14 Nabari kyakyawu ni solota Mirikisi sua pala yi anya guru durinya de e ma sheeda ba nsu worede shina beta Mirikisi ba, tukuna karishe yaa zo.

29 <<Dandani beyi ni Genbeki ni nana ni Nana yaa yi dopuwa, Wonta yaa beyi asikye ba; kemu sua puari butu a bisi, nja guru sori de e ma bisi sua zizika.

30 <<A kwanki ni alama ni Yaa nsebeki yaa butu a bisi, se guru nsu worede su ma durinya sua yi sasa. Sua geni zo ni Yesu butu a siki gidagida a bisi, nja sori nja yowa dereja. 31 Yaa saka meleku yi ni totolo kala ni koho sukwa, nja de sua tala worede e zabi su butu keteri wuru ni karishe bisi te ni durinya.

42 <<Nkaa yomu kuma a kiya kone, sobon ku shina kowoni nana na Obagizi aku yaa zo ba. 43 Nde nsugizi shina ko woni kwanki na ndederi bolowa yaa zo, yaa man shiri yaa bila gizi e yi wokye de bolowa e te yuru a siki e yi ba. 44 Nkaa yomu oku ma se ku zunwa nshiri, sobon Yaa nsebeki yaa zo kwanki de ku shina nkye yaa zo ba.

20 nja de ku kokoyi su de su biya guru doka de ni ba ku. E ni na ma nja ku kowon kwanki, ari karishe durinya.>>

32 Sede nseda shina nana ko woni kwanki na yaa zo ba, ko meleku ni bisi, ko Yaa, sede adaa ndandaa yi kin.

1 Sede Timoti mma so ki shina mbo mu a dishiya ke: Ntani sua Genbeki a kwanki karishe. 2 Ntani sua ma nsu so kiya asu, nsu so gyolo, nsu dege dolo, nsu dege kiya, nsu basi kyakyaka, worede sua zi beta nsu adaasu ba, sua ma ntani de sua gbede worede sua su nto ba, worede su ma so yi mbo kyakyawu ba, 3 Ntani de su ma so yayuwa su ba, nsu keyi yayuwa su a dishiya, nsu pala yaruwa de su bebeta yayuwa ANKI, ntani de su ma ka kiya asu ba, ntani de su ma nsu zapi leyi nja yayuwa su, nsu ki mbode e ma kyakyawu, 4 ntani sua ma nsu butu yayuwa su a beyi, nsu lesa ankeli, nsu dege kiya, nsu so jima kiya su pi de sua jima Mirikisi, 5 su mani alama ni nsubiya Yesu sede a siki dishiya su su ki sori Mirikisi. Kede ki zunwa nja yiri ntani mu.

17 << <Mirikisi nkye, A nana ni karishe,

Na nya guru ntani Aworo na.

Yaya aku menza nja mata sua pala mbode yaa paru a geba,

Yaya sambari aku sua geni mbo boyi,

susupe aku sua yi anansi nyowa.

18 A nana de Na nya Aworo a kiya bunwa na, menza nja mata,

Na nya Aworo na a nana ni,

tuku na sua beyi manki.

19 Na nana mbo mamanki a siki bisi

nja alama a kisi,

Zini nja wuta ni ayanki beki kiri.

20 Nana yaa juyi ma dopuwa

nja wonta yaa ma zanza kankye zini

kapi totolo nana zo ni Obagizi.

21 Nja guru nsude sua sukwa

seni ni Obagizi sua samu sila>.

15 Mua gye ku yiri de beta Obagizi pala nkye, omu de mua man leyi, a kwanki de Obagizi yaa zo, mua rigye worede su muntu dege ba. 16 Mu beigaskye Obagizi nkiya yi e yi yaa sonka dege bisi, nja sukwa nsu sori, nja murinya totolo ni meleku nja wula koho ni Mirikisi, worede su muntu a siki ni Yesu na sua para dege a kumsha. 17 A beyi yomu, omu de mu man leyi de su bila mu sori Mirikisi yaa la mu yere nja su a siki ni gidagida de mu gomu nja Obagizi a bisi. Yomu na mua ma nja Obagizi gbogbo. 18 Nkayomu se ku ba nkiya ku sori guyam nja kelima mu.

6 Sobon yomu, kede mu ma kankye worede su ma nsubiya Yesu ba, de su mayi kwana, sede mu yi zunwa ni kpanku nja ka nkimu. 7 Sobon worede ma yi kwana, su mayi kwana ndederi la, nja worede su ma bugu, su ma bugu ndederi la. 8 Sede tunde mu ma ntani nana na, se mu yi zunwa ni kpanku. Mu sa riga keripi ni beigaskye nja so, nja gongo ni sadishiya ni sila e ma kankye golonka ni tele kiya. 9 Mirikisi zabi mu de mu Genbeki yi ba sede mu samu sila anya Obagizi mu Yesu kiristi.

34 <<Ku zunwa ni shiri, kede kusa dishiya aku a kiya mbosi si nja sha nja damuwa ni durinya su dama dishiya aku, mba yomu ba, nana ni yaa zo de ku shina ba kankye toroko. 35 Yaa zo a kiya guru ntani durinya kankye toroko. 36 Ku sa ndani kone kowon nana nja yi lepa sobon de ku sila dege guru mbode yaa paru, nja de ku sakisi a geba ni yaa nsebeki.>>

8 Yayuwa na de mma so: kede ku mosi mbo ndandaa mu, nana daa anya Obagizi ema kankye shekera dubu daa la, shekera dubu daa ema kankye nana daa la. 9 Obagizi yaa ki seberi ni sika anikowori ba, yiride worosu su ma kone lesa seberi Mirikisi, sede yaa kadishiya pekye ku, sobon yaa bila de kede nseda e bebeta ba, sede yaa so de guru ntani su juyi bila lepi asu.

10 Sede nana ni Obagizi yaa zo kankye bolowa la. De bisi yaa beta ni totolo kuruwa; Guru mbode ma a bisi yaa bebeta ni wuta nja guru mbode ma a siki durinya sua beta.

11 Tunde Mirikisi yaa juru guru mbo woromu yomu, woni yiri ntani na e kamata de ku ma? Se mu yi zunwa seki nja zunwa ali de jima Mirikisi. 12 Yiride mua sa ndani pekye nana zo ni Mirikisi nja de mua yi kokori de mu sa nana mu de e zo seberi, nana de Mirikisi yaa juru bisi ni wuta, nja guru mbode su ma a siki bisi nja kisi sua nyeleka ni dimi wuta. 13 Sede a siki anikowori Mirikisi: mua sa ndani pekye sabuwa bisi nja kisi, gizi anya de ntani gangasi sua zunwa.

51 Ku zi, Na pala gye ku mbode ku shina ba: Guru amu na mua muntu ba, sede Mirikisi yaa shenja mu nkimu guru, 52 a kwanki daa na yaa paru, yaama kankye bita ni ndani, ni zi kala koho ni karishe. Sobon Meleku sua wula koho, nde mu zi wula koho ni guru nsubiya Yesu de su muntu sua dege a kumsha ni nki de yaa rubu ba, omu de mu man leyi Mirikisi yaa shenja nkimu du.

1 Se Ni geni sabuwa bisi nja sabuwa kisi. Sobon bisi ni pari nja kisi ni pari beta ma su, totolo riki ma du beta. 2 Ni geni totolo geri Nsuseki, sabuwa Wurishelima, ma sonka dege bisi anya Mirikisi, Mirikisi shiriya yi kankye okeshe de su yi gyaga kyakyawu ma pekye de e gom nja minji yi. 3 Se Ni zi murinya daa yi beta nsori dege kingbolo solota: nkye, <<Kuzukam anya zunwa Mirikisi ma nja ntani yi! yaa zunwa nja su, sua ma ntani yi. Mirikisi nkiya yi yaama nja su, yaa kwa ma Mirikisi asu, 4 Mirikisi yaa shire su anwe a ndani asu. muntu yaa ma kuma gagaba ko beki siki ko kuka ko Genbeki, sobon wuri mbo rigye bise wo.>>