdjaala Zɛɛb ɔ: Yɛ ɛ́ nɛ menabɛlka djas ɛ Zɛɛb dhis bhaadal yak, étɛp ɛtsik ɛ́ mena. 27 Nɛ tsɛɛtsɛ, bot ɛ dɛl ɛ Yeluzalɛm nɛ ekukuma bɔɔ nabɛ ɛ́, ààgu mbi mot Yezu nadi ɛ. Bela náá, bɛ àànyɔ ɛgwak mɛkpa ɛ bɛngoolel ɛ Mɛkpa ɛ Zɛɛb di elaŋaa dwoo esaba djas ɛ. Tin, bɛ naadjɛ Yezu epɛ́ɛ e ɛsyee, etɛɛ náá, mɛkpa menek neebela mɛsuk. 28 Baabela náá, bɛ nabɛ ààbela lo mɛsɔ mɛ nyɛ napɛ́ɛaa epɛ́ɛ e ɛsyee étɛp tak ɛ. Bɛ naake nɛ Pilat náá, nyɛ gó nyɛ. 29 Bhii bɛ nazesa etɛp djas ee Ekwyala ɛ Zɛɛb nalɛɛ kɔ ɛsu ɛ lɛ ɛ, bɛ eezɛsil nyɛ kɔ mɛlaaba, bhii tak, bɛ eekɛnɛɛg nyɛ tɔ ɛvit. 30 Wɔ gwaa, Zɛɛb zɛgomal nyɛ.»

31 Mɛlu ɛbuɛpe Yezu nadi elyaal bot ɛ nadi egyee nɛ nɛ ɔ nyel, dusa pɛ Ghalile tɔ́ pɛ Yeluzalɛm. Bot ɛ tak moo mos ɛ́ bɛtyaasɛs é mis mɛ bot ɛ mbyak Yisalaɛl. 32 Bisɔ bɛmet, bis ɛpezɛgoola bin Mbɛɛ Bhaadal. Mbɛɛ Bhaadal tak ɛ́ sa Zɛɛb nakɛk bɛbhaab binaka ɛ. 33 Nyɛ nasa deenek ɛ́, kɔ ɛsu ɛ lenaka, menabɛlka bɛdha bɔɔ, nyɛ naagomal Yezu bhii ɛsyee. Ekwyala lɛɛ ɛ́ tɔ mɛkana mɛ Mɛdjeeb ɛlaŋel ebá ɛ́ náá:

«Yɛ ɛ́ wɔy ɛ di Mɔn'am,

kana dwoo pan mos'ak, mɛ ɛ́ Soog.»

34 Zɛɛb nabɛ ɛ́, nyɛ eelɛɛ náá, nyɛ waagomal nyɛ bhis ɛsyee, étɛp nyɛ needi ààsik kɛbɔ tɔ ɛvit. Nyɛ nake ɛ́ náá:

«Mɛ waasɛɛ bin tɛtɛ mɛtel mɛ e dɛɛ

yii etsɛɛtsɛ mɛ nakɛk Dhavid ɛ.»

35 «Yɛ ɛ́ étɛp tak ɛ nyɛ di ebaalɛɛ tɔ dhiiti Ekwyala náá:

"Wɔ aanàkwaabet náá mot'ɔ na dɛɛ kɛsyep tɔ ɛvit*."

36 É ghɛŋ ɛ Dhavid, ye nabɛ ɛ́ nyɛ naasa etɛp ee Zɛɛb nadi ekwyɛl ɛ. Bhii nyɛ nakagwyɛ ɛ, nyɛ nakɛdelaa ɛ́ é ngwoob bɛbhaab bɛ, ye nabɛ ɛ́ nyɛ naabɔ. 37 Ghuna, mot Zɛɛb nagomal ɔ nabɛ ààbɔ. 38,39 Bɔn-nyɛɛg, ye goka ɛ́ bi gu náá: Yɛ ɛ́ kɔ ɛsu ɛ Yezu ɛ ɛpelak e mesyem men di egoolaaa. Yɛ ɛ́ kɔ ɛsu ɛ lɛ ɛ́ di náá, bot djas aadum koŋ nɛ nɛ ɔ, bɛ waapɛkel tɔ bhel mesyem djas. Mɛpɛkel mɛ tak tok nɛ ghwyil ɛbɛlel tɔ ɛduwal ɛ́ etsi e Moiiz. 40 Dika ndjem, etɛɛ náá, etɛp ee bɛngoolel ɛ Mɛkpa ɛ Zɛɛb nakwyal ɛ needi ààsael nɛ biyɔ bɛmet. Ye nabɛ ɛ́ náá:

41 "Beeka biyɔ bot ɛ ɛbet!

Djokaka, da bi ɛ́ dus mɛ é mis,

etɛɛ náá, é mɛlu mɛ tsik'en, mɛ waasa dhiiti ndem di náá,

mot ɛ kaada bin yɛ ɔɔ, bi aanàkwaamyaal nyɛ*!"»

42 Dáa Pyɛɛd bɛ nɛ Bhaanabhas nawyis tɔ ndjaa mendjaala ɛ, bɛ eezɛke nɛ nɔɔ náá, bɛ baabula é saba poon, étɛp bɛ neebaazɛlyo bɛ mɛkpa mɛ tak wat. 43 Bhii zɛɛga tak, bɛtɛ nɛ bot e mbyak eYuda nɛ bot ɛ nazemyaal ɛdjaala Zɛɛb eYuda ɔ, zokazɛdu Pɔl bɛ nɛ Bhaanabhas. Bɛ nadi elii nɛ nɔɔ, nɛ ɛdjɛ bɛ mɛghaaz mɛ ɛdi bɛsosoob si esɛɛa mɛtel ɛ Zɛɛb.

44 Dáa ye nakum yak dwoo saba ɛ, bɛtɛ nɛ bot tɔ ghaada djas zɛsɛɛga, étɛp bɛ neezɛgwak mɛkpa ɛ Ghɛŋ. 45 Dáa eYuda nabee mɛdhuu mɛ bot binɔk ɛ, ye nakpaa bɛ elyem. Bɛ moo tin elet etɛp ee Pɔl nadi elii ɛ, tin, bɛ eezɛlee nyɛ. 46 Pɔl bɛ nɛ Bhaanabhas eezɛlɛɛ bɛ nɛ ɛbwaalel djas náá: «Ye bɛ ɛ́, ye goka náá, Mɛkpa ɛ Zɛɛb pookogoolaaa sok pɛ daa len. Dáa ye di náá, bi ɛpebyen yɛ ɛ, nɛ dáa bi di ebee náá, tsik na kɔm-kɔm tok dhiiti vaŋ sonok é mis men ɛ, akiba, bis katɔ́ ɛ́ pɛ daa bot ɛ di ààdi bot ɛ mbyak eYuda ɔ. 47 Beeka dáa Ghɛŋ nake nɛ nes ɛ,

"Mɛ eenɛɛg wɔ dáa ngel étɛp membyak djas,

étɛp wɔ neetɔ́ bɛ nɛ tsik kɛkum pɛ edum e bɔs*!"»

48 Dáa bot ɛ di ààbɛ bot ɛ mbyak eYuda ɔ nagwak deenek ɛ́, bɛ naamyaala. Bhii tak, bɛ moo tin eduwal mɛkpa ɛ Ghɛŋ. Tin, bot djas nazesɛ́ɛaa étɛp bɛ neebela tsik na kɔm-kɔm ɔ, eezɛliig elyem, bɛ moo edu Zɛɛb. 49 Mɛkpa ɛ Ghɛŋ nadi egoolaaa, ɛgoola nɛ ɛgoola kɔ kyee dik'enek djas. 50 Tin, eYuda eezɛbesal bɛdhil ɛ boa di bɛkum, eduwal Zɛɛb ɔ, nɛ bɛdhil ɛ botom ɛ ghaada, étɛp bɛ neewa Pɔl bɛ nɛ Bhaanabhas tɔ tsik mezuk. Bhii tak, bɛ eezɛsɔ bɛ kɔ kyee dik'ɔɔ. 51 Bot ɛbá binɔk ɛ boozɛkut piib é mɛko mɔɔ étɛp ɛdul ɛ bɛ mɛlɔ, bhii tak, bɛ eezɛtɔ́ pɛ dɛl ɛ Ikoniɔm. 52 Yɛ kabɛ bɛdjekel pɛ bɛ nadi pɛ Antiɔs ɔɔ, bɛ nadi ɛ́ tɔ boo mɛmyaala nɛ Sisim na Dɛɛ tɔ lɔɔ na tɔɔɔ.