1 Yesu sakye yi su beta ni kokongye nkye: 2 <<Gizi bisi e ma ka nkye seleki de shiriya buki amere ba yaa yi. 3 Seleki saka bunwa e yi nkye e te de e sukwa guru worede e ba su manki de su zo ayan buki, sede su ki de su zo.

4 <<Se e saka worosu su bunwa yi nyowa nkye, <Gye worede ni ba su manki de su zo ni shiriya mbosi ni nana: Ni yanka saa totolo su pendeyi, mbo guru ema shiri. Ku zo anya buki ni amere yaa na.>

5 <<Sede ntani su kula nja su ba kowon nse daa ta bikiya e yi, nse daa ta anya bize e yi. 6 Se woron su kaa bunwa e yi, su dukwa su ari su kisa su. 7 Seleki yi anwashi nyowa. E saka shoja e yi de su kisa nsu worede de su kisa bunwa e yi de su juru su totolo geri asu guru.

8 <<Se nseminji ni gye bunwa e yi, <Ni shiriya Buki amere wo, sede nsu worede ni gesu su deta de sua zo ba. 9 Ku te guru a turiki turiki de ku sukwa guru nsu de ku geni de su zo anya buki amere.> 10 Se bunwa yi butu a woze te a turiki turiki guru ntani de su samu, ni kyakyawu ni mumungu, se kolonwa buki sika nja bakwe.

11 <<Sede de seleki zo a siki de e geni bakwe, e geni nse minzi daa de e sa keyi buki ba. 12 <Oboki,> e minya, <ki yi yaya na ki yuru anya mu de kisa keyi buki ba?> nse minzi ni shina beta de yaa pala ba.

13 <<Se seleki gye nsu bunwa nkye, <Ku domuna yi nani nja seni, de ku kutiri yi ta woze, a siki dopuwa, anya de sua yi kuka nja suku ankuri.>

14 Se Yesu gama nkye, <<Su sukwa ntani nyowa, sede su zabi piri na a siki su.>>

15 Se Parisiyawa te a woze su yi shiri saa toroko de su keyi a kiya beta de yaa pala. 16 Su saka yayagizi su nja woron su ntani ni Yirudiya, Su nkye, <<Male>> Mu shina ki ma nsu pala gaskye la ka kokoyi beta Mirikisi dede ni gaskye. Ka mala nsebeki ba, sobon kaba su ankeli de kishi na ko waa ma osu ba. 17 Gye mu, e man kyawu de mu biya gendu ba Kesa ko yi?

18 Sede Yesu, shina mungu de ma dishiya asu, nkye, <<Oku munabuki, mina sa de kwa sa toroko de e ka ni? 19 Ku nana ni gyolo de kwa yi anpani ni biya gendu.>> Se Su keyi gyolo dinari daa, 20 se e minya su nkye, <<Woto ni waa ko pisika waa ma damu?>>

21 <<Su keleba nkye,>> Ni Kesa.

Se Yesu gye su nkye, <<Ku ba Keisa mbode mani Keisa, nja mbode mani Mirikisi ku ba Mirikisi.>>

22 De Parisiyawa su zi yomu, su yi mamanki. Se su bila yi te ma yi.

23 Nana ni ntani sadokiyawa, de su yeda ni dege a kumsha ba, su zo anya Yesu su minya yi. 24 Su nkye, <<Male,>> <<Musa gye mu nkye nde nseminji muntu de e man yaya ba, dole yayiwa e yi e bila mata e yi de e yapu yaya beyi. 25 Kuzukam su yi yayuwa bokwe a siki amu. Ni pari e yi amere e la muntu, e man yaya ba, e bila mata yi ba yayiwa e yi. 26 Yomuna mbode e sa yayiwa yi ni bi nja yayiwa yi ni wuku, e kwa paru ni guru yayuwa yi bokwe su la muntu. 27 Karishe, mase ni muntu. 28 Kuzukam, kwanki de worede muntu sua dege, sede mata waa a siki asu bokwe mu, sobon guru asu su yi amere nja shi?>>

29 Yesu keleba nkye, <<Ku yi tunani dede ba sobon de ku shina takada ko sori beta mirikisi ba. 30 Kwanki de nsu muntu sua dege ntani sua yi amere ko su beyi mase ni amere ba; sede ntani sua ma kankye meleku Mirikisi. 31 Sede a kiya dege ni nsu muntu ku karanta mbode Mirikisi pala gye ku ba, 32 <Eni ma Mirikisi ni Abireyi, Mirikisi Ishaku, nja Mirikisi ni Yakubu>? E ma Mirikisi ni muntu kede aba sede Mirikisi ni worede su ma leyi du.>>

33 De ntani nyowa zi mbode Yesu pala mu, su yi mamanki ni mbode E kokoyi su.

34 De Parisiyawa zi mbo de Yesu gye Sadokiyawa, se su yi beta gagaba. 35 Se daa a siki male doka ni Musa, gwada yi nja beta:

36 <<Male, doka waa na pi girima a siki doka de ki beyi?>> 37 Yesu gye su nkye: <<<So Obagizi Mirikisi nja guru dishiya ake nja guru leyi ake nja guru ankeli ake.> 38 Da mu e shiya ma pari nja totolo a siki doka. 39 Se ni bi e ma yomu: <Ki so degeri ake ka nkye kiya ake.> 40 Guru doka ni Musa nja ni nsu anebi e ma a kiya doka bi la.>>

41 To de Parisiyawa su tala anya daa, Yesu minya su, 42 <<Mina ma tunani aku a kiya Kiristi? E ma Yaa ni waa?>>

Su pala nkye, <<Yaa ni Dowuda.>>

43 Yesu gye su nkye, <<Mina sa de Dowuda, yaa yi beta sobon ni sori Aworo Mirikisi, yaa sukwa yi nkye, <Obagizi>?

44 <<<Obagizi pala gye Obagizi na:

<<Zunwa a nani dama na

Se ni sa obokigeba ake

A kisi seni ake.>>>

45 Nde Dowuda sukwa Yesu <Obagizi,> yaya na yaa ma yaa yi?>> 46 Nse daa pala kelima gye yi gagaba, dege a nana ni tageba nse daa sakye minya yi beta jaja gaba.