1 Yɛ ɛ́ mam Pɔl, mot Zɛɛb natɔ tɔ ɛkwosak ɛ lɛ náá, mɛ di mot-lwoma ɛ Yezu Klisto ɔ. Yɛ ɛ́ bis nɛ mɔn-nyɛɛg’ena Sɔstɛn.

2 Mɛ kwyal mɛkana mak ɛ́ étɛp bot ɛ zɛɛga mendjaala ghaada Koolɛt, biyɔ, bot ɛ Zɛɛb nasa náá, bi di bot ɛ edɛɛ étɛp ɛdi sama wat nɛ Yezu Klisto ɔ. Bi ɛ́ bot ɛ na dɛɛ, biyɔ nɛ bot djas di kɔ mɛl mɛ di etuwal din ɛ Ghɛŋ Yezu Klisto, nyɛy ɛ́ di Ghɛŋ’ɔɔ, nɛ ɛbaadi Ghɛŋ’enaka. 3 Beta náá, bi bela enɛm nɛ embɛɛ, nɛ egwyem ɛ Zɛɛb Sɛɛg’enaka nɛ yii Ghɛŋ Yezu Klisto.

4 Deenek, mɛ ɛpebulal bhɔɔ nɛ Zɛɛb’am mɛlu djas étɛp enɛm nɛ embɛɛ ee nyɛ nasa bin dum nɛ Yezu Klisto ɛ. 5 Tin, tɔ ɛgwakel ɛ len nɛ Yezu Klisto, bi naazedjɛaa mɛkɛɛ djas, daŋ-daŋ ɛ́ yii ɛgu etsɛɛtsɛ nɛ yii ɛgoola Mɛkpa ɛ Zɛɛb. 6 Ye nabɛ ɛ́, bis naabaŋa bin etɛp ee Klisto nasa ɛ, deenek, bi eemyaal yɛ ɛnyɔɛpe. 7 Tin, biyɔ bot ɛ di ebhwood ɛwala ɛ Ghɛŋ’enaka Yezu Klisto aatuula ɛ, sa ɛkɛɛ wat ààwyii tɔ len. 8 Yɛ ɛ́ nyɛy ɛ kwaadjɛ bin ghwyil ɛdi tɔ epiki, kɛkum dwoo mɛsik mɛ bɔs. Yɛ ɛ́ deenek ɛ́ bɛ aadi ààbela sa bɛ aapit bin é ɛwala Ghɛŋ’enaka Yezu Klisto aazyɛ ɛ. 9 Zɛɛb mot nadjóo bin náá, bi needi tɔ ɛgwakel nɛ mɔn’ɛ Yezu Klisto Ghɛŋ’enaka ɔ, nyɛ waasa sa nyɛ nakɛk ɛ.

10 Bɔn-nyɛɛg bam, mɛ ɛpedjaala nɛ nen nɛ din ɛ Ghɛŋ’enaka Yezu Klisto náá: Gwakelka, sa bi ààdi nɛ zyaala pak’en, dika tɔ ɛgwakel nɛ lyem wat, da bi ɛ́ di nɛ esiiza wat, zɛnɔɔ egeka wat. 11 Bɔn-nyɛɛg bam, mɛ lii deenek ɛ́ etɛɛ náá, mɛ gwak nɛ bot ɛ mɛbyel ɛ Kolowe ɛ́ náá, ye moo ɛ́ nɛ zyaala pak’en. 12 Gwakeka sa mɛ di ekwyɛl ɛlɛɛ bin ɛ: Pak’en, bɛdhiiti bot ɛpeke náá: «Mam ɛ́ mot ɛ Pɔl!» Bak náá: «Mam ɛ́ mot ɛ Apolɔs!» Bak bɛdhiiti náá: «Mam ɛ́ mot ɛ Pyɛɛd!» Deenek, bak bot kake ɛ́ náá: «Mam ɛ́ mot ɛ Klisto!» 13 Egeka bin ɛ́ náá, Klisto ɛ́ nɛ ghwyil ɛkaŋaa epes-epes é? Yɛ ɛ́ Pɔl ɛ nabemaa é mɛlaaba étɛp’en é? Bi naduwa Zɛɛb ɛ́ nɛ din ɛ Pɔl é? 14 Mɛ ɛpeghaapɛɛ Zɛɛb etɛɛ náá, pak’en, ye tok nɛ mot mɛ naduu nyɛ Zɛɛb, yɛ di ààbɛ Kilipus nɛ Ghayus bot ɛ mam naduu ɔ. 15 Tin, mot tok nɛ ghwyil ɛke náá, bi naduwa Zɛɛb ɛ́ nɛ din ɛ lam. 16 Deenek, yɛ ɛ́ tsɛɛtsɛ náá, mɛ naaduu bot ɛ mɛbyel ɛ Stefanas Zɛɛb. Bhii tak, mɛ ààbee náá, mɛ naaduu bɛdhiiti bot Zɛɛb. 17 Etɛɛ náá, Klisto nabɛ ɛ́ ààlwom mɛ náá, mɛ kɛduu bot Zɛɛb. Tin, nyɛ nalwom mɛ ɛ́ náá, mɛ kɛgoola Mbɛɛ Bhaadal. Deenek, sa mɛ ààgoola yɛ nɛ etsoŋ e bot ɛ bɔs, yɛ ɛpedi ɛ́ di deenek ɔɔ, ɛsyee ɛ Klisto kɔ mɛlaaba kadi ɛ́ ààbɛ nɛ mɛbwala.

18 É mis mɛ bot ɛ zewo ze ɔ, ɛlyo bot dum nɛ ɛsyee ɛ Klisto kɔ mɛlaaba ɛ́ dhatyee mɛlyet. Tin, yɛ kabɛ bisɔ bot ɛ di edu ze tsik ɔɔ, bis bee ɛ́ náá, ɛlyo bot dum nɛ ɛsyee ɛ Klisto kɔ mɛlaaba ɛ́ mɛbwala ɛ Zɛɛb. 19 Ekwyala lɛɛ ɛ́ náá:

«Mɛ waapul etsoŋ e bɛtsoŋ ɛ bot,

mɛ waasaab mɛtselal mɛ bot ɛ mɛtselal✝.»

20 É di’enek, tsoŋ mot kadi tin paa? Mot mɛtselal kadi tin paa? Mot di egu ɛlii ɛnyɔɛpe é ɛwala ɛlak kadi tin paa? Bi ààbee tin náá, Zɛɛb naazelyaal náá, etsoŋ e bot ɛ bɔs ɛ́ dhatyee mɛlyet é?

21 Tin, Zɛɛb tɔ etsoŋ bɛ, nyɛ nɛ gu náá, bot ɛ di kɔ bɔs ɔ, tok nɛ ghwyil ɛgu nyɛ nɛ etsoŋ bɔɔ bɛmet. Dum nɛ tɛp tak ɛ, Zɛɛb namyam ɛtsik ɛ bot ɛ di emyaal mɛlyo mɛ ɛsyee ɛ Klisto kɔ mɛlaaba, yii bis di egoola ɛ. Mɛlyo mɛ tak ɛ́ nɛ bɛdhiiti bot ɛ dáa mɛlyet. 22 Deenek, bot ɛ mbyak eYuda saŋ ɛ́ mɛvyɛkɛlɛ. Yɛ kabɛ bot ɛ mbyak eGhɛlɛk ɔɔ, bɔɔ kasaŋ ɛ́ etsoŋ. 23 Yɛ kabɛ bisɔ ɔɔ, bis lyo bot ɛ́ ɛsyee ɛ Klisto kɔ mɛlaaba. Tin, yɛ ɛ́ nɛ bot ɛ mbyak eYuda ɛ mɛlee, ye kadi ɛ́ dáa mɛlyet pɛ daa bot ɛ membyak mɛ sis. 24 Tin, dum nɛ bot ɛ Zɛɛb nazedjóo ɔ, ye nakoozodi bot ɛ mbyak eYuda nɛghu bot ɛ di ààbɛ bot ɛ mbyak eYuda ɔ, Klisto ɛ́ di nɛ mɛbwala nɛ etsoŋ e Zɛɛb. 25 Etɛɛ náá, etɛp e Zɛɛb ee bot di ebee náá yɛ ɛ́ mɛlyet ɛ, yɛ ɛ́ etɛp ee di nɛ etsoŋ dhaa etsoŋ bɔɔ ɛ. Deenek, esa e Zɛɛb ee bɛ di ebee náá, ye tok nɛ ghwyil ɛ, yɛ eedhaa bot ɛ bɔs nɛ ghwyil.

26 Tin, bɔn-nyɛɛg, beeka mbi bot bi di ɛ, biyɔ bot ɛ Zɛɛb nazedjóo ɔ. Dilka mɛnyel men, etɛɛ náá pak’en, ye tok nɛ mbula bot di nɛ etsoŋ, nɛ mɛbwala nɛghu bɛdhil ɛ bot. 27 É di’enek, Zɛɛb kasɛ́ɛ ɛ́ sa di é mis mɛ bot dáa mɛlyet ɛ, étɛp ɛdjɛ sen nɛ bɛtsoŋ ɛ bot. Nyɛ kanɔŋ ɛ́ sa di ààbɛ nɛ ghwyil é mis mɛ bot ɛ bɔs ɛ, étɛp ɛdjɛ sen nɛ bot ɛ di ebee náá, bɛ ɛ́ nɛ ghwyil ɔ. 28 Tin, nyɛ naasɛ́ɛ bot ɛ di ebeeaa é mis toto ɔ, bot ɛ di ebhinaa ɔ, nɛghu bot ɛ di ààval dhiiti sonok é mis mɛ bot ɛ bɔs ɔ, étɛp ɛpul dék esa ee bot ɛ bɔs di ebee náá, yɛ ɛ́ nɛ boo mɛtaŋ ɛ. 29 Deenek, ye tok nɛ dhiiti mot kɔ ɛko ɛ bɔs di nɛ ghwyil ɛghɛɛ nyel é mis ɛ Zɛɛb. 30 Zɛɛb nasa deenek ɛ́, étɛp nyɛ neewa bin tɔ ɛgwakel nɛ Yezu Klisto. Nyɛ naasa náá, Klisto di nɛ nena etsoŋ di edus pɛ daa lɛ ɛ. Kɔ ɛsu ɛ Klisto, Zɛɛb eesa náá, mena dika epiki e bot. Nyɛ sɛ́ɛ mena ɛ, étɛp mena needika bot bɛ, nɛ ɛpɛk mena tɔ mesyem. 31 Ekwyala nabela ɛsuk ɛ́ kɔ mɛkpa mak: «Yɛ bɛ náá, mot ɛpekwyɛl ɛghɛɛ nyel ɔɔ, nyɛ goka ɛ́ nɛ ɛghɛɛ nyel ɛ dum nɛ sa Ghɛŋ di esa ɛ✝.»