1 Kwanki ni Yiridu e ma seleki ni Galili, e zi nabari a kiya Yesu. 2 <<E gye nsu keleba manki e yi nkye, <<Yaaya nsu yi tunkwasa, e shiya dege a kumsha,>> mbode saa e man sori de yaa yi ANKI mamanki naka.>>

3 Kuzukam Yiridu e sa su kaa Yaaya nsu yi tunkwasa ta jaru de su kula yi sobon Yirudiya, mata yayiwa e yi Pilibu, 4 Yaaya e ma gye Yiridu nkye: <<E yi kyawu de amere Yirudiya mata yayiwa ke ba.>> 5 Yiridu yaa so de e kisa Yaaya, sede yaa zi womba ntani, sobon su la Yaaya e ma Anebi la.

6 De sua yi buki turunwa nana de su yapu seleki Yiridu, yaa ni Yirudiya yi wasa a geba ntani de sa seleki Yiridu e yi peri siki nyowa 7 E yi anikowori ni melese nkye, guru mbode ki ologba na ba ke. 8 E biya beta ni amaa yi, e pala nkye, <<Dandani kuzukam ba ni kiya Yaaya nsu yi tunkwasa akoriya.>> 9 Seleki da mu, sede sobon melese de e yi a geba guru worede su ma bakwe, E gye su su beyi mbode e minya 10 E sa su butu Yaaya kiya a jaru. 11 Su keyi kiya Yaaya a siki koriya zo nshi munka yaamase ni, abenshi keyi amaa yi. 12 Yayagizi Yaaya su zo la nki e yi te bishina. Su te gye Yesu.

13 De Yesu zi mbode paru nja Yaaya, e dege yuru kwanto ta ayan de nseda ma a siki yi ba. De ntani zi yomu, se konse bila geri e yi biya Yesu su yi tepiya a seni. 14 De Yesu sonka a siki kwanto de e geni yowa ntani, e zi toseyi asu e worikye worede suman lapiya ba.

15 De nyema yi yayagizi yi zo gye e yi nkye, <<Anya mu nseda ma asikye yi ba, gye ntani mu de su te a siki geri de su bila mbosi.>>

16 Yesu keleba, <<E ma dole na de su ta anya daa ba. ku ba su mbo si de su si.>>

17 Su keleba nkye <<Mu mani mbodaa anya mu ba sede buredi biyari nja gunda bi,>>

18 Yesu pala nkye. <<Ku zo nshi anya mu,>> 19 E gye su guru su zunwa a kiya sanwa. E la buredi biyari nja gunda bi e kone bisi, e gbede Mirikisi se e laba buredi. Se e ba yayagizi e yi, yayagizi e yi su ba ntani. 20 Guru ntani su si ari su koshi, yayagizi e yi sukwa yi worede rigye sika obubu gom sha bi. 21 Yowa ntani de su si su ma menza dubu biyari, bon mata nja yaya dende.

22 Dandani Yesu saa yayagizi yi su yuru a kwanto su te a geba e yi a keteri daa, se e gye ntani su kuma ta gizi. 23 De e seleme ntani, e nyunwa bisi dunsi e shi dan daa de yi lepa. De nyema yi, Yesu ma anya ni e shi dan daa, 24 Sede kwanto tuku ma nyisa a siki riki, kwanto yaa zizika sobon akusuka de yaa topula a kiya e yi.

25 kyakya ni pekye keripi wuru ni dederi Yesu ma yi tepiya a kiya riki ma zo ayan yayagizi e yi. 26 De yayagizi yi geni ni ema yi tepiya a kiya riki, su yi womba. Su nkye, <<potoruwa la,>> Se guru asu su yi kuruwa sobon ni womba.

27 Dandani Yesu gye su nkye: <<Ku kadishiya. E ni na. Kede ku zi womba ba.>>

28 Anya ni Biturusu nkye, <<Obagizi, nde e ma e ke la! sa ni de ni yi tepiya a kiya riki zo anya ake.>>

29 Yesu sukwa yi nkye <<Zo,>> .

Se Biturusu butu a siki kwanto yi tepiya a kiya riki de e te anya Yesu. 30 De e zi akusuka man sori, e zi womba anya ni e para takisi riki. <<E yi kuruwa nkye, sila ni Obagizi.>>

31 Dandani Yesu munka nani e yi keyi nkye, <<Mina sa de ki beigaskye piri, de ki shaka a dishiya ake?>>

32 De guru asu su yuru a kwanto akusuka sakisi sip. 33 Se worede ma a siki kwanto su bowuta Yesu. <<Su nkye ni gaskye ki ma Yaa Mirikisi la!>>

34 De su nyenteri riki ta kesa ganesere. 35 De ntani anya ni gane Yesu. Su beyi manki ta guru geri de gyowe su, su keyi worede sua yi suwo zo anya Yesu. 36 Su ologba Yesu de worede su ma yi suwo su kpa keteri riga yi guru, de su samu worikye.