1 Bɛ eezɛdhaa pɛ eghaada Anfipolis nɛ Apoloni, tin, bɛ eezɛkum pɛ ghaada Tesalonik pɛ bot ɛ mbyak eYuda nadi nɛ ndjaa mendjaala ɛ. 2 Dáa nyɛ nabela nɛ ɛsesa sok ɛ, Pɔl eezɛtɔ́ é esaba elɛl tɔ mendjaa mɛ mendjaala mɛ eYuda, bɛ nadi elii dum nɛ Ekwyala e Zɛɛb, bɛ nɛ bot ɛ nadi tin ɔ. 3 Nyɛ nadi elyo nɛ ɛlyaal ɛ́ bɛ náá, ye nagoka ɛ́ náá, Mɛsia zukaa, da nyɛ ɛ́ gom bis ɛsyee. Nyɛ nadi eke nɛ nɔɔ ɛ́ náá: «Yɛ ɛ́ Yezu mɛ di elii nɛ nen kɔ ɛsu ɛ lɛ'aak, nyɛy ɛ di Mɛsia.» 4 Bɛdhiiti bot tɔ sama bot ɛ nadi tin ɔ, naamyaal etɛp é tak, bɛ ɛ́ boozɛdu Pɔl nɛ Silas. Dɔɔ nɛ bɛtɛ nɛ bot ɛ mbyak eGhɛlɛk ee nadi eduwal Zɛɛb ɔ, naazɛsɛɛga nɛ nɔɔ, zɛnɔɔ bɛtɛ nɛ bɛdhiiti bɛdhil ɛ boa. 5 Tin, zok naazɛsa eYuda, wɔ gwaa, bɛ zɛsɛɛg edhiiti ewo e mengbaaz bɛ nabela é gba ɛ, bɛ boozɛkus ɛzɛm tɔ ɛdhuu ɛ bot ɛ nadi tin ɔ. Wɔ gwaa, bɛ zɛkus ɛghuub kɔ ghaada. Bɛ eezɛtɔ́ pɛ ndjaŋ ɛ Zasɔn kɛsaa Pɔl nɛ Silas, étɛp bɛ neemɛt bɛ, zyɛ nɛ nɔɔ é mis mɛ mɛdhuu mɛ bot. 6 Dáa bɛ nadi ààbela bɛ ɛ, bɛ ɛ́ boozɛmɛt Zasɔn bɛ nɛ bɛdhiiti bɔn-nyɛɛg, tɔ́ nɛ nɔɔ pɛ daa ekukuma é ghaada. Bɛ moo tin etsim náá: «Bot bak ɛpezɛm dik djas, deenek, nenak bɛ eezezyɛ nɛ yɛ wak! 7 Zasɔn eemyaal náá, bot ɛ tak sulal pɛ daa lɛ! Bot ɛ tak djas ààsa dáa etsi ɛ mɛkoozi Sezaad nadi elɛɛ ɛ, etɛɛ náá, bɛ ke ɛ́ náá, yɛ ɛ́ nɛ dhiiti mɛkoozi mɛ sis, din ɛ lɛ ɛ́ Yezu.» 8 Etɛp binek naadjɛ ekukuma nɛ mɛdhuu mɛ bot ɛ ghaada bwoo. 9 Bot ɛ tak naasa náá, Zasɔn bɛ nɛ bɔn-nyɛɛg zɛdjɛ boo etuud pɛ daa ekukuma, étɛp bɛ neebetaa.

10 Dáa ɛgwyitok nagwyiidela ɛ, bɛdhiiti bot ɛ nadi edum koŋ nɛ Zɛɛb ɔ ɛbookyeed Pɔl bɛ nɛ Silas náá, bɛ tɔ́ pɛ dɛl ɛ Bheede. Dáa bɛ nakum ɛ, bɛ eezɛtɔ́ pɛ ndjaa mendjaala mɛ eYuda. 11 Bɛ nabɛ ɛ́ ààbɛ nɛ embee elyem dáa bot ɛ Tesalonik. Bɛ naagwak Mɛkpa ɛ Zɛɛb nɛ mbɛɛ lyem. Mɛlu djas bɛ nadi esɛɛga étɛp ɛdjek Mɛkpa ɛ Zɛɛb nɛ ɛfyal ɛ etsɛɛtsɛ e Ekwyala ee Pɔl nadi elɛɛ ɛ. 12 Yɛ ɛ́ kɔ ɛsu ɛ tak ɛ bɛtɛ nɛ bot pak'ɔɔ nabɛ, bɛ moo edum koŋ nɛ Zɛɛb, dɔɔ nɛ tɔ sama bot ɛ mbyak eGhɛlɛk, bɛdhil ɛ boa nɛ botom ɛbuɛpe, namyaal ɛdu ɛ Zɛɛb. 13 Dáa bɛdhiiti eYuda e dɛl Tesalonik nagwak náá, Pɔl nabaadi egoola Mɛkpa ɛ Zɛɛb pɛ Bheede ɛ, bɛ eezɛzyɛ zɛkus ɛghuub, nɛ ɛzɛm tɔ mɛdhuu mɛ bot. 14 Bɔn-nyɛɛg eezɛkyeed Pɔl kaab ɛ́ kaab pɛ ze boo dii mɛsɔn. Tin, Silas bɛ nɛ Timote eezɛlik pɛ Bheede. 15 Bot ɛ nakɛkyeed Pɔl ɔ, zokatɔ́ nɛ nɛ kɛkum pɛ ghaada Atɛn. Bhii tak, bɛ eezɛlel ɛsik yɔbɔ pɛ Bheede nɛ mɛbhaadal mɛ Pɔl nakyeed Silas bɛ nɛ Timote ɛ. Nyɛ nake nɛ nɔɔ ɛ́ náá, bɛ lel ɛkɛboma nɛ nɛ.

16 Dáa Pɔl nadi ebwood bɛ pɛ Atɛn ɛ, wɔ gwaa, ghoŋ zɛmɛt nyɛ ɛlyelɛpe dáa nyɛ naabee dɛl tɔɔɔ nɛ bɛzɛɛb ɛ elula-lula ɛ. 17 Nyɛ moo tin elii tɔ ndjaa mendjaala bɛ nɛ eYuda nɛ bot ɛ sis nadi eduwal Zɛɛb ɔ, dɔɔ nɛ kɔ ɛbɛsɛɛ, é di bot djas di edi ɔ. Mɛlu djas nyɛ nadi elii nɛ bot ɛ nyɛ nadi eboma nɛ nɛ ɔ. Pɔl ɛpelyo Mɛkpa ɛ Zɛɛb pɛ ghaada Atɛn

18 Bɛdhiiti bɛlyoel ɛ nadi djóoaa «Bot a Epikyiid» nɛ bot nadi é djóoaa «Bot ɛ Zenɔŋ*» ɔ, zokazɛlii nɛ nɛ. Bɛdhiiti eezɛdji nyɛ náá: «Mot ɛtap ɛlak kwyɛl ɛlɛɛ yé?» Bɛdhiiti náá: «Ye di ɛkɛɛ náá, nyɛ ɛpelyo bot bɛzɛɛb ɛ sis.» Bɛ nake deenek ɛ́ etɛɛ náá, bɛ nadi egwak Pɔl egoola Mɛkpa ɛ Zɛɛb kɔ ɛsu ɛ Yezu nɛ étɛp ɛgom ɛ lɛ bhis ɛsyee. 19 Bɛ eezɛnɔɔ nyɛ, tɔ́ nɛ nɛ pɛ sum di zɛɛga bɛ di edjóo «Ɛlopaaz» ɛ. Tin, bɛ eezɛke nɛ nɛ náá: «Bis ɛ́ nɛ ghwyil ɛgu mɛlyo mɛ na bes wɔ di eke ɛ? 20 Wɔ ɛpelyaal bis etɛp e na bes, bis kwyɛl ɛ́ náá, bis gu mɛsuk mɛ tak.» 21 Ye goka ɛ́, wɔ gu náá, bot ɛ ghaada Atɛn djas nɛ bɛdjoŋ ɛ nadidi bɛ nɛ bɛnɔɔ ɔ, nadhaa mɛwala mɔɔ ɛ, bɔɔ é ɛsɔs nɛ ɛgwak etɛp e na bes tak. 22 É di'enek, Pɔl tetel kuku ɛbwak ɛ zɛɛga pɛ «Ɛlopaaz», nyɛ eezɛke náá: «Bot ɛ ghaada Atɛn, mɛ eebee náá, bi nɛ dyeebaduwal bɛzɛɛb bin ɛbuɛpe tɔ etɛp djas. 23 Deenek, é sok mɛ di ekɛ kɔ ghaada yen ɛ, mɛ di ebee emesa e bɛzɛɛb ɛ elula-lula bi di eduwal ɛ, mɛ eebee dɔɔ nɛ mɔɔ di na dɛɛ wat, kɔ tak kwyala náá: "Yɛ ɛ́ yii zɛɛb ngɔt bot di ààgu ɛ." É di'enek, yɛ ɛ́ yii bi di eduwal ààgu ɛ, mɛ zyɛ ɛ́ zɛgoola bin nwyak. 24 Zɛɛb mot nakus bɔs nɛ esesɛɛ ɛ djas ɔ, Ghɛŋ gwoo nɛ bɔs. Nyɛy ààdi tɔ mendjaa me bɛzɛɛb ɛ bɛnaghisɛ, bot di esum nɛ mɛmbɔ mɔɔ ɛ. 25 Nyɛ tok pe nɛ gwyes náá, bɛ kwyee nyɛ nɛghu bɛ djɛ nyɛ yak sonok, etɛɛ náá, nyɛy ɛ́ di edjɛ bot djas tsik, eswos nɛ esonok djas kalik ɛ. 26 Kɛkan nɛ mot ngɔt, nyɛ naasa membyak djas, bhii tak, nyɛ eezɛdjɛ mot nɛ mot yɛ di kɔ bɔs. Étɛp'ɔɔ, nyɛ naakoobal membu, nɛ mɛsik nɛ mɛtsek mɛ mɛdhik mɛ bɛ nagoka nɛ ɛdi kɔ tak ɛ. 27 Nyɛ nasa deenek ɛ́, étɛp bɛ neesaa nyɛ, ye nakoozolyel, bɛ ɛ́ nɛ ghwyil ɛbela nyɛ. Nɛ tsɛɛtsɛ, Zɛɛb ààtseta nɛ mot ngɔt pak'ena, 28 etɛɛ náá:

"Yɛ ɛ́ kɔ ɛsu ɛ lɛ ɛ mena dika nɛ tsik,

mena di ekuuka, mena dika."

Yɛ ɛ́ etɛp ee bɛdhiiti bɛsaŋel ɛ esesa bin nazolɛɛ ɛ:

"Menaka ɛ́ bɔn bɛ pe*."

29 Dáa ye di náá, menaka ɛ́ bɔn bɛ ɛ, mena tokeka nɛ ghwyil ɛgek náá, Zɛɛb ɛ́ dáa sonok lulaa nɛ lɔɔd, nɛ ghwooz di esaaa epata nɛ yɛ ɛ, nɛghu nɛ ɛkok ɛ mot di esa nɛ egeka nɛ etsoŋ bɛ ɛ. 30 Ghuna, Zɛɛb ààkabis etɛp ee nasael sok nɛ bot nadi tɔ ɛdjak ɔ, deenek, nenak, nyɛ ɛpelɛɛ bot djas pɛ edi ee bɛ di ɛ, bɛ swoola mɛfulu mɔɔ. 31 Etɛɛ náá, nyɛ naazekoobal ɛlu ɛ nyɛ aazɛpɛ́ɛ bot ɛ bɔs djas epɛ́ɛ é epiki ɛ, nɛ mot nyɛ nazesɛ́ɛ ɔ. Nyɛ naatel bot djas ndem, tɔ ɛgomal ɛ nyɛ gomal mot yenɔk pak bɛmyoŋ ɛ!»

32 Dáa bɛ nagwak Pɔl elii dum nɛ ɛgom bhis ɛsyee ɛ, bɛdhiiti bot eezɛduk nyɛ, bak tak eezɛke náá: «Bis ɛ́ waaboogwak wɔ kɔ ɛsu ɛ tak dhiiti dwoo.» 33 É di'enek ɛ, Pɔl nazɛlik bɛ. 34 Ye kabela tin ɛ́ náá, bɛdhiiti bot naazeni zɛɛga yɔɔ, bɔɔ dum koŋ nɛ Zɛɛb. Tɔ sama bot ɛ tak, ye nabɛ ɛ́, Dhenis mot zɛɛga boo kwan nadi pɛ Ɛlopaaz ɔ, dhiiti moma din ɛ lɛ ɛ́ Dhamalis, nɛ bak bɛdhiiti bot.