1 Anya ni Aworo Mirikisi la Yesu biya nshi ta siki denka de obiri e gwada yi. 2 De Yesu si mbosi ba e sha ba ari nana aribeni nja ndederi aribeni, e zi nyunwa. 3 Anya ni obiri zo de e gwada yi, <<E gye yi nkye nde ki ma Yaa ni Mirikisi, gye dunsi mu de e ma mbosi.>>

4 Yesu keleba nkye, <<E ma rubutu a siki takada Mirikisi: <Nsebeki yaa man leyi ba sobon mbosi na kede ba, se nsude yeda ni kelima beta Mirikisi.> >>

5 Se obiri la Yesu te nshi a Wurishelima geri nsuseki, E sa yi sakisi a kiya bisi laki Mirikisi, 6 <<e gye yi nkye, nde ki ma Yaa Mirikisi,>> <<Kutiri kiya ke de ki zo a kisi. E ma rubutu a siki takada Mirikisi nkye:

<<<Mirikisi beyi doka ba Meleku sobon ke,

sua zo de su la ke a nani su,

de kede seni ke e titimi a dunsi ba.> >>

7 Yesu keleba yi nkye, <<E ma rubutu a siki takada Mirikisi nkye, <Kede ki gwada Obagizi Mirikisi ke.> >>

8 Obiri kwa la Yesu te a kiya bisi dunsi nsu nyisa e nana yi guru solota a siki durinya ni girima su nja dereja su. 9 <<Obiri gye yi nkye na ba ke,>> mbo de ki geni mu guru, <<nde ka dure de ki bowuta ni.>>

10 Yesu gye yi nkye, <<Dege anya naa, obiri! E ma rubuta a siki takada Mirikisi: <Dure ba Obagizi Mirikisi ake, de ki bowuta e shi dandaa e yi.> >>

11 Anya ni obiri bila e yi ni kwanki piri, Meleku Mirikisi zo anya ni de sua ni nto.

12 De Yesu zi nkye Yaaya e ma jaru, e kuma ta Galili. 13 E bila Nazare e te ma a Kapanawu a keteri riki, a Geri ni Zebulun nja Naptali. 14 De e sika mbo de anebi Ishaya pala.

15 <<Kesa Zebulun nja Kesa Naptali,

Turiki de ta totolo riki, anya ni Yoda,

Galili kesa ni worede su ma Yawudawa ba,

16 Nsu worede su zunwa a siki dopuwa

Su geni totolo asikye;

Worede su zunwa a siki kesa wurinya ni muntu

asikye zo anya su>>.

17 Dege kwanki ni Yesu para beyi manki e yi, <<Nkye ku juyi bila lepi, sobon solota Mirikisi a bisi e yi kusa.>>

18 De Yesu yaa yi tepiya a baki totolo riki ni Galili, e geni yayuwa ntani bi, Saminu de sua sukwa yi nkye Biturusu, nja Anduru, sua kutiri eya a siki riki, su ma nsu ka gunda la. 19 Yesu pala gye su nkye, <<Zo de ku biya ni,>> <<na sa de ku ma nsu ka ntani zo anya naa.>> 20 Dandani su bila eya asu su biya yi.

21 E sigeba ntepiya yi, e geni Yakubu nja dende yi Yaaya de su ma yaya ni Zabedi. Su ma siki kwanto nja Adaa asu Zabedi, sua gyala eya asu, Yesu sukwa su. 22 Dandani su bila kwanto nja Adaa asu su biya Yesu.

23 Yesu te a guru a kesa Galili, e kokoyi su a siki kolonwa, e keyi su manki kyakyawu ni solota bisi, e worikye guru suwo nja shuwuta de ntani man shi. 24 Su keyi beta e yi te anya guru a kesa Suriya, su kwa yi ntani nyowa nsu suwo yiri yiri, worede sua zi zapi suwo, nsu mumungu aworo, okpinkpi, nki sha ruwa, se Yesu worikye su guru. 25 Ntani nyowa butu dege kesa Galili, ni geri gom, Wurishelima, Yawudiya, nja gunduma de su ma keteri riki ni Yoda.