1 Pɛ ghaada Ikoniɔm, Pɔl bɛ nɛ Bhaanabhas naabaazɛni tɔ ndjaa mendjaala mɛ eYuda, bɛ moo tin elyo. Mɛlyo mɛ bɛ nadi elyo bot ɛ naasa náá, bɛtɛ nɛ bot ɛ mbyak eYuda nɛ bot ɛ nadi ààbɛ bot ɛ mbyak eYuda ɔ, dum koŋ nɛ Zɛɛb. 2 Tin, bot ɛ mbyak eYuda nabyen ɛdu ɛ Zɛɛb ɔ, zokazɛful bot ɛ di ààbɛ bot ɛ mbyak eYuda ɔ elo, étɛp bɛ needi nɛ embee esiiza nɛ bɔn-nyɛɛg bɔɔ. 3 Deenek, Pɔl bɛ nɛ Bhaanabhas naadi mɛlu ɛbuɛpe pɛ dɛl ɛ Ikoniɔm. Bɛ nadi elii-lii ɛ́ nɛ eghɛŋ djas, zɛnɔɔ ɛbwaalel nɛ Ghɛŋ. Ghɛŋ nadi edjɛ bɛ ghwyil ɛsa endem e mɛbwala, deenek, étɛp ɛlyaal etsɛɛtsɛ etɛp ee bɛ nadi elyo bɛ, dum nɛ enɛm esa e Zɛɛb ɛ. 4 Tin, bot ɛ dɛl zokazɛbɛka: Ɛdhuu ɛ wat pɛ kyee bot ɛ nadi edu eYuda ɔ, yak ɛdhuu pɛ kyee bot ɛ nadi edu bot ɛ lwoma ɔ. 5 Bot ɛ mbyak eYuda, nɛ bot ɛ di ààbɛ bot ɛ mbyak eYuda ɔ, nɛ bɛmɛkoozi mɔɔ, nadi egwakel étɛp bɛ neezuk Pɔl bɛ nɛ Bhaanabhas, da bɛ ɛ́ gó bɛ nɛ mɛkok. 6 Dáa bot ɛbá tak nagwak ɛ, wɔ gwaa, bɛ zɛkaab tɔ́ pɛ mɛl mɛ Lisetɛ nɛ Dhɛlɛɛb, eghaada e kyee dik Likaoni, nɛ mɛl mɛ di é mengwoob ɔ. 7 Kɔ mɛl mɛ tak, bɛ eezɛni é baagoola Mbɛɛ Bhaadal.

8 Pɛ kɔ ghaada Lisetɛ, ye nabɛ ɛ́ nɛ dhiiti mot nadi ààbɛ nɛ ghwyil ɛtyaa tetel ɔ, etɛɛ náá, mɛko mɛ nadi ɛ́ esɔɔbela. Nyɛ nadi ɛ́ boka kana edhɔma bɛ, nyɛ nabɛ ɛ́ ààbɛ nɛ ghwyil ɛkɛ. 9 Nyɛ nadi egwak etɛp ee Pɔl nadi elii ɛ. Tin Pɔl eezɛgwyák nyɛ piii, nyɛ eezɛbee náá, ɛdum ɛ koŋ ɛ lɛ nɛ Zɛɛb ɛ́ waasa náá, mot tak bela tsik. 10 Nyɛ eezɛben gwood, zɛke nɛ nɛ náá: «Wyɛla, tyaŋa tetel nɛ mɛko mɔ met!» Pɔl eetsik boka mot

Vaskala, mot'enɔk eezɛtyaa tetel, nɛ mɛko mɛ, nyɛ moo tin ekɛ. 11 Dáa mɛdhuu mɛ bot nabee sa Pɔl nasa ɛ, bɛ eezɛtsim tɔ lii'ɔɔ, din ɛ lii tak ɛ́ Likoniɛ, bɔɔ náá: «Bɛzɛɛb eenɔɔ mɛnyel mɛ bot, tin, bɛ eesul pɛ pak mena dika'aak!» 12 Wɔ gwaa, bɛ zɛget Bhaanabhas din ɛ «Zees», bɛ kaget Pɔl ɛ «Ɛɛlmɛs», etɛɛ náá, Pɔl nadi ɛ́ ngoola-ngoola. 13 Ndjaa-zɛɛb ɛ Zees nadi ɛ́ é ɛniel ɛ dɛl. Wɔ gwaa, ghaa-zɛɛb ɛ Zees zokazyɛ nɛ engɔmbɛ ee bɛ nazekomsa nɛ epyeeda e mɛzɛm mɛ ele bɛ napyeed ɛ, é ɛbɛ ɛ ndjaa-zɛɛb tak. Bɛ nasa deenek ɛ́, étɛp bɛ needjɛ Pɔl bɛ nɛ Bhalnabas buwa. 14 Tin, dáa bot ɛ lwoma binɔk bɛbá nagwak menduk mɛ tak ɛ, bɛ eezɛnyaa ekaad bɔɔ. Bhii tak, bɛ eezɛlel ɛni tɔ ɛdhuu ɛ bot é ɛtuud náá: 15 «Bɛwɛn, bi sa deenek étɛp yé? Bis ɛ́ bot, dáa biyɔ. Bis zɛgoola bin ɛ Mbɛɛ Bhaadal, bis ke nɛ nen ɛ́ náá, bi bet ɛduwal ekpaka-kpaka nɛ elula-lula, ye tok dhiiti vaŋ sonok. Duka Zɛɛb di nɛ tsik ɔ, mot nakus gwoo nɛ bɔs, nɛ boo dii mɛsɔn nɛ esa ee di tɔ tak ɛ djas. 16 É membu mɛ nadhaŋ'enek, ye nabɛ ɛ́, nyɛ naabet náá, membyak nɛ membyak sa esa ee elyem bɔɔ di ekwyɛl ɛ. 17 Bela náá, nyɛ nadi enyen é mis mɛ bot, nɛ enɛm esa ee nyɛ di esa ɛ. Nyɛy tɔ gwoo, nyɛ ɛpedhis bin bɛbhi, étɛp ye neesa náá, bhek nɛ bhek kwyil é yɛ mbu, nyɛ ɛpedjɛ bin edee, nɛ ɛlwoodal elyem bin nɛ mɛmyaala.» 18 Bɛ nakoozolii deenek, ye nabɛ ɛ́ ɛlyelɛpe nɛ bot ɛ lwoma, bɛ lyak ɛdhuu bot binɔk náá, bɛ nàdjɛ bɛ buwa.

19 Bhii tak, eYuda eezɛzyɛ pɛ Antiɔs kɔ Pisidi nɛ pɛ Ikoniɔm. Tin, mɛkpa mɛ bɛ naloo nɛ mɛdhuu mɛ bot ɛ, naasa náá, bɛ kwyɛl bɛ. Wɔ gwaa, Pɔl zɛwusaa nɛ mɛkok étɛp nyɛ neegóaa, bhii tak bɛ eezɛwyisal nyɛ kɔ dɛl, bɛ nadi egek ɛ́ náá, nyɛ eezegwyɛ. 20 Tin, dáa bot ɛ di edum koŋ nɛ Zɛɛb ɔ nazɛsɛɛga é ngwoob'ɛ, nyɛ eezɛwyɛl, bhii tak, nyɛ eezɛsik tɔ ghaada. Djɛmɛn tak, nyɛ eezɛtɔ́ pɛ dɛl ɛ di djóoaa Dhɛlɛɛb bɛ nɛ Bhaanabhas.

21 Pɔl bɛ nɛ Bhaanabhas nadi egoola Mbɛɛ Bhaadal pɛ kɔ dɛl ɛ Dhɛlɛɛb. Tin, bɛ naabela bɛdjekel ɛbuɛpe. Bhii tak, bɛ eezɛsik pɛ Lisetɛ, pɛ Ikoniɔm pɛ Antiɔs yii kyee Pisidi. 22 Bɛ nadi edjɛ ghwyil nɛ bot ɛ namyaal ɛdu Zɛɛb ɔ, bɛ nadi edjɛ bɛ mɛghaaz mɛ ɛwa zii tɔ ɛdum ɛ koŋ nɛ Zɛɛb, bɛ nadi eke ɛ́ náá: «Mena gokaka ɛ́ nɛ ɛkpaa tɔ boo tsik mezuk, étɛp mena neenika tɔ Ɛyoŋ ɛ Zɛɛb.» 23 Pɛ tɔ ezɛɛga mendjaala djas, bɛ nadi esɛ́ɛ bɛpaa. Deenek bhii mendjaala nɛ ɛtsi edee, bɛ nadi edjɛ bɛ ebotan ɛ Ghɛŋ, mot bɛ nadum koŋ nɛ nɛ ɔ.

24 Bɛ eezɛdhaa Pisidi kɛkum pɛ kyee dik Panfili. 25 Bɛ naagoola Mɛkpa mɛ Zɛɛb pɛ ghaada Pɛɛledje, bhii tak, bɛ eezɛtɔ́ pɛ ghaada Ataliya. 26 Dusa tin, bɛ eezɛnɔɔ mɛsuwa, tɔ́ pɛ Antiɔs pɛ kyee Siili, ghaada bɛ nadjɛ bɛ ebotan ɛ Zɛɛb étɛp lwomel bɛ nagoka nɛ ɛsa ɛ. 27 Dáa bɛ nakakum pɛ Antiɔs ɛ, bɛ ɛ́ boozɛsɛɛg bot ɛ zɛɛga mendjaala mɛ tak djas. É di'enek, bɛ boozɛbaŋa bɛ esesɛɛ djas Zɛɛb nasa nɛ nɔɔ ɛ, nɛ dáa Zɛɛb nadjɛ pe bot ɛ di ààdi bot ɛ mbyak eYuda ɔ, ghwyil ɛdum koŋ nɛ Zɛɛb ɛ. 28 Deenek, Pɔl bɛ nɛ Bhalnabas naadi ba mɛlu ɛbuɛpe bɛ nɛ bɛdjekel ɛ dɛl ɛ Antiɔs.