1 Mɛkoozi Aghilipa eezɛke nɛ Pɔl náá: «Bɛ eedjɛ wɔ ze wɔ taŋal.» Tin, Pɔl naazɛghɛɛ mbɔ étɛp nyɛ neelii. Wɔ gwaa, nyɛ zɛkan ɛzɛtaŋal náá: 2 «Mɛkoozi Aghilipa, mɛ ɛ́ nɛ mɛmyaala tɔ lyem'am mos, etɛɛ náá, wɔ eedjɛ mɛ ze ɛtaŋal é mis mɔ kɔ ɛsu ɛ etɛp ee eYuda zɛpit mɛ ɛ. 3 Ye nɛ baanyɔ deenek, etɛɛ náá, wɔ nɛ gu ɛnyɔɛpe etsi eYuda djas, nɛ etɛp ee bɛ dyeebadi nɛ zyaala dum nɛ tak ɛ. Mɛ eemɛt wɔ ɛboŋ, gwaka mɛ ɛnyɔɛpe. Pɔl sok bhwoob ɛ mɛkoozi Aghilipa nɛ kukuma Fɛstus

4 EYuda djas nɛ gu mbi mot mɛ nadi sok ɛ, kana ɛwyɛl ɛ engbaaz bam. Bɛ nɛ gu dáa mɛ nadi sok nɛ bot ɛ mbyak'am, nɛ pɛ Yeluzalɛm ɛ. 5 Bɛ eelookan ɛgu ɛ́ mɛ. Tin, bɛ ɛ́ nɛ ghwyil ɛdi etyaasɛs bam, bɛ kwyɛl ɔɔ! Etɛɛ náá, mɛ nadi ɛ́ tɔ sama eFalizyɛ, bot ɛ nadi ebaal etsi e Zɛɛb'ena nɛ ghwyil ɛlyelɛpe dhaa bot djas ɔ. 6 Nenak yak, mɛ kadi wak é pɛ́ɛaa ɛ́, etɛɛ náá, mɛ ɛ́ nɛ ɛbwaalel dum nɛ ekɛk ee Zɛɛb nakɛk bɛbhaab binaka ɛ. 7 Yɛ ɛ́ dum nɛ ɛbwaalel ɛ ekɛk binek ɛ, membyak kam nɛ bɛbá nadi tɔ ɛduwal ɛ Zɛɛb, nɛ ghwyil nɛ lyem wat mwos nɛ pum. Deenek, mɛkoozi mam, yɛ ɛ́ dum nɛ ɛbwaalel ɛlenek ɛ eYuda zɛpit mɛ! 8 Étɛp yé biyɔ eYuda di ebee náá, ye tok nɛ ghwyil ɛsael, náá, Zɛɛb waagomal bot ɛ zegwyɛ ɔ?

9 Mam mɛ ɛmet nadi egek ɛ́ náá, ye goka ɛ́ mɛ sa mɛghaaz étɛp ɛlu ɛ́ bot náá, bɛ byen ɛdu ɛ́ Yezu mot Nazalɛt. 10 Mɛ naasa yɛ pɛ Yeluzalɛm. Ye nabɛ ɛ́ eboo bɛghaa-Zɛɛb naadjɛ mɛ boo eghɛŋ. Mɛ naawa bɛtɛ nɛ bot ɛ di dum koŋ nɛ Zɛɛb ɔ é membok. É sok bɛ nadi edjɛ bɛ epɛ́ɛ e ɛsyee ɛ, mɛ nadi emyaal yɛ. 11 É sok nɛ é sok, bis nadi tɔ́ mendjaa nɛ mendjaa mɛ mendjaala mɛ eYuda, mɛ nadi ewa bot é feŋ, mɛ nadi elwom bot nɛ bhel náá, bɛ lee din ɛ Zɛɛb. Ɛbuk ɛ lam étɛp'ɔɔ naasa náá, mɛ gheewa bɛ tɔ tsik mezuk, kɛkum pɛ tɔ eghaada bot ɛ membyak mɛ sis.»

12 «Yɛ ɛ́ deenek ɛ́ mɛ natɔ́ pɛ ghaada Dhamas nɛ eghɛŋ nɛ lwomel eboo bɛghaa-Zɛɛb, étɛp ɛkɛsa, sa bɛ nalwom mɛ ɛ. 13 Mɛ nadi ɛ́, ze ɛ ze, kuku mwos, mɛkoozi Aghilipa, wɔ gwaa, mɛ zɛbee mɛkas edus tɔ gwoo, mɛkas mɛ tak dhaa mɛkas mɛ gwyes. Ye nadi ekas é ngwoob'am nɛ bot ɛ nadi etɔ́ mɛdjoŋ bis nɛ bɛnɔɔ ɔ. 14 É di'enek, bisɔ djas zokaduma si, tin, mɛ eezɛgwak gwood wat elii nɛ nam tɔ dhiiti lii bot ɛ ebhele náá: "Sɔl, Sɔl, étɛp yé wɔ di etiig mɛ? Wɔ sa ɛlyel ɛ lo ɛ́ gwyes, dáa tit di eboola nɛ ghwyɛs kukuma yɛ ɛ." 15 Mɛ eezɛdji náá: "Wɔy ɛzɛ Ghɛŋ?" Tin, Ghɛŋ eezɛbɔɔza nɛ nam náá: "Yɛ ɛ́ mam Yezu mot wɔ di etiig ɔ. 16 Deenek, wyɛla, tyaŋa tetel, mɛ lyaal wɔ nyel ɛ, etɛɛ náá, mɛ eetɔ wɔ náá, wɔ di mot-mɛsa mam. Wɔ aakadi ɛ́ tyaasɛs'am, étɛp wɔ neekɛlɛɛ bot dáa wɔ bee mɛ mos ɛ, nɛ ɛkɛgoola sa mɛ aabaalyaal wɔ ɛ. 17 Mɛ waatsik wɔ é mɛmbɔ mɛ bot ɛ mbyak eYuda nɛ edhiiti membyak mɛ sis, pɛ pak mɛ aalwom wɔ ɛ. 18 Mɛ aakyeed wɔ ɛ́ etɛɛ náá, wɔ neekɛbɛɛ bɛ mis, étɛp wɔ neekɛdis bɛ tɔ ghooghom, zyɛ nɛ nɔɔ tɔ gwyɛ. Mɛ waapɛk bɛ si eghɛŋ ɛ Satan mot mɛkɔŋ, zyɛ nɛ nɔɔ pɛ daa Zɛɛb. Bɛ dum koŋ nɛ nam ɔɔ, bɛ waabela ɛpelak ɛ mesyem mɔɔ, nɛ ɛdi tɔ sama bot ɛ di bɛ moo ɛ́, bot ɛ zedum koŋ nɛ Zɛɛb ɔ."»

19 «Deenek mɛkoozi Aghilipa, mɛ nabɛ ààbyen ɛlooba nɛ sa mɛ nabee nɛ ɛgwak tɔ djema mɛbwala mɛ nadus tɔ gwoo ɛ. 20 Tin, mɛ naakan ɛgoola yɛ nɛ bot ɛ Dhamas, nɛ bot ɛ Yeluzalɛm, zɛnɔɔ bot ɛ kyee dik Yude djas, nɛ bot ɛ dhiiti membyak. Mɛ eelɛɛ nɛ nɔɔ náá, bɛ liig elyem bɔɔ, da bɛ ɛ́ dum koŋ nɛ Zɛɛb, nɛ ɛlyaal tɔ mɛsa mɔɔ náá, yɛ ɛ́ tsɛɛtsɛ náá, bɛ eezeswoola mɛfulu. 21 Yɛ ɛ́ kɔ ɛsu ɛ tɛp'enek ɛ eYuda mɛt mɛ, é sok mɛ di tɔ kok Ndjaa-ebuwa ɛ, ye bɛ ɛ́, bɛ eewaagó mɛ. 22 Tin, ye bɛ ɛ́, Zɛɛb eebaal mɛ kɛkum dwoo mos, yɛ ɛ́ étɛp tak ɛ mɛ baadi mos, étɛp mɛ neetaŋal yam é mis mɛ bot djas, nɛ bɔɔ dhyeeb nɛ eboo bot. Ye tok nɛ dhiiti sonok mɛ baadi elɛɛ, bhis yii Moiiz nɛ bɛngoolel ɛ Mɛkpa ɛ Zɛɛb nalɛɛ náá, yɛ waasael ɛ. 23 Yɛ ɛ́ náá, Mɛsia ɛ́ waazuk, nyɛ aadi ɛ́ mot mɛkɛn é ɛgom bhis ɛsyee. Deenek, nyɛ waagoola bhaadal gwyɛ di edjɛ tsik nɛ bot ɛ mbyak'ena, dɔɔ nɛ bot ɛ membyak mɛ sis ɛ.»

24 Tin, Pɔl kuku taŋal'ɛ, Fɛstus eezɛtsim náá: «Wɔ ɛpelyet, Pɔl! Dáa di náá, wɔ naadyeebatɔ́ mɛdjek ɛ, wɔ moo lyet!» 25 Pɔl eezɛbɔɔza náá: «Mɛ ààlyet, dhaandiŋaa. Etɛp ee mɛ di elii ɛ, yɛ ɛ́ tsɛɛtsɛ, nɛ piki. 26 Mɛkoozi Aghilipa nɛ gu etɛp ee mɛ di elii ɛ, deenek, mɛ ɛ́ nɛ ghwyil ɛlii nɛ ɛbwaalel é mis mɛ. Mɛ nɛ gu náá, ye tok nɛ sa nyɛ di ààgu, etɛɛ náá, ye nabɛ ɛ́ ààsael tɔ sɔ, tɔ dhiiti tuma. 27 Mɛkoozi Aghilipa, wɔ nɛ myaal sa bɛngoolel ɛ Mɛkpa ɛ Zɛɛb nalɛɛ ɛ? Mɛ nɛ gu náá, wɔ nɛ myaal yɛ!» 28 Aghilipa eezɛke nɛ Pɔl náá: «Wɔ gek ɛ́ náá, wɔ ɛ́ nɛ ghwyil ɛsa náá, mɛ di Keletyɛ é mɔɔ ɛwala batsa dáak é?» 29 Pɔl eezɛbɔɔza náá: «Ye nakoozodi mɔɔ ɛwala batsa, nɛghu bɛtɛ nɛ mɛwala, mɛ ɛpedjaala nɛ Zɛɛb náá, wɔy nɛ bot djas di egwak mɛ mos'aak, bi di dáa mɛ di'aak, tin, ààbɛ kɔla nɛ eghwooz bak!»

30 Mɛkoozi, kukuma dik nɛ kɛl Bheelenis, zɛnɔɔ bot ɛ bɛ nɛ bɛnɔɔ nadi ɔ, zokazɛwyɛl. 31 Bɛ eezɛdus tin, bɛ moo tin esɔs pak'ɔɔ náá: «Mot'ak ààpasa dhiiti tɛp nyɛ di egoka nɛ ɛgóaa, nɛghu ɛkɔɔlaa é membok kɔ ɛsu ɛ tak ɛ.» 32 Tin, Aghilipa eezɛke nɛ Fɛstus náá: «Mot'ak ɛpedi ààdjóo Sezaad boo mɛkoozi náá, nyɛ zɛpɛ́ɛ tɛp'ɛ ɔɔ, pe nyɛ eebetaa.»