Mɛsa 25

Taŋal ɛ Pɔl sok bhwoob kukuma Fɛstus

1 Mɛlu mɛlɛl bhii nyɛ nakum pɛ kyee dik tak ɛ, Fɛstus naazɛdus pɛ ghaada Sezaale, tɔ́ pɛ ghaada Yeluzalɛm. 2 Penek ɛ́, eboo bɛghaa-Zɛɛb nɛ eYuda di bɛdjɛɛdel ɔ, nakɛpit Pɔl pɛ daa lɛ. Bɛ naazɛdjaala nɛ nɛ náá, 3 nyɛ gek bɛ ghoŋ, da swaal bɛ Pɔl pɛ Yeluzalɛm. Bɛ nake deenek ɛ́ etɛɛ náá, ye nabɛ ɛ́ bɛ naazedi boob kɔ ɛsu ɛ lɛ, tin, bɛ nadi ekwyɛl ɛgó ɛ nyɛ é ze. 4 Tin, Fɛstus naazɛbɔɔza náá, Pɔl ɛ́ é membok pɛ Sezaale, ye kalik ɛ́ batsa nyɛy ɛmet neesik pɛ ghaada tak. 5 Bhii tak, nyɛ naabaazɛke náá: «Ye goka ɛ́ náá, ekukuma bin zyɛ bis nɛ bɛnɔɔ pɛ Sezaale, bɛ zɛpit mot tak, yɛ bɛ náá, nyɛ eesa etɛp ɛbiyo ɔɔ.» 6 Fɛstus zokazɛdjaasi tin bɛ nɛ bɛnɔɔ, tyee mɛlu mɛtɛn nɛ elɛl nɛghu kam (8-10), bhii tak, nyɛ naazɛsik pɛ Sezaale. É dwoo nabɔɔba ɛ, nyɛ naazɛdisi pɛ sum di bɛ di pɛ́ɛ bot ɛ, nyɛ naazɛlwom náá, bɛ kɛnɔɔ Pɔl. 7 Dáa nyɛ nakakum ɛ, eYuda nadus pɛ Yeluzalɛm ɔ, naazɛwa nyɛ kuku ɛbwak. Wɔ gwaa, bɛ zokazɛsu nyɛ bɛtɛ nɛ embee etɛp, mɛpita mɛ bɔɔ bɛmet di ààbɛ nɛ ghwyil ɛlyaal mɛsɔ mɛ tak ɛ. 8 Tin, Pɔl naazɛtaŋal yɛ, nyɛy náá: «Mɛ ààpasa pɔtɔ dum nɛ etsi eYuda, ààkobɛ dum nɛ Ndjaa-ebuwa, ààkobɛ-bɛak dum nɛ Sezaad, mɛkoozi mɛ Lɔm.»

9 Fɛstus mot nadi ekwyɛl ɛsa náá, eYuda neekwyɛl nyɛ ɔ, nyɛ boozɛdji Pɔl náá: «Wɔ ɛpɛkwyɛl ɛtɔ́ pɛ Yeluzalɛm, étɛp wɔ neekɛpɛ́ɛaa é mis mam dum nɛ tɛp’ak é?» 10 Pɔl naazɛbɔɔza náá: «Mɛ ɛ́ tetel sok bhwoob di epɛ́ɛ e Sezaad, deenek, yɛ ɛ́ wak ɛ mɛ di egoka nɛ ɛpɛ́ɛaa. Ye tok nɛ mbee sa mɛ sa nɛ eYuda, dáa wɔy wɔ ɛmet di egu yenek. 11 Nɛghu mɛ ɛ́ nɛ ndjɛ ɔɔ, yɛ bɛ, mɛ eesa sa mɛ di egoka nɛ ɛgóaa kɔ ɛsu ɛ tak ɔɔ, mɛ ààpabyen ɛsyee. Deenek, yɛ kabɛ náá, etɛp e mɛpita mɛ bot bak pit mɛ ɛ ye tok tsɛɛtsɛ ɔɔ, mot tok nɛ ghwyil ɛ́ ka mɛ é mɛmbɔ mɔɔ. Beta náá, Sezaad, mɛkoozi mɛ Lɔm, pɛ́ɛ tɛp’am!» 12 Deenek, dáa Fɛstus nasilal ɛlii bɛ nɛ bɛtsoŋ ɛ bot bɛ ɛ, nyɛ naazɛbɔɔza náá: «Dáa wɔ tuwal din ɛ boo mɛkoozi Sezaad ɛ, wɔ aakakɛtaŋal ɛ́ sok bhwoob’ɛ.»

Taŋal ɛ Pɔl sok bhwoob mɛkoozi Aghilipa nɛ Bheelenis

13 Ba mɛlu bhii tak, mɛkoozi Aghilipa bɛ nɛ Bheelenis kɛl, naazɛkum pɛ Sezaale étɛp ɛkɛswos Fɛstus. 14 Dáa nyɛ nadi nɛ bɛtɛ nɛ mɛlu tin ɛ, Fɛstus naazɛlii nɛ mɛkoozi kɔ ɛsu ɛ Pɔl náá: «Wak, yɛ ɛ́ nɛ dhiiti mot Feliksɛ nalik é membok ɔ. 15 É ghɛŋ mɛ natɔ́ pɛ Yeluzalɛm ɛ, ekukuma e bɛghaa-Zɛɛb, nɛ bɛpaa eYuda naazɛpit nyɛ. Bɛ naazɛke nɛ nam náá, mɛ kwyesal nyɛ ndjɛ sɔs. 16 Mɛ ɛ́ boozɛbɔɔza nɛ nɔɔ náá, bot ɛ Lɔm tok nɛ mɛfulu mɛ ɛka mot é mɛmbɔ mɛ bot ɛ zɛpit nyɛ ɔ, yɛ bɛ náá, bɛtetɛp dinaa ààpagwak yɛ taŋal ɔɔ. 17 Bɛ zyɛ wak pɛ Sezaale ɛ́ bis nɛ bɛnɔɔ. Mɛ bɛ ɛ́ ààkabaakwyɛl bɔya-bɔya. Tin, djɛmɛn tak mɛ eenɔɔ di é sum di bot di pɛ́ɛaa ɔ, mɛ eezɛlwom náá, bɛ zyɛ nɛ mot tak. 18 Bot ɛ nadi epit nyɛ ɔ, bɛ eezɛzyɛ, é di’enek, bɛ naatuwal bɛtɛ nɛ embee etɛp nyɛ nasa ɛ, tin, ye nàbaabɛ etɛp ee mam nadi egek ɛ. 19 Bɛ nɛ bɛnɔɔ nazosuu ɛ́ mɛso dum nɛ Zɛɛb’ɔɔ met, dɔɔ nɛ kɔ ɛsu ɛ dhiiti mot din ɛ lɛ ɛ́ Yezu. Mot tak naazegwyɛ, da Pɔl ɛ́ di eke náá, nyɛ ɛ́ nɛ tsik. 20 Yɛ kabɛ mam ɔɔ, mɛ bɛ ɛ́ ààbɛ nɛ tyee mɛ pɛ́ɛ mbi yenek tɛp. Yɛ ɛ́ étɛp tak ɛ mɛ dji Pɔl náá, nyɛ kwyɛl ɔɔ, nyɛ tɔ́ pɛ Yeluzalɛm, étɛp nyɛ neekɛpɛ́ɛaa dum nɛ tɛp tak. 21 Tin, Pɔl eebyen, nyɛ booke náá, tɛp’ɛ kɛpɛ́ɛaa pɛ daa boo mɛkoozi mɛ dik Lɔm nyɛ ɛmet. Mɛ ɛ́ boozɛlwom náá, nyɛ nɛɛgaa é membok, kɛkum dwoo mɛ aakyeed nyɛ pɛ daa Sezaad mɛkoozi mɛ dik ɛ.»

22 Aghilipa eezɛke nɛ Fɛstus náá: «Mɛ kwyɛl ɛ́, mɛ gwak mot’ak mam ɛmet nɛ mɛlɔ mam.» Fɛstus eezɛbɔɔza náá: «Wɔ waagwak nyɛ djɛmɛn.»

23 É yak mɛlem mɛ tak, Aghilipa bɛ nɛ Bheelenis naazɛtuula nɛ zukamwaa nɛ mot, nɛ boo duu djas bɛ nɛ ekomanda esodja, nɛ bɛdhil ɛ bot ɛ ghaada. Wɔ gwaa, bɛ zɛni tɔ boo wal bɛ nadi ezyɛ nɛ ɛpɛ́ɛ ɛ bot ɛ. Fɛstus naazɛke náá, bɛ zyɛ nɛ Pɔl, tin, bɛ naazɛzyɛ nɛ nɛ. 24 É di’enek, Fɛstus naazɛke náá: «Mɛkoozi Aghilipa nɛ biyɔ bot ɛ di wak’aak, bi ɛpebee mot’ak. Bot ɛ mbyak eYuda djas eezyɛ zɛpit nyɛ pɛ daa lam, kana pɛ Yeluzalɛm zɛkum wak, etsim bɔɔ ɛ́ náá, nyɛ ààkagoka nɛ tsik. 25 Yɛ kabɛ mam ɔɔ, mɛ bee ɛ́ náá, nyɛ ààpasa dhiiti tɛp di egoka náá, nyɛ góaa étɛp tak ɛ. Bela náá, nyɛy nakuma nyel bɛ ɛ́ nyɛ eelɛɛ náá, bɛ tɔ́ nɛ nɛ sok bhwoob boo mɛkoozi mɛ dik Lɔm. Mɛ eemyaal ɛkyeed ɛ nyɛ nwyak. 26 Tinaak, mɛ tok nɛ tɛtɛ mɛsɔ mɛ mɛ aakwyal tɔ mɛkana kyeed pɛ daa boo mɛkoozi dum nɛ tɛp’ɛ. Yɛ ɛ́ étɛp tak ɛ, mɛ sa náá, nyɛ taŋal é mis men, daŋ-daŋ ɛ, é mis mɔ, wɔy mɛkoozi Aghilipa, etɛɛ náá, bhii mɛdjin mɛ bi aadji nyɛ ɛ, mɛ neebela sa mɛ waakwyal tɔ mɛkana ɛ. 27 Etɛɛ náá, ɛkyeed ɛ́ mot é membok pɛ dɛl ɛ Lɔm ààbɛ nɛ lo mɛsɔ mɛ nyɛ mɛtaa étɛp tak ɛ, nɛ pip mam é mis.»