Mɛsa 11

Taŋal ɛ Pyɛɛd sok bhwoob bot ɛ zɛɛga mendjaala pɛ Yeluzalɛm

1 Bot ɛ lwoma nɛ bɔn-nyɛɛg bɔɔ nadi pɛ kyee dik Yude ɔ, naazɛgwak náá, bot ɛ di ààbɛ bot ɛ mbyak eYuda ɔ naamyaal pe Mɛkpa ɛ Zɛɛb. 2 Dáa Pyɛɛd nasik pɛ Yeluzalɛm ɛ, bot ɛ mbyak eYuda nadum koŋ nɛ Yezu ɔ, moo tin ebyak nyɛ. 3 Bɔɔ náá: «Wɔ eeni tɔ ndjaa ezibo, wɔ eekɛdɛ edee bi nɛ bɛnɔɔ!» 4 Tin, Pyɛɛd ɛ́ boozɛbaŋa bɛ popoopwon etɛp ee nadhaŋ ɛ djas. Nyɛ nalɛɛ ɛ́ náá: 5 «Mɛ nadi ɛ́ pɛ tɔ ghaada Zafa, mɛ nadi edjaala, é di tak mɛ eezɛbee tɔ sisim, dhiiti sonok esul pɛ kyee mɛ nadi ɛ. Sonok tak nadi enɔŋel nɛ boo pes lɛmbɛ, mɛta é mɛlɔ mɛ tak ená, yɛ nadi edus tɔ gwoo, sul é bɔs, zɛkum pɛ mɛ nadi ɛ. 6 Mɛ eezɛgwyák tɔ tak piii, mɛ kabee ɛ́, bɛtit ɛ di ekɛ nɛ mɛko mɛná ɔ, bɛtit ɛ dik, nɛ bɛtit ɛ di nɛ epapa ɔ, zɛnɔɔ enen. 7 Wɔ gwaa, mɛ zɛgwak gwood wat eke nɛ nam náá: "Wyɛla, Pyɛɛd, góa, da wɔ ɛ́ dɛ!" 8 Tin, mɛ eezɛbɔɔza náá: "Hooo ààbɛ! Ghɛŋ, etɛɛ náá, mɛ dinaa ààpakodɛ sok sa di tɔ etsi e mbyak eYuda ɛ, nɛ sa di nɛ edhuud ɛ dinaa ààpakɛ tɔ nuub’am." 9 Tinaak, gwood’enek eebaazɛgék-géka sis, eke tɔ gwoo náá: "Nàbeea edhuud sa Zɛɛb ke náá, yɛ ɛ́ dɛɛ ɛ." 10 Yɛ naasael deenek tyee esok elɛl, bhii tak sonok tak eezɛbyet tɔ gwoo. 11 Tin, é ɛwala ɛ tak wat, wɔ gwaa, bot ɛlɛl zokazɛkum pɛ ndjaa mɛ nadi ɛ. Bɛ nadus ɛ́ pɛ ghaada Sezaale, bɛ nadi esaa pɛ mɛ nadi edi ɛ. 12 Sisim na Dɛɛ eezɛke nɛ nam náá, mɛ tɔ́ bis nɛ bɛnɔɔ, sa mɛ ààbem ba. Deenek, bɔn-nyɛɛg bam bɛtɛn nɛ wat mɛ nazyɛ nɛ nɔɔ wak ɛ, bɛ naakɛkyeed mɛ pɛ Sezaale. Bisɔ djas, bis bɛ ɛ́, bis eeni tɔ ndjaŋ ɛ Kɔɔdnɛy. 13 Kɔɔdnɛy eezɛkaada bis dáa nyɛ nabee fofop tetel tɔ ndjaŋ’ɛ, elɛɛ nyɛ náá: "Kyeeda bot pɛ Zafa, étɛp bɛ neekɛdjóo Simɔŋ di ebaadjóoaa Pyɛɛd ɔ. 14 Mot tak ɛ́ waalɛɛ wɔ mɛkpa mɛ di náá, wɔy nɛ bot ɛ mɛbyel mɔ djas ɛ, waabela tsik nɛ yɛ ɛ." 15 Tin, dáa mɛ nadi mɛ moo ekan ɛlii ɛ, wɔ gwaa, Sisim na Dɛɛ zɛsul kɔ lɔɔ, dáa ye nasul kɔ les é mɛkɛn ɛ. 16 Tin, mɛ eezɛtaala sa Ghɛŋ nalɛɛ ɛ: "Zaŋ naduu bot Zɛɛb ɛ́ tɔ mɛdii, yɛ kabɛ biyɔ ɔɔ, bi aaduwaa Zɛɛb ɛ́ tɔ ghwyil Sisim na Dɛɛ." 17 Yɛ ɛ́ deenek ɛ́ Zɛɛb nadjɛ bɛ mbi ɛkɛɛ ɛ tak wat, nyɛ nadjɛ mena, é ghɛŋ mena nadumka koŋ nɛ Ghɛŋ Yezu Klisto ɛ. Mam nadi zɛ, étɛp mɛ neekɛla etɛp ee Zɛɛb di esa ɛ?» 18 Bhii bɛ nagwak etɛp binek djas ɛ, elyem bɔɔ djas eezɛsila, bɛ moo tin eduwal Zɛɛb eke náá: «Yɛ ɛ́ tsɛɛtsɛ náá, Zɛɛb eebaadjɛ pe bot ɛ di ààbɛ bot ɛ mbyak eYuda ɔ, ghwyil ɛswoola mɛfulu mɔɔ, nɛ yii ɛbela tɛtɛ tsik.»

Zɛɛga mendjaala mɛ bot ɛ ghaada Antiɔs

19 Bhis Etiɛn nagóaa ɛ, bot ɛ nadi edum koŋ nɛ Zɛɛb ɔ, naadyeebatiigaa, ye naasa náá, bɛ wyɛɛza. Bɛdhiiti bot naatɔ́, batakɛkum pɛ kyee dik Fenisi, pɛ ghola Siipɛlɛ, nɛ pɛ boo ghaada Antiɔs. Bela náá, bɛ nazogegoola Mɛkpa ɛ Zɛɛb ɛ, pɛ daa bot ɛ mbyak eYuda. 20 Bela náá, bɛdhiiti bot ɛ nadi edum koŋ nɛ Zɛɛb ɔ, bot ɛ Siipɛlɛ nɛ Silɛn, naatɔ́ pɛ Antiɔs. Bɛ nadi elii nɛ bot ɛ membyak mɛ sis, é ɛgoola bɛ Mbɛɛ Bhaadal ɛ Ghɛŋ Yezu. 21 Ghwyil ɛ Ghɛŋ nadi ɛ́ nɛ nɔɔ lɔɔg wat, ye naasa náá, zukamwaa nɛ mot swoola mɛfulu mɔɔ, da dum koŋ nɛ Ghɛŋ. 22 Ye nabɛ ɛ́ bot ɛ zɛɛga mendjaala Yeluzalɛm naagwak menduk me tak. Bɛ ɛ́ boozɛlwom Bhaanabhas pɛ Antiɔs. 23 Dáa nyɛ nakum ɛ, tin, nyɛ eezɛbee dáa Zɛɛb nazesɛɛ bot ɛ di edum koŋ nɛ Zɛɛb ɔ mɛtel ɛ, nyɛ eezɛmyaala. Bhii tak, nyɛ eezɛdjɛ bɛ mɛghaaz mɛ ɛwa lyem, étɛp bɛ neewa zii ɛdu ɛ Ghɛŋ tɔ esosoob. 24 Bhaanabhas nadi ɛ́ mbɛɛ mot, Sisim na Dɛɛ nɛ ɛdum ɛ koŋ nɛ Zɛɛb tɔɔɔ tɔ lɛ. Tin, wɔ gwaa zukamwaa nɛ mot zokamyaal ɛdu ɛ Ghɛŋ.

25 Bhii tak, Bhaanabhas eezɛtɔ́ pɛ dɛl Taalas kɛsaa Sɔl. 26 Bhii nyɛ nakabela nyɛ ɛ, nyɛ ɛ́ bootɔ́ nɛ nɛ pɛ Antiɔs. Tin, bɔɔ bɛbá naazɛdhaa tu mbu tɔ zɛɛga mendjaala mɛ tak. É di’enek, bɛ naalyo bot ɛbuɛpe dum nɛ ɛdum ɛ koŋ nɛ Zɛɛb. Yɛ ɛ́ kɔ ghaada Antiɔs ɛ bɛdjekel nakan ɛdjóoaa sok «ekeletyɛ». 27 É ghɛŋ tak, ye nabɛ ɛ́, bɛngoolel ɛ Mɛkpa ɛ Zɛɛb naazɛdus pɛ Yeluzalɛm tɔ́ pɛ Antiɔs. 28 Dhiiti pak’ɔɔ, din ɛ lɛ nabɛ ɛ́ Aghabis, Sisim na Dɛɛ eepem nyɛ, nyɛ eezɛni é ɛlɛɛ náá, boo za moo aatuula kɔ bɔs djas. Bela náá, mbi za tak naasael é sok Kolood nadi mɛkoozi mɛ Lɔm ɛ. 29 Tin, bɛdjekel eezɛgwakel náá, mot nɛ mot ɛ́ waadjɛ yɛ ba bim nyɛ aabela ɛ, étɛp ɛkwyee bɔn-nyɛɛg bɔɔ nadi pɛ kyee dik Yude ɔ. 30 Bɛ nasa ɛ́ deenek, wɔ gwaa, bɛ zokakyeed esa binek pɛ daa bɛpaa ɛ eYuda, é mɛmbɔ ɛ Bhaanabhas bɛ nɛ Sɔl.