1 Dhiiti dwoo, Pyɛɛd bɛ nɛ Zaŋ zokazɛbyet pɛ kok Ndjaa-ebuwa étɛp ɛkɛdjaala, ye nabɛ ɛ́ é ɛwala elɛl yii bikoko. 2 É ngwoob ɛniel ɛ di edjóoaa «Ɛbɛ ɛ ndjaa na nyɔ-nyɔ» ɛ, é di tak ye nabɛ ɛ́ nɛ dhiiti boka mot mbyela mɔ. Mɛlu djas bot nadi eghɛɛ nyɛ, zɛmak nyɛ tin, étɛp nyɛ neebɔɔ epata pɛ daa bot ɛ nadi ezyɛ pɛ kok Ndjaa-ebuwa ɔ. 3 Dáa nyɛ nabee Pyɛɛd bɛ nɛ Zaŋ ekwyɛl ɛni tɔ kok Ndjaa-ebuwa ɛ, nyɛ eezɛwaab bɛ epata. 4 É di'enek, Pyɛɛd bɛ nɛ Zaŋ zɛgwyák nyɛ kpɛɛɛ. Bhii tak, Pyɛɛd eezɛke nɛ nɛ náá: «Gwyáka bis!» 5 Tin mot'enɔk eezɛgwyák bɛ kpɛɛɛ, etɛɛ náá, tɔ lyem'ɛ, nyɛ nadi egek ɛ́ náá, bɛ waadjɛ nyɛ sonok. 6 É di'enek, Pyɛɛd ɛ́ booke nɛ nɛ náá: «Mɛ tok nɛ epata, ààkobɛ nɛ lɔɔd, sa mɛ di nɛ yɛ ɛ, mɛ ɛpedjɛ wɔ: Nɛ din ɛ Yezu Klisto mot Nazalɛt, wyɛla da wɔ ɛ́ kɛ!» 7 Bhii tak nyɛ eezɛmɛt nyɛ pɛ mbɔ eghɛŋ, nyɛ eezɛkwyee nyɛ é ɛwyɛl. É di tak wat, mɛko nɛ mɛtii mɛ mɛko mɛ mot'enɔk moo tin ɛlyelɛpe, 8 vaskala, é di tak wat, nyɛ eezɛtyaa tetel, nyɛ moo tin ekɛ. Pyɛɛd eetsik boka mot

Bhii tak nyɛ eezɛni lɔɔg wat bɛ nɛ bot ɛ lwoma pɛ tɔ kok Ndjaa-ebuwa, nyɛy ekɛ, etsel, nɛ ɛduwal ɛ Zɛɛb. 9 Bot djas nadi tin ɔ naabee nyɛ ekɛ nɛ ɛduwal ɛ Zɛɛb. 10 Dáa bɛ nagwyák náá, ye nabɛ ɛ́ mot nadyeebadidi ndiindel é «Ɛbɛ ɛ ndjaa na nyɔ-nyɔ» yii kok Ndjaa-ebuwa étɛp ɛwaab epata ɛ, tin bɔɔ djas naabela bɛbebwol nɛ ɛdjoka ɛbuɛpe dum nɛ sa nasael nɛ boka mot'enɔk ɛ.

11 Dáa mot'enɔk nanaada Pyɛɛd nɛ Zaŋ ɛ, bot djas tɔ ɛdjoka bɛ nadi edjoka ɛ, wɔ gwaa bɛ zokazyɛ kaab pɛ pak bɛ nadi ɛ. Ye nabɛ ɛ́ di bhaaz nadi edjóoaa, «Bhaaz ɛ Salomɔŋ» ɛ. 12 Dáa Pyɛɛd nabee deenek ɛ́, nyɛ ɛ́ booke nɛ ɛdhuu ɛ bot binɔk náá: «Bɔn-nyɛɛg bam bot ɛ Yisalaɛl, étɛp yé bi di edjoka tsik mot'ak tsak ɛ? Étɛp yé bi di egwyák tyee náá, bis tsik mot'ak ɛ́ nɛ mɛghwyil mes met nɛghu etɛɛ náá, bis ɛpesa zii étɛp ɛdu ɛ Zɛɛb? Ààbɛ ye tok deenek! 13 Yɛ ɛ́ Zɛɛb ɛ Abalaam, Zɛɛb ɛ Izak, nɛ Zɛɛb ɛ Zakɔɔb, Zɛɛb ɛ bɛbhaab binaka ɛ lyaal duu mot-mɛsa mɛ Yezu. Biyɔ bɛmet bi naka nyɛ é mɛmbɔ mɛ ekukuma, nɛ swonal ɛ nyɛ é mis mɛ Pilat, kabela náá, Pilat naakwyɛl ɛbet nyɛ. 14 Biyɔ, bi naabyen mot na dɛɛ, na epiki, biyɔ nakwyɛl ɛ́ náá, Pilat bet mot di egó bot ɔ. 15 Deenek, bi naagó mot di nakuma tsik ɔ. Tin, bhis etɛp binek djas, Zɛɛb naagomal nyɛ tɔ ɛsyee, bis ɛ́ bɛtyaasɛs étɛp tak. 16 Yɛ ɛ́ kɔ ɛsu ɛ mɛbwala mɛ din ɛ Yezu, nɛ dum nɛ ɛdum ɛ koŋ nɛ nɛ ɛ, ghwyil mot bi di ebee nɛ ɛgu'aak bula. Yɛ ɛ́ ɛdum ɛ koŋ nɛ Yezu ɛ sa náá, nyɛ bela tsik nyel djas bi di ebee'enek.

17 Bela náá, bɔn-nyɛɛg bam, mɛ nɛ gu ɛnyɔɛpe náá, biyɔ nɛ ekukuma bin nasa deenek ɛ́, etɛɛ náá, bi ɛ́ tɔ boo ɛdjak dum nɛ Yezu. 18 Yɛ ɛ́ deenek ɛ́ Zɛɛb kwyɛl ɛlyaal ɛsuk ɛ etɛp ee nyɛ naloolɛɛ tɔ enuub e bɛngoolel ɛ Mɛkpa ɛ Zɛɛb djas ɛ. Nyɛ nabɛ ɛ́ nyɛ eelɛɛ náá, Mɛsia mɛ ɛ́ waazuk. 19 Swoolaka mɛfulu men, da bi ɛ́ dum koŋ nɛ Zɛɛb etɛɛ náá, nyɛ needis mesyem men. 20 Deenek bhii tak, Ghɛŋ ɛ́ waazɛdjɛ bin ɛwala ɛ bi aawala ɛ. Tin, nyɛ waadhis bin Yezu, Mɛsia mɛ nyɛ naloozetɔ kɔ ɛsu ɛ len ɛ. 21 Nenak yak, ye goka ɛ́ náá, Yezu Klisto pookodi pɛ tɔ gwoo, kɛkum mɛlu mɛ yɛ aabɛ náá, esonok djas ɛ́ waabula bes, dáa Zɛɛb naloozelɛɛ tɔ enuub e bɛngoolel ɛ Mɛkpa ɛ Zɛɛb bɛ na dɛɛ ɛ. 22 Ye nabɛ ɛ́, Moiiz naake náá: "Ghɛŋ Zɛɛb'en ɛ́ waadhis bin ngoolel-Mɛkpa ɛ Zɛɛb dáa mam. Nyɛ aadi ɛ́ mot mbyak'en, da bi ɛ́ gwak etɛp ee nyɛ aalɛɛ bin ɛ djas. 23 Mot djas aadi ààgwak etɛp e ngoolel-Mɛkpa ɛ Zɛɛb tak ɔ, nyɛ waasɔaa tɔ sama bot ɛ mbyak, bhii tak nyɛ waagóaa*."

24 Tɔ bɛngoolel ɛ Mɛkpa ɛ Zɛɛb djas, kana Samyɛl, kɛyaka nɛ bot ɛ nakazyɛ bhii koŋ'ɛ ɔ, ye nabɛ ɛ́ bɛ naalii nɛ nen dum nɛ mɛlu mak. 25 Etɛp ee Zɛɛb nakɛk bin tɔ enuub bɛngoolel ɛ Mɛkpa ɛ Zɛɛb ɛ, nabɛ ɛ́ yebɔ. Bi ɛ́ nɛ yebɔ di tɔ ɛbhɛŋ ɛ Zɛɛb nakwyal bɛ nɛ bɛbhaab bin ɛ. Nyɛ naake nɛ Abalaam náá: "Mɛ waasɛɛ mɛbyel djas, kɔ bɔs mɛtel, kɔ lo bɛdha bɔ." 26 Étɛp tak ɛ́ di náá, Zɛɛb napookoleedhis mot-mɛsa mɛ sok ɛ́ kɔ ɛsu ɛ len, nyɛ napookoleedhis nyɛ ɛ́, étɛp nyɛ neezɛsɛɛ bin mɛtel, nɛ ɛsa náá, mot nɛ mot neeliig koŋ nɛ embee mɛfulu mɛ.»