1 Mɛlu mɛtɛn bhii tak, boo ghaa-Zɛɛb Ananias eezɛkum pɛ ghaada Sezaade bɛ nɛ bɛdhiiti bɛpaa, zɛnɔɔ mot ghɛm-taŋal nɛ din ɛ Tɛɛltulus. Bɛ naazɛzyɛ pɛ daa kukuma dik, étɛp bɛ neezɛlɛɛ nyɛ mɛsɔ mɛ mɛpita mɛ bɛ napit Pɔl ɛ. 2 Bɛ naazɛdjóo Pɔl, tin, Tɛɛltulus naazɛpit nyɛ, nyɛy náá: «Dhaandiŋaa Feliksɛ, kɔ ɛsu ɛ lɔ ɛ́, bis di wak mos tɔ egwyem é etɛp djas. Yɛ ɛ́ dum nɛ etsoŋ bɔ ɛ wɔ kɛm bis, tɔ ɛswoola ɛ etɛp ɛnyɔɛpe tɔ mbyak'es. 3 Dhaandiŋaa Feliksɛ, bis eeghaapɛɛ wɔ dum nɛ embɛɛ esesɛɛ djas bis di ebela é mɛwala djas nɛ é edi djas ɛ. 4 Deenek mɛ ààpakwyɛl ɛdulal wɔ tɛp ɛdjaŋɛpe, yɛ ɛ́ étɛp tak ɛ mɛ kwyɛl náá, wɔ di nɛ mbɛɛ lyem ɛgwak ɛ́ bis ba mɔɔ pes ɛwala. 5 Bis eebee náá, mot'ak ɛ́ mbee mot dhaa nyel: dáa ye di náá, nyɛ ɛ́ kukuma zɛɛga eNazaleyɛ ɛ, nyɛ ɛpekus ɛghuub tɔ bot ɛ mbyak eYuda djas kɔ bɔs. 6,7 Nyɛ nabɛ ɛ́ nyɛ eekwyɛl ɛsaab edɛɛ e Ndjaa-ebuwa. Tin, bis ɛ́ boomɛt nyɛ. 8 Wɔ dji nyɛ ɔɔ, wɔ ɛ́ nɛ ghwyil ɛgu wɔy ɛmet etsɛɛtsɛ e etɛp ee bis zɛpit nyɛ kɔ ɛsu ɛ tak ɛ.» 9 Tin, ekukuma eYuda naazɛkɛm taŋal tak, bɔɔ náá, etɛp ee nyɛ lii ɛ yɛ ɛ́ tsɛɛtsɛ.

10 Kukuma Feliksɛ naazɛsa dhiiti tseŋa ɛlɛɛ nɛ Pɔl náá, nyɛ lii, é di'enek Pɔl ɛ́ booke náá: «Mɛ nɛ gu náá, wɔ moo mos ɛ́ nɛ membu ɛbuɛpe ee wɔ di esa mɛsa mɛ epiki kɔ kyee dik'ena. Yɛ ɛ́ étɛp tak ɛ mɛ di nɛ ɛbwaalel ɛtaŋal é mis mɔ. 11 Wɔ ɛ́ nɛ ghwyil ɛsaŋ ɛgu wɔy wɔ ɛmet, mɛ moo mos ɛ́ nɛ mɛlu kam nɛ ebá ee mɛ natɔ́ pɛ ghaada Yeluzalɛm, étɛp ɛkɛduwal Zɛɛb ɛ. 12 Ye tok nɛ mot zɛbela mɛ pɛ tɔ kok Ndjaa-ebuwa é waya bis nɛ dhiiti mot, nɛghu é ful ɛdhuu ɛ bot elo, ààkobɛ-bɛak tɔ ndjaa mendjaala mɛ eYuda nɛghu é dhiiti di sis kɔ ghaada. 13 Bot bak tok nɛ ghwyil ɛlyaal wɔ ɛnyɔɛpe etɛp ee bɛ zɛpit mɛ kɔ ɛsu ɛ tak nenak ɛ. 14 Bela náá, sa mɛ di emyam é mis mɔ ɛ́ náá, mɛ eemyaal ɛdu ɛ mɛze ɛ Ghɛŋ, yii bɔɔ di eke náá, yɛ ɛ́ zɛɛga bot ɛ di edjaala embee bɛzɛɛb ɔ. Deenek, mam duwal ɛ́ Zɛɛb bɛbhaab benaka. Tin, mɛ nɛ myaal etɛp ee di kwyala tɔ bɛmɛkana mɛ etsi nɛ bɛngoolel ɛ Mɛkpa ɛ Zɛɛb ɛ. 15 Mɛ ɛ́ nɛ ɛbwaalel nɛ Zɛɛb, ɛbwaalel ɛ tak wat ɛ, bɛ baazodi nɛ yɛ, yɛ ɛ́ náá, ye nakoozodi bot ɛ embee mɛfulu, nɛghu bot ɛ epiki, bɛ waagom bis ɛsyee. 16 Yɛ ɛ́ étɛp tak ɛ, mɛ di esa mɛghaaz mɛ ɛnɛɛg lyem'am sɛŋ mɛlu djas é mis ɛ Zɛɛb nɛ é mis mɛ bot.

17 Bhii mɛ nadi ààbɛ kɔ dɛl membu ɛbuɛpe ɛ, mɛ eebula pɛ Yeluzalɛm étɛp ɛzɛkwyee bot ɛ mbyak'am, nɛ ɛzɛdjɛ Zɛɛb ebuwa. 18 Mɛ nabɛ ɛ́ mɛ eezesa ɛzel ɛ ɛdis edhuud bam, bhii tak ɛ́, bɛ nazɛbela mɛ tɔ kok Ndjaa-ebuwa. Ɛdhuu ɛ bot nabɛ ɛ́ ààdi tin, ààkobɛ-bɛak nɛ ɛzɛm. 19 Tin, bɛdhiiti eYuda e kyee dik Azi nadi ɛ́ tin. Deenek, tɛp ɛpedi náá, yɛ tak ɔɔ, pe yɛ ɛ́ bɔɔ ɛ zyɛzɛpit mɛ pɛ daa lɔ. 20 Bot ɛ di wak ɔ, kaalɛɛ wɔ mbee sa mɛ nakwyeselaa ndjɛ sɔs é tak ɛ, é ghɛŋ bɛ nazyɛ nɛ nam sok bhwoob zɛɛga boo kwan eYuda ɛ. 21 Nɛghu yɛ ɛ́ kɔ ɛsu ɛ mɛ ke sok bhwoob zɛɛga boo kwan eYuda náá: "Mɛ eemyaal náá, bot ɛ́ waagom bis ɛsyee", yɛ ɛ́ bɛ di epɛ́ɛ mɛ mos é mis mɔ'aak!»

22 Feliksɛ mot nadi egu ɛnyɔɛpe etɛp djas e zɛɛga bot ɛ di edu mɛze ɛ Ghɛŋ ɔ, eezɛswaal tɛp tak, etɛɛ náá, ye neeliiaa dhiiti dwoo, nyɛy nɛ bot ɛ napit Pɔl ɔ náá: «Mɛ aapɛ́ɛ tɛp'en ɛ́, é sok komanda esodja Lyzias aazyɛ ɛ.» 23 Nyɛ naazɛlwom dhiiti kukuma tɔ lɔɔg esodja náá, nyɛ baal Pɔl é membok. Tin, nyɛ eezɛke náá, bɛ djɛ nyɛ ba ɛpɛɛd étɛp bɛsɔ bɛ neegheezyɛ zɛkwyee-kwyee nyɛ.

24 Ba mɛlu bhii tak, Feliksɛ naazɛzyɛ bɛ nɛ myɛl Dulusil nadi moma mbyak eYuda ɔ. Nyɛ naazɛlwom náá, bɛ kɛnɔɔ Pɔl, bhii tak nyɛ eezɛgwak sa Pɔl nadi elii dum nɛ ɛdum ɛ koŋ nɛ Yezu Klisto ɛ. 25 É sok Pɔl nakan ɛlii dum nɛ tɛtɛ tsik epiki, nɛ ɛgu ɛdil ɛ nyel, zɛnɔɔ epɛ́ɛ e Zɛɛb di ezyɛ pɛ sok yenek ɛ, tin, Feliksɛ moo tin nyaa-nyaa, nyɛ ɛ́ boozɛke náá: «Yɛ eedjala, wɔ ɛ́ nɛ ghwyil ɛkatɔ́. É sok mɛ aabela ba mɔɔ ɛpɛɛd ɛ ɛwala ɛ, mɛ waadjóo wɔ.» 26 Nyɛ nadi ebwaal ɛ́ náá, Pɔl ɛ́ waadjɛ nyɛ epata, yɛ ɛ́ étɛp tak ɛ, nyɛ nadi edjóo nyɛ ngwyis, bɛ zɛmɔ bɛ nɛ nɛ. 27 Membu membá naazɛdhaa deenek, tin, Pɔlsius Fɛstus naazɛdjila Feliksɛ kɔ boo ekukuma e dik. Dáa Feliksɛ nadi esaa náá, eYuda kwyɛl nyɛ ɛ, nyɛ naazɛbet Pɔl kɔɔla é membok.