1 Bhii bis nɛ bɛnɔɔ nabɛka ɛ, bis eezɛni tɔ mɛsuwa tɔ́ pɛ ghola Kɔɔs. Djɛmɛn tak, bis eezɛkum pɛ ghola Lood, dusa bis nadus tin ɛ, bis eezɛtɔ́ pɛ ɛboŋ Patala. 2 Dáa bis nabela mɛsuwa é tsaal tɔ pɛ Fenisi ɛ, bis eezɛni tɔ mɛsuwa mɛ tak, bis eezɛtɔ́. 3 Dáa bis nadi, bis moo é ngwoob ghola Siipɛlɛ ɛ, bis eezɛdhaa pɛ pak kyɛ ghola tak, étɛp bis neetɔ́ pɛ dik Siili. Bis eezɛtɔ́ pɛ ghaada Tiid, pɛ kyee bɛ nadi ekekɛɛ esa ee nadi tɔ mɛsuwa ɛ. 4 Bis eezɛboma nɛ bot ɛ di edum koŋ nɛ Zɛɛb ɔ, bis eezɛdhaa yenga wat tin bis nɛ bɛnɔɔ. Dáa ye nabɛ náá, Sisim na Dɛɛ naazedul bɛ mɛlɔ ɛ, bɛ ɛ́ boozɛke nɛ Pɔl náá, nyɛ nàtɔ́ pɛ Yeluzalɛm. 5 Tin, dáa yenga tak nadhaŋ ɛ, bis eezɛnɔɔ mɛnyel dhaa. Wɔ gwaa, bɛ zɛmwana nɛ nes pɛ esik ɛ dɛl, bɔɔ nɛ bɛl bɔɔ, zɛnɔɔ bɔn bɔɔ. Tin, bis eezɛkwyit mɛboŋ si é ɛboŋ ɛ boo dii mɛsɔn, bis moo tin edjaala Zɛɛb. 6 Deenek, dáa bis nɛ bɛnɔɔ nasilal ɛmwana pak'es ɛ, bis eezɛni tɔ mɛsuwa, é di'enek, bɛ eezɛsik pɛ mendjaa mɔɔ. 7 Bis nasilal goŋ mɛdjoŋ mes ɛ́, kɔ boo dii mɛsɔn, bhii tak, bis nadus pɛ ghaada Tiid, tɔ́ pɛ ɛboŋ Potolemayis ɛ. Bhis bis nasilal ɛswos bɔn-nyɛɛg bis di kɔ ghaada tak ɛ, bis eezɛkwyɛɛg ɛlu ɛ wat bis nɛ bɛnɔɔ. 8 Djɛmɛn tak, bis eezɛsik, bis eezɛtɔ́ pɛ ghaada Sezaale. É di'enek, bis eezɛsulal pɛ ndjaŋ ɛ Filip, lyoel Mɛkpa ɛ Zɛɛb. Yɛ pɛ daa lɛ ɛ bis nadjaasi. Nyɛ nabɛ ɛ́ ngɔt tɔ bot ɛtɛn nɛ bɛbá bɛ nasɛ́ɛ pɛ Yeluzalɛm ɔ. 9 Nyɛ nabɛ ɛ́ nɛ mɛsyes mɛ bɔɔ boa bɛná, bɛ nadi egegoola mɛbhaadal mɛ Zɛɛb nadi edjɛ bɛ ɛ. 10 Bis nabɛ ɛ́ bis moo nɛ bɛtɛ nɛ mɛlu tin, é ghɛŋ dhiiti ngoolel-Mɛkpa ɛ Zɛɛb nɛ din ɛ Aghabis nazɛdus pɛ kyee dik Yude, zyɛ ɛ. 11 Nyɛ eezɛzyɛ pɛ daa les, nyɛ eezɛnɔɔ bhɛtɛ ɛ Pɔl, kɔl mɛko mɛ nɛ mɛmbɔ mɛ, bhii tak, nyɛy náá: «Beeka sa Sisim na Dɛɛ lɛɛ ɛ: Nakuma bhɛtɛ yak ɛ́ waakɔlaa nɛ ekel dáak nɛ bot ɛ mbyak eYuda, pɛ Yeluzalɛm, bhii tak, nyɛ waakaa é mɛmbɔ mɛ bot ɛ membyak mɛ sis.» 12 Bhii bis nagwak etɛp binek ɛ, wɔ gwaa, bisɔ djas nɛ bɔn-nyɛɛg bis e dɛl ɛ Sezaale zokazɛdjaala nɛ Pɔl náá, nyɛ nàtɔ́ pɛ Yeluzalɛm. 13 Tin, nyɛ eezɛbɔɔza náá: «Étɛp yé bi di edji nɛ ɛsa náá, bi djɛ mɛ lyem bwoo? Mam eezemyaal nɛ lyem'am, ye nakoozodi ɛkɔlaa nɛ ekel, nɛghu ɛsyee pɛ Yeluzalɛm kɔ ɛsu ɛ din ɛ Ghɛŋ Yezu.» 14 Dáa bis nadi ààkwak ɛlu ɛ́ nyɛ ɛ, bis nabɛ ɛ́ ààkabaanenal nyel, bis ɛ́ booke náá: «Ɛkwosak ɛ Ghɛŋ sael!»

15 Dáa bis nakadhaa ba mɛlu é di'enek ɛ, bis eezɛkaŋal esa, bhii tak, bis eezɛtɔ́ pɛ Yeluzalɛm. 16 Bɛdjekel ɛ nadi pɛ Sezaale ɔ zokakɛkyeed bis, bɔɔ zokatɔ́ nɛ nes pɛ ndjaa dhiiti mot bis nawaasulal pɛ daa lɛ ɔ. Din ɛ mot tak nabɛ ɛ́ Mɛnasɔn, mot Siipɛlɛ, nyɛ nadi ɛ́ tɔ sama bɛdjekel ɛ mɛkɛn.

17 Dáa bis nakum pɛ Yeluzalɛm ɛ, bɔn-nyɛɛg bis zokazɛboma nɛ nes, nɛ mɛmyaala djas. 18 Djɛmɛn tak, bis nɛ Pɔl eezɛtɔ́ pɛ daa Zak, pɛ pak bɛpaa ɛ zɛɛga mendjaala nasɛɛga ɛ. 19 Tin, Pɔl eezɛswos bɛ, bhii tak, nyɛ eezɛni nɛ ɛbaŋa bɛ etɛp ee Zɛɛb nasa pɛ daa bot ɛ membyak mɛ sis ɛ wat-wat. 20 Bhii bɛ nazegwak nyɛ ɛ, bɛ eezɛduwal Zɛɛb. É di'enek, bɛ eezɛke nɛ Pɔl náá: «Mɔn-nyɛɛg wɔ eebee dáa eYuda bɛmil nɛ bɛmil moo mos eedum koŋ nɛ Zɛɛb ɛ, elyem bɔɔ djas nɛ dyeebakwyɛsa tɔ etsi. 21 Ghuna, beeka sa bis nalɛɛ bɛ kɔ ɛsu ɛ lɔ ɛ: Wɔ ɛpelyo bot ɛ mbyak eYuda djas di é di wat bɛ nɛ bot ɛ membyak mɛ sis ɔ náá, ye nyɔ ɛ́ bɛ byen etsi ɛ Moiiz. Wɔ lɛɛ bɛ ɛ́ náá, bɛ kat ɛniigal bɔn bɔɔ beka, dɔɔ nɛ ɛkat ɛdu ɛ́ mɛzel mɛ eYuda. 22 Bis sa dáa? Bɛ waagu nɛ tsɛɛtsɛ náá, wɔ eezekum. 23 Deenek, sa sa bis lɛɛ wɔ ɛ. Menaka wak ɛ́ nɛ botom ɛná nazesa ekɛk nɛ Zɛɛb ɔ. 24 Nɔŋa bɛ, da bi ɛ́ kɛgwyiia étɛp ɛdis edhuud bi nɛ bɛnɔɔ, bhii tak da wɔ ɛ́ kɛdjɛ bɛ epata ee di egoka ɛ, étɛp bɛ neetsik bɛ lo. Deenek, bot djas neegu náá, etɛp ee bot nadi elɛɛ dum nɛ nɔ ɛ, nabɛ ɛ́ etɛp ee mɛkɔŋ, deenek, dɔɔ nɛ wɔy pe wɔ ɛ duwal etsi ɛ Moiiz. 25 Yɛ kabɛ bot ɛ membyak mɛ sis di dum koŋ nɛ Zɛɛb ɔɔ, tɔ mɛkana mɛ bis nakwyal ɛ, ye nabɛ ɛ́ bis naalɛɛ bɛ egeka bis djas. Ye nabɛ ɛ́ náá, bɛ ààgoka nɛ ɛdɛ bɛtit ɛ nakaaa étɛp ɛdjɛ bɛzɛɛb ɛ bɛnaghisɛ ebuwa ɔ, nɛ ghiya nɛ epuud e bɛtit ɛ nagóaa nɛ bhiyo ɔ, zɛbaanɔɔ náá, sa bi ààsa mɛzɔ.»

26 Tin, Pɔl eezɛtɔ́ bɛ nɛ bot ɛná binɔk, tɔ yak mɛlem tak, bɛ eezɛtɔ́ kɛsa mɛzel mɛ ɛkɛgwyiia edhuud. Bhii tak, bɛ eezɛtɔ́ pɛ kok Ndjaa-ebuwa etɛp ɛkɛlɛɛ dwoo mɛzel mɛ ɛgwyiia edhuud aasi ɛ, yɛ dwoo tak ɛ́ bɛ di egoka nɛ ɛgó ɛ́ ebuwa kɔ ɛsu ɛ mot ngɔt-ngɔt pak'ɔɔ ɛ.

27 Ye nabɛ ɛ́ mɛlu mɛtɛn nɛ ebá moo ekɔ nɛ ɛkum, wɔ gwaa, eYuda e kyee dik Azi zokazyɛ zɛbee Pɔl pɛ tɔ kok Ndjaa-ebuwa. Wɔ gwaa, bɛ zɛful ɛdhuu ɛ bot ɛ nadi tin ɔ, elo. Bhii tak, bɛ eezɛmɛt Pɔl, 28 bɔɔ é tsim náá: «Bot ɛ Yisalaɛl, dhaka zɛkwyee bis! Beeka mot di elyo bot djas, é edi djas mbee mɛlyo dum nɛ Yisalaɛl, nɛ etsi ɛ Moiiz, zɛnɔɔ dum nɛ kok Ndjaa-ebuwa ɔ. Deenek, nyɛ eezebataniigal bot ɛ di ààbɛ bot ɛ mbyak eYuda ɔ tɔ Ndjaa-ebuwa. Tin, nyɛ eezesaab Di na Dɛɛ tak!» 29 Bɛ nalii deenek ɛ́, etɛɛ náá, ye nabɛ ɛ́ bɛ naabee Tolofim, mot dɛl ɛ Efɛɛz, bɛ nɛ Pɔl pɛ tɔ ghaada. Bɛ nagu ɛ́ náá, Pɔl naaniigal nyɛ tɔ kok Ndjaa-ebuwa.

30 Ɛghuub ɛ tak eezɛdjala kɔ ghaada djas, bhwak moo tin metetel nɛ ekaab, é edi djas. Bɛ eezɛmɛt Pɔl, bɛ eezɛwyisal nyɛ tɔ kok Ndjaa-ebuwa, bhii tak, bɛ eezɛdiyal mɛbɛ mɛ kok Ndjaa-ebuwa. 31 Dáa bɛ nadi ekwyɛl ɛgó Pɔl ɛ, ye nabɛ ɛ́ menduk mɛ ɛzɛm ɛ nadi esael pɛ Yeluzalɛm ɛ, naagék pɛ daa komanda mwaka esodja e Lɔm. 32 É di tak wat, nyɛ eezɛnɔɔ bɛdhiiti ekukuma lɔɔg esodja, nɛ bɛdhiiti esodja yii pɛ si, bɛ eezɛwyis kaab, tɔ́ pɛ kyee ɛdhuu ɛ bot nadi ɛ. Dáa bɛ nabee komanda esodja nɛ bɛdhiiti esodja ɛ, bɛ ɛ́ boozɛkat ɛbi ɛ́ Pɔl. 33 Tin, komanda esodja eezɛtiila pɛ daa lɛ, nyɛ eezɛlwom náá, bɛ mɛt nyɛ, da bɛ ɛ́ kɔl nyɛ nɛ ekel e ghwooz ebá. Bhii tak, komanda eezɛdji nyɛ náá: «Wɔy ɛzɛ, wɔ sa yé?» 34 Tin, pɛ tɔ ɛdhuu ɛ bot, bɛdhiiti bot nadi etsim ɛ́ sa sis, bak bɛdhiiti sa sis. Tin, ye nabɛ ɛ́, yɛ eelyel náá, komanda mɛt sa wat tɔ ɛzɛm ɛ tak. Nyɛ ɛ́ boozɛke náá, bɛ tɔ́ nɛ Pɔl pɛ tɔ peeb esodja. 35 Dáa Pɔl nakum é di bot di ebyet etɛp ɛ́ ɛni tɔ peeb ɛ, ye nagoka ɛ́ náá, esodja ɛzɛghɛɛ nyɛ. Bɛ nadi ekaab ɛlyel ɛ kuukuu mɛdhuu mɛ bot, 36 etɛɛ náá, bot djas nadi edu nyɛ bɔɔ etsitsim náá: «Góa nyɛ!»

37 É ghɛŋ bɛ nadi ekwyɛl ɛniigal Pɔl tɔ peeb esodja ɛ, nyɛ eezɛke nɛ komanda náá: «Mɛ ɛ́ nɛ ghwyil ɛlii é?» Tin, komanda esodja eezɛdji nyɛ náá: «Wɔ nɛ gu ɛlii mbyak eGhɛlɛk é? 38 Deenek, wɔ tok mot dik Eziptɛ, mot nazɛkus ɛghuub koko ɛ koko wak, da nyɛ ɛ́ zɛtɔ́ nɛ bot bɛmil ɛná (4 000) di egu ɛlumla dɛɛb, kɔ kyee bɔs bɛsyɛ di ààbɛ nɛ mɛdii ɛ ɔ?» 39 Tin, Pɔl eezɛbɔɔza náá: «Mam ɛ́ mot mbyak eYuda, mɛ nabyel ɛ́ pɛ ghaada Taalas, pɛ kyee dik Silisi, mot boo ghaada di nɛ boo ngék ɔ. "Mɛ eemɛt wɔ ɛboŋ", beta náá, mɛ lii nɛ bot bak.» 40 É di'enek, komanda eezɛdjɛ nyɛ ze ɛlii. Tin, Pɔl eezɛtyaa tetel kɔ ɛgoɛl ɛ ɛniel ɛ peeb, nyɛ eezɛpyap ɛdhuu ɛ bot binɔk mbɔ, bɛ di gwyem étɛp bɛ neegwak nyɛ. Bɔɔ djas eezɛdi gwyem, tin nyɛ moo elii nɛ nɔɔ tɔ lii eBhele.