1 Dáa bis natsak ɛ, bis eezɛgwak náá, din ɛ ghola tak nabɛ ɛ́ Maletɛ. 2 Bot ɛ mbyak di kɔ ghola tak ɔ, naabe bis ɛnyɔɛpe. Dáa bhi nadi enee ɛ, ɛgwyiyo nadi esa, bot ɛ dɛl ɛ tak naazɛtuub boo du, bisɔ djas neesulal é ngwoob tak, étɛp ɛgoogal ɛ mɛnyel. 3 Pɔl eetɔ́ kɛtek boo mbwoob egeta étɛp ɛzɛwa tɔ du. Tin, wɔ gwaa ɛgel zɛwyis tɔ mbwoob egeta tak, ekaab mɛgoo mɛ du, nyɛ eezɛkwaal Pɔl, naata nyɛ é mbɔ. Ɛgel eenaata Pɔl é mbɔ

4 Dáa bot ɛ ghola nabee ɛgel tsela é mbɔ ɛ Pɔl ɛ, bɛ moo tin eke pak'ɔɔ náá: «Yɛ ɛ́ tsɛɛtsɛ, mot'ak nɛ gó bot. Yɛ kobɛ náá, ɛsyee eekat nyɛ tɔ boo dii mɛsɔn ɔɔ, epiki e Zɛɛb ààpakwyɛl náá, mot'ak di nɛ tsik.» 5 Tin, Pɔl eezɛkut mbɔ, nyɔ tak eekwyit tɔ du, nyɛy ààgwak sonok. 6 Bot ɛ tak nadi ebwood náá, bɛ bee nyel ɛ Pɔl ebeyal, nɛghu náá, ɛsyee bela nyɛ zaka. Tin, bhii bɛ nadyeebabwood ɛbuɛpe, bɛ eezɛbee náá, sonok nabɛ ɛ́ ààsa nyɛ. Bɛ eezɛswoola esiiza bɔɔ, bɛ moo eke pak'ɔɔ náá, nyɛ ɛ́ kɔkɔ mbi dhiiti zɛɛb.

7 É ngwoob di tak, ye nabɛ ɛ́ nɛ bɛɛdok ɛ kukuma ghola tak. Din ɛ lɛ nabɛ ɛ́ Pibilus. Kukuma tak naamyaal nɛ lyem wat náá, bis sulal pɛ daa lɛ. Tin, nyɛ naadjɛk bis tɔ ndjaŋ'ɛ mɛlu mɛlɛl. 8 Sɛɛg ɛ Pibilus nadi ɛ́ ndjaasi, nyɛ nadi ɛ́ nɛ mɛkosa nɛ mɛlaa. Pɔl eezɛtɔ́ kɛbee nyɛ, nyɛ boodjaala Zɛɛb kɔ ɛsu ɛ lɛ, bhii tak, nyɛ eezɛkɛl nyɛ mɛmbɔ, wɔ gwaa nyɛ zɛtsik nyɛ. 9 Bhii tak, bɛdhiiti bot ɛ mɛbɛ́ nadi kɔ ghola ɔ zokabaazyɛ yɔbɔ, Zɛɛb zokazɛtsik bɛ. 10 Bɛ naazɛdjɛ bis boo duu. Tin, é ghɛŋ bis nadi bis moo eni tɔ mɛsuwa étɛp bis neetɔ́ ɛ, wɔ gwaa, bɛ zɛdjɛ bis esesɛɛ djas nagoka náá bis di nɛ yɛ, étɛp mɛdjoŋ mɛ bis nadi etɔ́ ɛ.

11 Bhii bɛngɔn ɛlɛl, bis eezɛtɔ́, tɔ dhiiti mɛsuwa mɛ nadus pɛ ghaada Alɛkzandili ɛ. Pɛ lo mɛsuwa mɛ tak, ye nabɛ ɛ́ nɛ kpaka dhiiti ndem bɛzɛɛb ɛ di edjóoaa «Mɛwas» ɔ. Ye nadi ɛ́, mɛsuwa mɛ nadhaa mbu kwol é ɛboŋ ɛ ghola Maletɛ ɛ. 12 Bis eezɛsel é ɛboŋ ɛ ghaada Silakuuz, bis eezɛdhaa mɛlu mɛlɛl tin. 13 Dusa bis nadus tin ɛ, bis eezɛdhaa mbaka-mbaka nɛ ghola tak, étɛp ɛkɛtsaal dii, kɛtuula pɛ ghaada Leezyo. É yak mɛlem, pup di edus pɛ kyɛ bɔs ɛ́ eezɛkan ɛpupal. Mɛlu mɛmbá bhii tak, bis eezɛtuula pɛ ghaada Puzɔlɛs. 14 Pɛ kɔ ghaada tak, bis naazɛbela bɔn-nyɛɛg bis. Bɛ nadi ekwyɛl náá, bis nɛ bɛnɔɔ dhaa yenga wat tin. Yɛ ɛ́ deenek ɛ́ bis nakɛkum pɛ Lɔm. 15 Bɔn-nyɛɛg bis yii ghaada Lɔm naagwak menduk mes. Wɔ gwaa, bɛ zokazyɛ zɛboma nɛ nes, pɛ djando Apiyus nɛ pɛ di di edjóoaa «Mendjaa melɛl yii bɛdjoŋ» ɛ. Dáa Pɔl nabee bɛ ɛ, nyɛ eezɛghaapɛɛ Zɛɛb, tin, nyɛ eezɛbela mɛghaaz. 16 Bis naazɛkum pɛ ghaada Lɔm. Tin bɛ naazɛdjɛ Pɔl ze ɛkɛdjaasi pɛ ndjaŋ'ɛ, bɛ nɛ sodja ngɔt nadi ebaal nyɛ ɔ.

17 Mɛlu mɛlɛl bhii tak, Pɔl eezɛdjóo ekukuma eYuda nadi kɔ ghaada Lɔm ɛ pɛ daa lɛ. Dáa bɛ nakasɛɛga ɛ, nyɛ boozɛke nɛ nɔɔ náá: «Bɔn-nyɛɛg, ye nakoozodi náá, mɛ ààpasa étɛp ɛbiyo nɛ bot ɛ mbyak'ena, ààkobɛ pe dum nɛ mɛtiŋ e bɛbhaab benaka. Ye nabɛ ɛ́, mɛ eemɛtaa pɛ Yeluzalɛm, djɛaa é mɛmbɔ mɛ bot ɛ Lɔm. 18 Bhii ekukuma e Lɔm nalɛɛ náá, mɛ taŋal ɛ, bɛ naagwak mɛ ɛnyɔɛpe. Tin, bɛ naakwyɛl ɛbet ɛ mɛ, etɛɛ náá, bɛ nabɛ ààbee lo mɛsɔ mɛ bɛ nawaadjɛ mɛ epɛ́ɛ ɛsyee kɔ ɛsu ɛ tak ɛ. 19 Tin, eYuda naabyen, mɛ ɛ́ boozɛwaab nɛ bhel náá, mɛ zɛtaŋal sok bhwoob ɛ Sezaad, boo mɛkoozi mɛ dik Lɔm. Deenek, mɛ nabɛ ɛ́ ààbɛ nɛ ghwyil ɛzyɛ wak zɛpit mbyak'am. 20 Yɛ ɛ́ étɛp tak ɛ mɛ kwyɛl ɛbee bin, étɛp mɛ neelii nɛ nen. Yɛ tsɛɛtsɛ náá, mɛ kɔɔlaa nɛ eghwooz bak ɛ, kɔ ɛsu ɛ mot, bot ɛ Yisalaɛl di nɛ ɛbwaalel nɛ nɛ ɔ.»

21 Bɛ eezɛbɔɔza nɛ nɛ náá: «Bis ààpabela mɛkana mɛ nadus pɛ daa bot ɛ kyee dik Yude dum nɛ tɛp'ɔ ɛ. Ye tok nɛ dhiiti mɔn-nyɛɛg'es dus penek, étɛp nyɛ neezɛbaŋa bis dhiiti tɛp. Nɛghu ɛlɛɛ bis embee etɛp dum nɛ nɔ. 22 Tin, bis ɛpekwyɛl náá, wɔ pookolɛɛ bis wɔy wɔ ɛmet yɔ esiiza. Etɛɛ náá, bis nɛ gu náá, pɛ kɔ edi djas, bot ààkwyɛl bot ɛ di edu sama bot ɛ wɔ di edu yenek.»

23 Bɛ eezɛgwakel nɛ Pɔl, étɛp bɛ neebaaboma é dhiiti dwoo. Dáa dwoo tak nakakum ɛ, bɛ eezɛzyɛ bɔɔ ɛbuɛpe, bɛ eezɛbela nyɛ pɛ nyɛ nasulal ɛ. Pɔl eezɛni nɛ ɛlii, kana mɛlem kɛkum bikoko. Nyɛ nadi elyo bɛ ɛ́ dum nɛ Ɛyoŋ ɛ Zɛɛb. Nyɛ nadi esa zii tɔ ɛlɛɛ bɛ náá, Yezu ɛ́ Mɛsia, étɛp bɛ needum koŋ nɛ Zɛɛb. Nyɛ nanenɔɔ etɛp e tak ɛ, tɔ mɛkana mɛ etsi ɛ Moiiz nɛ tɔ bɛmɛkana mɛ bɛngoolel ɛ Mɛkpa ɛ Zɛɛb. 24 Bɛdhiiti bot naamyaal etɛp ee nyɛ nadi elɛɛ bɛ ɛ. Tin, bɛdhiiti naabyen ɛmyaal yɔbɔ. 25 Dáa bɛ nabɛka, bɔɔ ààgwakel pak'ɔɔ ɛ, Pɔl ɛ́ booke nɛ nɔɔ náá: «Sisim na Dɛɛ nadi ɛ́ nɛ gham, é ghɛŋ nyɛ nadi elii nɛ bɛbhaab bin tɔ nuub ɛ ngoolel-Mɛkpa ɛ Zɛɛb Ezayi ɛ! 26 Nyɛ nadi eke ɛ́ náá:

"Tɔ́a kɛlɛɛ bot ɛ mbyak'ak náá:

Bi ɛpegwak ɛnyɔɛpe, tin, bi ààmɛt mɛsuk mɛ tak.

Bi ɛpegwyák ɛnyɔɛpe, tin, bi ààbee.

27 Etɛɛ náá, bot bak nɛ kadyeebalyel elyem dhaa tyɛ.

Bɛ eezediyal mɛlɔ mɔɔ.

Bɛ eezediyal mis mɔɔ.

Bɛ sa deenek ɛ́, ekaab náá, mis mɔɔ ɛ́ zɛkɛbee,

mɛlɔ mɔɔ ɛ́ zɛkɛgwak,

ɛtselal ɛ lɔɔ ɛ́ zɛkɛtiibal.

Bɛ aanàkwaabula pɛ daa lam étɛp mɛ neetsik bɛ*."»

28 Pɔl eebaazɛbil náá: «Guka náá, Zɛɛb eedhis bhaadal tsik pɛ daa bot ɛ di ààdi bot ɛ mbyak eYuda ɔ. Bɔɔ, bɛ waagwak yɛ.»

[29 *]

30 Pɔl eezɛdi membu membá tin tɔ ndjaa bɛ nanɛɛg nyɛ tɔ tak ɛ. Nyɛy nadi emɔ nɛ bot djas nadi ezyɛ zɛbee nyɛ ɔ. 31 Nyɛ nadi elɛɛ bot náá, Zɛɛb ɛ́ waakɔk kɔ Ɛyoŋ ɛ lɛ, nɛ ɛlyo ɛ bot dum nɛ Ghɛŋ Yezu Klisto nɛ boo ɛbwaalel, nyɛy ààluaa.