Mɛsa 12

Zak eegóaa, Pyɛɛd eekɔɔlaa é membok

1 É ghɛŋ tak, mɛkoozi Eelood Aghilipa moo tin etiig bɛdhiiti bot ɛ zɛɛga mendjaala. 2 Nyɛy zokalwom bɛ, bɛ gó Zak mɔn-nyɛɛg ɛ Zaŋ nɛ pɛl. 3 Deenek, dáa nyɛ nabee náá, eYuda naakwyɛl yɛ ɛ, nyɛ eezɛlwom bɛ, bɛ mɛt Pyɛɛd é ghɛŋ ɛbyoŋ ɛ emapa ee di ààwaaa leviid ɛ. 4 Eelood eezɛlwom náá, bɛ mɛt nyɛ, da bɛ ɛ́ kɔɔl nyɛ é membok. Tin, nyɛ ɛ́ boodjɛ mɛsa mɛ ɛbaal ɛ nyɛ nɛ mɛdhuu mɛná mɛ esodja, é ɛdhuu ɛ wat, ye nabɛ ɛ́ nɛ esodja ená. Nyɛ nadi egek ɛ́ náá, nyɛ neepɛ́ɛ nyɛ é mis mɛ bot bhis ɛbyoŋ ɛ Pak. 5 Tin, Pyɛɛd nadi ɛ́ kɔɔla tɔ ndjaa membok, deenek bot ɛ zɛɛga mendjaala nadi ewa zii tɔ ɛdjaala ɛ Zɛɛb kɔ ɛsu ɛ lɛ ɛlyelɛpe.

Pyɛɛd eewyiselaa é membok

6 Bela náá, dáa Eelood nadi ekwyɛl ɛpɛ́ɛ nyɛ é mis mɛ bot ɛ, é pum, Pyɛɛd nadi ɛ́ egɔ́ pak esodja ebá. Nyɛ nabɛ ɛ́ kɔɔla nɛ ekel e ghwooz ebá. Bɛmbaalel ɛ ndjaa membok nadi ɛ́ tin é edi bɔɔ, é ɛbɛ ɛ ndjaa membok. 7 Kasɛka ɛ́, dhiiti fofop ɛ Ghɛŋ ngɔt eezɛtuula tin, tɔ dhɛŋ moo tin bweee nɛ mɛkas. Tin, fofop eezɛkwyɛt nyɛ é bhaaz, nyɛ eezɛdjem nyɛ, nyɛy nɛ nɛ náá: «Lela ɛdjem, wyɛla!» Tin, wɔ gwaa ekel é ghwooz nyɛ nakɔɔlaa nɛ yɛ é mɛmbɔ ɛ, zokakwyit. 8 Tin, fofop eezɛke nɛ nɛ náá: «Bɔta bhɛtɛ yɔ, da wɔ ɛ́ kɔl ekel e mɛpapa mɔ.» Pyɛɛd eezɛgwak nyɛ, bhii tak, fofop eebaazɛbil náá: «Bɔta ndjookuwa yɔ, da wɔ ɛ́ du mɛ.»

9 Wɔ gwaa, Pyɛɛd zɛwyis tɔ membok, nyɛ moo tin edu fofop. Nyɛ nabɛ ɛ́ ààgek náá, etɛp ee fofop nadi esa ɛ, nabɛ ɛ́ etɛp e tsɛɛtsɛ. Nyɛ nagu ɛ́ náá, nyɛ ɛ́ tɔ dhyam. 10 Bɛ eezɛdhaa esum di e bɛmbaalel yii mɛkɛn, bhii tak yii bhɔɔba, bɛ eezɛkum pɛ ɛbɛ ɛ membok nasael nɛ ghwooz ɛ. Ɛbɛ ɛ tak tuula ɛ́ kɔ ɛbɛsɛɛ ɛ dɛl. Ɛbɛ ɛ tak zokazɛdiiel nyɛ ɛmet é mis mɔɔ. Bɛ eezɛwyis, tin, bɛ eezɛtiila é gba, é di tak wat, kasɛka ɛ́ fofop eezɛdiib nyɛ é mis. 11 Tin, Pyɛɛd eezɛsiiza ɛnyɔɛpe sa nasael ɛ, nyɛ ɛ́ boozɛke náá: «Wak nenak mɛ moo bee náá, yɛ ɛ́ tsɛɛtsɛ. Ghɛŋ eedhis fofop’ɛ, nyɛ eepɛk mɛ si ghwyil ɛ Eelood, nɛ mezuk mɛ bot ɛ mbyak eYuda di ekwyɛl náá, mɛ bee ɛ.» 12 Dáa nyɛ nazegwyak di nyɛ nadi ɔ, nyɛ ɛ́ boozɛtɔ́ pɛ ndjaŋ ɛ Maali, nyɛɛg ɛ Zaŋ, di ebaadjóoaa Malak ɔ. Tin, bɛtɛ nɛ bot naasɛɛga étɛp ɛdjaala Zɛɛb. 13 Pyɛɛd eezɛdiig é ɛbɛ ɛ ndjaa, tin, moma mɛsa ngɔt eezɛzyɛ, étɛp nyɛ neezɛdii ndjaa. Din ɛ moma tak nabɛ ɛ́ Lood. 14 Nyɛ eezɛgwyak gwood ɛ Pyɛɛd, nyɛ moo tin tɔ mɛmyaala. Ye waagoka ɛ́ náá, nyɛ dii ndjaa, tin, nyɛ ààpakadii ndjaa, nyɛy kasik ɛ́ kaab kɛlɛɛ bot tɔ ndjaa náá, Pyɛɛd ɛ́ pɛ kel. 15 Bɛ eezɛbɔɔza nɛ nɛ náá: «Wɔ ɛpelyet e!» Tin, nyɛ eezɛbasal náá, yɛ ɛ́ tsɛɛtsɛ. É di’enek, bɛ eezɛke náá: «Yɛ ɛ́ fofop’ɛ.» 16 Tinaak, Pyɛɛd kuku ɛdiig ɛ́ ɛbɛ yenek, dáa bɛ nakazɛdii ndjaŋ ɛ, bɛ eezɛbee nyɛ, bɛ naadyeebadjoka ɛbuɛpe. 17 Nyɛ eezɛlyak bɛ nɛ mbɔ náá, bɛ di gwyem. Bhii tak, nyɛ eezɛni elɛɛ bɛ, dáa Ghɛŋ nawyisal nyɛ é membok ɛ. Nyɛ eebaazɛke náá: «Lɛɛka Zak nɛ bɛdhiiti bɔn-nyɛɛg bina sa dhaŋ ɛ.» Bhii tak, nyɛ eezɛwyis tɔ́ pɛ kyee sis. 18 Dáa mɛlem nakalem ɛ, esodja moo tin zɛm-zɛm pak’ɔɔ. Bɛ nadi edjinel pɛ pak Pyɛɛd natɔ́ ɛ. 19 Eelood eezɛlwom bot náá, bɛ kɛnɔɔ nyɛ, tin, bɛ ààpakabela nyɛ. Bɛ eezɛdji bɛmbaalel ɛ ndjaa membok, tin, nyɛ boodjɛ bɛ ɛlee náá, bɛ gó bɛ. Bhii tak, Eelood eezɛtɔ́ pɛ kyee dik Yude pɛ Sezaale, penek nyɛ naasa ba bim mɛlu.

Ɛsyee ɛ Eelood

20 Eelood naadyeebakpaa lyem nɛ bot ɛ Tiid nɛ Sidɔn. Tin, bot ɛ tak ɛ́ boozɛgwakel náá, bɛ tɔ́ pɛ daa lɛ. Ye nabɛ ɛ́, bɛ eegwakel nɛ Bhalastus, kukuma di esa mɛsa tɔ ndjaŋ mɛkoozi ɔ. Tin, bɛ eezɛtɔ́ kɛlɛɛ nɛ Eelood náá, ɛgwakel bula bɛ nɛ bot ɛ eghaada e tak, etɛɛ náá, edee ee bot binɔk nadi ededɛ ɛ, nadudus ɛ́ pɛ mɛl ɛ Eelood. 21 Dáa ye nakum dwoo tak ɛ, Eelood eezɛbɔt kaad mɛkoozi mɛ, nyɛ eezɛdisi kɔ bóó mɛkoozi mɛ. Tin, nyɛ eezɛni elii nɛ nɔɔ é mis mɛ mɛdhuu mɛ bot. 22 Mɛdhuu mɛ bot binɔk eezɛtsim náá, «Yɛ ɛ́ gwood dhiiti zɛɛb, ààkabɛ yii mot!» 23 Tin, é di tak wat, wɔ gwaa, fofop ngɔt ɛ Ghɛŋ zokazɛdjɛ Eelood baka, etɛɛ náá, nyɛ naakwyɛl ɛnɔɔ duu di náá yɛ ɛ́ yii Zɛɛb ɛ. Elum zokazɛdɛ nyɛ nyel, nyɛy batagwyɛ.

24 Ghuna, Mɛkpa ɛ Zɛɛb nadi egoolaaa, ɛgoolel nɛ ɛgoolel. 25 Yɛ kabɛ Bhaanabhas bɛ nɛ Sɔl ɔɔ, bhii bɛ nasilal lwomel yɔɔ pɛ Yeluzalɛm ɛ, bɛ eezɛsik, tin, bɛ katɔ́ ɛ́ nɛ Zaŋ, mot di ebaadjóoaa Malak ɔ.