1 É ghɛŋ tak, mɛsa mɛ Sɔl nabɛ ɛ́, ɛtiig nɛ ɛwun ɛ ɛgó ɛ bɛdjekel ɛ Ghɛŋ. Wɔ gwaa, nyɛ zɛtɔ́ kɛbee boo ghaa-Zɛɛb, 2 bhii tak, nyɛ eezɛwaab mɛkana mɛ di edjɛ nyɛ ze, náá, nyɛ neekɛbee mendjaa mɛ mendjaala mɛ eYuda di pɛ ghaada Dhamas ɛ. Nyɛ nasa deenek ɛ́, nɛghu nyɛ waabela boa nɛ botom ɛ di edu Ze ɛ Ghɛŋ ɔ, étɛp nyɛ neemɛt bɛ, da nyɛ ɛ́ sik nɛ nɔɔ kɔɔla pɛ Yeluzalɛm. 3 Dáa nyɛ nadi nyɛ dinaa é ze nyɛy etɔ́ ɛ, nyɛ nadi ɛ́ nyɛ moo ekunaa nɛ ghaada Dhamas, kasɛka ɛ́, dhiiti ngel eezɛdus tɔ gwoo, mɛkas mɛ tak eezɛbutal nyɛ.Sɔl eeboma nɛ Yezu é ze ghaada Dhamas

4 Wɔ gwaa, nyɛ zɛduma si, bhii tak, nyɛ eezɛgwak gwood wat eke nɛ nɛ náá: «Sɔl, Sɔl, étɛp yé wɔ di etiig mɛ?» 5 Nyɛ eezɛdji náá: «Wɔy ɛzɛ, Ghɛŋ?» Tin gwood yenek eezɛbɔɔza náá: «Yɛ ɛ́ mam Yezu mot wɔ di etiig ɔ. 6 Deenek, wyɛla, da wɔ ɛ́ ni tɔ ghaada, tin bɛ waalɛɛ wɔ sa wɔ di egoka nɛ ɛsa ɛ.» 7 Bot ɛ nadi ekɛ sama wat nɛ Sɔl ɔ zokazɛtyaa, ààlóo ɛkpa ɛ wat. Bɛ nadi egwak gwood, tin ààbee mot. 8 Tin Sɔl eewyɛl, nyɛ eezɛbɛɛ mis, kabela ɛ́ náá, nyɛ ààkabee. Bɛ eezɛmɛt nyɛ é mbɔ, tɔ́ nɛ nɛ pɛ Dhamas. 9 Mɛlu mɛlɛl naadhaa, nyɛy ààkabee, tin nyɛ nadi ɛ́ ààdɛ edee nɛ mɛdii.

10 Pɛ kɔ ghaada Dhamas, ye nabɛ ɛ́ nɛ dhiiti djekel ngɔt din ɛ lɛ nabɛ ɛ́ Ananias. Ghɛŋ zokazɛtuula nyɛ tɔ sisim, nyɛy nɛ nɛ náá: «Ananias!» Nyɛ eezɛbɔɔza náá: «Beea mɛ Ghɛŋ.» 11 Ghɛŋ eezɛke nɛ nɛ náá: «Tɔ́a nenak yak, pɛ gba di edjóoaa "Piki" ɛ. Pɛ tɔ ndjaŋ ɛ Yudas, djia dhiiti mot dɛl ɛ Taalas, din ɛ lɛ ɛ́ Sɔl. É di mena di nenak'aak nyɛ ɛpedjaala Zɛɛb. 12 Tin, tɔ sisim'ɛ nyɛ eebee dhiiti mot ngɔt din ɛ lɛ ɛ́ Ananias eni tɔ ndjaa étɛp ɛkɛl nyɛ mɛmbɔ, mis mɛ neebɛŋel-bɛŋela sis.» 13 Ananias eezɛbɔɔza náá: «Ghɛŋ, bot ɛbuɛpe eedyeebalii nɛ nam kɔ ɛsu ɛ mot'ak, dum nɛ bɛtɛ nɛ embee etɛp ee nyɛ di esa, nɛ bot ɛ na dɛɛ bɔ pɛ Yeluzalɛm ɛ. 14 Deenek, nyɛ zyɛ wak ɛ́ nɛ eghɛŋ ee boo ghaa-Zɛɛb nadjɛ nyɛ ɛ, étɛp ɛmɛt bot djas di edjaala nɛ din ɛ lɔ ɛ.» 15 Tin, Ghɛŋ ɛ́ booke nɛ nɛ náá: «Tɔ́a, etɛɛ náá, mɛ eetɔ mot'ak étɛp nyɛ neetɔ́ kɛgoola din ɛ lam pɛ daa bot ɛ membyak mɛ sis nɛ bɛmɛkoozi mɔɔ, zɛnɔɔ bot ɛ mbyak Yisalaɛl. 16 Mam mɛ ɛmet mɛ waalyaal nyɛ mezuk djas mɛ nyɛ aazuk kɔ ɛsu ɛ din ɛ lam ɛ.» 17 Tin, Ananias eezɛtɔ́. Nyɛ eezɛni tɔ ndjaa tak, bhii tak, nyɛ eezɛkɛl Sɔl mɛmbɔ, nyɛ eezɛke nɛ nɛ náá: «Sɔl, mɔn-nyaagam, Ghɛŋ Yezu mot tel wɔ nyel é gba pɛ ze wɔ di ezyɛ ɛ, lwom mɛ ɛ́, étɛp wɔ neebaazɛbee-beea sis, da wɔ ɛ́ lwoodel nɛ Sisim na Dɛɛ.» 18 É di tak wat, dhiiti mbi esonok tyee epapa eezɛkwyit é mis ɛ Sɔl, tin, nyɛ moo tin ebaazɛnyaasok. Nyɛ eezɛwyɛl, nyɛ eezɛduwa Zɛɛb. 19 Bhii tak, nyɛ eezɛdɛ edee, nyɛ eezɛbela ghwyil.

Sɔl zokazɛkpaa ba mɛlu é di wat bɛ nɛ bɛdjekel ɛ nadi pɛ Dhamas ɔ. 20 Ààkobɔya deenek, nyɛ moo tin egoola Mɛkpa ɛ Zɛɛb pɛ tɔ mendjaa mɛ mendjaala mɛ eYuda náá, Yezu ɛ́ Mɔn ɛ Zɛɛb. 21 Bot ɛ nadi egwak nyɛ djas ɔ, nadi edjoka, tin, bɛ ɛ́ boodi edji náá: «Ye tok mot'ak nadi etiig ɛlyelɛpe bot ɛ nadi etuwal din ɛ Yezu pɛ Yeluzalɛm ɔ? Wɔ ke ɛ́ náá, nyɛ aazyɛ wak ɛ étɛp ɛzɛmet bɛ, nyɛ neesik nɛ nɔɔ pɛ daa boo bɛghaa-Zɛɛb é?» 22 Tin, mɛlu djas, Sɔl nadi ɛ́ nɛ ɛbwaalel dhaa tyɛ é ɛgoola Mbɛɛ Bhaadal nɛ ghwyil djas. Tɔ mbi mɛlyo mɛ, nyɛ nadi elyaal popoopwon nɛ Eyuda ee nadidi pɛ Dhamas ɔ, náá Yezu ɛ́ Mɛsia, tin bɛ nabɛ ɛ́ ààkabaabɛ nɛ ɛkpa ɛbɔɔza nyɛ.

23 Ba mɛlu bhii tak, wɔ gwaa eYuda djas zokagwakel étɛp bɛ neegó Sɔl. 24 Tin, Sɔl eezɛgu boob'ɔɔ. Bɛ nadi ebaal mɛbɛ mɛ ɛniel ɛ ghaada ɛ́ mwos nɛ pum, étɛp bɛ neegó nyɛ. 25 Tin, é pum, wɔ gwaa, bɛdjekel bɛ zokanɔɔ nyɛ, tɔ́ nɛ nɛ, étɛp ɛkwyɛɛg nyɛ pɛ yii kyee peeb ghaada tɔ djhan.Bɛdjekel eewisal Pɔl bhii peeb dɛl tɔ djhan

26 Dáa nyɛ nakum pɛ Yeluzalɛm ɛ, wɔ gwaa, Sɔl zokazɛgek ɛsɛɛga bɛ nɛ bɛdjekel. Bɔɔ djas nadi ɛ́ nɛ bwoo, etɛɛ náá, bɛ nabɛ ɛ́ ààdi emyaal ɛnyɔɛpe náá, nyɛ nadi ɛ́ djekel nɛ tsɛɛtsɛ. 27 Tin, Bhaanabhas ɛ́ boozɛnɔɔ nyɛ, tɔ́ nɛ nɛ pɛ daa bot ɛ lwoma. Nyɛ eezɛbaŋa bɛ dáa Sɔl naboma nɛ Ghɛŋ é ze ɛ, nɛ dáa Ghɛŋ nalii nɛ nɛ ɛ. Nyɛ eebaazɛlɛɛ bɛ mbi ɛbwaalel ɛ Sɔl nadi nɛ yɛ, étɛp ɛlyo bot nɛ din ɛ Yezu pɛ Dhamas ɛ. 28 Kana ɛwala ɛlenek, Sɔl ɛ́ boozɛdi bɛ nɛ bɛnɔɔ. Nyɛ nadi ekɛ pɛ tɔ Yeluzalɛm djas, é ɛgoola Mbɛɛ Bhaadal nɛ ɛbwaalel djas nɛ din ɛ Ghɛŋ. 29 Nyɛ nadi elii nɛ eYuda ee di elii lii Ghɛlɛk ɔ, nyɛ nadi esuu mɛso bɛ nɛ bɛnɔɔ, ghuna bɔɔ nadi esaŋ ɛ́, ɛgó ɛ nyɛ. 30 Dáa bɔn-nyɛɛg nagwak náá, bɛ nadi ekwyɛl ɛgó nyɛ ɛ, bɛ eezɛtɔ́ nɛ Sɔl pɛ ghaada Sezaale, étɛp bɛ neekɛkyeed nyɛ pɛ ghaada Taalas.

31 Zɛɛga bot ɛ mendjaala nadi ɛ́ tɔ egwyem kɔ kyee dik Yude, Ghalile nɛ Samaali djas ɔ. Bɛ nadi ɛ́ bɛ eezelyel tɔ ɛdum ɛ koŋ nɛ Zɛɛb, bɛ nadi ɛ́ tɔ tsik ɛgwak ɛ Ghɛŋ. Zɛɛga bot ɛ mendjaala nadi ebɔk, ɛbɔk nɛ ɛbɔk, etɛɛ náá, Sisim na Dɛɛ nadi ekwyee bɛ.

32 Pyɛɛd mot nadi kɔ kyee dik tak djas ɔ, zokazɛtɔ́ dhiiti dwoo pɛ daa bot ɛ di edum koŋ nɛ Zɛɛb ɔ, bɛ nadidi ɛ́ pɛ dɛl ɛ Lidha. 33 Wɔ gwaa, nyɛ zɛbela dhiiti motom din ɛ lɛ nabɛ ɛ́ Ene. Nyɛ nabɛ ɛ́, nyɛ eesa membu mɛtɛn nɛ elɛl ndjaasi, etɛɛ náá, ye nabɛ ɛ́ nyɛ eezesɔɔb. 34 Pyɛɛd eezɛke nɛ nɛ náá: «Ene, Yezu Klisto eetsik wɔ! Wyɛla da wɔ ɛ́ koobal goŋ'ɔ.» Kasɛka ɛ́, Ene eezɛwyɛl. 35 Bot ɛ ghaada Lidha djas nɛ bot ɛ bal Saalɔn naabee nyɛ, wɔ gwaa bɛ zokaliig elyem, du Ghɛŋ.

36 Pɛ kɔ dɛl ɛ Zafa, ye nabɛ ɛ́ nɛ dhiiti moma nadi edum koŋ nɛ Zɛɛb ɔ, din ɛ lɛ nabɛ ɛ́ «Tabita» din ɛ tak kwyɛl ɛlɛɛ tɔ lii Ghɛlɛk ɛ́ «Dhɔɔlekas», ɛsuk ɛ tak lɛɛ ɛ́ «kwyee». Mɛlu djas mɛsa mɛ nabɛ ɛ́, ɛsa enɛm esa, nɛ ɛkwyee ɛ bɛdjel ɛ bot. 37 É ghɛŋ tak wɔ gwaa, nyɛ zɛbɛ́, bhii tak, nyɛ eezɛgwyɛ. Bhii bɛ nagwyii muu ɛ, wɔ gwaa, bɛ kɛnɛɛg yɛ tɔ dhɛŋ, pɛ ɛko tɔ ndjaa. 38 Bɛdjekel ɛ nadi pɛ Zafa ɔ, naagwak náá, Pyɛɛd nadi ɛ́ pɛ Lidha, ye nadi ɛ́ ɛkunaaɛpe nɛ Zafa. Bɛ eezɛkyeed bot ɛbá nɛ bhaadal yak: «Bis eedjaala nɛ nɔ, lela ɛzyɛ kaab pɛ yesɔ.» 39 É di tak wat Pyɛɛd eezɛghɛɛ nyel tɔ́ bɛ nɛ bɛnɔɔ. Dáa bɛ nakum ɛ, bɛ eezɛdul nyɛ tɔ dhɛŋ, pɛ ɛko tɔ ndjaa. Bɛkus ɛ boa djas eezɛtiila pɛ daa lɛ nɛ mɛgwyɛ, bɛ moo tin elyaal nyɛ ekuwa nɛ endjookuwa ee Tabita nalat é sok nyɛ nadi nyɛ dinaa nɛ tsik ɛ. 40 Pyɛɛd eezɛwyisal bot djas pɛ kel, é di'enek, nyɛ eezɛkwyit mɛboŋ si edjaala. Bhii tak, nyɛ eezɛliigel pɛ muu nadi ɛ́, nyɛ eezɛke náá: «Tabita wyɛla!» Tabita eezɛbɛɛ mis, tin, dáa nyɛ nabee Pyɛɛd ɛ, nyɛ eezɛnɔɔ nyel disi. 41 Pyɛɛd eezɛmɛt nyɛ é mbɔ étɛp ɛkwyee nyɛ, nyɛ neewyɛl. Bhii tak, nyɛ eezɛdjóo bot ɛ di dum koŋ nɛ Zɛɛb ɔ nɛ bɛkus ɛ boa, nyɛ eezɛtel bɛ nwyak, nyɛy nɛ tsik. 42 Wɔ gwaa, bot ɛ ghaada Zafa djas zokagwak menduk mɛ tak, é di'enek, bot ɛbuɛpe naazɛdum koŋ nɛ Ghɛŋ. 43 Pyɛɛd zokadi kɔ Zafa bɛtɛ nɛ mɛlu pɛ daa dhiiti mot nadi esa mɛsa mɛ ekwood e bɛtit ɔ. Din ɛ mot tak nabɛ ɛ́ Simɔŋ.