1 Kwanki de su yapu Yesu a kesa batalami ni Yawudiya, de Yiridu, e ma Seleki, nsu worede shina kemu butu ni anse su zo a Wurishelima su nkye 2 <<Seleki Yawudawa de su yapu managa? Mu geni kemu butu ni anse, mu zo de mu bowuta yi.>>

3 De Seleki Yiridu zi yomu se dishiya yi dege, yomuna guru worede su ma Wurishelima dishiya su dege. 4 Yiridu sukwa guru toree ni pirisi nja male ni doka Musa, e minya su nkye angana su yapu kiristi.

5 Su keleba nkye, <<A kesa batalami ni Yawudiya.>> Yiride Anebi rubuta nkye:

6 << <E ke batalami ni kesa Yawudiya,

e ke ki ma dende naba a siki gunduma ni Yawuda;

Dege a siki ke sua yapu Seleki de yaa yi solota kesa mu,

nsu kpanku ntani na Izireyila>>>.

7 Se Yiridu sukwa nsu worede shina kemu a boyi de e zi anya su dede kwanki de kemu butu. 8 E saka su a batalami, nkye, <<Ku te de ku minya nkyawu a kiya ni yaa de su yapu, ku kuma de ku ka yi ni manki, de eni ma nte de ni bowuta yi.>>

9 De su zi beta Seleki, su sigeba ntepiya asu, kemu de su geni anse, e ta geba asu e zo sakisi anya de su yapu Yesu. 10 De su geni kemu sakisi anya ni, su yi perisiki nyowa. 11 De su yuru a gizi ni, su geni Yaa ni nja Amaa e yi Meremu, se su dure a geba e yi su bowuta yi. Su bure Angala, su ba yi kyawuta ni zinari, tularee myrrh. 12 De kwanki yi ni kuma ta geri asu, Su kuman beyi biya turiki ni gagaba, sobon Mirikisi gye su anansi nkye, kede su kuma ta ayan Yiridu gagaba.

13 De nsu shina kemu kuma mbeyi, meleku Obagizi zo ayan Yusupu anansi e gye yi nkye, <<Dege a bisi! De ki la Yaa dende nja Amaa yi, de ku ta kesa Masa. Seni gye ku tuku de ku kuma mbeyi, sobon Yiridu yabila de e kisa Yaa de su yapu mu.>> 14 Yusupu dege a bisi, e la Yaa nja Amaa yi, ndederi su ta kesa Masa. 15 Ema anya ni ari Yiridu muntu. Da mu e sika mbo de Anebi pala butu ayan Obagizi: <<Ni sukwa Yaa na butu a kesa Masa.>>

16 De Yiridu geni nsu worede shina kemu su kuma zo ba, su leyi e ma kankye e shina mbode yaa yi ba anya ni dishiya yi dege. E saka manki nkye su kisa yaya dende de su yapu ashekera bi ko daa de e kasa shekera bi, a kesa batalami nja geri de mala nsu, sobon nsu shina kemu pala nkye su geni kemu shekera bi de bise a beyi. 17 Mbo de Yiridu yi e sika beta de Anebi Yirimiya pala.

18 <<Su zi murinya a Rama

Murinya kuka ni beki siki ni zapi,

Rayila yaa yi kuka sobon yaya yi,

e ki de e kadishiya,

sobon yaya yi de su muntu.>>

19 Kwanki de Yiridu muntu, Meleku Obagizi zo ayan Yusupu anansi a kesa Masa e gye nkye 20 nkye, <<Dege a bisi, de ki la yaa nja Amaa e yi de ki ta kesa Izireyila, nsu worede sua bila de su kisa su muntu.>>

21 Anya ni Yusupu dege a bisi, e la yaa nja Amaa e yi kuma ta kesa ni Izireyila. 22 De Yusupu zi nkye seleki ma yaa ni Yiridu ni kesa Yawudiya, de seni yi ema Arikilayus yi womba ni te anya ni, dun su gila yi anansi, se kuma ta gunduma ni Galili, 23 anya ni Yusupu te zunwa a geri de sua sukwa yi Nazare. Dun e sika beta de Anebi su pala nkye: <<Sua sukwa yi Yesu ni Nazare.>>