1 Pɔl eezɛgwyák bot ɛ zɛɛga boo kwan eYuda kpɛɛɛ, nyɛ eezɛke náá: «Bɔn-nyɛɛg yɛ ɛ́ nɛ lyem'am selele ɛ mɛ sa mɛsa mɛ Zɛɛb kɛkum dwoo pan mos'ak.» 2 Dhiiti boo ghaa-Zɛɛb Ananias eezɛlwom bot ɛ nadi é ngwoob ɛ Pɔl ɔ náá, bɛ nyuu nyɛ é nuub. 3 Tin, Pɔl eezɛke nɛ nɛ náá: «Yɛ ɛ́ Zɛɛb ɛ aakwaamyak wɔ, wɔy mot mɛdjhaaz pɛ ɛko, bhimis pɛ si! Wɔ di tin ɛ́ étɛp wɔ neepɛ́ɛ mɛ dum nɛ etsi ɛ Moiiz, bela náá, wɔy ààduwal etsi tak, etɛɛ náá, wɔ eelwom náá bɛ myak mɛ!» 4 Bot ɛ nadi é ngwoob ɛ Pɔl ɔ eezɛke nɛ nɛ náá: «Wɔ lee boo ghaa-Zɛɛb!» 5 Pɔl eezɛbɔɔza náá: «Bɔn-nyɛɛg, mɛ bɛ ààgu náá, ye bɛ ɛ́ boo ghaa-zɛɛb. Etɛɛ náá, Ekwyala lɛɛ ɛ́ náá: "Sa wɔ aalii ɛbiyoɛpe nɛ dhiiti kukuma mbyak'ɔ*!"»

6 Pɔl nadi egu náá, tɔ zɛɛga boo kwan eYuda tak, ye nabɛ ɛ́, kyee wat eSaduseɛ, yak kyee eFalizyɛ. Yɛ ɛ́ étɛp tak ɛ nyɛ nazɛtsim ɛlyelɛpe kuku ɛbwak ɛ lɔɔ náá: «Bɔn-nyɛɛg, mɛ ɛ́ Falizyɛ, mot nabya mɛ ɔ nyɛ ɛ́ Falizyɛ. Mɛ ɛ́ nɛ ɛbwaalel náá, Zɛɛb ɛ́ waagomal bot bhis ɛsyee, étɛp tak bi di epɛ́ɛ mɛ.» 7 Dáa nyɛ nazosilal ɛlii deenek ɛ́, eFalizyɛ bɛ nɛ eSaduseɛ tombooo nɛ ɛwɔ pak'ɔɔ, tin, zɛɛga eezɛbɛka. 8 Deenek, bɛ nadi esuu mɛso ɛ́, etɛɛ náá, eSaduseɛ ke ɛ́ náá, ɛgom bis ɛsyee tok, efofop tok, esisim tok. Yɛ kabɛ eFalizyɛ ɔɔ, bɔɔ nɛ myaal yɔbɔ náá, esonok binek djas ɛ́ tsɛɛtsɛ. 9 Bot djas moo tin etsim ɛlyelɛpe, tin, bɛdhiiti bɛghaŋ ɛ mɛkana mɛ etsi, bot ɛ nadi bot ɛ sama eFalizyɛ ɔ eezɛwyɛl, bɛ eezɛbyen sa tak ɛlyelɛpe, bɔɔ náá: «Bis ààpabee dhiiti tɛp ɛbiyo tɔ mot'ak. Dhiiti sisim, nɛghu dhiiti fofop eelii bilak nɛ nɛ!» 10 Dáa ye nadi náá, ɛwɔ nadi ebɔk, ɛbɔk, nɛ ɛbɔk dhaa tyee ɛ, wɔ gwaa komanda zɛbela bwoo ekaab náá, bɛ zɛkɛduma Pɔl é nyel, da gó nyɛ. Tin, nyɛ ɛ́ boolwom esodja bɛ náá, bɛ sul pɛ zɛɛga kwan, bɛ neekɛpɛk Pɔl é mɛmbɔ mɔɔ, bhii tak, da bɛ ɛ́ sik nɛ nɛ pɛ ɛbɛsɛɛ esodja. 11 É yak pum bhii tak, Ghɛŋ eezɛlyaal Pɔl nyel, nyɛy nɛ nɛ náá: «Dia nɛ mɛghaaz! Wɔy ɛ́ di tyaasɛs'am wak, kɔ ghaada Yeluzalɛm, deenek, egoka wɔ tɔ́ kɛdi pe tyaasɛs'am pɛ ghaada Lɔm.»

12 Dáa mɛlem nakalem ɛ, dhiiti ba bim eYuda eezɛgwakel é boob, bɛ eezɛtuwal myoŋ nɛ mɛsoŋ mɔɔ náá, bɛ aanàkwaadɛ edee nɛ mɛdii, ɛsok nɛ bɛ nɛ pookogó Pɔl. 13 Bot ɛ nagwakel é boob tak ɔ naadhaa bot mɛkam-mɛná (40). 14 Bɛ eezɛtɔ́ kɛbee eboo bɛghaa-Zɛɛb nɛ bɛpaa, tin, bɛ eezɛke nɛ nɔɔ náá: «Bisɔ, bis eegwakel, nɛ ɛtuwal myoŋ nɛ mɛsoŋ mes nɛ tsɛɛtsɛ náá, bis aanàkwaadɛ edee, bis dinaa ààgó Pɔl. 15 Deenek, biyɔ, sama wat nɛ bot ɛ zɛɛga boo kwan eYuda, kɛwaabka nenak nɛ komanda náá, nyɛ zyɛ bin nɛ Pɔl, kɔɔka nyɛ náá, bi ɛpekwyɛl ɛdjek tɛp'ɛ ɛnyɔɛpe. Yɛ kabɛ bisɔ ɔɔ, bis aadi ɛ́, ebwood nyɛ étɛp bis neegó nyɛ, ɛsok nɛ nyɛ nɛ kum wak.»

16 Tin, dhiiti mɔn kɛl ɛ Pɔl, zokagwak dáa bɛ nadi elii é boob tak ɛ. Nyɛ eezɛtɔ́ pɛ ɛbɛsɛɛ ɛ esodja, bɛ eezɛniigal nyɛ, étɛp ɛkɛlɛɛ Pɔl etɛp ee bot binɔk nadi elii dum nɛ nɛ ɛ. 17 Tin, Pɔl eezɛdjóo dhiiti kukuma tɔ lɔɔg esodja, nyɛ eezɛke nɛ nɛ náá: «Tɔ́a nɛ mɔɔ ngbaaz'ak pɛ daa komanda, etɛɛ náá, nyɛ ɛ́ nɛ tɛp nyɛ di elɛɛ nyɛ ɛ.» 18 Kukuma esodja eezɛnɔɔ nyɛ, nyɛ eezɛtɔ́ nɛ nɛ pɛ daa komanda, nyɛy nɛ nɛ náá: «Mot membok Pɔl bɛ ɛ́ nyɛ eedjóo mɛ, nyɛ eezɛke nɛ nam náá, mɛ zyɛ wɔ nɛ mɔɔ ngbaaz'ak. Nyɛ ɛ́ nɛ tɛp ɛlɛɛ wɔ.» 19 Kukuma esodja eezɛmɛt mɔɔ ngbaaz tak é mbɔ, nyɛ eezɛdul nyɛ é ngwoob bɔɔ bɛbá. Tin, nyɛ eezɛdji nyɛ náá: «Wɔ kwyɛl ɛlɛɛ mɛ yé?» 20 Nyɛ eezɛbɔɔza náá: «Bot ɛ mbyak eYuda eegwakel náá, bɛ ɛpezɛwaab náá, djɛmɛn, wɔ tɔ́ nɛ Pɔl sok bhwoob boo kwan eYuda. Bɛ aakɔɔ ɛ́ náá, bot ɛ tak ɛpekwyɛl ɛdjek tɛp'ɛ ɛnyɔɛpe. 21 É di'enek, sa wɔ ààmyaal bɛ, etɛɛ náá, bot, dhaa bot mɛkam-mɛná (40) pak'ɔɔ waalaab nyɛ. Bɛ sa deenek ɛ́, etɛɛ náá, bɛ eezegwakel nɛ ɛtuwal myoŋ nɛ mɛsoŋ mɔɔ náá, bɛ aanàkwaadɛ edee nɛ mɛdii, ɛsok nɛ bɛ nɛ gó nyɛ. Bɛ eezekoobal etyɛ, bɛ zokabwood ɛ́ wɔ myaal.» 22 Bhii tak, komanda eezɛlɛɛ nɛ mɔɔ ngbaaz tak náá, sa nyɛ ààlɛɛ bot etɛp ee nyɛ baŋa nyɛ ɛ, nyɛ eezɛswaal nyɛ.

23 Bhii tak, komanda eezɛdjóo edhiiti ekukuma esodja bɛ bɛbá, nyɛ eezɛke nɛ nɔɔ náá: «Sɛɛgka esodja bɛdhet-ɛbá (200) dɔɔ nɛ esodja ee di ekɛ kɔ eyaaga ɔ mɛkam-mɛtɛn nɛ mɛkam-mɛmbá (70), zɛnɔɔ bot bɛdhet-ɛbá (200) nɛ mɛkɔɔ mɔɔ, koobalka étɛp ɛtɔ́ pɛ ghaada Sezaale e pum, bhis ɛgwyiidela ɛgwyitok. 24 Da bi ɛ́ baakoobal dɔɔ nɛ eyaaga, étɛp bi neebɛp Pɔl tɔ́ nɛ nɛ, nyel ɛnyɔɛpe pɛ daa mɛkoozi Feliksɛ.» 25 Bhii tak, nyɛ eezɛkwyal mɛkana náá:

26 «Mam Kolood Lyzias eeswos wɔy, Feliksɛ mɛkoozi mɛ dik. 27 Ye bɛ ɛ́, eYuda eemɛt mot mɛ dhis bin nwyak'enɔk, tin, bɛ di ekwyɛl ɛgó ɛ́ nyɛ. Dáa mɛ nagwak náá, nyɛ nadi ɛ́ mot ghaada kyee dik Lɔm ɛ, bis nɛ esodja bam ɛ́ bookɛlyak, bis eezɛpɛk nyɛ é mɛmbɔ mɔɔ. 28 Dáa mɛ nadi ekwyɛl ɛgu lo mɛsɔ mɛ eYuda nadi epit nyɛ dum nɛ tɛp tak ɛ, mɛ naazɛtɔ́ nɛ nɛ sok bhwoob zɛɛga boo kwan eYuda. 29 Mɛ eezɛgu náá, bɛ nadi epit nyɛ ɛ́, kɔ ɛsu ɛ etɛp ee di edum nɛ etsi bɔɔ ɛ. Bela náá, bɛ nabɛ ɛ́ ààbɛ nɛ tɛtɛ tɛp nyɛ nadi egoka nɛ ɛgóaa nɛghu ɛmɛtaa é mbok kɔ ɛsu ɛ tak ɛ. 30 Bhii tak, bɛ naazɛlɛɛ mɛ náá, eYuda nadi egwakel etɛp ɛgó ɛ́ nyɛ, deenek mɛ booke é di tak wat náá, mɛ dhis bin nwyak. Tin, mɛ ɛ́ boolɛɛ nɛ bot ɛ zɛpit nyɛ ɔ náá, bɛ zɛpit nyɛ sok bhwoob'ɔ.»

31 Esodja eezɛsa dáa komanda yɔɔ nalɛɛ bɛ ɛ. Bɛ eezɛnɔɔ Pɔl tɔ́ nɛ nɛ pum ɛ pum kɛkum pɛ ghaada Antipatilis. 32 É yak mɛlem, esodja ee natɔ́ nɛ mɛko ɔ eezɛbula yɔbɔ pɛ ɛbɛsɛɛ ɛ esodja, tin, bɛ eezɛbet bot ɛ nadi kɔ eyaaga ɔ bɛ goola mɛdjoŋ mɔɔ nɛ Pɔl. 33 Dáa bɛ nakum pɛ Sezaale ɛ, esodja ee nazyɛ kɔ eyaaga ɔ boodjɛ kukuma dik mɛkana mɛ komanda nadhis ɛ, bhii tak bɛ eezɛlyaal nyɛ Pɔl. 34 Kukuma dik eezɛlaa mɛkana, bhii tak, nyɛ eezɛdji Pɔl, mot kyee dik nyɛ nadi ɛ. Bhii nyɛ nagwak náá, nyɛ ɛ́ mot kyee dik Silisi ɛ, 35 nyɛ eezɛke nɛ nɛ náá: «Mɛ aadji wɔ mɛdjin ɛ́, é sok bot ɛ zɛpit wɔ ɔ, aakum ɛ.» Nyɛ eezɛlwom náá, bɛ baal Pɔl pɛ tɔ ndjaa mɛkoozi Eelood.